Alọdlẹndonu Nuplọnwe Opli Gbẹzan po Lizọnyizọn po Tọn

2-8 OCTOBRE

NUHỌAKUẸ LẸ SỌN OHÓ JIWHEYẸWHE TỌN MẸ | DANIẸLI 7-9

“Daniẹli Dọ Dọdai Gando Wiwá Mẹsia Tọn Go”

it-2-F 998 huk. 1

Osẹ 70

Sẹ́nhẹngba po ylando po yin tadona. Jesu yin sinsánsẹ to okú mẹ, yin finfọnsọnku bo sọawuhia to olọn mẹ bọ kọdetọn enẹ tọn wẹ yindọ, ‘sẹ́nhẹngba yin tadona, bọ ylando yin alọdotena podọ ovẹsè yin bibasi na nuṣiwa.’ (Da 9:24) Alẹnu Osẹ́n tọn lọ nọ do Ju lẹ hia di ylandonọ, nọ gblewhẹdo yé, bo nọ hẹn yé wá whẹgbledomẹ glọ, na yé ma yin nugbonọ na alẹnu lọ wutu. Amọ́, fie ylando “ko jideji” kavi yin hinhẹn họnwun gbọn Osẹ́n Mose tọn dali te, lẹblanu po nukundagbe Jiwheyẹwhe tọn po ko sudeji dogọ ga gbọn Mẹsia etọn gblamẹ. (Lo 5:20) Gbọn avọ́sinsan Mẹsia tọn gblamẹ, sẹ́nhẹngba po ylando mẹhe lẹnvọjọ lẹ tọn po nọ yin hùzẹdeji bọ yé masọ nọ yin whẹgbledo ba.

it-2-F 996 huk. 6

Osẹ 70

Mẹsia Wá to “Osẹ 69” Godo. Na “osẹ 62” (Da 9:25), he bọdego lọ lẹ yin apadewhe osẹ 70 lọ lẹ tọn bo yin sọha awetọ he yin sislẹ wutu, yé na bẹsọn vivọnu “osẹ 7” lọ lẹ tọn. Enẹwutu, ojlẹ he bẹ “sọn whenue yè ko degbe” nado vọ́ Jelusalẹm gbá kakajẹ wiwá “Mẹsia Nukọntọ lọ” tọn na yin “osẹ” 7 po 62 po kavi “osẹ” 69—yèdọ owhe 483—enẹ wẹ sọn owhe 455 J.W.M. jẹ 29 W.M. Dile e ko yin nùdego do to aga, to afò-whenu owhe enẹ tọn, enẹ wẹ 29 W.M., Jesu yin bibaptizi to osin mẹ, yin amisisayidode gbọn gbigbọ wiwe dali, bo bẹ lizọnyizọn etọn jẹeji taidi “Mẹsia Nukọntọ lọ.”—Luk 3:1, 2, 21, 22.

it-2-F 997 huk.1

Osẹ 70

“Yin sinsánsẹ” to odaa osẹ lọ tọn. Gabliẹli sọ dọna Daniẹli dọmọ: “To osẹ 62 lọ lẹ godo, Mẹsia na yin sinsánsẹ, bọ nudepope ma na pò na ẹn.” (Da 9:26) Ojlẹ vude to vivọnu ‘osẹ 7 po 62 lọ lẹ po’ tọn godo, yèdọ nudi owhe atọ̀n daa godo wẹ Klisti yin sinsánsẹ to okú mẹ to yatin ji taidi ofligọ de na gbẹtọvi lẹ, gbọn nulẹpo jijodo dali. (Isa 53:8) Kunnudenu dohia dọ Jesu yí odaa tintan “osẹ” lọ tọn zan to lizọnyizọn lọ mẹ. To nujijọ de whenu, vlavo to vivọnu owhe 32 W.M., e na apajlẹ de he mẹ e yí akọta Ju lẹ tọn jlẹdo ovòtin de go te (yijlẹdo Mt 17:15-20; 21:18, 19, 43 go) he ma de sinsẹ́n depope tọ́n na “owhe atọ̀n.” Vẹngle-zọ́nwatọ lọ dọna klunọ vẹngle lọ tọn dọmọ: “Klunọ, jo e do na owhe dopo dogọ, kaka yẹn nado kùndò lẹdo e bo bẹ ogbó do e mẹ. Eyin e de sinsẹ́n tọ́n to sọgodo, be e yọ́n; ṣigba eyin e ma yinmọ, hiẹ ni bo sán ẹn liai.” (Luk 13:6-9) Tofi, e na ko to alọdlẹndo ojlẹ he e yí do wà lizọnyizọn do akọta tasinyẹntọ ehe tamẹ, yèdọ lizọnyizọn he e ko wà na nudi owhe atọ̀n, ehe na zindonukọn biọ owhe ẹnẹtọ mẹ.

