Nawẹ Jehovah Nọ Na Gblọndo Odẹ̀ Mítọn lẹ Tọn Gbọn?

1, 2. Etẹwẹ mí gán nọ kanse míde gando odẹ̀ mítọn lẹ go?

BE A ko kanse dewe pọ́n eyin Jehovah nọ na gblọndo na odẹ̀ towe lẹ ya? Eyin mọ wẹ, e ma yin hiẹ ṣo wẹ e to mọ na. Mẹmẹsunnu po mẹmẹyọnnu mítọn susu lẹ po wẹ ko lẹn mọ pọ́n, titengbe whenue yé to jujugbọn ojlẹ sinsinyẹn de mẹ. Eyin mí to awufiẹsa mẹ, mílọsu gán mọdọ e nọ vẹawu dogọ nado doayi lehe Jehovah to gblọndo na na odẹ̀ mítọn lẹ do go.

² Mì gbọ mí ni gbadopọnna nuhewutu mí gán deji dọ Jehovah nọ na gblọndo na odẹ̀ sinsẹ̀n-basitọ etọn lẹ tọn. (1 Joh. 5:15) Mí nasọ gbadopọnna kanbiọ ehelẹ: Naegbọn e gán nọ taidi na mí to whedelẹnu dọ Jehovah ma nọ na gblọndo na odẹ̀ mítọn lẹ? Aliho tẹlẹ mẹ wẹ Jehovah nọ na gblọndo na odẹ̀ mítọn lẹ te to egbehe?

JEHOVAH GÁN NỌMA NA GBLỌNDO DILE MÍ DONUKUN DO

3. Naegbọn Jehovah do jlo dọ mí ni nọ hodẹ̀ hlan emi?

³ Owe-wiwe lẹ hẹn mí deji dọ Jehovah yiwanna mí sisosiso, podọ mí họakuẹ to nukun etọn mẹ. (Hag. 2:7; 1 Joh. 4:10) Enẹwutu wẹ e dọna mí nado nọ biọ alọgọ emitọn to odẹ̀ mẹ. (1 Pita 5:6, 7) E jlo na gọalọna mí nado hẹn haṣinṣan pẹkipẹki de go hẹ ewọ, podọ nado pehẹ nuhahun mítọn lẹ po kọdetọn dagbe po.

4. Nawẹ mí yọnẹn gbọn dọ Jehovah nọ na gblọndo na odẹ̀ sinsẹ̀n-basitọ etọn lẹ tọn? (Sọ pọ́n yẹdide lọ.)

⁴ To Biblu mẹ, mí nọ saba hia dọ Jehovah nọ na gblọndo na odẹ̀ sinsẹ̀n-basitọ etọn lẹ tọn. Lẹnnupọndo apajlẹ Ahọlu Davidi tọn ji. E pehẹ kẹntọ huhlọnnọ susu lẹ to gbẹzan etọn mẹ, podọ e nọ saba biọ alọgọ Jehovah tọn to odẹ̀ mẹ. To gbèdopo, e hodẹ̀ dọmọ: “Jehovah E, sè odẹ̀ ṣie; dotoaina ovẹ̀ ṣie na alọgọ. To nugbonọ-yinyin po dodowiwa towe po mẹ, siọ mi.” (Salm. 143:1) Jehovah na gblọndo na odẹ̀ he Davidi hò nado mọ whlẹngán lẹ. (1 Sam. 19:10, 18-20; 2 Sam. 5:17-25) Davidi gán dọ po jide po dọmọ: “Jehovah ma dẹn do mẹhe nọ dawhá ylọ ẹ lẹpo.” Mílọsu gán do jidide dopolọ.—Salm. 145:18.

5. Be Jehovah nọ na gblọndo na odẹ̀ sinsẹ̀n-basitọ hohowhenu tọn etọn lẹ tọn dile yé jlo do to whelẹponu wẹ ya? Na apajlẹ. (Sọ pọ́n yẹdide lọ.)

⁵ Jehovah gán nọma na gblọndo na odẹ̀ mítọn lẹ dile mí jlo do. Nuhe jọ do apọsteli Paulu go niyẹn. E biọ dọ Jiwheyẹwhe ni de ‘owùn de sẹ̀ sọn agbasalan emitọn mẹ.’ Whla atọ̀n wẹ Paulu hodẹ̀ tlọlọ gando nuhahun sinsinyẹn ehe go. Be Jehovah na gblọndo na odẹ̀ enẹlẹ ya? Mọwẹ, amọ́ e ma yin dile Paulu donukun do. Kakati Jehovah ni de nuhahun lọ sẹ̀, e na ẹn huhlọn he e do hudo etọn nado to sinsẹ̀n Ẹn po nugbonọ-yinyin po zọnmii.—2 Kọl. 12:7-10.

