Etẹwẹ A Gán Wà Nado Nọ Ogbẹ̀ Yọyọ lọ Mẹ?

Hosọ he wayi lẹ plọn mí dọ Jiwheyẹwhe na de mẹylankan po nuhahun voovo he mí nọ pehẹ lẹ po sẹ̀. Naegbọn mí gán kudeji dọ e ma na gblá? Na Jiwheyẹwhe wẹ dopà to Ohó etọn Biblu mẹ bo dọ dọ:

“Aihọn to jujuyi.”—1 JOHANU 2:17.

Nuhe zọ́n bọ mí sọgan kudeji dọ mẹlẹ na gán wẹ yindọ wefọ lọ sọ dọ dọ:

“Mẹhe wà ojlo Jiwheyẹwhe tọn na gbọṣi aimẹ kakadoi.”

E bayi dọ ojlo Jiwheyẹwhe tọn wẹ mí dona wà bo nado mọ whlẹngán. Mí dona yọ́n Jiwheyẹwhe whẹ́ whẹpo do yọ́n ojlo etọn.

MÍ DONA “YỌ́N” JIWHEYẸWHE NADO MỌ WHLẸNGÁN

Jesu dọ dọ: “Ehe wẹ ogbẹ̀ madopodo, dọ yé ni wá yọ́n hiẹ Jiwheyẹwhe nugbo dopo kẹdẹ lọ.” (Johanu 17:3) Jiwheyẹwhe wẹ mí na ‘yọnẹn,’ eyin mí na mọ whlẹngán bo nọgbẹ̀ kakadoi. Eyin mí tlẹ yigbe dọ Jiwheyẹwhe tin kavi yọ́n onú taun-taun delẹ gando e go, enẹ ma ko pé. E nasọ yọ́n dọ mí ni yin họntọn etọn lẹ. Eyin omẹ awe jlo dọ họntọn yetọn ni vivi, yé dona nọ zan whenu dopọ. Onú dopolọ wẹ mí dona wà eyin mí jlo na yin họntọn po Jiwheyẹwhe po. Todin, mí na mọ nuhe Biblu dọ mí ni wà nado jihọntọn hẹ Jiwheyẹwhe. Mí nasọ mọ nuhe mí na wà bọ họntọn mítọn ma na gble.

NỌ HIA BIBLU HE YIN OHÓ JIWHEYẸWHE TỌN EGBESỌEGBESỌ

Mí nọ dùnú, na enẹ wẹ nọ zọ́n bọ mí do nọ nọgbẹ̀. Amọ́, Jesu dọ dọ: “Gbẹtọ ma nọ nọgbẹ̀ gbọn núdùdù kẹdẹ dali gba, ṣigba gbọn ohó he nọ tọ́n sọn onù Jehovah tọn mẹ lẹpo dali.”—Matiu 4:4.

Biblu mẹ wẹ mí nọ mọ ohó he nọ tọ́n sọn onù Jehovah tọn mẹ lẹ te. Eyin a nọ plọn owe wiwe ehe, a na mọ nuhe Jiwheyẹwhe wà wayi lẹ, nuhe e to wiwà to alọnu po nuhe e na wà to osọ he ja po.

NỌ HODẸ̀ BO NỌ BIỌ ALỌGỌ JIWHEYẸWHE TỌN

Mí ni dọ dọ a jlo na setonuna Jiwheyẹwhe bọ e ka to awuvẹ na we nado jo nuhe e gbẹwanna lẹ do. Eyin mọ wẹ, etẹwẹ a gán wà? Jiwheyẹwhe yinyọnẹn ganji wẹ na gọalọna we to ninọmẹ mọnkọ mẹ.

Pọ́n apajlẹ nawe gblewanọ de tọn he mí na ylọdọ Sakura. Whenue e jẹ Biblu plọn ji, e wá mọdọ Jiwheyẹwhe degbe dọ mí ni “họ̀nna fẹnnuwiwa zanhẹmẹ tọn.” (1 Kọlintinu lẹ 6:18) Enẹ wẹ zọ́n bọ Sakura nọ hodẹ̀, na Jiwheyẹwhe nido gọalọna ẹn, na e nido jo aṣa ylankan enẹ do. Amọ́, e gbẹ́ nọ vẹawuna ẹn. Nuhe e dọ die: “Eyin gblewa sin linlẹn lẹ jẹ ayiha mẹ wá na mi ji, n’nọ hodẹ̀ hlan Jehovah bo nọ dọ homẹ na ẹn, na n’yọnẹn dọ yẹn ṣo ma na pé e go. Dẹ̀hiho gọalọna mi bọ n’vẹ́ po Jehovah po.” Gbọnvona Sakura, gbẹtọ livilivi lẹ wẹ wá yọ́n Jiwheyẹwhe. Jiwheyẹwhe nọ gọalọna yé nado diọ jijọ bo setonuna ẹn.—Filipinu lẹ 4:13.

Eyin a yọ́n Jiwheyẹwhe ganji, mọ wẹ ‘Jiwheyẹwhe lọsu na yọ́n’ we do niyẹn, bọ mì omẹ awe lẹ na yin họntọn vivẹ́. (Galatianu lẹ 4:9; Salmu lẹ 25:14) Enẹ na zọ́n bọ a na gán bo na nọ ogbẹ̀ yọyọ he Jiwheyẹwhe na hẹnwa lọ mẹ. Amọ́, nawẹ nulẹ na te to ogbẹ̀ yọyọ enẹ mẹ? Mí na dọhodo enẹ ji to hosọ he bọdego mẹ.