Alọdlẹndonu Nuplọnwe Opli Gbẹzan po Lizọnyizọn po Tọn
6-12 NOVEMBRE
NUHỌAKUẸ LẸ SỌN OHÓ JIWHEYẸWHE TỌN MẸ | AMỌSI 1-9
“Mì Dín Jehovah bo Gbọṣi Ogbẹ̀”
jd-F 90-91 huk. 16-17
Nọ Sẹ̀n Jehovah Sọgbe hẹ Nujinọtedo Yiaga Etọn Lẹ
16 Sunnu tintan lọ, Adam basi nudide nulú tọn to whenue e de nado hodo nujinọtedo dagbe po oylan po tọn he ma sọgbe. Be míwlẹ na yí nuyọnẹn do basi nudide lẹ ya? Amọsi dotuhomẹna mí nado nọ yí nukun nujọnu tọn do pọ́n whẹho ehe, to whenue e dọmọ: “Mì gbẹwanna nuhe ylan, bo yiwanna nuhe yin dagbe.” (Amọsi 5:15) William Rainey Harper, yèdọ mẹhe nọ plọnmẹ ogbè dowhenu tọn lẹ to wehọmẹ alavọ tọn Chicago tọn dọ gando wefọ ehe go dọmọ: “Nujinọtedo dagbe po oylan po tọn he go [Amọsi] donù sọgbe pẹpẹ hẹ ojlo Yahweh [Jehovah] tọn.” Onú titengbe de wẹ enẹ yin bọ mí dona plọn sọn yẹwhegán 12 lẹ dè. Be mí nọ hodo nujinọtedo dagbe po oylan po tọn Jehovah tọn lẹ sọn ojlo mẹ wá ya? Nujinọtedo yiaga enẹlẹ yin didehia mí to Biblu mẹ bo yin zẹẹmẹ-basina gbọn Klistiani numimọnọ he whèwhín lẹ dali, mẹhe pipli yetọn yin “afanumẹ nugbonọ podọ nuyọnẹntọ lọ.”—Matiu 24:45-47.
17 Wangbigbẹna nuhe ylan nọ gọalọna mí nado nọla na nuhe nọ hẹn homẹgble Jiwheyẹwhe lẹ. Di apajlẹ, mẹde sọgan doayi owù he yẹdide fẹnnuwiwa tọn pinpọn to Intẹnẹt ji bẹhẹn go bo de nado dapana ẹn. Ṣigba, na nuhe dù ‘gbẹtọ he e yin to homẹ,’ etẹwẹ nọ yin numọtolanmẹ etọn gando nọtẹn Intẹnẹt tọn he nọ do yẹdide fẹnnuwiwa tọn hia lẹ go? (Efesunu lẹ 3:16) Ayinamẹ Biblu tọn he tin to Amọsi 5:15 mẹ yíyí-do-yizan mẹ na hẹn ẹn bọawuna ẹn nado gbẹwanna nuhe ylan. Gbọnmọ dali, e sọgan duto avùn gbigbọmẹ tọn etọn ji.
13-19 NOVEMBRE
Onú Sisosiso Gbigbọmẹ Tọn Lẹ
jd-F 112 huk. 4-5
Nọ Yinuwa hẹ Mẹdevo lẹ Dile Jiwheyẹwhe Jlo Do
4 Mí sọgan plọn nude sọn whẹgbledomẹ Jiwheyẹwhe tọn sọta Edomi mẹ, yèdọ aigba de he sẹpọ Islaeli: “Hiẹ ma dona jẹaglin to azán he gbè nugbajẹmẹji wá nọvisunnu towe ji, hiẹ ma dona jaya to azán he gbè dindọn wá omẹ Juda tọn lẹ ji.” (Obadia 12) Tilenu lẹ sọgan ko yin “nọvisunnu” na whẹho ajọwiwa tọn lẹ wutu, amọ́ “nọvisunnu” jọnun Islaeli tọn wẹ Edominu lẹ yin, na kúnkan Esau tọn wẹ yé, yèdọ mẹhe yin ahoho na Jakọbu. Jehovah lọsu tlẹ ylọ Edominu lẹ dọ “nọvisunnu” Islaeli tọn lẹ. (Deutelonomi 2:1-4) Enẹwutu, wangbẹna sinsinyẹn wẹ Edominu lẹ dohia to whenue yé jẹaglin gando nugbajẹmẹji he Babilọninu lẹ hẹnwa Ju lẹ ji go.—Ezekiẹli 25:12-14.
