Alọdlẹndonu Nuplọnwe Opli Gbẹzan po Lizọnyizọn po Tọn
4-10 MARS
NUHỌAKUẸ LẸ SỌN OHÓ JIWHEYẸWHE TỌN MẸ | LOMUNU LẸ 12-14
“Nuhe E Zẹẹmẹdo Nado Do Owanyi Klistiani Tọn Hia”
it-1-F 53
Owanyi
Owanyi mẹmẹsunnu tọn (to Glẹkigbe mẹ, phi·la·del·phiʹa, to paa mẹ, “owanyi tintindo na mẹmẹsunnu”) dona tin to hagbẹ agun Klistiani tọn lẹpo ṣẹnṣẹn. (Lo 12:10; Heb 13:1; sọ pọ́n 1Pi 3:8.) Ehe dohia dọ haṣinṣan yetọn dona siso, sinyẹn bo lodo dile hagbẹ whẹndo tọn lẹ nọ vẹ́ do. Mahopọnna dọ hagbẹ agun lọ tọn lẹ ko nọ do owanyi mẹmẹsunnu tọn hia, tuli yin nina yé nado do e hia to gigọ́ mẹ dogọ.—1Tẹ 4:9, 10.
Hogbe Glẹkigbe tọn lọ phi·loʹstor·gos, he zẹẹmẹdo “owanyi sisosiso tintindo,” nọ yin yiyizan na mẹhe vẹ́ hẹ yede taun lẹ. Dopo to hogbe he mẹ e wá sọn lẹ mẹ wẹ, sterʹgo, he nọ yin yiyizan nado dlẹnalọdo owanyi jọwamọ tọn taidi to hagbẹ whẹndo tọn lẹ ṣẹnṣẹn. Apọsteli Paulu na tuli Klistiani lẹ nado wleawuna jẹhẹnu ehe. (Lo 12:10) Paulu sọ dohia dọ to azán godo tọn lẹ mẹ, gbẹtọ lẹ na yin “owanyi jọwamọ tọn matindotọ” (Glẹkigbe, aʹstor·goi) bo dọ dọ okú wẹ omẹ ehelẹ jẹna.—2Ti 3:3; Lo 1:31, 32.
w09 15/10 8 huk. 3
“Mì Nọ Nọ̀ Jijọho hẹ Omẹ Popo”
3 Hia Lomunu lẹ 12:17. Paulu dọ dọ eyin mí pehẹ nuyiwahẹmẹ agọ̀, mí ma dona nọ yiahọsu. Nujọnu wẹ e yin nado hodo ayinamẹ ehe, titengbe to whẹndo he klan to sinsẹ̀n-liho lẹ mẹ. Alọwlemẹ Klistiani lọ dona dava ede ma nado yiahọsu to whenuena alọwlemẹ etọn yinuwa hẹ ẹ to aliho he ma sọgbe mẹ kavi yí hogbe sinsinyẹn zan na ẹn. Dagbe depope ma nọ wá sọn e mẹ eyin mí “yí oylan do yiahọsu oylan tọn” gba. Kakatimọ, nuyiwa mọnkọtọn nọ hẹn ninọmẹ lọ vantan dogọ poun wẹ.
w07 1/7 24-25 huk. 12-13
“Mì Yí Oylan Do Yiahọsu Oylan Tọn to Mẹde Go Blo”
12 Tudohomẹnamẹ he Paulu na bọdego gando aliho he mẹ mí dona yinuwa hẹ yisenọ lẹ po mayisenọ lẹ po go te wẹ yindọ: “Mì yí oylan do yiahọsu oylan tọn to mẹde go blo.” Hodidọ enẹ wá to jọwamọ-liho sọn nuhe e ko dọ jẹnukọn lẹ mẹ dọmọ: “Mì nọ gbẹwanna nuhe ylan.” To popolẹpo mẹ, nawẹ mẹde sọgan dọ dọ emi gbẹwanna oylan nugbonugbo gbọn eyin e nọ yí ylanwiwa zan nado yiahọsu to mẹdevo lẹ go? Mọwiwà na dohia dọ omẹ mọnkọtọn ma tindo owanyi “matin yẹnuwiwa.” Enẹwutu, Paulu dọmọ: “Mì nọ wleawu nuhe yọ́n lẹ tọn dai to gbẹtọ lẹpo nukọn.” (Lomunu lẹ 12:9, 17) Nawẹ mí sọgan yí hogbe ehelẹ zan gbọn?
