Kanbiọ lẹ sọn Wehiatọ lẹ Dè

Nukun tẹwẹ Kunnudetọ Jehovah tọn lẹ dona nọ yí do pọ́n nọtẹn dopedido tọn lẹ yiyizan nado dín alọwlemẹ?

Matin ayihaawe, ojlo Jehovah tọn wẹ yindọ mẹhe wlealọ lẹ ni do ayajẹ, bosọ duvivi haṣinṣan pẹkipẹki he dẹn-to-aimẹ de tọn to yede ṣẹnṣẹn. (Mat. 19:4-6) Eyin a jlo na wlealọ, nawẹ a gán mọ alọwlemẹ dagbe de gbọn? Taidi Mẹdatọ mítọn, Jehovah yọ́n nuhe na zọ́n bọ mí na do kọdetọn dagbe to whenue mí to họntọn mẹ, podọ to whenue mí wlealọ. Enẹwutu, eyin a yí nunọwhinnusẹ́n he e na mí lẹ do yizan mẹ, a na do ayajẹ nujọnu tọn. Lẹnnupọndo delẹ to nunọwhinnusẹ́n enẹlẹ mẹ ji.

Tintan, mí dona mọnukunnujẹ nugbo ehe mẹ gando míde go: “Ahun nọ klọmẹ hú nulẹpo bosọ yin owùnu.” (Jel. 17:9) Dile mẹde to tintẹnpọn nado mọ alọwlemẹ sọgodo tọn de bo dọ̀n ẹn, numọtolanmẹ sinsinyẹn lẹ gán yawu fọndote bosọ glọnalina nulinlẹnpọn to aliho he sọgbe mẹ. Eyin numọtolanmẹ kẹdẹ wẹ deanana mẹde nado bayi nudide bo wlealọ, nugbajẹmẹji mẹ wẹ e nọ wá dekọtọn do. (Howh. 28:26) Enẹwutu whenue omẹ awe to họntọn mẹ, e ma yin nuyọnẹnnu nado yawu jẹ owanyi dohia yede ji kavi yawu jẹ gbemima lẹ bayi ji whẹpo do wá yọ́n yede ganji.

Howhinwhẹn lẹ 22:3 dọmọ: “Zinzintọ nọ mọ owù hlan bo nọ whlá ede, ṣigba, wunvinọ nọ dlí biọ e mẹ bo nọ jiya kọdetọn etọn lẹ tọn.” Naegbọn e gán yin owùnu nado nọ yí nọtẹn dopedido tọn lẹ zan? E blawu dọ mẹdelẹ ko biọ họntọn mẹ hẹ mẹhe yé dukosọna to Intẹnẹt ji lẹ whẹpo do wá mọdọ omẹ ehelẹ tafu emi wẹ. Humọ, gbẹtọ nugbomadọtọ lẹ nọ ze nọtẹn Intẹnẹt tọn delẹ dai nado hò wunvinọ lẹ dù. To whedelẹnu, mẹhe nọ wà nuylankan mọnkọ lẹ tlẹ nọ dọ dọ emi yin Kunnudetọ.

Lẹnnupọndo owù devo ji. Nọtẹn dopedido tọn delẹ nọ yí azọ́nwanu nulinlẹn tọn lẹ zan nado yọ́n mẹhe gán jẹ hẹ yedelẹ. Amọ́, kunnudenu depope ma tin dọ onú mọnkọ lẹ nọ wazọ́n nugbonugbo. Be nuyọnẹnnu wẹ e na yin nado dejido nuzedai gbẹtọvi tọn lẹ go nado do kọdetọn dagbe to whẹho titengbe de taidi alọwle mẹ ya? Mí ma gán yí azọ́nwanu ọdinatẹẹ tọn lẹ jlẹdo nunọwhinnusẹ́n Biblu tọn lẹ go pọ́n gbede.—Howh. 1:7; 3:5-7.

Nunọwhinnusẹ́n de he to Howhinwhẹn lẹ 14:15 mẹ dọ dọ: “Wunvinọ nọ yí ohó lẹpo sè, ṣigba, zinzintọ nọ lẹnnupọndo afọdide dopodopo ji.” Whẹpo a nido pọ́n mẹde hlan taidi alọwlemẹ sọgodo tọn, e na yọ́n nado jẹakọ hẹ mẹlọ ganji. Amọ́, eyin Intẹnẹt ji kẹdẹ wẹ mì nọ pé te, e gán vẹawu nado jẹ yanwle enẹ kọ̀n. Eyin mì tlẹ nọ do nudọnamẹ lẹ hlan ode awetọ, bosọ nọ yí whenu susu zan nado kanwehlan mìde, be mì gán dọ nugbonugbo dọ emi yọ́n omẹ enẹ ya? Mẹhe nọ lẹndọ emi ko mọ mẹyiwanna emitọn delẹ nọ wá jẹflumẹ sinsinyẹn to whenue yé mọ mẹlọ nukun sọ nukun to godo mẹ.

