Alọdlẹndonu Nuplọnwe Opli Gbẹzan po Lizọnyizọn po Tọn
4-10 FÉVRIER
NUHỌAKUẸ LẸ SỌN OHÓ JIWHEYẸWHE TỌN MẸ | LOMUNU LẸ 1-3
“Nọ to Ayihadawhẹnamẹnu Towe Plọn Zọnmii”
lvs 18 huk. 6
Tindo Ayihadawhẹnamẹnu Dagbe to Jiwheyẹwhe Nukọn
6 Mẹhe ma tlẹ yọ́n Jehovah lẹ lọsu nọ saba mọdọ nudelẹ sọgbe bọ devo lẹ ma sọgbe. Biblu dọmọ: “Yé to yinyin whẹsadokọna kavi tlẹ yin whẹsuna gbọn linlẹn yetọn titi dali.” (Lomunu lẹ 2:14, 15) Di apajlẹ, suhugan gbẹtọ lẹ tọn wẹ yọnẹn dọ e ma sọgbe nado hùmẹ kavi jẹajo. Yé sọgan nọma doayi e go, amọ́ nado dọ hójọhó, ayihadawhẹnamẹnu yetọn kavi nuhe Jehovah zedo ahun yetọn mẹ nado yọ́n dagbe gbọnvona oylan wẹ yé to todoaina. Yé sọ to nunọwhinnusẹ́n Jiwheyẹwhe tọn kavi nugbo dodonu tọn he Jehovah ko wleawuna bọ e nọ gọalọna mí nado basi nudide dagbe lẹ hodo.
lvs 19-20 huk. 8-9
Tindo Ayihadawhẹnamẹnu Dagbe to Jiwheyẹwhe Nukọn
8 Mẹdelẹ nọ lẹndọ eyin yé ko gbẹ́ yinuwa sọgbe hẹ numọtolanmẹ yetọn, be yé ko to todoaina ayihadawhẹnamẹnu yetọn niyẹn. Linlẹn yetọn wẹ yindọ yé gán wà nudepope he jlo yé dile e na dẹnsọ bọ ayiha yetọn ma mọdọ nude jẹdò to e mẹ. Amọ́, mapenọ wẹ mí yin bọ numọtolanmẹ mítọn lẹ gán nọ hẹn mí buali. Numọtolanmẹ mítọn lẹ gán sinyẹn sọmọ bọ yé na yinuwado ayihadawhẹnamẹnu mítọn ji. Biblu dọmọ: “Ahun nọ klọmẹ hú nulẹpo bosọ yin owùnu. Mẹnu wẹ sọgan yọnẹn?” (Jelemia 17:9) Enẹwutu, mí gán lẹndọ nude sọgbe to whenuena e ma ka sọgbe. Di apajlẹ, whẹpo Paulu do lẹzun Klistiani, e nọ yí kanyinylan do dohomẹkẹn omẹ Jiwheyẹwhe tọn lẹ bo nọ lẹndọ nuhe sọgbe wà wẹ emi te. E nọ mọ to ede mẹ dọ emi do ayihadawhẹnamẹnu dagbe. Amọ́, e wá dọ to godo mẹ dọ: “Mẹhe nọ dindona mi wẹ Jehovah.” (1 Kọlintinu lẹ 4:4; Owalọ lẹ 23:1; 2 Timoti 1:3) Whenue Paulu wá yọ́n linlẹn Jehovah tọn gando nuhe wà e te go, e mọdọ emi dona diọ. Enẹwutu, whẹpo mí nado wà nude, mí dona nọ kanse míde dọ, ‘Etẹwẹ Jehovah jlo dọ ma wà?
9 Eyin yè yiwanna mẹde, yè ma nọ jlo na hẹn homẹgble e. Na mí yiwanna Jehovah wutu, mí ma jlo na wà nudepope he na hẹn homẹgble e. Obu lọ ma nado hẹn homẹgble Jehovah dona sinyẹn to ahun mítọn mẹ. Mí mọ apajlẹ ehe tọn to whẹho Nẹhemia tọn mẹ. E gbẹ́ nado yí otẹn he mẹ e te taidi ayimatẹn-gán zan nado jẹ adọkun. Etẹwutu? E dọ dọ “na [emi] dibusi Jiwheyẹwhe wutu” wẹ. (Nẹhemia 5:15) Nẹhemia ma jlo na wà nudepope he na hẹn homẹgble Jehovah. Taidi Nẹhemia, mílọsu nọ dibu dọ mí gán hẹn homẹgble Jehovah eyin mí wà nuhe ma sọgbe. Gbọn Biblu hihia dali, mí sọgan yọ́n nuhe nọ hẹn homẹ Jehovah tọn hùn lẹ.—Pọ́n Nudọnamẹ Dogọ 6.
