LEHE MÍ GÁN GBAWHÀN WANGBẸNA TỌN DO

2 | Ma Nọ Yiahọsu Blo

Nuhe Biblu Plọn Mí:

“Mì nọ yí oylan do suahọ oylan tọn na mẹdepope blo. . . . Eyin e yọnbasi, dile mì penugo do, mì nọ nọ̀ jijọho mẹ hẹ gbẹtọ lẹpo. . . . Mì yiahọsu na mìde blo, . . . na e ko yin kinkandai dọmọ: “‘Ṣie wẹ ahọsuyi; yẹn na suahọ etọn,’ wẹ Jehovah dọ.”—LOMUNU LẸ 12:17-19.

Nuhe E Zẹẹmẹdo:

Dile etlẹ yindọ jọwamọnu wẹ e yin nado gblehomẹ to whenue mẹde yinuwa hẹ mí to aliho he ma sọgbe mẹ, Jiwheyẹwhe ma nọ yigbena dọ mí ni yiahọsu. Kakatimọ, e jlo dọ mí ni nọtepọn emi nado jla mawadodo lẹpo do to madẹnmẹ.—Salmu lẹ 37:7, 10.

Nuhe A Gán Wà:

Eyin gbẹtọvi lẹ yiahọsu, ehe nọ zọ́n bọ wangbẹna sọ nọ sinyẹn dogọ. Enẹwutu, to whenue mẹde ṣinuwa do we kavi gbleawuna we, ma yiahọsu blo. Tẹnpọn nado duto dewe ji, bo yinuwa to aliho he na yidogọna jijọho mẹ. To ninọmẹ delẹ mẹ, e gán pọnte hugan nado wọnji whẹho lọ go. (Howhinwhẹn lẹ 19:11) Na nugbo tọn, eyin a mọdọ e na jla nude do, a gán de nado dọhodo whẹho lọ ji. Di apajlẹ, eyin yè wadanu do gowe, a gán de nado jẹwhẹ na ponọ lẹ kavi aṣẹpatọ devo lẹ.

Mí na gbleawuna míde eyin mí yiahọsu

Bọ eyin e taidi dọ aliho de ma tin nado didẹ whẹho lọ to jijọho mẹ lo? Kavi etẹwẹ a na wà eyin a ko wà nuhe go a pé lẹpo nado didẹ nuhahun lọ to jijọho mẹ bọ e glo? Ma yiahọsu blo. Na enẹ gán hẹn ninọmẹ lọ vantan wutu. Kakatimọ, gbawhàn wangbẹna tọn. A gán plọn nado ganjẹ aliho he mẹ Jiwheyẹwhe na didẹ whẹho lọ te go. “Ganjẹ ewọ go, e nasọ yinuwado ota towe mẹ.”—Salmu lẹ 37:3-5.

Numimọ Jọnun—ADRIÁN

E Duto Numọtolanmẹ Ahọsuyiyi Tọn Ji

To whenue Adrián to aflanmẹ, e nọ to avùnho pé nado yiahọsu, na e tindo wangbẹna wutu. E dọmọ: “N’nọ saba yí osò do hoavùn, podọ whlasusu wẹ n’nọ to kúdaa-gbẹ̀daa to tòhomẹ-liho lẹ ji po ohùn po gbọn filẹpo.”

Adrián jẹ Biblu plọn ji whenue e do owhe 16. E yidogọ dọmọ: “Dile n’to nukọnyi to Biblu pinplọn ṣie mẹ, n’mọdọ n’dona diọ walọ ṣie lẹ.” E dona jo wangbẹna do bo dealọ sọn danuwiwa mẹ. E yiwanna nuhe e plọn sọn Lomunu lẹ 12:17-19 mẹ lẹ taun, enẹ wẹ ma nado nọ yiahọsu. E dọmọ: “N’wá mọnukunnujẹemẹ dọ Jehovah na didẹ mawadodo lẹpo dile e jlo e do podọ to ojlẹ etọn mẹ. Vudevude, n’wá dealọ sọn danuwiwa mẹ.”

To whèjai dopo, jọja sunnu delẹ sọn jaguda-gbẹ́ he yin kẹntọ Adrián tọn to dai lẹ mẹ tọ́navùn in. Ogán lọ dawhá dọmọ: “Yiavùnlọna dewe!” Adrián yigbe dọ, “E jlo mi taun nado yiahọsu.” Amọ́, e hodẹ̀ kleun de hlan Jehovah bo tlọ́n filọ.

Adrián zindonukọn dọmọ: “To wunkẹngbe, n’vọ́ dukosọ hẹ ogán lọ. Homẹgble mi sinsinyẹn bọ n’jlo na yiahọsu, ṣigba whladopo dogọ, n’vẹ̀ Jehovah dọ ni gọalọna mi nado duto dee ji. E paṣa mi dọ dẹpẹ lọ wá dè e tlọlọ bo dọmọ: ‘Ma gblehomẹ na nuhe jọ to osọ zánmẹ blo, jaale bo jona mi. Nugbo lọ wẹ yindọ n’jlo na taidi hiẹ nkọ. N’jlo na plọn Biblu.’ Lehe homẹ ṣie hùn do sọ dọ n’penugo nado duto homẹgble ṣie ji! Enẹ wẹ zọ́n todin bọ mí do bẹ plọnmẹ Biblu de jẹeji.”