13 Jẹnukọn, to wekanhlanmẹ etọn hlan Kọlintinu lẹ mẹ, Paulu wlanwe gando homẹkẹn he apọsteli lẹ pehẹ go. E dọmọ: “Yè yí mí do basi omẹ pinpọn de hlan aihọn, podọ hlan angẹli lẹ, podọ hlan gbẹtọ lẹ. . . . Yè to mí vlẹko, míwlẹ to didona; yè to homẹkẹndo mí, mí to ota sisẹ́ do e mẹ: yè to mí depò, míwlẹ to vẹvẹ.” (1 Kọlintinu lẹ 4:9-13) Mọdopolọ, aihọn to Klistiani nugbo lẹ pọ́n to egbehe. Eyin mẹhe lẹdo mí pé lẹ doayi dagbe he wà mí te lẹ go etlẹ yin to whenue mí to pipehẹ nuyiwahẹmẹ agọ̀, yé sọgan yin whinwhàn nado kẹalọyi owẹ̀n Klistiani tọn mítọn.—1 Pita 2:12.
w12 15/11 29 huk. 13
Mì Nọ Jona Ode Awetọ sọn Ojlo mẹ Wá
13 To whedelẹnu, hiẹ sọgan tindo ojlo nado gọalọna mẹhe ma yin Klistiani bo ṣinuwa do we de nado yọ́n nujinọtedo Biblu tọn lẹ. Apọsteli Paulu wlan dọmọ: “‘Eyin huvẹ hù kẹntọ towe, na núdùdù i; eyin nugbla hù i, na ẹn nude nado nù; na gbọn ehe wiwà dali, hiẹ na bẹ akán he to jiji do ota na ẹn.’ A dike oylan gbawhàn towe blo, ṣigba nọ yí dagbe do gbawhàn oylan tọn.” (Lom. 12:20, 21) Eyin hiẹ nọ do walọ dagbe hia to whenue mẹdevo lẹ yinuwa hẹ we to aliho agọ̀ mẹ, enẹ sọgan yinuwado yé ji bo na tlẹ whàn yé nado do jẹhẹnu dagbe lẹ hia. Eyin hiẹ tẹnpọn nado mọnukunnujẹ nuhewutu mẹlọ do ṣinuwa do we mẹ bo do awuvẹmẹ hia ẹ, a sọgan penugo nado gọalọna ẹn nado plọn nugbo Biblu tọn lẹ. Vlavo mẹlọ kẹalọyi kavi lala, homẹdagbe he a dohia ẹ sọgan hùn dotẹnmẹ dote na ẹn nado lẹnnupọndo walọyizan dagbe towe ji.—1 Pita 2:12; 3:16.
Onú Sisosiso Gbigbọmẹ Tọn Lẹ
lvs 76-77 huk. 5-6
Lehe Mí Na Nọ De Ayidedai Mítọn lẹ Do
5 Nuhe mí nọ wà to gbẹ̀mẹ lẹpo wẹ gando sinsẹ̀n-bibasi mítọn hlan Jehovah go. Paulu basi zẹẹmẹ ehe tọn dọmọ: “Mì . . . yí agbasa mìtọn do basi avọ́sinsan he togbẹ̀, wiwe, he yin alọkẹyi na Jiwheyẹwhe.” (Lomunu lẹ 12:1) Jesu dọmọ: “Hiẹ dona yí ahun towe lẹpo, alindọn towe lẹpo, ayiha towe lẹpo, podọ huhlọn towe lẹpo do yiwanna Jehovah Jiwheyẹwhe towe.” (Malku 12:30) Nudagbe hugan mítọn lẹ wẹ mí nọ jlo na na Jehovah to whelẹponu. To Islaeli hohowhenu tọn mẹ, eyin mẹde jlo na yí kanlin de do sanvọ́ hlan Jehovah, e dona yin kanlin he to gángán de. Eyin avọ́sinsan lọ tindo oblọ, Jiwheyẹwhe ma nọ kẹalọyi i. (Levitiku 22:18-20) Mọdopolọ, sinsẹ̀n-bibasi mítọn gán nọma yin alọkẹyi gbọn Jehovah dali. Gbọnna?
6 Jehovah dọna mí dọ: “Mì dona yin wiwe, na wiwe wẹ yẹn.” (1 Pita 1:14-16; 2 Pita 3:11) Jehovah ma na kẹalọyi sinsẹ̀n-bibasi mítọn, adavo e yin wiwe. (Deutelonomi 15:21) Sinsẹ̀n-bibasi mítọn ma sọgan yin wiwe eyin mí nọ wà nuhe Jehovah gbẹwanna lẹ, taidi fẹnnuwiwa, danuwiwa kavi nuhe tindo kanṣiṣa hẹ aovinuwiwa lẹ. (Lomunu lẹ 6:12-14; 8:13) Podọ homẹ Jehovah tọn ma na hùn eyin ayidedai mítọn lẹ nọ bẹ onú mọnkọ lẹ hẹn. Ehe gán hẹn sinsẹ̀n-bibasi mítọn flu bọ Jehovah ma na kẹalọyi i, podọ e sọgan hẹn haṣinṣan he mí tindo hẹ ẹ gble.
w08 15/6 31 huk. 4
Nuagokun lẹ sọn Owe Lomunu lẹ Tọn Mẹ
13:1—Aliho tẹ mẹ wẹ huhlọn daho lẹ ‘yin didoai gbọn Jiwheyẹwhe dali’ do otẹn aṣẹpipa tọn he tindo dogbó lẹ mẹ te? Aṣẹpatọ aihọn tọn lẹ ‘yin didoai gbọn Jiwheyẹwhe dali’ do otẹn aṣẹpipa tọn he tindo dogbó lẹ mẹ to linlẹn lọ mẹ dọ Jiwheyẹwhe wẹ na yé dotẹnmẹ nado dugán, podọ to whẹho delẹ mẹ Jiwheyẹwhe ko mọ gandudu yetọn hlan nukọn. Dọdai he Biblu dọ gando gandutọ susu go hẹn ehe họnwun.
w11-F 1/9 21-22
Be Mí Dona Sú Takuẹ Wẹ Ya?
