Hodo Apajlẹ Yise Yetọn Tọn
1. Owe tẹwẹ mí na jẹ pinplọn ji to Biblu Pinplọn Agun tọn whenu bẹsọn osẹ 19 octobre tọn mẹ?
1 To osẹ 19 octobre 2015 tọn mẹ, mí na jẹ owe Hodo Apajlẹ Yise Yetọn Tọn plọn ji to Biblu Pinplọn Agun tọn whenu. Owe ehe dọhodo kandai Biblu tọn he gando sunnu po yọnnu po 14 he do yise hia delẹ go ji. Owe lọ yin kinkan to aliho de mẹ he na gọalọna mí nado nọ yí nukun homẹ tọn do pọ́n omẹ ehelẹ, podọ nado nọ pọ́n yé di omẹ nujọnu tọn lẹ he pehẹ avùnnukundiọsọmẹnu lẹ dile yé to Jehovah sẹ̀n. Owe lọ sọ bẹ nuhe mí sọgan plọn sọn kandai enẹlẹ mẹ hẹn, ehe dopodopo mítọn sọgan yizan to egbehe.—Heb. 6:12.
2. Basi zẹẹmẹ adà he owe Hodo Apajlẹ Yise Yetọn Tọn bẹhẹn delẹ tọn.
2 Adà Owe lọ Tọn Lẹ: Owe lọ bẹ ojlẹ he mẹ nujijọ lọ lẹ wá aimẹ te po yẹdide otò tọn lẹ po hẹn nado gọalọna mí nado yọ́n whenue podọ fie mẹhe yin nùdego lẹ nọgbẹ̀ te. Humọ, weta dopodopo nọ bẹ adà de hẹn he hosọ etọn yin “Kanbiọ Dogbapọn Tọn lẹ,” ehe na gọalọna mí nado lẹnayihamẹpọn do kandai lọ lẹ ji bo basi yọ́n-na-yizan nuhe mí plọn lẹ tọn. Owe lọ sọ bẹ yẹdide whanpẹnọ he yè yí sọwhiwhe do wleawuna lẹ hẹn, ehe na gọalọna mí nado yí nukun homẹ tọn do pọ́n kandai lọ lẹ.
3. Etẹwẹ mí sọgan wà nado mọaleyi sọn owe ehe pinplọn mẹ?
3 Lehe Hiẹ Sọgan Mọaleyi sọn E mẹ Do: Wekanhlanmẹ bẹjẹeji tọn Hagbẹ Anademẹtọ lọ tọn na tuli mí dọmọ: “Yí nukun homẹ tọn do pọ́n nujijọ lọ lẹ bo mọ dewe taidi mẹhe to mahẹ tindo to yé mẹ. Tẹnpọn nado tindo numọtolanmẹ dopolọ hẹ mẹhe yin nùdego to Biblu mẹ lọ lẹ, nado sọgan yí nukun homẹ tọn do mọ nuhe yé mọ lẹ. Yí aliho he mẹ yé yinuwa te to ninọmẹ lọ mẹ jlẹdo lehe hiẹ na ko yinuwa do go.” Ṣigba, nado yí nukun homẹ tọn do pọ́n nujijọ lọ lẹ ma zẹẹmẹdo nado mọ nulẹ hlan to aliho he zẹ̀pá mẹ gba, kakatimọ nado lẹnnupọndo nuhe kandai gbọdo lọ to didọ ji bo ze dewe do ninọmẹ mẹlọ lẹ tọn mẹ. Mọwiwà nọ biọ whenu po ayihamẹlinlẹnpọn po. (Nẹh. 8:8) Eyin nupinplọn lọ bẹsọn ṣẹnṣẹn weta de tọn, anademẹtọ lọ na bẹjẹeji po dogbapọn nukunwhiwhe daa jẹ dopo nupinplọn he jẹnukọn lọ tọn po. Eyin nupinplọn lọ ma bẹ adà lọ “Kanbiọ Dogbapọn Tọn lẹ” hẹn, kanbiọ dopo kavi awe sọgan yin kinkanse taidi kanbiọ dogbapọn tọn nado dotana nupinplọn gbenẹgbe tọn.
4. Naegbọn mí tindo nuhudo nado plọn owe Hodo Apajlẹ Yise Yetọn Tọn?
4 Mí to gbẹnọ to aihọn de mẹ he to dindin egbesọegbesọ nado dekanpona yise mítọn to aliho de kavi devo mẹ. Owe ehe—gọna hosọ debọdo-dego Hodo Apajlẹ Yise Yetọn Tọn he nọ tọ́n to Atọ̀họ̀-Nuhihọ́ lọ Tọn mẹ lẹ, ehe ji owe lọ sinai do—yin nunina de sọn Jehovah dè nado gọalọna mí nado hẹn yise mítọn lodo. (Jak. 1:17) Mì gbọ mí ni mọ ale gigọ́ yí sọn owe ehe mẹ gbọn Biblu Pinplọn Agun tọn yìyì to gbesisọ mẹ dali, gọna mahẹ gigọ́ tintindo to gblọndo nina mẹ dile mí na to owe ehe plọn to pọmẹ!