5 E họnwun dọ aliho he mẹ Edominu lẹ yinuwa hẹ nọvisunnu yetọn Ju lẹ te ma hẹn homẹhun Jiwheyẹwhe. Ṣigba, mí sọgan kanse dọ, ‘Nawẹ Jiwheyẹwhe sọgan dindona aliho he mẹ n’nọ yinuwa hẹ mẹmẹsunnu ṣie lẹ te gbọn?’ Nuhe go e nọ doayi dopo wẹ lehe mí nọ yinuwa hẹ mẹmẹsunnu de do to whenue nulẹ ma to yìyì ganji to ṣẹnṣẹn mítọn. Di apajlẹ, mí ni dọ dọ Klistiani de ṣinuwa do we kavi dọ nuhahun de to ewọ po hẹnnumẹ towe de po ṣẹnṣẹn. Eyin a tindo “whẹwhinwhẹ́n nado wọ́,” be a na hẹnmẹdohomẹ, bo ma na johodo kavi ma na tẹnpọn nado didẹ whẹho lọ wẹ ya? (Kolosinu lẹ 3:13; Jọṣua 22:9-30; Matiu 5:23, 24) Mọwiwà sọgan bẹpla aliho he mẹ a nọ yinuwa hẹ mẹmẹsunnu lọ te; a sọgan dekanpona nuyiwa towe hẹ ẹ, dapana gbẹdido hẹ ẹ kavi jẹ ohó agọ̀ dọ gandego ji. Yinukọn dogọ, mí ni dọ dọ mẹmẹsunnu lọ wá ṣinuwa, vlavo bo tlẹ wá do nuhudo ayinamẹ kavi mẹplọnlọ mẹho agun tọn lẹ tọn. (Galatianu lẹ 6:1) Be a na do gbigbọ Edominu lẹ tọn nkọ hia bo na jẹaglin do nuhahun mẹmẹsunnu towe tọn ji wẹ ya? Nawẹ Jiwheyẹwhe na ko jlo dọ a ni yinuwa gbọn?
20-26 NOVEMBRE
NUHỌAKUẸ LẸ SỌN OHÓ JIWHEYẸWHE TỌN MẸ | MIKA 1-7
“Etẹwẹ Jehovah Biọ sọn Mí Si?”
w12-F 1/11 22 huk. 4-7
“Etẹwẹ Jehovah to Bibiọ sọn Asi We?”
“Nọ yí whẹdida dodo zan.” Sọgbe hẹ alọdlẹndonu de, hogbe Heblugbe tọn he yin lilẹdo “whẹdida dodo” nọ bẹ “haṣinṣan dagbe he sọgbe tintindo hẹ mẹdevo lẹ” hẹn. Jiwheyẹwhe biọ to mí si nado nọ yinuwa hẹ mẹdevo lẹ to aliho dagbe mẹ gbọn nujinọtedo etọn lẹ hihodo dali. Nado yí whẹdida dodo zan nọ biọ dọ mí ni yin mẹnukuntamahopọntọ, bo nọ wà nuhe sọgbe, bosọ nọ yin nugbonọ to nuyiwa mítọn hẹ mẹdevo lẹ mẹ. (Levitiku 19:15; Isaia 1:17; Heblu lẹ 13:18) Eyin mí nọ yí whẹdida dodo zan to nuyiwa mítọn hẹ mẹdevo lẹ mẹ, yé sọgan yin whinwhàn nado wà nudopolọ na mílọsu.—Matiu 7:12.
“Nado yiwanna nugbodidọ (homẹdagbe).” Jiwheyẹwhe ma biọ dọ mí ni do homẹdagbe hia poun gba, ṣigba dọ mí ni yiwanna ẹn. Hogbe Heblugbe tọn lọ (cheʹsedh) he yin lilẹdo “homẹdagbe” sọgan sọ yin lilẹdo “dagbewanyi” kavi “owanyi nugbo.” Weyọnẹntọ Biblu tọn de dọmọ: “Depope to jẹhẹnu ehelẹ mẹ, enẹ wẹ owanyi, lẹblanu, po homẹdagbe po ma ko pé nado basi zẹẹmẹ [cheʹsedh] tọn; atọ̀n lọ lẹpo wẹ e bẹhẹn dopọ.” Eyin mí yiwanna homẹdagbe, mí nọ do e hia sọn ojlo mẹ wá; homẹ nọ hùn mí nado gọalọna mẹhe to nuhudo mẹ lẹ. Taidi kọdetọn de, mí nọ duvivi ayajẹ he nunamẹ nọ hẹnwa tọn.—Owalọ lẹ 20:35.
“Nado nọ yí whiwhẹ do zinzọnlin hẹ Jiwheyẹwhe towe.” To Biblu mẹ, hodidọ lọ “nado zinzọnlin” zẹẹmẹdo “nado hodo aliho nuyiwa tọn de.” Mí nọ zinzọnlin hẹ Jiwheyẹwhe gbọn aliho ogbẹ̀ tọn he yin nùdego to Biblu mẹ lọ hihodo dali. Mí dona “nọ yí whiwhẹ” zan to aliho enẹ hihodo mẹ. Gbọnna? Eyin mí whiwhẹ míde to Jiwheyẹwhe nukọn, mí nọ gbọn lẹnpọn dagbe dali yọ́n otẹn mítọn po dogbó mítọn lẹ po. Enẹwutu, “nado yí whiwhẹ do zinzọnlin hẹ” nọ zẹẹmẹdo nado nọ tindo pọndohlan he sọgbe gando nuhe e biọ to mí si po nuhe mí sọgan wà po go.
Mí dopẹ́ dọ Jehovah ma nọ biọ hugan nuhe mí sọgan wà. Homẹ etọn nọ hùn eyin mí wà nuhe go mí pé lẹpo nado sẹ̀n ẹn. (Kolosinu lẹ 3:23) Ewọ yọ́n dogbó mítọn lẹ. (Salmu lẹ 103:14) Eyin mí gbọn whiwhẹ dali mọnukunnujẹemẹ dọ mí tindo dogbó, mí sọgan mọ ayajẹ to zọnlinzinzin hẹ ewọ mẹ. Naegbọn a ma na plọn lehe a sọgan bẹ zọnlinzinzin hẹ Jiwheyẹwhe jẹeji do? Aliho nuyiwa tọn enẹ nọ hẹn dona susu wá.—Howhinwhẹn lẹ 10:22.