Kanṣiṣa Tẹwẹ Tin to Takuẹ po Ayihadawhẹnamẹnu po Ṣẹnṣẹn?
E jẹna ayidego dọ, delẹ to takuẹ he Klistiani owhe kanweko tintan whenu tọn lẹ dona sú lẹ mẹ nọ yin yiyizan nado nọgodona awhàn. Whẹho ayihadawhẹnamẹnu tọn ehe wẹ wá zọ́n bọ Gandhi po Thoreau po do gbẹ́ nado nọ sú takuẹ.
Flindọ Klistiani lẹ nọ setonuna gbedide he tin to Lomunu lẹ weta 13 mẹ, e ma yin nado dapana yasanamẹ poun gba, ṣigba “na ayihadawhẹnamẹnu [yetọn] wutu ga.” (Lomunu lẹ 13:5) Enẹwutu, ayihadawhẹnamẹnu Klistiani de tọn na yigbena ẹn nado nọ sú takuẹ lẹ, eyin yé tlẹ nọ yin yiyizan nado nọgodona nuwiwa he mẹlọ mọdọ e ma sọgbe lẹ. Nado mọnukunnujẹ linlẹn ehe mẹ, mí dona yọ́n onú titengbe de gando ayihadawhẹnamẹnu mítọn go, yèdọ ogbè homẹ tọn de he nọ dọna mí eyin nuyiwa mítọn sọgbe kavi ma sọgbe.
Dile Thoreau dohia do, mẹlẹpo wẹ tindo ogbè homẹ tọn enẹ, ṣigba mí ma sọgan dejidego to whelẹponu. Nado hẹn homẹ Jiwheyẹwhe tọn hùn, mí dona hẹn ayihadawhẹnamẹnu mítọn sọgbe hẹ nujinọtedo walọ dagbe tọn etọn lẹ. Mí nọ saba tindo nuhudo nado vọ́ nulẹnpọn kavi pọndohlan mítọn jlado bo hẹn ẹn sọgbe hẹ Jiwheyẹwhe tọn, na linlẹn etọn lẹ yiaga hú mítọn lẹ. (Salmu lẹ 19:7) Enẹwutu, mí dona tẹnpọn nado yọ́n linlẹn Jiwheyẹwhe tọn gando gandudu gbẹtọvi tọn lẹ go. Etẹwẹ yin linlẹn etọn?
Apọsteli Paulu ylọ gandudu gbẹtọvi tọn lẹ dọ “devizọnwatọ gbangba tọn Jiwheyẹwhe tọn lẹ.” (Lomunu lẹ 13:6) Etẹwẹ ehe zẹẹmẹdo? Na taun tọn, e zẹẹmẹdo dọ yé nọ hẹn nulẹ do titoji bosọ nọ dike bọ tòvi lẹ nọ mọ dandannu delẹ. Gandudu he tlẹ nọ hò ahizi hugan lẹ nọ saba wleawu nudelẹ tọn taidi tito posu tọn lẹ, wehọmẹ yìyì, tito miyọ́n ṣíṣí tọn bosọ nọ de osẹ́n lẹ tọ́n. Dile etlẹ yindọ Jiwheyẹwhe yọnẹn ganji dọ aṣẹpipa gbẹtọvi tọn ehelẹ tindo awugbopo lẹ, e dike na yé nido tin-to-aimẹ na ojlẹ de bo biọ dọ mí ni nọ sú takuẹ lẹ nado do sisi hia na tito etọn, enẹ wẹ dotẹnmẹ he e na gandudu ehelẹ nado paṣẹ do gbẹtọvi lẹ ji.
Ṣigba, ojlẹ kleun de poun wẹ Jiwheyẹwhe na dotẹnmẹ gandudu gbẹtọvi tọn lẹ nado dugán na. Ojlo etọn wẹ nado yí Ahọluduta olọn mẹ tọn etọn do diọtẹnna yemẹpo bo de awugble he gandudu ehelẹ ko hẹnwa gbẹtọvi lẹ ji na owhe kanweko susu lẹpo sẹ̀. (Daniẹli 2:44; Matiu 6:10) Todin whẹ́, Jiwheyẹwhe ma kẹalọyi dọ Klistiani lẹ ni vẹtolina gandudu lẹ vlavo gbọn gbigbẹ́ nado sú takuẹ lẹ dali kavi gbọn nudevo wiwà dali.