Onú Sisosiso Gbigbọmẹ Tọn Lẹ
w08 15/6 30 huk. 5
3:4. Eyin ohó gbẹtọ tọn jẹagọdo nuhe Jiwheyẹwhe dọ to Ohó etọn mẹ, mí nọ dike “yè ni yí Jiwheyẹwhe do [mọ] nugbonọ” gbọn jidide do wẹndomẹ Biblu tọn go po nuyiwa sọgbe hẹ ojlo Jiwheyẹwhe tọn po dali. Eyin mí nọ tindo mahẹ zohunhun tọn to azọ́n yẹwhehodidọ Ahọluduta lọ tọn po mẹhẹnzun devi po tọn mẹ, mí sọgan gọalọna mẹdevo lẹ nado mọ Jiwheyẹwhe taidi nugbonọ.
3:24, 25—Nawẹ “ofligọ he tin to Klisti Jesu mẹ” lọ sọgan ṣinyọ́n “ylando hoho” he ko yin wiwà whẹpo e do yin súsú lẹ gbọn? Dọdai tintan he gando Mẹssia go lọ, ehe yin kinkàndai to Gẹnẹsisi 3:15 mẹ, mọ hẹndi to owhe 33 W.M. whenuena Jesu yin hùhù do yatin ji. (Gal. 3:13, 16) Ṣigba gbeegbe Jehovah dọ dọdai enẹ, mẹflikuẹ lọ taidi nuhe ko yin súsú dote to nukun etọn mẹ, na nudepope ma sọgan glọnalina Jiwheyẹwhe nado hẹn lẹndai etọn di. Enẹwutu to dodonu avọ́sinsan he Jesu Klisti na wá basi lọ tọn ji, Jehovah sọgan jo ylando kúnkan Adam tọn he do yise hia to opagbe enẹ mẹ lẹ tọn na yé. Ofligọ lọ sọ hẹn fọnsọnku mẹhe nọgbẹ̀ jẹnukọnna ojlẹ Klistiani tọn lẹ tọn yọnbasi.—Owalọ 24:15.
11-17 FÉVRIER
NUHỌAKUẸ LẸ SỌN OHÓ JIWHEYẸWHE TỌN MẸ | LOMUNU LẸ 4-6
“Jiwheyẹwhe Do Owanyi Ede Tọn Hia Mí”
w11 15/6 12 huk. 5
Jiwheyẹwhe Do Owanyi Etọn Hia Mí
5 Paulu dọhodo whẹho lọ ji, bo bẹjẹeji po nugbo ehe po dọmọ: “Ylando gbọn omẹ dopo gblamẹ biọ aihọn mẹ podọ okú gbọn ylando gblamẹ wá, gbọnmọ dali, okú dlẹnkan jẹ mẹlẹpo dè, na yemẹpo wẹ ko waylando wutu.” (Lom. 5:12) Mí sọgan mọnukunnujẹ ehe mẹ na Jiwheyẹwhe wleawuna kandai lehe ogbẹ̀ gbẹtọvi tọn bẹjẹeji do tọn. Jehovah dá gbẹtọ awe, yèdọ Adam po Evi po. Mẹdatọ lọ yin mẹpipe, podọ mọ wẹ tọgbo mítọn tintan enẹlẹ yin do ga. Jiwheyẹwhe na yé anademẹ lẹ ehe dopo to e mẹ ze dogbó dai na yé podọ ewọ dọna yé dọ tolivivẹ na anademẹ enẹ na dekọtọn do okú mẹ. (Gẹn. 2:17) Ṣigba, yé de nado yinuwa to aliho he na hẹn dindọn wá na yé mẹ, bo tùnafọ anademẹ lẹnpọn dagbe tọn he Jiwheyẹwhe na yé ji, bo gbọnmọ dali gbẹ́ ewọ dai taidi Sẹ́nnamẹtọ po Nupojipetọ po.—Deut. 32:4, 5.
