Be Ylando Wẹ Azọ̀-Nùnù Yin Ya?

Gblọndo Biblu tọn

Biblu ma donù azọ̀-nùnùa kavi aliho devo depope he mẹ taba gán yin yiyizan te go. Ṣigba, e bẹ nunọwhinnusẹ́n delẹ hẹn he dohia dọ Jiwheyẹwhe jẹagọdo aṣa mawé he gán bẹpla agbasalilo mítọn lẹ bo nọ pọ́n azọ̀-nùnù hlan di ylando.

• Sisi tintindo na ogbẹ̀. ‘Jiwheyẹwhe wẹ nọ na gbẹtọ lẹpo ogbẹ̀ po gbọfufu po.’ (Owalọ lẹ 17:24, 25) Na ogbẹ̀ yin nunina Jiwheyẹwhe tọn de wutu, mí ma dona wà nudepope he na sán ogbẹ̀ mítọn dogli, taidi azọ̀-nùnù. Azọ̀-nùnù yin dopo to nuhe nọ hẹn okú azán mape wá lẹ mẹ lẹdo aihọn pé.

• Owanyi tintindo na kọmẹnu mẹtọn. “Hiẹ dona yiwanna kọmẹnu towe di dewe.” (Matiu 22:39) Azọ̀-nùnù to apá mẹdevo lẹ tọn ma nọ do owanyi hia. Mẹhe nọ nọ̀ apá na azọ̀-nùtọ de whẹwhẹ tin to owù sinsinyẹn mẹ nado bẹ awutu dopolọ he azọ̀-nùtọ de nọ wá jẹ lẹ.

• Nuhudo lọ nado yin wiwe. “Mì . . . yí agbasa mìtọn do basi avọ́sinsan he togbẹ̀, wiwe, he yin alọkẹyi na Jiwheyẹwhe.” (Lomunu lẹ 12:1) “Mì gbọ mí ni klọ́ míde wé sọn hẹnflu agbasalan tọn podọ gbigbọ tọn lẹpo mẹ, bo nọ to wiwe-yinyin hẹn zun pipé to budisi Jiwheyẹwhe mẹ.” (2 Kọlintinu lẹ 7:1) Azọ̀-nùnù yin nuyiwa de he ma sọgbe to jọwamọ-liho bosọ jẹagọdo wiwejininọ​—yèdọ nado wé bo mẹ́​—na azọ̀-nùtọ lẹ nọ desọn ojlo mẹ nado nù adí ylankan he nọ hẹnnugble sinsinyẹn to agbasa yetọn go lẹ.

Be Biblu dọ nude gando marijuana kavi amasin adínọ devo lẹ yiyizan nado deayidai go ya?

Biblu ma donù marijuana kavi yinkọ amasin adínọ devo depope tọn go. Ṣigba, e bẹ nunọwhinnusẹ́n he jẹagọdo amasin adínọ mọnkọ lẹ yiyizan nado deayidai lẹ hẹn. Gbọnvona nunọwhinnusẹ́n he go mí donù wayi lẹ, dehe bọdego lẹ lọsu sọ gandego:

• Nuhudo lọ nado deanana nugopipe apọ̀nmẹ tọn mítọn. “Hiẹ dona yí . . . ayiha towe lẹpo do yiwanna Jehovah Jiwheyẹwhe towe.” (Matiu 22:37, 38) “Mì gbọṣi lẹnpọn dagbenọ-yinyin mẹ mlẹnmlẹn.” (1 Pita 1:13) Mẹde ma gán deanana ayiha etọn to gigọ́ mẹ to whenue e tin to nuyiwadomẹji amasin adínọ tọn glọ, podọ susu mẹhe nọ nù lẹ tọn wẹ nọ wá lẹzun afanumẹ etọn to godo mẹ. Kakati nado ze ayiha yetọn do linlẹn he jlọmẹdote lẹ ji, amasin adínọ lẹ dindinmọ bo nù janwẹ nọ gbà tamẹ na yé.​—Filipinu lẹ 4:8.

• Tonusisena osẹ́n otò tọn lẹ. Mì “nọ setonuna gandudu lẹ po aṣẹpipa lẹ po.” (Titu 3:1) To otò susu mẹ, aṣẹpatọ lẹ nọ dosẹ́n gando amasin adínọ delẹ yiyizan go. Eyin mí jlo na hẹn homẹ Jiwheyẹwhe tọn hùn, mí dona setonuna aṣẹpatọ lẹ.​—Lomunu lẹ 13:1.