Taidi Gandhi, eyin a gbẹ́ nọ lẹndọ takuẹ lẹ súsú nado nọgodona awhàn yin ylando lo? Dile mí nọ mọ lẹdo de hlan ganji dogọ do to whenue mí hẹaga, mọ wẹ e sọgan bọawuna mí nado vọ́ nulẹnpọn mítọn jlado bo hẹn ẹn sọgbe hẹ Jiwheyẹwhe tọn do eyin mí yọ́n lehe pọndohlan etọn yiaga hú mítọn do. Jiwheyẹwhe dọ gbọn yẹwhegán Isaia gblamẹ dọmọ: “Dile olọn yiaga hú aigba do, mọ wẹ aliho ṣie lẹ yiaga hú aliho mìtọn lẹ bọ linlẹn ṣie lẹ yiaga hú linlẹn mìtọn lẹ do niyẹn.”—Isaia 55:8, 9.
11-17 MARS
NUHỌAKUẸ LẸ SỌN OHÓ JIWHEYẸWHE TỌN MẸ | LOMUNU LẸ 15-16
“Nọ Lẹhlan Jehovah Dè Nado Mọ Akọndonanu po Homẹmimiọn Po”
w17.07 14 huk. 11
“Mì Nọ Viavi hẹ Mẹhe to Avivi Lẹ”
11 Kandai he gando numọtolanmẹ awubla tọn sinsinyẹn he Jesu tindo to whenue Lazalọsi kú go yin dopo poun to wefọ homẹmiọnnamẹ tọn susugege he tin to Ohó Jiwheyẹwhe tọn mẹ lẹ mẹ. Abajọ Biblu dọ dọ, “na nuhe ko yin kinkandai jẹnukọn lẹpo yin kinkandai na oplọn mítọn, na míwlẹ nido sọgan tindo todido gbọn akọndonanu mítọn gblamẹ podọ gbọn homẹmimiọn sọn Owe-wiwe lẹ mẹ gblamẹ.” (Lom. 15:4) Eyin hiẹ lọsu to aluẹmẹ, a sọgan mọ homẹmiọnnamẹ sọn wefọ taidi dehe bọdego ehelẹ mẹ:
▪ “Jehovah ma dẹn do mẹhe ahun yetọn jẹflumẹ lẹ; e nọ whlẹn ayimajainọ lẹ.”—Salm. 34:18, 19.
▪ “Whenue magbọjẹ lẹ húagbọ́ mi, hiẹ [Jehovah] miọnhomẹna mi bo hẹn kọgbọ wá na mi.”— Salm. 94:19.
▪ “Na Oklunọ mítọn Jesu Klisti lọsu podọ Jiwheyẹwhe Otọ́ mítọn, yèdọ mẹhe yiwanna mí bo na mí homẹmimiọn madopodo po todido dagbe po gbọn nukundagbe majẹhẹ dali, ni miọnhomẹna mì bo hẹn mì lodo.”—2 Tẹs. 2:16, 17.
w16.04 14 huk. 5
“Mì Gbọ Akọndonanu Ni Wazọ́n Etọn Dotana”
5 Nọ lẹhlan Jehovah dè nado mọ huhlọn yí. Jehovah wẹ “Jiwheyẹwhe he nọ namẹ akọndonanu po homẹmimiọn po.” (Lom. 15:5) Ewọ kẹdẹ wẹ mọnukunnujẹ nuhahun he mí nọ pehẹ lẹ mẹ to gigọ́ mẹ, bosọ mọnukunnujẹ lehe mẹhe lẹdo mí lẹ, numọtolanmẹ mítọn lẹ, podọ etlẹ yin ogú he mí dù sọn mẹjitọ mítọn lẹ dè nọ yinuwado mí ji do mẹ. Enẹwutu, ewọ kẹdẹ wẹ pegan nado gọalọna mí nado doakọnnanu. Biblu dọmọ: “E nọ hẹn pekọ wá na ojlo mẹhe nọ dibusi i lẹ tọn; e nọ sè awhágbe yetọn na alọgọ bo nọ whlẹn yé.” (Salm. 145:19) Ṣigba, nawẹ Jiwheyẹwhe nọ na gblọndo odẹ̀ he mí hò nado mọ huhlọn yí nado doakọnnanu lẹ gbọn?
w14 15/6 14 huk. 11
‘Hiẹ Dona Yiwanna Jehovah Jiwheyẹwhe Towe’
11 Jehovah ‘nọ namẹ todido he nọ yí ayajẹ po jijọho po do gọ́ mí mẹ.’ (Lom. 15:13) Todido he Jiwheyẹwhe na mí nọ gọalọna mí nado doakọnna whlepọn yise tọn lẹ. Mẹyiamisisadode he do yede hia taidi ‘nugbonọ, yèdọ kakajẹ okú lẹ, na mọ jẹgbakun ogbẹ̀ olọn mẹ tọn yí.’ (Osọ. 2:10) Mẹhe tindo todido aigba ji tọn bo hẹn tenọgligo lẹ na duvivi dona susu tọn to Paladisi mẹ to aigba ji kakadoi. (Luku 23:43) Numọtolanmẹ tẹwẹ mí nọ tindo gando todido mọnkọtọn lẹ go? Be mí ma gọ́ na ayajẹ po jijọho po bo yiwanna Mẹhe nọ na mí “nunina dagbe lẹpo gọna nunina pipé lẹpo” ya?—Jak. 1:17.