6. To whedelẹnu, naegbọn e gán taidi dọ Jehovah ma na gblọndo odẹ̀ mítọn lẹ tọn?

⁶ To whedelẹnu, mílọsu gán nọ mọ gblọndo de he gbọnvona nuhe mí donukun. Mí gán kudeji dọ Jehovah yọ́n aliho dagbe hugan lọ nado gọalọna mí. E tlẹ gán “wà susu tlala hú nuhe mí biọ kavi lẹn lẹpo.” (Efe. 3:20) Enẹwutu, e gán na gblọndo na odẹ̀ mítọn lẹ to ojlẹ de kavi to aliho de he mẹ mí ma donukun te.

7. Naegbọn e gán biọ dọ mí ni diọ nuhe go mí nọ hodẹ̀ gando? Na apajlẹ.

⁷ E gán biọ dọ mí ni diọ nuhe go mí nọ hodẹ̀ gando dile ojlo Jehovah tọn to wunhọ́n na mí dogọ. Lẹnnupọndo apajlẹ mẹmẹsunnu Martin Poetzinger tọn ji. Tlolo to alọwle etọn godo, Mẹmẹsunnu Poetzinger yin súsú do opá yasanamẹ tọn Nazi lẹ tọn de mẹ. To tintan whenu, e biọ dọ Jehovah ni de emi tọ́n sọn opá lọ mẹ na emi nido sọgan penukundo asi emitọn go bosọ gọ̀ azọ́n yẹwhehodidọ tọn emitọn bẹ. Amọ́ to osẹ awe godo, e ma mọ ohia depope he dohia dọ Jehovah na de ali de, na e nido yin tuntundote. Enẹwutu e jẹ dẹ̀ho ji dọmọ: “Jehovah, jaale bo do nuhe a jlo dọ n’ma wà hia mi.” Enẹgodo, e jẹ nulẹnpọn do nuhe mẹmẹsunnu devo lẹ to pipehẹ to opá lọ mẹ ji. Susu yetọn wẹ to nuhà taun gando asi yetọn po ovi yetọn lẹ po go. Enẹwutu, Mẹmẹsunnu Poetzinger hodẹ̀ dọmọ: “Jehovah, a wanu taun na azọ́ndenamẹ yọyọ ṣie. Gọalọna mi nado hẹn mẹmẹsunnu ṣie lẹ lodo bosọ na tuli yé.” Nuhe e yí owhe ṣinẹnẹ he bọdego lẹ zan nado wà to opá voovo lẹ mẹ pẹẹ niyẹn!

8. Whẹho titengbe tẹwẹ mí dona hẹn do ayiha mẹ whenue mí to dẹ̀ho?

⁸ Mí dona flindọ Jehovah tindo lẹndai de, podọ ewọ na hẹn ẹn di to ojlẹ dide etọn mẹ. Apadewhe lẹndai enẹ tọn wẹ nado de nuhahun he ko hẹn awufiẹsa susu wá na gbẹtọvi lẹ to egbehe lẹ sẹ̀ mlẹnmlẹn podọ kakadoi, enẹ wẹ nugbajẹmẹji jọwamọ tọn, azọ̀n po okú po. Jehovah na yí Ahọluduta etọn zan nado hẹn lẹndai etọn di. (Dan. 2:44; Osọ. 21:3, 4) Amọ́ kakajẹ whenẹnu, Jehovah to dotẹnmẹ na Satani nado deanana aihọn lọ.b (Joh. 12:31; Osọ. 12:9) Eyin Jehovah ko didẹ nuhahun gbẹtọvi lẹ tọn lẹ todin wẹ, e gán taidi dọ gandudu Satani tọn ko tindo kọdetọn dagbe jẹ obá de mẹ. Enẹwutu, dile mí to tepọn Jehovah nado hẹn opagbe delẹ di, ehe ma zẹẹmẹdo dọ e jo mí do matin alọgọ. Mì gbọ mí ni gbadopọnna aliho delẹ he mẹ Jehovah nọ gọalọna mí te.