w11 15/6 12 huk. 6
Jiwheyẹwhe Do Owanyi Etọn Hia Mí
6 To whenue Adam ko lẹzun ylandonọ godo wẹ e ji ovi lẹ, bo gbọnmọ dali bẹ ylando po nuyiwadomẹji etọn lẹ po plá yemẹpo. Na nugbo tọn, yé ma gbà osẹ́n Jiwheyẹwhe tọn dile Adam wà do gba, enẹwutu yé ma hùwhẹ ylando tọn dopolọ; mọjanwẹ todohukanji osẹ́n tọn depope ma ko yin nina to ojlẹ enẹ mẹ. (Gẹn. 2:17) Etomọṣo, kúnkan Adam tọn dugu ylando tọn. Enẹwutu, ylando po okú po to gandu kakajẹ whenue Jiwheyẹwhe na todohukanji osẹ́n tọn de Islaelivi lẹ, ehe dohia hezeheze dọ yé yin ylandonọ. (Hia Lomunu lẹ 5:13, 14.) Nuyiwadomẹji ylando he mí dugu etọn tọn sọgan yin yiyijlẹdo azọ̀n delẹ he mí sọgan dugu etọn sọn mẹjitọ mítọn lẹ dè go. Dile etlẹ yindọ ovi delẹ nọ dugu azọ̀n de tọn sọn mẹjitọ yetọn lẹ dè to whẹndo de mẹ, e ma yin ovi lẹpo wẹ sọgan dugu azọ̀n lọ tọn to whẹndo enẹ mẹ gba. Ṣigba, whẹho ylando tọn ma yinmọ. Mímẹpo wẹ dugu ylando tọn sọn Adam dè podọ enẹ wẹ zọ́n bọ mímẹpo dona kú. Be ninọmẹ ylankan enẹ na gbọṣi aimẹ kakadoi wẹ ya?
w11 15/6 13 huk. 9-10
Jiwheyẹwhe Do Owanyi Etọn Hia Mí
9 Etẹwẹ hogbe Glẹki tọn he yin lilẹdo “mẹsusu lilá di dodonọ” kavi “lilá [yé] di dodonọ” zẹẹmẹdo? Lẹdogbedevomẹ-basitọ Biblu tọn de wlan gando hogbe lọ go dọmọ: “Hogbe nuyijlẹdonugo tọn he nọ yin yiyizan to osẹ́n-liho to aliho delẹ mẹ wẹ e yin. E gando diọdo he nọ wá aimẹ to haṣinṣan mẹde tọn hẹ Jiwheyẹwhe mẹ go, e ma yin diọdo he mẹlọ basi to ede mẹ gba . . . Hogbe nuyijlẹdonugo tọn lọ do Jiwheyẹwhe hia taidi whẹdatọ de he basi nudide dagbe do ota mẹhe hùwhẹ mawadodo tọn bo yin pinplan wá whẹdatẹn Jiwheyẹwhe tọn nukọn de tọn mẹ. Ṣigba, bọ Jiwheyẹwhe jo whẹhuhu etọn na ẹn.”
10 Dodonu tẹ ji wẹ “Whẹdatọ [dodonọ] aihọn lẹpo tọn” sọgan jo whẹhuhu gbẹtọvi mawadodonọ de tọn na ẹn te? (Gẹn. 18:25) Jiwheyẹwhe gbọn owanyi dali ze afọdide tintan lọ bo do Visunnu detọ́n dopo akàn etọn hlan aigba ji. Jesu wà ojlo Otọ́ etọn tọn to pipé mẹ, mahopọnna whlepọn lẹ, mẹṣanko sinsinyẹn po mẹtitafu po. E hẹn tenọgli go etlẹ yin kakajẹ okú to yatin ji. (Heb. 2:10) Na Jesu yí ogbẹ̀ gbẹtọvi pipé tọn etọn do sanvọ́ wutu, e basi ofligọ de he sọgan tún kavi whlẹn ovivi Adam tọn lẹ sọn ylando po okú po si.—Mat. 20:28; Lom. 5:6-8.