Onú Sisosiso Gbigbọmẹ Tọn Lẹ
w89-F 1/12 24 huk. 3
‘Tẹ́n Nugbo-Yinyin Owanyi Towe Tọn Pọ́n’
E họnwun dọ mẹmẹsunnu yetọn Kosi lẹ dona ko yin whinwhàn nado gọalọna yé to ojlẹ nuhudo tọn mẹ. To popolẹpo mẹ, yé dù “ahọ́” vonọtaun de do Klistiani he to Jelusalẹm lẹ. Be e ma yin Jelusalẹm wẹ wẹndagbe lọ tlọ́n bo gbàpe jẹ Kosi lẹ dè ya? Paulu yigbe dọ: “Eyin akọta lẹ [Kosi lẹ] ko tindo mahẹ to onú gbigbọ tọn yetọn [Klistiani Juvi lẹ tọn] lẹ mẹ, be yelọsu duahọ etọn do yé nado yí onú agbasa tọn yetọn lẹ do yilizọn na yé.”—Lomunu lẹ 15:27.
it-2-F 647 huk. 2
Oyọnẹn Jẹnukọn, Dide Jẹnukọn
Mẹsia lọ, kavi Klisti wẹ Okún dopagbe lọ, he gblamẹ gbẹtọvi dodonọ lẹpo sọn whẹndo aigba ji tọn lẹpo mẹ na yin didona te. (Ga 3:8, 14) To atẹṣiṣi Edẹni mẹ tọn godo, yèdọ jẹnukọnna jiji Abẹli tọn wẹ “okún” ehe yin nùdego whla tintan. (Jen 3:15) Ehe wá aimẹ owhe 4 000 plipli whẹpo “aṣli wiwe” lọ do yin didehia to whenue “okún” Mẹsia lọ tọn wá họnwun hezeheze. Na taun tọn, e “yin whiwhla na ojlẹ dindẹn.”—Lo 16:25-27; Efe 1:8-10; 3:4-11.
18-24 MARS
NUHỌAKUẸ LẸ SỌN OHÓ JIWHEYẸWHE TỌN MẸ | 1 KỌLINTINU LẸ 1-3
“Be Gbẹtọ Agbasanọ Wẹ A Yin Ya Kavi Gbigbọnọ?”
w18.02 19 huk. 4-5
Etẹwẹ E Zẹẹmẹdo Nado Yin Gbẹtọ Gbigbọnọ?
4 Jẹnukọn whẹ́, mì gbọ mí ni lẹnnupọndo jijọ gbẹtọ agbasanọ de tọn ji. Jijọ he gbayipe hugan to aihọn lọ mẹ wẹ nado nọ ze agbasanu lẹ do otẹn tintan mẹ. Paulu basi zẹẹmẹ etọn taidi “gbigbọ he to nuyiwa todin to tolivẹtọ lẹ mẹ.” (Efe. 2:2) Gbigbọ enẹ nọ sisẹ́ suhugan gbẹtọ lẹ tọn nado yinuwa dile mẹhe lẹdo yé lẹ nọ wà do. Yé nọ ze ayiha yetọn do agbasalan ji. Taidi kọdetọn de, suhugan yetọn nọ wà nuhe yọ́n to nukun yedetiti tọn mẹ, bo ma nọ dovivẹnu depope nado nọgbẹ̀ sọgbe hẹ nujinọtedo Jiwheyẹwhe tọn lẹ. Nuhe nọ saba duahunmẹna gbẹtọ agbasanọ zẹjlẹgo wẹ yindidi po yanwle agbasa tọn lẹ po, kavi nado yiavùnlọna nuhe ewọ lẹndọ e yin jlọjẹ emitọn lẹ.
5 Onú devo tẹwẹ sọ nọ do gbẹtọ agbasanọ de hia? Mẹhe nọ doalọ to “azọ́n agbasalan tọn lẹ” depope mẹ wẹ sọgan yin yiylọdọ gbẹtọ agbasanọ. (Gal. 5:19-21) Wekanhlanmẹ tintan Paulu tọn hlan agun Kọlinti tọn donù jijọ devo delẹ go, he nọ dohiagona mẹhe tindo pọndohlan agbasalan tọn lẹ. Jijọ ehelẹ bẹ kinklan kavi gbemanọpọ hinhẹnwa, wiwọ́ finfọndote, ode awetọ hinhẹn yì whẹ̀ nukọn, pinpẹn-nutọn matindo na tito tatọ́-yinyin tọn, gọna mẹde jijona dùdù po nùnù po hẹn. Eyin gbẹtọ agbasanọ pehẹ whlepọn lẹ, e nọ joawuna yé po awubibọ po. (Howh. 7:21, 22) Juda dọho gando mẹdelẹ go he ninọmẹ yetọn na ylan sọmọ bọ yé “ma [na] tindo gbigbọnọ-yinyin” ba.—Juda 18, 19.