LEHE JEHOVAH NỌ NA GBLỌNDO NA ODẸ̀ MÍTỌN LẸ DO TO EGBEHE

9. Nawẹ Jehovah gán gọalọna mí gbọn whenue mí jlo na basi nudide lẹ? Na apajlẹ.

⁹ E nọ na mí nuyọnẹn. Jehovah dopà nado na mí nuyọnẹn he mí do hudo etọn nado basi nudide dagbe lẹ. Mí nọ do hudo nuyọnẹn Jiwheyẹwhe tọn titengbe to whenue mí jlo na basi nudide delẹ he na yinuwado pipotọ gbẹzan mítọn tọn ji, vlavo nudide lọ nado gbọṣi tlẹnmẹ kavi nado wlealọ. (Jak. 1:5) Lẹnnupọndo apajlẹ mẹmẹyọnnu tlẹnnọ de he nọ yin Mariac tọn ji. E yin gbehosọnalitọ whepoponu tọn ayajẹnọ de whenue e dukosọna mẹmẹsunnu de. E dọmọ: “Dile haṣinṣan mítọn to nukọnyi, mọ wẹ numọtolanmẹ mítọn na ode awetọ to sinsinyẹn deji do niyẹn. N’yọnẹn dọ n’dona basi nudide de. N’hodẹ̀ vẹkuvẹku na ojlẹ dindẹn gando whẹho lọ go. N’do hudo anademẹ Jehovah tọn, amọ́ n’sọ yọnẹn dọ Jehovah ma na basi nudide lọ do otẹn ṣie mẹ.” E mọdọ Jehovah na gblọndo na odẹ̀ he emi hò nado mọ nuyọnẹn lẹ. Gbọnna? Dile e to dodinnanu basi to owe mítọn lẹ mẹ, e penugo bo mọ hosọ tangan delẹ he gọalọna ẹn nado mọ gblọndo na kanbiọ etọn lẹ. E sọ hẹn ayinamẹ nuyọnẹn tọn he onọ̀ nugbonọ etọn na ẹn do ayiha mẹ. Ayinamẹ enẹ gọalọna Maria nado gbadopọnna numọtolanmẹ etọn lẹ. To godo mẹ, e penugo bo basi nudide nuyọnẹn tọn.

10. Sọgbe hẹ Filipinu lẹ 4:13, etẹwẹ Jehovah na wà nado gọalọna sinsẹ̀n-basitọ etọn lẹ? Na apajlẹ. (Sọ pọ́n yẹdide lọ.)

¹⁰ E nọ na mí huhlọn nado doakọnnanu. Dile Jehovah wà do na apọsteli Paulu, e na na mílọsu huhlọn he mí do hudo etọn nado doakọnna whlepọn mítọn lẹ. (Hia Filipinu lẹ 4:13.) Pọ́n lehe Jehovah gọalọna mẹmẹsunnu de he nọ yin Benjamin nado doakọnna ninọmẹ sinsinyẹn lẹ do. Na suhugan jọja whenu Benjamin tọn, ewọ po whẹndo etọn po nọ opá fibẹtado-dintọ lẹ tọn lẹ mẹ to Aflika. Benjamin dọmọ: “N’nọ hodẹ̀ na Jehovah to whelẹponu bo nọ biọ dọ ni na mi huhlọn nado wà nuhe na hẹn homẹ etọn hùn. Jehovah na gblọndo odẹ̀ ṣie lẹ tọn bo na mi jijọho ahun mẹ tọn, adọgbigbo nado zindonukọn bo to yẹwhehodọ, podọ owe he n’do hudo etọn nado hẹn haṣinṣan dagbe de go hẹ ẹ lẹ.” E zindonukọn bo dọmọ: “Eyin n’hia numimọ Kunnudetọ hatọ lẹ tọn bo mọ lehe Jehovah gọalọna yé nado doakọnnanu do, enẹ nọ gọalọna mi nado hẹn gbemima ṣie go bo to nugbonọ yin na ewọ zọnmii.”

11, 12. Nawẹ Jehovah sọgan yí whẹndo gbigbọmẹ tọn mítọn zan nado na gblọndo odẹ̀ mítọn lẹ tọn gbọn? (Sọ pọ́n yẹdide lọ.)

