Hẹn Lizọnyizọn Towe Pọnte Dogọ—Owe Biblu Plọn Mí Yiyizan Nado Do Lehe Mí Nọ Plọn Biblu hẹ Gbẹtọ lẹ do Hia

Nuhewutu E Do Yin Nujọnu: Mẹsusu sọgan nọma mọnukunnujẹ nuhe dọ mí te mẹ eyin mí dọ dọ mí sọgan wá plọn Biblu hẹ yé vọnu to owhé yetọn gbè. Yé sọgan lẹndọ yé dona kọnawudopọ hẹ ogbẹ́ nupinplọn tọn de kavi dọ nupinplọn lọ na yin bibasi gbọn wekanhlanmẹ dali. Kakati nado nọ dọna gbẹtọ lẹ dọ mí sọgan wá plọn Biblu hẹ yé eyin yé jlo, be e ma na yọ́n hugan nado nọ basi dohia lehe oplọn lọ nọ yì do tọn na yé ya? To nukunwhiwhe kleun delẹ gblamẹ, etlẹ yin to họntonu, a sọgan basi dohia lehe Biblu pinplọn bọawu bo nọ gọalọnamẹ nado mọnukunnujẹnumẹ do tọn.

Lehe Mí Sọgan Wàmọ Do:

• To whenue a ko dọ yinkọ towe po nuhewutu a wá whétọ lọ dè po godo, kanse e eyin sọgodo nọ duahunmẹna ẹn.

• Dohia ẹ dọ mẹsusu wẹ whẹho mọnkọtọn lẹ nọ duahunmẹna podọ do todowhinnu hosọ lẹ tọn hia ẹ to owe Biblu Plọn Mí mẹ. Basi zẹẹmẹ na ẹn dọ weta he to owe ehe mẹ lẹ ma vẹawu podọ yé do nuhe Biblu plọnmẹ gando sọgodo po whẹho devo lẹ po go hia. Enẹgodo, biọ to e si nado dọ weta he dọ̀n ẹn lọ.

• Yí vọkan owe lọ tọn dopo na ẹn bo do weta he e de lọ hia ẹ. Basi zẹẹmẹ na ẹn dọ kanbiọ he tin to bẹjẹeji weta lọ tọn lẹ sin gblọndo tin to hukan he bọdego lẹ mẹ.

• Biọ to e si nado hia hukan tintan eyin e ma na dotukla ẹ nado wàmọ. Enẹgodo, hia kanbiọ hukan lọ tọn bo gbadopọnna gblọndo lọ hẹ ẹ. Mì hia wefọ he nọgodona gblọndo lọ lẹ bosọ dọhodo yé ji. Do lehe a zẹhudo glọ na gblọndo lọ lẹ to owe towe mẹ do hia ẹ.

• Gbadopọnna hukan he bọdego, ṣigba todin dọna whétọ lọ dọ ni tẹnpọn bo na gblọndo kanbiọ lọ tọn to hogbe etọn titi lẹ mẹ.

• Pà ẹ, podọ basi tito nado lẹkọwa nado fó weta lọ.

• Do video lọ Nawẹ Mí Nọ Plọn Biblu hẹ Mẹ Gbọn? he to jw.org ji hia ẹ eyin e biọ domọ.

Tẹ́n Ehe Pọ́n to Osun lọ Mẹ:

• Hodẹ̀ hlan Jehovah nado dona vivẹnudido towe lẹ nado bẹ plọnmẹ Biblu yọyọ de jẹeji.—Flp. 2:13.

• Tẹnpọn nado yí owe Biblu Plọn Mí zan nado do lehe mí nọ plọn Biblu hẹ gbẹtọ lẹ do hia. Kavi e whè gbau whla dopo to lizọnyizọn lọ mẹ, do video lọ Nawẹ Mí Nọ Plọn Biblu hẹ Mẹ Gbọn? hia.