Etẹwẹ E Zẹẹmẹdo Nado Yin Gbẹtọ Gbigbọnọ?
6 Todin, etẹwẹ e zẹẹmẹdo nado yin “gbẹtọ gbigbọnọ”? To vogbingbọn mẹ na gbẹtọ agbasanọ, Jiwheyẹwhe wẹ nọ tin to otẹn tintan mẹ na gbẹtọ gbigbọnọ. Mẹhe whèwhín to gbigbọ-liho lẹ nọ dovivẹnu nado “hodo apajlẹ Jiwheyẹwhe tọn.” (Efe. 5:1) E dohia dọ yé nọ tẹnpọn nado tindo pọndohlan Jehovah tọn do whẹho lẹ ji, bo nọ pọ́n nulẹ hlan dile ewọ nọ wà do. Yé nọ mọ Jiwheyẹwhe di omẹ nujọnu tọn de. Yé nọ wà nuhe go yé pé lẹpo nado nọgbẹ̀ sọgbe hẹ nujinọtedo Jehovah tọn lẹ, yèdọ nuhe gbẹtọ agbasanọ lẹ ma nọ wà. (Salm. 119:33; 143:10) Gbẹtọ gbigbọnọ nọ dovivẹnu nado do adà “sinsẹ́n gbigbọ tọn” lẹ hia kakati nado ze ayiha do azọ́n agbasalan tọn lẹ ji. (Gal. 5:22, 23) Nado hẹn zẹẹmẹ hodidọ lọ “gbẹtọ gbigbọnọ” tọn họnwun dogọ, lẹnnupọndo nuyijlẹdonugo ehe ji: Mẹhe bikan to ajọwiwa mẹ nọ yin yiylọdọ ajọwatọ. Mọdopolọ, mẹhe gbigbọnu lẹ kavi whẹho gbigbọmẹ tọn lẹ nọ duahunmẹna taun lẹ nọ yin yiylọdọ gbẹtọ gbigbọnọ.
w18.02 22 huk. 15
Etẹwẹ E Zẹẹmẹdo Nado Yin Gbẹtọ Gbigbọnọ?
15 Nawẹ dopodopo mítọn sọgan hodo apajlẹ Klisti tọn gbọn? Biblu dọho gando “ayiha Klisti tọn” tintindo go to 1 Kọlintinu lẹ 2:16 mẹ. Podọ Lomunu lẹ 15:5 dotuhomẹna mí nado tindo “pọndohlan dopolọ he Klisti Jesu tindo.” Enẹwutu, nado taidi Klisti, mí dona yọ́n aliho nulẹnpọn tọn etọn bosọ yọ́n gbẹtọ-yinyin etọn to gigọ́ mẹ. Enẹgodo, e na biọ dọ mí ni hodo afọdòmẹ etọn lẹ. Jesu nọ ze ayiha do haṣinṣan etọn hẹ Jiwheyẹwhe ji. Enẹwutu, apajlẹ Jesu tọn hihodo na zọ́n bọ mí na hodo apajlẹ Jehovah tọn dogọ. Na whẹwhinwhẹ́n ehelẹ wutu, e họnwun dọ nujọnu wẹ e yin dọ mí ni plọn nado nọ lẹnnupọn di Jesu.
Onú Sisosiso Gbigbọmẹ Tọn Lẹ
it-2-F 854 huk. 5
Nuyọnẹn
Mahopọnna nuyọnẹn he aihọn tindo, e pọ́n awuwledainanu Jiwheyẹwhe tọn gbọn Klisti gblamẹ di nulunu bo gbẹ́ ẹ dai; dile etlẹ yindọ gandutọ etọn lẹ na ko penugo bo gán sọ dawhẹ dodo, yé “hù Oklunọ gigonọ lọ.” (1Kọ 1:18; 2:7, 8) Ṣigba, Jiwheyẹwhe do nuyọnẹn aihọn tọn hia di nulunu, bo dowinyan nuyọnẹntọ etọn lẹ, na e yí nuhe yé nọ pọ́n di “nulunu Jiwheyẹwhe tọn,” gọna gbẹtọvi he yé nọ mọ di ‘nulunọ, madogánnọ, podọ mẹhe ma diyin lẹ,’ zan nado hẹn lẹndai jiawu Etọn di. (1Kọ 1:19-28) Paulu flinnu Klistiani he to Kọlinti lẹ dọ “nuyọnẹn titonu ehe tọn [gọna] dehe yin ogán titonu ehe tọn lẹ tọn” na yin hinhẹn zun ovọ́; enẹwutu apọsteli lọ ma plọnmẹ nuyọnẹn enẹ to owẹ̀n he e lá mẹ. (1Kọ 2:6, 13) E na avase Klistiani he to Kolosi lẹ sọta omọ̀ lọ nado joawuna “tamẹnuplọnmẹ [phi·lo·so·phiʹas, to paa mẹ, owanyi na nuyọnẹn] po oklọ ovọ́ po . . . sọgbe hẹ aṣa gbẹtọ lẹ tọn.”—Kol 2:8; yijlẹdo wefọ 20-23 go.