Onú Sisosiso Gbigbọmẹ Tọn Lẹ
6:3-5—Etẹwẹ e zẹẹmẹdo nado yin bibaptizi do Klisti Jesu mẹ podọ do okú etọn mẹ? Eyin Jehovah yí gbigbọ wiwe do de hodotọ Klisti tọn lẹ, yé nọ yin kinkọndopọ hẹ Jesu bo nọ lẹzun hagbẹ agun lọ tọn lẹ, ehe yin agbasa Klisti tọn, he ewọ lọsu yin Ota etọn. (1 Kọl. 12:12, 13, 27; Kọl. 1:18) Lehe yé nọ yin bibaptizi to Klisti Jesu mẹ gbọn niyẹn. Klistiani yiamisisadode lẹ sọ ‘yin bibaptizi do okú Klisti tọn mẹ’ to linlẹn lọ mẹ dọ yé nọ zan gbẹzan mẹde-yido-sanvọ́ tọn bo nọ gbẹ́ todido gbẹninọ kakadoi to aigba ji tọn lẹpo dai. Enẹwutu, okú yetọn yin avọ́sinsan tọn, taidi Jesu tọn, dile etlẹ yindọ okú yetọn ma sọgan yinuwa taidi ofligọ de. Yé nọ yin bibaptizi mlẹnmlẹn do okú Klisti tọn mẹ to whenuena yé kú bo yin finfọnsọnku do ogbẹ̀ olọn mẹ tọn mẹ.
w14 1/7 10 huk. 11
Todido Tẹwẹ Tin Na Tọgbo Ṣie Lẹ?
To whenue mawadodonọ lẹ na yin finfọnsọnku, be nuhe yé ko wà wayi lẹ wẹ yè na pọ́n bo do dawhẹna yé ya? Lala. Lomunu lẹ 6:7 dọmọ: “Ewọ he kú ko yin whẹsuna sọn ylando etọn mẹ.” Ehe dohia dọ mawadodonọ he kú lẹ ko suahọ ylando he yé wà wayi lẹ tọn. Enẹwutu, nuhe yé wà to fọnsọnku yetọn godo lẹ wẹ yè na pọ́n bo do dawhẹna yé, e ma yin nuhe yé wà to whenue yé ma yọ́n nudepope gando Jiwheyẹwhe go lẹ wẹ gba. Ale tẹwẹ enẹ na hẹnwa na yé?
18-24 FÉVRIER
NUHỌAKUẸ LẸ SỌN OHÓ JIWHEYẸWHE TỌN MẸ | LOMUNU LẸ 7-8
w12 15/7 11 huk. 17
Dike Jehovah Ni Deanana We Yì Mẹdekannujẹ Nujọnu Tọn Kọ̀n
17 To whenue Paulu to hodọdo mẹdekannujẹ he Jehovah tindo to sẹdotẹnmẹ na devizọnwatọ aigba ji tọn etọn lẹ ji, e wlan dọmọ: “Nukundido vẹkuvẹku nudida tọn to tenọpọn awusọhia visunnu Jiwheyẹwhe tọn lẹ tọn.” Enẹgodo, e yidogọ dọmọ: “Nudida lọsu na ede [na] yin hinhẹn jẹ mẹdekannu sọn afanumẹ-yinyin na gbigble mẹ bo tindo mẹdekannujẹ gigonọ he yin ovi Jiwheyẹwhe tọn lẹ tọn.” (Lom. 8:19-21) “Nudida” he yin nùdego tofi nọtena gbẹtọvi lẹ he tindo todido nado nọgbẹ̀ to aigba ji bo na mọaleyi sọn “awusọhia” visunnu yí gbigbọ do de Jiwheyẹwhe tọn lẹ tọn mẹ. Awusọhia enẹ na bẹjẹeji to whenue “visunnu” ehelẹ na gọalọna Klisti to olọn mẹ nado và mẹylankan lẹpo sudo sọn aigba ji bosọ whlẹn “gbẹtọ susugege de” nado luntọ́n biọ titonu yọyọ lọ mẹ.—Osọ. 7:9, 14.