¹¹ E nọ yí whẹndo gbigbọmẹ tọn mítọn zan. To ozán he jẹnukọnna okú etọn mẹ, Jesu hodẹ̀ vivẹvivẹ. E vẹ̀ Jehovah dọ ni ma dike mẹlẹ ni pọ́n emi hlan di nùzantọ bo gblewhẹdo emi na enẹ wutu blo. Podọ Jehovah gọalọna Jesu bo do dopo to nọvisunnu etọn he yin angẹli lẹ mẹ hlan nado wá na ẹn huhlọn. (Luku 22:42, 43) Jehovah gán sọ gọalọna mí gbọn oylọ kavi dlapọn tulinamẹ tọn mẹmẹsunnu kavi mẹmẹyọnnu de tọn gblamẹ. Mímẹpo wẹ dona nọ dín dotẹnmẹ lẹ nado dọ “ohó dagbe” na yisenọ hatọ lẹ.—Howh. 12:25.

¹² Lẹnnupọndo apajlẹ mẹmẹyọnnu Miriam tọn ji. Osẹ kleun delẹ to okú asu etọn tọn godo, Miriam ṣo wẹ to whégbè bo to awubla mẹ bosọ jẹflumẹ petepete. E to avivi badabada bosọ do hudo mẹde he e na dọhona tọn. E dọmọ: “N’ma do huhlọn bo na ylọ mẹdepope, enẹwutu, n’hodẹ̀ hlan Jehovah. Dile n’gbẹ́ to avivi bo to dẹ̀ho, alokan ṣie dọnú. Mẹho agun tọn de wẹ, yèdọ họntọn vivẹ́ de.” Mẹho agun tọn enẹ po asi etọn po miọnhomẹna Miriam. E kudeji dọ Jehovah wẹ whàn mẹmẹsunnu ehe nado ylọ.

13. Na apajlẹ de he dohia dọ Jehovah gán yí mẹhe ma nọ sẹ̀n ẹn lẹ zan nado na gblọndo odẹ̀ mítọn lẹ tọn.

¹³ E gán yí mẹhe ma nọ sẹ̀n ẹn lẹ zan. (Howh. 21:1) To whedelẹnu, Jehovah nọ na gblọndo odẹ̀ omẹ etọn lẹ tọn gbọn mẹhe ma nọ sẹ̀n ẹn lẹ whinwhàn nado gọalọna yé dali. Di apajlẹ, e whàn Ahọlu  Altakẹlikesi nado kẹalọyi obiọ Nẹhemia tọn nado lẹkọyi Jelusalẹm, na e nido gọalọ nado vọ́ tòdaho lọ gbá. (Nẹh. 2:3-6) Mọdopolọ to egbehe, Jehovah gán whàn mẹhe ma tlẹ nọ sẹ̀n ẹn lẹ nado wá gọalọna mí to whenue mí do hudo etọn.

14. Etẹwẹ a yiwanna to numimọ Soo Hing tọn mẹ? (Sọ pọ́n yẹdide lọ.)

¹⁴ Mẹmẹyọnnu Soo Hing mọdọ Jehovah yí doto emitọn zan nado gọalọna emi. Visunnu etọn nọ jẹ apọ̀nmẹ-zọ̀n voovo lẹ. Whenue visunnu lọ basi asidan sinsinyẹn de, mẹmẹyọnnu lọ po asu etọn po jo azọ́n yetọn do nado penukundego. Ehe zọ́n bọ yé do nuhahun akuẹ tọn. Soo Hing mọdọ ninọmẹ lọ húagbọ́ emi. E dọ nuhe to ahun ji na ẹn lẹpo na Jehovah bo biọ alọgọ etọn. Doto etọn de nado gọalọna ewọ po whẹndo etọn po. Ehe zọ́n bọ yé mọ alọgọ aṣẹpatọ lẹ tọn gọna adọtẹn he pọkuẹ de. Enẹgodo, Soo Hing dọmọ: “Mí mọ alọ Jehovah tọn to whẹho ehe mẹ. Na nugbo tọn, ewọ wẹ ‘Sisètọ odẹ̀ tọn’”—Salm. 65:2.