Nuagokun lẹ sọn Owe Kọlintinu lẹ Tọn Mẹ
2:3-5. To whenuena Paulu to kunnude to Kọlinti, fie tamẹnuplọnmẹ po nupinplọn Glẹki tọn po sinai do, e sọgan ko to nuhà gando lehe e na penugo nado diọlinlẹnna hosetọ etọn lẹ do go. Etomọṣo, e ma dike obu kavi awugbopo depope he e sọgan ko tindo ni glọnalina ẹn nado hẹn lizọnyizọn he e mọyi sọn Jiwheyẹwhe dè lọ di. Mọdopolọ, mí ma dona dike ninọmẹ sinsinyẹn lẹ ni hẹn mí joagọyigodo to wẹndagbe Ahọluduta Jiwheyẹwhe tọn lilá mẹ. Mí sọgan yí jidide do lẹhlan Jehovah dè na alọgọ dile Paulu wà do.
25-31 MARS
NUHỌAKUẸ LẸ SỌN OHÓ JIWHEYẸWHE TỌN MẸ | 1 KỌLINTINU LẸ 4-6
“Otọ́n Pẹvide Wẹ Nọ Hẹn Linfin Yinyan lọ Pete Fọ́n”
it-2-F 130
Otọ́n
Apọsteli Paulu yí nuyijlẹdonugo dopolọ zan to whenue e degbena Klistiani he to agun Kọlinti tọn mẹ lẹ nado de dawe fẹnnuwatọ de sẹ̀ sọn agun lọ mẹ, dọmọ: “Be mì ma yọnẹn dọ otọ́n pẹvide wẹ nọ hẹn linfin yinyan lọ pete fọ́n ya? Mì de otọ́n hoho lọ sẹ̀, na mì nido yin linfin yinyan yọyọ de, to whenuena e yindọ mì ma tindo otọ́n ba. Na nugbo tọn, na Klisti he yin lẹngbọvu Juwayi tọn mítọn ko yin yíyí do sanvọ́.” Enẹgodo, e do nuhe e to yiylọdọ “otọ́n” lọ hia dọmọ: “Enẹwutu, mì dike mí yí otọ́n hoho kavi otọ́n ylankan po ylanwiwa tọn po do basi hùnwhẹ lọ blo, adavo akla madotọ́n ahundopo tọn po nugbo tọn lẹ po.” (1Kọ 5:6-8) Tofi, Paulu to alọdlẹndo zẹẹmẹ yẹhiadonu tọn he Hùnwhẹ Akla Madotọ́n Ju lẹ tọn he nọ yin bibasi bọdo hùnwhẹ Juwayi tọn go tlolo lọ tindo. Dile otọ́n vude nọ yin kinkọndo linfin yinyan mẹ bọ e nọ hẹn linfin he na dà akla lọ pete fọ́n do, mọ wẹ agun lọ pete na lẹzun mawé to nukun Jehovah tọn mẹ do eyin yé ma glọnalina nuyiwadomẹji agọ̀ dawe fẹnnuwatọ lọ tọn. Yé dona yinuwa bo de “otọ́n” lọ sẹ̀ sọn ṣẹnṣẹn yetọn, dile Islaelivi lẹ ma gán jo otọ́n depope do owhé yetọn gbé to hùnwhẹ lọ whenu do.
it-2-F 903-904
Satani
Etẹwẹ e zẹẹmẹdo nado ‘ze mẹde do alọmẹ na Satani, na nuyiwadomẹji ylando lọ tọn nido yin kúnsúdona’?