w12 15/3 23 huk. 11
Mì Gbọ Mí Ni Nọ Jaya to Todido Mítọn Mẹ
11 Jehovah ze “dodonu todido tọn” donukọnna gbẹtọvi lẹ to whenue e dopagbe nado whlẹn yé sọn “odàn hoho lọ,” Satani Lẹgba si gbọn “okún” dopagbe lọ gblamẹ. (Osọ. 12:9; Gẹn. 3:15) Jesu Klisti wẹ adà tintan “okún” lọ tọn. (Gal. 3:16) Gbọn okú po fọnsọnku etọn po gblamẹ, Jesu hẹn ẹn yọnbasi na gbẹtọvi lẹ nado tindo todido dọ yé na yin tuntundote sọn kanlinmọgbenu ylando po okú po tọn si. Hẹndi todido ehe tọn tindo kanṣiṣa hẹ “awusọhia visunnu Jiwheyẹwhe tọn lẹ tọn.” Mẹyiamisisadode he ko yin yẹyidogona lẹ wẹ yin adà awetọ “okún” lọ tọn. Yé na ‘sọawuhia’ to whenue yé na gọalọna Klisti nado và aihọn ylankan Satani tọn sudo. (Osọ. 2:26, 27) Ehe na dekọtọn do whlẹngán mẹ na lẹngbọ devo he ko jugbọn nukunbibia daho lọ mẹ lẹ.—Osọ. 7:9, 10, 14.
w12 3/15 23 huk. 12
Mì Gbọ Mí Ni Nọ Jaya to Todido Mítọn Mẹ
12 Kọgbọ nankọ die “nudida” he yin gbẹtọvi lẹ na mọ to Gandudu Owhe Fọtọ́n Klisti tọn whenu! To whenẹnu, “visunnu Jiwheyẹwhe tọn” he ko yin yẹyidogona lẹ na ‘sọawuhia’ whladopo dogọ to whenue yé na sẹ̀n taidi yẹwhenọ lẹ hẹ Klisti bo na gọalọna gbẹtọvi lẹ nado mọaleyi sọn avọ́sinsan ofligọ etọn tọn mẹ. Taidi mẹjidugando Ahọluduta olọn tọn lẹ tọn, gbẹtọvi lẹ na jẹ tundote mọyi ji sọn nuyiwadomẹji ylando po okú po tọn si. Vudevude, gbẹtọvi tonusetọ lẹ na “yin hinhẹn jẹ mẹdekannu sọn afanumẹ-yinyin na gbigble mẹ.” Eyin yé gbọṣi nugbonọ-yinyin mẹ na Jehovah to owhe fọtọ́n lọ whenu podọ to mẹtẹnpọn godo tọn he na wá aimẹ to vivọnu owhe fọtọ́n lọ tọn mẹ, yinkọ yetọn na yin kinkan do “owe-hihá ogbẹ̀ tọn lọ” mẹ kakadoi. Yé na biọ “mẹdekannujẹ gigonọ he yin ovi Jiwheyẹwhe tọn lẹ tọn” mẹ. (Osọ. 20:7, 8, 11, 12) Todido gigonọ de wẹ ehe yin nugbonugbo!
Onú Sisosiso Gbigbọmẹ Tọn Lẹ
w17.06 3
Be Hiẹ Flin Ya?
Vogbingbọn tẹwẹ tin to “ayiha zizedo agbasalan ji” po “ayiha zizedo gbigbọ ji” po ṣẹnṣẹn? (Lom. 8:6)
Mẹhe nọ joawuna tintan lọ nọ ze ayiha do ojlo po ayilinlẹn agbasa mapenọ tọn etọn lẹ po ji, nọ to hodọ mapote gando onú agbasalan tọn lẹ go, bosọ nọ doawagun to yé mẹ. Mẹhe nọ joawuna awetọ lọ nọ dike gbẹzan etọn blebu ni tin to kọndopọ mẹ hẹ Jiwheyẹwhe po linlẹn etọn lẹ po; podọ gbigbọ wiwe wẹ nọ deanana Klistiani mọnkọtọn. Tintan lọ nọ dekọtọn do okú mẹ, awetọ lọ nọ dekọtọn do ogbẹ̀ po jijọho po mẹ.—w16.12, w. 15-17.
w09 15/11 7 huk. 20
Etẹwẹ Odẹ̀ Towe lẹ Nọ Dohia Gando Gowe?
