Be A Yọnẹn Ya?
Etẹwutu wẹ awhànpa Ahọlu Davidi tọn do bẹ jonọ lẹ hẹn?
TO AWHÀNFUNTỌ jonọ he to awhànpa Davidi tọn mẹ lẹ mẹ, mí gán mọ mẹdelẹ taidi Zelẹki Amọninu lọ, Ulia Hetinu lọ po Itma Moabinu lọ po.a (1 Otàn. 11:39, 41, 46) Awhànpa Davidi tọn sọ bẹ “Kelẹtinu lẹ, Pelẹtinu lẹ gọna Gatinu lẹ” hẹn. (2 Sam. 15:18) To paa mẹ, mẹlẹ nọ lẹndọ Kelẹtinu lẹ po Pelẹtinu lẹ po sẹpọ Filistinu lẹ taun. (Ezek. 25:16) Gatinu lẹ wá sọn tòdaho Filistinu lẹ tọn he nọ yin Gati mẹ.—Jọṣ. 13:2, 3; 1 Sam. 6:17, 18.
Naegbọn Davidi do yí jonọ lẹ do awhànpa etọn mẹ? Na e deji dọ yé na yin nugbonọ na emi, podọ humọ na Jehovah wutu wẹ. Di apajlẹ, gando Kelẹtinu lẹ po Pelẹtinu lẹ po go, owe de dọmọ: “Yé hẹn nugbonọ-yinyin yetọn na Davidi go to ojlẹ he vẹawu hugan to gandudu etọn whenu lẹ mẹ.” (The New Interpreter’s Dictionary of the Bible) Gbọnna? Whenue “sunnu Islaeli tọn lẹpo” họ̀n bo jo Ahọlu Davidi do nado hodo ‘dawe avùnda-daitọ lọ he nọ yin Ṣeba,’ Kelẹtinu lẹ po Pelẹtinu lẹ po hẹn nugbonọ-yinyin yetọn na Davidi go bosọ gọalọ nado sukúndona atẹṣiṣi Ṣeba tọn. (2 Sam. 20:1, 2, 7) To nujijọ devo whenu, visunnu Ahọlu Davidi tọn he nọ yin Adonija tẹnpọn nado hò gánzinpo lọ yí. Amọ́, Kelẹtinu lẹ po Pelẹtinu lẹ po yin nugbonọ na Davidi, bosọ gọalọ nado ze Sọlomọni do gánzinpo ji, yèdọ mẹhe Jehovah ko de nado yin ahọlu he na bọdego.—1 Ahọ. 1:24-27, 38, 39.
Jonọ devo he yin nugbonọ na Davidi taun wẹ Ittai Gatinu lọ. Ittai po awhànfuntọ etọn 600 lẹ po nọgodona Ahọlu Davidi whenue Absalọmi he yin visunnu Davidi tọn fọngu bosọ diọlinlẹnna sunnu Islaeli tọn lẹ nado diọnukunsọ ahọlu lọ. To tintan whenu, Davidi dọna Ittai dọ awhàn lọ ma yin etọn, na jonọ de wẹ e yin wutu. Amọ́ Ittai gblọn dọmọ: “Dile Jehovah togbẹ̀ podọ dile e họnwun dọ oklunọ ṣie ahọlu togbẹ̀, fidepope he oklunọ ṣie ahọlu te, vlavo okú wẹ ya kavi ogbẹ̀, finẹ wẹ devizọnwatọ towe na te ga!”—2 Sam. 15:6, 18-21.
Ittai yin nugbonọ na Davidi, yèdọ ahọlu dide Jehovah tọn
Mahopọnna dọ Kelẹtinu lẹ, Pelẹtinu lẹ po Gatinu lẹ po yin jonọ, yé kẹalọyi dọ Jehovah wẹ Jiwheyẹwhe nugbo lọ, podọ Davidi wẹ yin mẹyiamisisadode etọn. Lehe Davidi na ko yọ́n pinpẹn etọn do sọ dọ emi do sunnu nugbonọ ehelẹ to adà emitọn mẹ!
a Osẹ́n Jiwheyẹwhe tọn he yin kinkandai to Deutelonomi 23:3-6 mẹ gbẹ́ dọ Amọninu lẹ po Moabinu lẹ po ma dona biọ agun Islaelivi lẹ tọn mẹ. Ehe dohia dọ yé ma gán lẹzun tòvi to osẹ́n-liho bo tindo jlọjẹ he Islaelivi de nọ tindo lẹpo, amọ́ jonọ ehelẹ gán kọnawudopọ hẹ omẹ Jiwheyẹwhe tọn lẹ kavi nọ ṣẹnṣẹn yetọn eyin yé kẹalọyi sinsẹ̀n-bibasi nugbo. Pọ́n Étude perspicace des Écritures, Bladopọ 1, w. 100.