To whenue apọsteli Paulu to wekanhlan agun he to Kọlinti nado dọ nuhe yé dona wà na hagbẹ agun lọ tọn he gbọn kanyinylan dali yí asi otọ́ etọn tọn, e dọmọ: “Mì dona ze dawe mọnkọtọn do alọmẹ na Satani, na nuyiwadomẹji ylando lọ tọn nido yin kúnsúdona.” (1Kọ 5:5) Gbedide de wẹ ehe yin nado de dawe lọ sẹ̀ sọn agun mẹ, bo sánkanna gbẹdido hẹ ẹ mlẹnmlẹn. (1Kọ 5:13) Dawe lọ zizedo alọmẹ na Satani dohia dọ e ma na yin hagbẹ agun lọ tọn ba bo na yin didohlan aihọn he Satani yin yẹwhe po ogán etọn tọn po mẹ. Taidi “otọ́n pẹvide” he nọ hẹn “linfin yinyan lọ pete” fọ́n, dawe ehe lẹzun “nuyiwadomẹji ylando” tọn kavi agbasalan tọn to agun lọ mẹ; enẹwutu eyin dawe fẹnnuwatọ ehe yin didesẹ sọn ṣẹnṣẹn yetọn, agun gbigbọnọ ehe na sukúndona “nuyiwadomẹji ylando” tọn. (1Kọ 5:6, 7) Mọdopolọ, Paulu ze Himeneu po Alẹkzandle po do alọmẹ na Satani, na yé gbẹkọ yise po ayihadawhẹnamẹnu dagbe he yé tindo dai lọ po go bọ yise yetọn siọ taidi tọjihun de.—1Ti 1:20.
lvs 241, nudọnamẹ dogọ
Mẹdesẹ sọn Agun Mẹ
Eyin mẹhe waylando sinsinyẹn de ma lẹnvọjọ bo gbẹ́ ma nado hodo nujinọtedo Jehovah tọn lẹ, e ma gán sọ yin hagbẹ agun lọ tọn ba. E dona yin didesẹ sọn agun mẹ. Eyin mẹde yin didesẹ sọn agun mẹ, mí masọ nọ dogbẹ́ hẹ ẹ kavi dọho hẹ ẹ ba. (1 Kọlintinu lẹ 5:11; 2 Johanu 9-11) Tito mẹdesẹ sọn agun mẹ tọn nọ basi hihọ́na oyín Jehovah tọn po agun lọ po. (1 Kọlintinu lẹ 5:6) Mẹdidesẹ sọn agun mẹ sọ yin aliho de nado domẹplọnlọ ylanwatọ de go, na e nido lẹnvọjọ bo lẹkọwa Jehovah dè.—Luku 15:17.
▸ Weta 3, hukan 19
Onú Sisosiso Gbigbọmẹ Tọn Lẹ
w09 15/5 24 huk. 16
Angẹli lẹ Yin “Gbigbọ Devizọnwiwa Tọn” Lẹ
16 Klistiani he tin to whlepọn glọ lẹ nọ lẹzun ‘nupinpọn de na angẹli lẹ.’ (1 Kọl. 4:9) Homẹ nọ hùn angẹli lẹ tlala nado mọ nuyiwa nugbonọ-yinyin tọn mítọn lẹ bo tlẹ nọ jaya to whenue ylandonọ de lẹnvọjọ. (Luku 15:10) Angẹli lẹ sọ nọ doayi walọ dagbe yọnnu Klistiani lẹ tọn go. Biblu dohia dọ “e jẹ dọ yọnnu ni tindo ohia mẹmẹglọ tọn de to ota, na angẹli lẹ wutu.” (1 Kọl. 11:3, 10, NW) Mọwẹ, homẹ nọ hùn angẹli lẹ nado mọdọ yọnnu Klistiani lẹ po devizọnwatọ Jiwheyẹwhe tọn he tin to aigba ji lẹpo kọngbedopọ hẹ tito yẹwhehọluduta tọn po tito tatọ́-yinyin tọn po. Tonusise mọnkọtọn nọ yin nuflinmẹ dagbe de na ovi olọn mẹ tọn Jiwheyẹwhe tọn lẹ.
it-2-F 151
Osẹ́n
Osẹ́n de Na Angẹli Lẹ. Angẹli lẹ yiaga hú gbẹtọ lẹ bo tin to osẹ́n po gbedide Jiwheyẹwhe tọn lẹ po glọ. (Heb 1:7, 14; Slm 104:4) Jehovah tlẹ nọ degbena kẹntọ etọn Satani bo nọ ze dogbó de dai na ẹn. (Job 1:12; 2:6) Angẹli-gán lọ, Mikaẹli kẹalọyi bosọ nọ na sisi otẹn Jehovah tọn taidi Whẹdatọ Daho Hugan, to whenue e dọna Lẹgba to nudindọn de whenu dọmọ: “Na Jehovah ni wọhẹ we.” (Juda 9; yijlẹdo Zek 3:2 go.) Jehovah Jiwheyẹwhe ko ze angẹli lẹpo do anademẹ Jesu Klisti he yin gigopana lọ tọn glọ. (Heb 1:6; 1Pi 3:22; Mt 13:41; 25:31; Flp 2:9-11) Enẹwutu wẹ Jesu do degbe bọ angẹli de do yin didohlan Johanu. (Osọ 1:1) Ṣigba, to 1 Kọlintinu lẹ 6:3 mẹ, apọsteli Paulu dohia dọ mẹmẹsunnu gbigbọmẹ tọn Klisti tọn lẹ yin dide nado dawhẹna angẹli lẹ, na yé na tindo mahẹ to whẹdidana gbigbọ ylankan lẹ mẹ.