20 To whedelẹnu, mí sọgan nọma yọ́n nuhe mí na dọ to odẹ̀ mẹdetiti tọn mítọn lẹ mẹ. “Mí ma yọ́n nuhe mí na hodẹ̀ na dile e jẹna mí do,” wẹ Paulu wlan, “ṣigba [gbigbọ wiwe] lọsu yí winwẹ̀n he yè ma sọgan dọtọ́n do to vẹvẹ na mí. Podọ [Jiwheyẹwhe] he to ayiha mẹ dinpọn yọ́n nuhe ayiha [gbigbọ] tọn yin.” (Lom. 8:26, 27) Jehovah hẹn ẹn diun dọ odẹ̀ susu yin kinkàndai to Owe-wiwe mẹ. E nọ kẹalọyi nuhe yin bibiọ to gbọdo glọ enẹlẹ taidi nuhe mí tindo nuhudo yetọn, bosọ nọ hẹn yé di. Jiwheyẹwhe yọ́n mí bo yọ́n zẹẹmẹ nuhe gbigbọ etọn whàn wekantọ Biblu tọn lẹ nado basi kandai yetọn lẹ tọn. Eyin gbigbọ “vẹvẹ” do ota mítọn mẹ, Jehovah nọ sè. Ṣigba eyin mí jẹakọ hẹ Ohó Jiwheyẹwhe tọn ganji, nuhe mí na biọ to odẹ̀ mẹ lẹ na nọ wá ayiha mẹ na mí to jọwamọ-liho.
25 FÉVRIER–3 MARS
NUHỌAKUẸ LẸ SỌN OHÓ JIWHEYẸWHE TỌN MẸ | LOMUNU LẸ 9-11
“Apajlẹ Atin Olivie Tọn lọ Tọn”
w11 15/5 23 huk. 13
‘Lehe Nuyọnẹn Jiwheyẹwhe Tọn Siso Do Sọ!’
13 Apọsteli Paulu yí mẹhe na lẹzun apadewhe okún Ablaham tọn lẹ tọn jlẹdo alà atin olivie yẹhiadonu tọn lẹ go. (Lom. 11:21) Atin olivie tọn he yin dido dó jipa de mẹ ehe nọtena hẹndi lẹndai Jiwheyẹwhe tọn gando alẹnu he e basi hẹ Ablaham go. Adọ̀ atin lọ tọn yin wiwe podọ e nọtena Jehovah mẹhe nagbẹ̀ Islaeli gbigbọmẹ tọn. (Isa. 10:20; Lom. 11:16) Gotò atin lọ tọn nọtena Jesu he yin adà tintan okún Ablaham tọn. Alà atin lọ tọn lẹ nọtena ‘sọha gigọ́’ mẹhe yin adà awetọ okún Ablaham tọn lẹ tọn.
w11 15/5 24 huk. 15
‘Lehe Nuyọnẹn Jiwheyẹwhe Tọn Siso Do Sọ!’
15 To whelọnu lo, etẹwẹ Jehovah wà nado hẹn lẹndai etọn di? Paulu basi zẹẹmẹ dọ alà he yin hinhẹnwa sọn atin olivie nukanmẹ tọn go lẹ yin tùntùn do olivie he yè do dó jipa de mẹ go nado diọ dehe yin finfẹ́n sẹ̀ lẹ. (Hia Lomunu lẹ 11:17, 18.) Enẹwutu, to aliho he ma yin tlọlọ mẹ, Klistiani yiamisisadode he wá sọn akọta lẹ mẹ, taidi mẹdelẹ to agun Lomu tọn mẹ yin tùntùn do atin olivie yẹhiadonu tọn ehe go. Gbọnmọ dali, yé lẹzun apadewhe okún Ablaham tọn. To dowhenu, yé tin taidi alà olivie nukanmẹ tọn lẹ, bo ma tindo dotẹnmẹ hundote depope nado yin apadewhe alẹnu vonọtaun ehe tọn. Ṣigba, Jehovah hùn dotẹnmẹ lọ dotena yé nado lẹzun Ju gbigbọmẹ tọn lẹ.—Lom. 2:28, 29.
w11 15/5 25 huk. 19
‘Lehe Nuyọnẹn Jiwheyẹwhe Tọn Siso Do Sọ!’
19 Mọwẹ, lẹndai Jehovah tọn gando “Islaeli Jiwheyẹwhe tọn” go to hẹndi mọyi to aliho jiawu de mẹ. (Gal. 6:16) Kẹdẹdile Paulu dọ do, “Islaeli lẹpo na yin whinwhlẹngán.” (Lom. 11:26) To ojlẹ sisọ Jehovah tọn mẹ, “Islaeli lẹpo”—enẹ wẹ sọha pipé Islaelivi gbigbọmẹ tọn lẹ tọn—na sẹ̀n taidi ahọlu lẹ po yẹwhenọ lẹ po to olọn mẹ. Nudepope ma sọgan glọnalina lẹndai Jehovah tọn enẹ!