Salmu-kantọ lọ dọmọ: “Yẹn ma nọ dogbẹ́ hẹ mẹklọtọ lẹ, podọ yẹn nọ dapana mẹhe nọ whlá nuhe yé yin lẹ.” (Salm. 26:4) Mẹdelẹ nọ mọdọ e ma ylan nado dolalo to nudọnamẹ he yé nọ na gando yede go to Intẹnẹt ji lẹ mẹ whenue yé to alọwlemẹ de dín, na enẹ na zọ́n bọ yé na dọ̀n mẹlẹ dogọ. Yé gán whlá omẹ alọpa he yé yin nugbonugbo kavi nọma do e hia to whenue yé to nuyiwa hẹ mẹdevo lẹ to Intẹnẹt ji. Dile etlẹ yindọ mẹdelẹ gán nọ do yede hia taidi Kunnudetọ Jehovah tọn, be yé yin Klistiani he ko yí baptẹm lẹ nugbonugbo ya? Be yé whèwhín to gbigbọ-liho ya? Be yé do haṣinṣan mẹdetiti tọn de hẹ Jehovah ya? Be mẹlẹ nọ na yé sisi to agun yetọn mẹ ya? Kavi vlavo apajlẹ ylankan, kavi etlẹ yin “gbẹdido ylankan lẹ” wẹ yé yin? (1 Kọl. 15:33; 2 Tim. 2:20, 21) Podọ, be yé vò sọgbe hẹ Owe-wiwe lẹ nado wlealọ ya? A dona yọ́n onú ehelẹ, amọ́ e nọ vẹawu eyin a ma dọhodopọ hẹ Kunnudetọ devo he yọ́n mẹlọ ganji lẹ. (Howh. 15:22) Humọ, e họnwun dọ e ma na tlẹ wá ayiha mẹ na devizọnwatọ nugbonọ Jehovah tọn de nado biọ “zẹgẹ he ma sọzẹn de glọ” hẹ mayisenọ de.—2 Kọl. 6:14; 1 Kọl. 7:39.

Na nugbo tọn, nọtẹn dopedido tọn lẹ yiyizan do owù taun, amọ́ aliho he pọnte hugan lẹ tin nado dín alọwlemẹ de bo wleawuna haṣinṣan dagbe de he gán wá dekọtọn do alọwle he do yẹyi de mẹ. Dotẹnmẹ tẹlẹ whenu wẹ a gán dukosọna alọwlemẹ sọgodo tọn de te? Eyin yè ma dosẹ́n gando pipli dopọ lẹ go, Kunnudetọ Jehovah tọn lẹ gán mọ yede nukun sọ nukun to opli lẹ, plidopọ lẹ po nuwiwa pọmẹ tọn devo lẹ po tẹnmẹ.

Eyin e ma yọnbayi nado pli dopọ to gbangba, taidi to azọ̀n bẹplamẹ COVID-19 tọn whenu, mí nọ yí nuyizan lẹtliki tọn lẹ zan nado bayi opli agun tọn lẹ, fie dotẹnmẹ gán hundote na mí nado jẹakọ hẹ Kunnudetọ tlẹnnọ devo lẹ te. A gán pọ́n lehe yé nọ ze azọ́n yetọn lẹ donukọnnamẹ to opli lẹ ji gọna lehe yé nọ bayi gbeyiyi gbangba tọn yise yetọn tọn do. (1 Tim. 6:11, 12) Mì gán sọ penugo nado dọhodopọ to pipli kleunkleun lẹ mẹ to opli lẹ godo. To whenue Kunnudetọ lẹ pli na nuwiwa pọmẹ tọn lẹ to nuyizan Intẹnẹt ji tọn lẹ ji, a gán nọ doayi lehe mẹhe a do ojlo na lọ nọ yinuwa hẹ mẹdevo lẹ do go, podọ enẹ gán do mẹhe e yin nugbonugbo hia. (1 Pita 3:4) Dile ojlẹ to yìyì bọ mì to akọjẹ hẹ mìde dogọ, mì gán wá yọnẹn eyin vlavo yanwle po nujinọtedo mìtọn lẹ po yin dopolọ, podọ eyin mìmẹ awe lẹ jẹ hẹ mìde nugbonugbo.

Eyin tlẹnnọ lẹ nọ dín alọwlemẹ sọgodo tọn lẹ to aliho he sọgbe hẹ nunọwhinnusẹ́n Biblu tọn lẹ mẹ, e yọnbayi dogọ dọ yé ni mọ nugbo-yinyin howhinwhẹn lọ tọn he dọmọ: “Mẹhe mọ asi [kavi asu] dagbe dà ko mọ nudagbe de, bosọ mọ nukundagbe Jehovah tọn.”—Howh. 18:22.