it-2-F 997 huk.4

Osẹ 70

“Odaa osẹ lọ tọn” na yin ṣẹnṣẹn owhe 7 tọn, kavi owhe atọ̀n daa “osẹ” owhe tọn enẹ godo. To whenuena e yindọ “osẹ” 70tọ lọ bẹjẹeji jei vivọnu owhe 29 W.M. tọn, to whenue Jesu yí baptẹm bo yin amisisayidode taidi Mẹsia, odaa osẹ enẹ tọn (owhe atọ̀n daa) na zindonukọn kakajẹ amakikọ-whenu owhe 33 W.M. tọn, kavi Juwayi (Nisan 14tọ) owhe enẹ tọn mẹ. E taidi dọ 1^er avril 33 W.M. wẹ azán enẹ jẹ do, sọgbe hẹ sunzanhiawe Grégorien tọn. (Pọ́n REPAS DU SEIGNEUR [Le moment de son institution]) (TENU-NÚDÙDÙ OKLUNỌ TỌN [Whenue E Yin Didoai]). Apọsteli Paulu dọna mí dọ Jesu ‘wá nado wà ojlo Jiwheyẹwhe tọn,’ enẹ wẹ nado ‘hẹn nuhe yin tintan lọ [avọ́sinsan po avọ́nunina he sọgbe hẹ Osẹ́n lẹ po] zun ovọ́ bo do nuhe yin awetọ lọ ai.’ E wà ehe gbọn agbasa etọn yíyí do sanvọ́ dali.—Heb 10:1-10.

16-22 OCTOBRE

g05-F 8/9 12 huk. 2

Whenue Kọndopọ Na Tin Lẹdo Aihọn Pé

Na nugbo tọn, nudida he to aigba ji lẹ na duvivi kọndopọ wunmẹ devo tọn, na Jiwheyẹwhe na plọn mẹjidugando nugbonọ etọn lẹ lehe yé na nọ penukundo aigba he yin owhé yetọn go do. To linlẹn de mẹ, e na tlẹ “basi alẹnu de” hẹ gbekanlin nuwledutọ lẹpo bo na hẹn yé nado tin to jijọho mẹ hẹ gbẹtọvi lẹ.—Hosea 2:18; Jenẹsisi 1:26-28; Isaia 11:6-8.

23-29 OCTOBRE

jd-F 87 huk. 11

Nọ Sẹ̀n Jehovah Sọgbe hẹ Nujinọtedo Yiaga Etọn Lẹ

¹¹ Hosea 14:9 sọ dọhodo ale dagbe he gbẹzan he sọgbe zinzan nọ hẹnwa lẹ ji. Gbẹninọ sọgbe hẹ nujinọtedo Jiwheyẹwhe tọn lẹ nọ hẹn ale po dona lẹ po wá. Na ewọ yin Mẹdatọ mítọn wutu, e yọ́n mí ganji. Nuhe na wà dagbe na mí lẹ wẹ e nọ donukun sọn mí si. Nado basi dohia haṣinṣan he to míwlẹ po Jiwheyẹwhe po ṣẹnṣẹn tọn, mí ni yí apajlẹ mọto de po mẹhe basi i po tọn. Mẹhe basi mọto lọ yọ́n lehe e yin awuwlena bo yin tito do. E yọnẹn dọ yè dona nọ diọ amì na mọto lọ whẹwhẹ. Etẹwẹ na jọ eyin a dovọ́na nujinọtedo enẹ, vlavo po linlẹn lọ po dọ mọto lọ to azọ́nwa ganji? E ma na dẹn bọ mọto lọ na gble bo na gbẹ́ azọ́n. Nudopolọ wẹ gando gbẹtọvi lẹ go ga. Mẹdatọ mítọn ko na mí gbedide lẹ. Eyin mí nọ yìn yé, mì na mọaleyi. (Isaia 48:17, 18) Enẹ yinyọnẹn yin whẹwhinwhẹ́n devo he wutu mí nọ nọgbẹ̀ sọgbe hẹ nujinọtedo etọn lẹ bo nọ yìn gbedide etọn lẹ.—Salmu lẹ 112:1.

30 OCTOBRE–5 NOVEMBRE

jd-F weda 167 huk. 4

“Mì Lá Ehe to Akọta lẹ Ṣẹnṣẹn”

⁴ Lẹnnupọndo whẹho lọ ji to aliho devo mẹ. Jehovah Jiwheyẹwhe dọna yẹwhegán Joẹli dọ ojlẹ de na wá bọ to linlẹn de mẹ, gbẹtọ wunmẹ lẹpo na dọ dọdai. E dọmọ: “Enẹgodo, yẹn na kọ̀n gbigbọ ṣie do agbasalan wunmẹ lẹpo ji, bọ visunnu mìtọn lẹ po viyọnnu mìtọn lẹ po na nọ dọ dọdai, sunnu mẹho mìtọn lẹ na nọ kudlọ lẹ, bọ jọja sunnu mìtọn lẹ na nọ mọ numimọ lẹ.” (Joẹli 2:28-32) To azán Pẹntikọsti 33 W.M., apọsteli Pita dohia dọ wefọ ehe wẹ mọ hẹndi to whenue gbigbọ wiwe yin kinkọnjẹgbonu do mẹhe pli to abò aga tọn de mẹ to Jelusalẹm lẹ ji, bọ yé jẹ “nujiawu Jiwheyẹwhe tọn lẹ” lá ji. (Owalọ lẹ 1:12-14; 2:1-4, 11, 14-21) Todin, lẹnnupọndo ojlẹ mítọn ji. Dọdai Joẹli tọn ko to hẹndi ayidego tọn mọ sọn bẹjẹeji owhe kanweko 20tọ tọn. Klistiani yiamisisadode lẹ—sunnu po yọnnu po, mẹho po jọja po—jẹ “dọdai” dọ ji, enẹ wẹ yindọ yé jẹ “nujiawu Jiwheyẹwhe tọn lẹ” lá ji, ehe bẹ wẹndagbe Ahọluduta he ko yin didoai to olọn mẹ todin lọ tọn hẹn.