E NỌ BIỌ YISE NADO DÍN GBLỌNDO JEHOVAH TỌN BOSỌ KẸALỌYI I

15. Etẹwẹ gọalọna mẹmẹyọnnu de nado doayi e go dọ odẹ̀ etọn lẹ nọ mọ gblọndo?

¹⁵ To paa mẹ, odẹ̀ mítọn lẹ ma nọ mọ gblọndo to aliho ayidego tọn lẹ mẹ. Amọ́ gblọndo he mí nọ mọ lẹ nọ yin nuhe mí do hudo etọn pẹẹ nado to nugbonọ yin zọnmii na Otọ́ olọn mẹ tọn mítọn. Enẹwutu, nọ to aṣeji gando gblọndo he Jehovah nọ na na odẹ̀ towe lẹ go. Mẹmẹyọnnu Yoko mọdọ Jehovah ma to gblọndo na na odẹ̀ emitọn lẹ, amọ́ e jẹ kandai nuhe e biọ Jehovah lẹ tọn basi ji. To ojlẹ de godo, e vọ́ dogbapọnna kandai etọn bo doayi e go dọ Jehovah ko na gblọndo na suhugan odẹ̀ etọn lẹ tọn, etlẹ yin na delẹ he e masọ flin ba. Sọn ojlẹ de mẹ jẹ devo mẹ, e yọ́n dọ mí ni nọ yiagbọji bo nọ lẹnnupọndo lehe Jehovah to gblọndo na na odẹ̀ mítọn lẹ do ji.—Salm. 66:19, 20.

16. Nawẹ mí gán nọ do yise hia gando odẹ̀ mítọn lẹ go gbọn? (Heblu lẹ 11:6)

¹⁶ Mí nọ do yise hia eyin mí nọ hodẹ̀ hlan Jehovah podọ eyin mí nọ kẹalọyi gblọndo etọn na odẹ̀ mítọn lẹ mahopọnna aliho he mẹ yé yin nina te. (Hia Heblu lẹ 11:6.) Lẹnnupọndo apajlẹ Mike po asi etọn Chrissy po tọn ji. Yanwle yetọn wẹ nado sẹ̀n to Bẹtẹli. Mike dọmọ: “Mí omẹ awe lẹ doalọwemẹ na owhe susu bosọ hodẹ̀ pludopludo gando yanwle ehe go, ṣogan mí ma yin oylọ-basina.” Mike po Chrissy po deji dọ Jehovah yọ́n aliho dagbe hugan lọ nado yí yé zan to sinsẹ̀nzọn etọn mẹ. Yé zindonukọn nado to nuhe go yé pé lẹpo wà bo yin gbehosọnalitọ whepoponu tọn to fie nuhudo sù te bosọ nọ nọgodona tito họ̀gbigbá yẹwhehọluduta tọn lẹ. To egbehe, yé to sinsẹ̀n to azọ́n lẹdo tọn mẹ. Mike dọmọ: “Jehovah ma na gblọndo na odẹ̀ mítọn lẹ to whelẹponu dile mí jlo do, amọ́ e ko na gblọndo yetọn lẹ to aliho he tlẹ sọ pọnte hugan dehe mí gán ko lẹn lẹ mẹ.”

17, 18. Sọgbe hẹ Salmu lẹ 86:6, 7, nujikudo tẹwẹ mí gán do?

¹⁷ Hia Salmu lẹ 86:6, 7. Salmu-kantọ Davidi kudeji dọ Jehovah nọ dotoaina odẹ̀ emitọn lẹ bosọ nọ na gblọndo yetọn. Hiẹ lọsu gán tindo nujikudo dopolọ. Apajlẹ he go mí donù to hosọ ehe mẹ lẹ hẹn mí deji dọ Jehovah gán na mí nuyọnẹn po huhlọn he mí do hudo etọn po nado doakọnnanu. E gán yí whẹndo gbigbọmẹ tọn mítọn kavi etlẹ yin mẹhe ma ko to sinsẹ̀n ẹn todin lẹ zan nado gọalọna mí to aliho de mẹ.

¹⁸ Dile etlẹ yindọ Jehovah gán nọma na gblọndo na odẹ̀ mítọn lẹ to whelẹponu dile mí donukun do, mí yọnẹn dọ e na na gblọndo yetọn janwẹ. E na na mí nuhe mí do hudo etọn, podọ to whenue mí do hudo etọn te pẹẹ. Enẹwutu, zindonukọn nado nọ yí yise do hodẹ̀, bo deji dọ Jehovah nọ hò towe pọ́n todin podọ e na “hẹn pekọ wá na ojlo nutogbẹ̀ lẹpo tọn” to aihọn yọyọ he ja lọ mẹ.—Salm. 145:16.