Onú Sisosiso Gbigbọmẹ Tọn Lẹ
w13 15/6 25 huk. 5
Kẹalọyi Anademẹ Jehovah Tọn
5 Eyin gbẹtọvi lẹ gbọn tasinsinyẹn dali gbẹ́ ma nado kẹalọyi anademẹ Zẹ́ndotọ Daho lọ tọn, nawẹ ewọ nọ yí aṣẹpipa etọn zan gbọn? Lẹnnupọndo ehe ji: Etẹwẹ zẹ́ndotọ de sọgan wà eyin okò de ma wá na nuhe zẹ́ndotọ lọ jlo? Zẹ́ndotọ lọ sọgan yí i do basi núzinzan wunmẹ devo kavi ze e dlan. To paa mẹ, eyin okò de ma yọ́n-na-yizan, zẹ́ndotọ lọ go wẹ owhẹ̀ lọ nọ sọn. Ṣigba, e ma nọ yinmọ na Zẹ́ndotọ mítọn pọ́n gbede. (Deut. 32:4) Eyin mẹde ma kẹalọyi anademẹ Jehovah tọn, owhẹ̀ mẹlọ lọsu tọn wẹ e nọ yin. Lehe Jehovah nọ yinuwa hẹ gbẹtọ lẹ do nọ sinai do lehe yé yinuwa hlan anademẹ etọn do ji. Mẹhe kẹalọyi anademẹ etọn lẹ nọ mọaleyi sọn e mẹ. Di apajlẹ, Klistiani yiamisisadode lẹ yin “núzinzan lẹblanu tọn lẹ” he Jiwheyẹwhe yí do basi ‘núzinzan lẹ na yizan yẹyi tọn.’ To alọ devo mẹ, mẹhe gbọn tasinsinyẹn dali diọnukunsọ Jiwheyẹwhe lẹ nọ wá lẹzun “núzinzan homẹgble tọn lẹ he jẹna vasudo.”—Lom. 9:19-23.
it-1-F 1234 huk. 6
Whànwu, Awuwhàn
Zohunhun Agọ̀. Mẹde gán tindo zohunhun kavi awuwhàn gando nude go, ṣogan bọ e gán yin to aliho agọ̀ mẹ bo ma na hẹn homẹhun Jiwheyẹwhe. Enẹ jọ do Ju susu go to owhe kanweko tintan whenu. Yé nọ dín nado yin pinpọnhlan di dodonọ gbọn azọ́n yetọn titi lẹ gblamẹ to Osẹ́n Mose tọn glọ. Amọ́, Paulu dohia dọ zohunhun agọ̀ wẹ yé tindo, na yé ma tindo oyọnẹn he pegan. Enẹwutu, Jiwheyẹwhe ma kẹalọyi yé di dodonọ. Nado mọ whẹdida dodo po mẹdekannujẹ po yí sọn whẹgbledomẹ Osẹ́n lọ tọn si, yé dona doayi nuṣiwa yetọn go bo lẹhlan Jiwheyẹwhe dè gbọn Klisti gblamẹ. (Lo 10:1-10) Saulu Talṣiṣi tọn yin dopo to omẹ mọnkọtọn lẹ mẹ, e tindo zohunhun he zẹ̀pá na sinsẹ̀n Ju lẹ tọn sọmọ, bo “dohomẹkẹn agun Jiwheyẹwhe tọn sinsinyẹn bo nọ tẹnpọn nado sukúndona ẹn.” E tẹdo Osẹ́n lọ go majomajo sọmọ bo nọ “do [ede] hia taidi mẹhe madoblọ.” (Ga 1:13, 14; Flp 3:6) Amọ́, zohunhun agọ̀ wẹ e tindo na sinsẹ̀n Ju lẹ tọn. Gbẹtọ ahundoponọ wẹ, enẹwutu Jehovah do nukundagbe majẹhẹ hia ẹ gbọn Klisti gblamẹ bo dọ̀n ẹn wá sinsẹ̀n-bibasi nugbo mẹ.—1Ti 1:12, 13.