LEHE MÍ GÁN GBAWHÀN WANGBẸNA TỌN DO

1 | Ma Nọ Homẹnukuntapọn Blo

Nuhe Biblu Plọn Mí:

“Jiwheyẹwhe ma yin mẹnukuntahopọntọ gba, ṣigba to akọta lẹpo mẹ, [mẹdepope he] nọ dibusi i bo nọ wà dodo wẹ e nọ kẹalọyi.”—OWALỌ LẸ 10:34, 35.

Nuhe E Zẹẹmẹdo:

Jehovaha Jiwheyẹwhe ma nọ pọ́n otò, akọ̀, sinmẹ agbasa tọn kavi aṣa mítọn do dawhẹna mí. Kakatimọ, e nọ ze ayiha do mẹhe mí yin taun ji—enẹ wẹ gbẹtọ homẹ tọn mítọn. Biblu dọmọ, “na nuhe sọawuhia to nukunta wẹ gbẹtọ nọ pọ́n, amọ́ ahun mẹ wẹ Jehovah nọ pọ́n.”—1 Samuẹli 16:7.

Nuhe A Gán Wà:

Dile etlẹ yindọ mí ma gán mọ ahun mẹ, mí gán dovivẹnu nado hodo apajlẹ Jiwheyẹwhe tọn bo ma nọ homẹnukuntapọn. Tẹnpọn ma nado nọ yí nukun dopolọ do pọ́n mẹlẹpo. Eyin a mọdọ emi nọ tindo pọndohlan agọ̀ gando mẹdevo lẹ go—vlavo mẹhe wá sọn akọ̀ kavi otò devo mẹ lẹ—nọ hodẹ̀ hlan Jiwheyẹwhe bo biọ ẹ dọ ni gọalọna we nado họ̀nadọna linlẹn mọnkọ lẹ. (Salmu lẹ 139:23, 24) Eyin a yí ahundopo do biọ Jehovah dọ ni na we huhlọn ma nado homẹnukuntapọn, a gán deji dọ e na dotoaina odẹ̀ towe lẹ bosọ gọalọna we.—1 Pita 3:12.

a Jehovah wẹ oyín mẹdetiti tọn Jiwheyẹwhe tọn.—Salmu lẹ 83:18.

“N’ma tlẹ ko sinai bo voawu to apá na yovo de pọ́n . . . Todin n’yin dopo to pipli mẹmẹsunnu lẹdo aihọn pé tọn mẹ.”—TITUS

Numimọ Jọnun—TITUS

E Gbawhàn Wangbẹna Tọn

Titus yin dawe de he to ogbẹ́ jaguda lẹ tọn de mẹ he nọ hoavùn sọta osẹ́n he gando akọ̀-ṣinṣinyan go lẹ. E dọmọ: “Mí nọ yì hotẹli po ahànnutẹn lẹ po, fie mẹyuu lẹ ma yin alọkẹyi te, po linlẹn lọ po nado dà avùn dai.” Titus yigbe dọ wangbẹna gọ́ ahun emitọn mẹ, podọ e yidogọ dọmọ: “Eyin n’to jlẹdọ hẹ mẹde, sunnu kavi yọnnu, yẹn whẹ́whẹ́ wẹ nọ linú mẹ.”

Titus jẹ didiọ ji whenue e jẹ Biblu plọn hẹ Kunnudetọ Jehovah tọn lẹ ji. Whenue e hia Biblu, e yinuwadeji sisosiso. Nuhe whàn ẹn taun wẹ opagbe sọgodo tọn gando aihọn yọyọ lọ go he dọmọ: “Okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.”—Osọhia 21:3, 4.

To bẹjẹeji, e vẹawuna Titus nado duto wangbẹna ji. E dọmọ: “E vẹawuna mi taun nado diọ aliho he mẹ n’nọ lẹnnupọn bo nọ yinuwa te lẹ.” Amọ́, nue gọalọna ẹn wẹ nuhe e plọn to Owalọ lẹ 10:34, 35 mẹ he dohia dọ Jiwheyẹwhe ma nọ homẹnukuntapọn.

Nawẹ nulẹ wá yì do? Titus dọmọ: “N’wá kudeji dọ Kunnudetọ Jehovah tọn lẹ wẹ yin sinsẹ̀n nugbo lọ na n’mọdọ yé nọ do owanyi hia ode awetọ yetọn lẹ, mahopọnna akọ̀ kavi sinmẹ agbasa tọn. Whẹpo n’tlẹ do yí baptẹm taidi Kunnudetọ de, hagbẹ agun lọ tọn de, he yin yovo basi oylọna mi yì owhé etọn gbè nado dùnú hẹ ẹ. E taidi odlọ na mi. N’ma tlẹ ko sinai bo voawu to apá na yovo de pọ́n, whẹpo yè na dọ na dùnú hẹ ẹ. Todin n’yin dopo to pipli mẹmẹsunnu lẹdo aihọn pé tọn mẹ.”