Whetẹnu Wẹ Ogbẹ̀ lọ Na Vọ̀? Nuhe Jesu Dọ

PỌ́N ONÚ AWE DELẸ HE JESU DỌ GANDO OGBẸ̀ LỌ SIN VIVỌ̀ GO:

“Enẹwutu, mì gbọṣi nukle, na mì ma yọ́n azán kavi gànmẹ lọ gba.”—MATIU 25:13.

“Mì nọ họ́ali, mì nọ họ́ mìde, na mì ma yọ́n whenue ojlẹ dide lọ na wá.”—MALKU 13:33.

Enẹwutu, mẹde ma to aigba ji bo gán dọ whenue ogbẹ̀ na vọ̀ taun. Amọ́, Jiwheyẹwhe ko de “ojlẹ dide” de, whenue ogbẹ̀ na vọ̀ do. E ko de ‘azán po gànmẹ lọ po.’ (Matiu 24:36) Be enẹ dohia dọ mí ma gán yọnẹn eyin ogbẹ̀ lọ sin vivọ̀ ko to sisẹpọ wẹ ya? E ma yinmọ paali. Jesu dọna devi etọn lẹ dọ yé na mọ nudelẹ he na dohia dọ ogbẹ̀ lọ sin vivọ̀ ko sẹpọ.

OHIA HE MÍ NA MỌ LẸ

Onú voovo enẹlẹ wẹ na yin ‘ohia vivọnu titonu lọ tọn.’ Jesu dọ dọ: “Akọta na fọ́n do akọta ji podọ ahọluduta do ahọluduta ji, bọ núdùdù whèdomẹ po aigba sisọsisọ lẹ po na tin sọn fide jẹ fide.” (Matiu 24:3, 7) E sọ dọ dọ “azọ̀nylankan lẹ,” enẹ wẹ azọ̀n bẹplamẹ lẹ, na tin. (Luku 21:11) Be a to nuhe Jesu dọ dọ e na jọ lẹ mọ ya?

To egbehe, awhàn, huvẹ po aigba sisọsisọ po to núgbà badabada, podọ mí ma ko nọ dọ azọ̀n de hó fó bọ devo nọ wá. Di apajlẹ to 2004, aigba sisọsisọ sinsinyẹn de gbànú to lẹdo Ohù Inde tọn mẹ, ehe zọ́n bọ ohù fọnadán bo hù gbẹtọ 225 000 nkọ. To owhe atọ̀n gblamẹ, azọ̀nylankan COVID-19 ko hù gbẹtọ livi 6 daa linlán to ogbẹ̀ lọ mẹ. Jesu dọ dọ onú ehelẹ nkọ na dohia dọ ogbẹ̀ lọ sin vivọ̀ ko sẹpọ.

“AZÁN GODO TỌN LẸ”

Biblu ylọ ojlẹ he na jẹnukọnna ogbẹ̀ lọ sin vivọ̀ dọ “azán godo tọn lẹ.” (2 Pita 3:3, 4) Timoti awetọ weta 3 wefọ 1 jẹ 5 dohia dọ jijọ gbẹtọ lẹ tọn na ylan deji to azán godo tọn lẹ mẹ. (Hia apotin lọ “Jijọ Delẹ He Na Dohia Dọ Ogbẹ̀ Jlo Na Vọ̀.”) Be a ma nọ mọdọ ṣejannabi, nukunkẹn po kanyinylan po nọ tọ́n to walọ mẹlẹ tọn mẹ bọ mẹde masọ nọ dọ mẹde tọn ba ya? Ehe lọsu dohia dọ ogbẹ̀ lọ sin vivọ̀ ko sẹpọ taun.

Ojlẹ nẹmu wẹ azán godo tọn lẹ na dẹn na? Biblu dọ dọ “whenu gli de” janwẹ pò. Enẹgodo, Jiwheyẹwhe na và “mẹhe to aigba husudo lẹ.”—Osọhia 11:15-18, nudọnamẹ odò tọn; 12:12.

ZANDE DIN AIGBA NA LẸZUN PALADISI!

Jiwheyẹwhe ko de azán po ogàn he mẹ e na và ogbẹ̀ ylankan ehe sudo po. (Matiu 24:36) Amọ́, owẹ̀n dagbe de die: Jiwheyẹwhe “ma jlo dọ mẹdepope ni yin vivasudo.” (2 Pita 3:9) E to alọgọna gbẹtọ lẹ nado yọ́n nuhe e jlo dọ mí ni wà bo nọ setonuna ẹn. E jlo dọ mí ni gán whenue ogbẹ̀ lọ na vọ̀ bo nọ ogbẹ̀ yọyọ lọ mẹ to whenue aigba na lẹzun paladisi.

Jiwheyẹwhe ko ze tito de dai bo to mẹlẹ plọn to ogbẹ̀ lọ blebu mẹ. Enẹ na zọ́n bọ yé na yọ́n nuhe yé na wà nado nọ ogbẹ̀ yọyọ lọ mẹ to Gandudu etọn glọ. Jesu ko dọ dai dọ yè na lá wẹndagbe he gando Ahọluduta Jiwheyẹwhe tọn go “to aigba fininọ lẹpo ji.” (Matiu 24:14) Lẹdo aihọn pé, Kunnudetọ Jehovah tọn lẹ zan gànhiho liva susu nado dọyẹwheho bo plọn owẹ̀n he to Biblu mẹ mẹlẹ. Owẹ̀n enẹ nọ namẹ todido. Jesu dọ dọ whẹpo ogbẹ̀ lọ na vọ̀, yè na dọyẹwheho gbọn aigba lọ blebu ji.

Azán kaka de ma pò to gbàn ji na gandudu gbẹtọ tọn. Jiwheyẹwhe jlo dọ a ni gán to whenue ogbẹ̀ lọ na vọ̀. E dopà dọ aigba na lẹzun Paladisi bo jlo dọ a ni nọ finẹ. Hosọ he bọdego na dọ nuhe a gán wà nado nọ ogbẹ̀ yọyọ enẹ mẹ.