ONÚ 6
Yinyọ́n Nuhe Yin Dagbe po Oylan Po
ETẸWẸ YINYỌ́N DAGBE PO OYLAN PO ZẸẸMẸDO?
Mẹhe do jijọ dagbe lẹ nọ yọ́n vogbingbọn to nuhe yin dagbe po oylan po mẹ. E ma yin nuhe wá ayiha mẹ na yé to ojlẹ lọ mẹ wẹ yé nọ pọ́n di dagbe kavi oylan poun gba. Amọ́, anademẹ he go yè dejido lẹ wẹ yé nọ hodo, etlẹ yin to whenue mẹde ma to finẹ.
NAEGBỌN YINYỌ́N DAGBE PO OYLAN PO DO YIN NUJỌNU?
Nususu wẹ ovi lẹ nọ sè gando nuhe yin dagbe po oylan po go, vlavo sọn wehọmẹvigbẹ́ yetọn lẹ dè, to ohàn he yé nọ sè lẹ mẹ, kavi to video po televiziọn po ji bọ nulọ lẹ ma ka nọ sọgbe. Ehelẹ gán fọ́n ayihaawe dote na yé gando nuhe yin dagbe po oylan po he ko yin pinplọn yé lẹ go.
Ehe nọ sinyẹn taun to whenue yé lẹzun jọja. Owe de dọ dọ to ojlẹ enẹ mẹ, yé “dona yọnẹn dọ hagbẹ lẹ po mẹhe yé nọ dotoaina to televiziọn ji lẹ po na tẹnpọn nado gbidikọna yé nado nọ yinuwa to aliho de mẹ, na mẹdevo lẹ nido yiwanna yé. Enẹwutu, ojlẹ enẹ mẹ wẹ yé dona tẹnpọn nado nọ basi nudide dagbe sọgbe hẹ nuhe ko yin pinplọn yé, eyin e ma tlẹ hẹn homẹhun họntọn yetọn lẹ.” (Beyond the Big Talk) Enẹwutu, mẹjitọ lẹ dona ko plọn ovi yetọn lẹ whẹpo yé nido lẹzun jọja.
LEHE A GÁN PLỌN OVI LẸ NUHE YIN DAGBE PO OYLAN PO DO
Nọ plọn yé nado yọ́n dagbe dovo na oylan.
AYINAMẸ BIBLU TỌN: “Mẹhe ko whẹ́n lẹ . . . ko plọn huhlọn wuntuntun tọn yetọn gbọn yíyí i zan dali nado nọ yọ́n vogbingbọn to dagbe po oylan po ṣẹnṣẹn.”—Heblu lẹ 5:14.
Nọ zan hogbe he nọ do vogbingbọn hia to dagbe po oylan po mẹ lẹ. To nuwiwa egbesọ tọn lẹ mẹ, nọ dohia dọ: “Ehe sọgbe; enẹ ma sọgbe.” “Ehe yin nugbo; enẹ ma yin nugbo.” “Ehe jọmẹ; enẹ ma jọmẹ.” Eyin e wá yá, ovi towe lẹ na yọ́n nuhe sọgbe bọ yé dona wà po nuhe ma sọgbe bọ yé ma dona wà po.
Nọ basi zẹẹmẹ nuhewutu ehe do sọgbe bọ enẹ ma do sọgbe tọn. Di apajlẹ, nọ kàn kanbiọ delẹ sè taidi: Naegbọn e do yọ́n nado nọ dọ nugbo? Nawẹ lalodido nọ hẹn họntọnjiji gble gbọn? Naegbọn ajo ma yọ́n? Nọ yí kanbiọ mọnkọ lẹ zan nado hẹn ovi towe lẹnnupọn.
Nọ dọ ale he nuhe yin dagbe lẹ wiwà nọ hẹnwa. A gán nọ dọ nude di: “Eyin a nọ dọ nugbo, mẹlẹ na nọ dejido gowe” kavi “Eyin a jọmẹ, mẹlẹ na yiwanna we.”
Tẹnpọn na mẹdevo lẹ ni yọnẹn dọ whẹndo towe tindo jijọ dagbe.
AYINAMẸ BIBLU TỌN: “Mì nọ dindona mìde nado yọ́n mẹhe nkọ mìwlẹ yin.”—2 Kọlintinu lẹ 13:5.
Eyin whẹndo towe tindo jijọ dagbe, a gán dọ nugbonugbo dọ:
“Mí ma nọ dolalo to whẹndo mítọn mẹ.”
“Mí ma nọ hoavùn kavi dawhá do mídelẹ ji.”
“Mí ma nọ zunmẹ.”
Enẹ na zọ́n bọ ovi towe lẹ na mọdọ jijọ dagbe ma yin nùmẹ yozò, amọ́ gbẹzan he whẹndo lọ nọ zan niyẹn.
Nọ yawu dọhodo walọ he yin alọkẹyi to whẹndo lọ mẹ lẹ ji hẹ ovi towe. Nọ dọhodo enẹ ji whedepopenu he dotẹnmẹ etọn hundote. A gán nọ yí jijọ mìtọn lẹ jlẹdo nuhe mọ mì te to televiziọn ji kavi nuhe nọ jọ to wehọmẹ lẹ go. Enẹgodo, nọ kanbiọ ovi towe dọ: “Etẹwẹ a na ko wà to ninọmẹ enẹ nkọ mẹ?” “Etẹwẹ whẹndo mítọn na ko wà to ninọmẹ mọnkọ mẹ?”
Nọ dohia dọ dandan wẹ nado zan jijọ dagbe.
AYINAMẸ BIBLU TỌN: “Mì hẹn ayihadawhẹnamẹnu dagbe de go.”—1 Pita 3:16.
Nọ pà ovi he zan jijọ dagbe. Eyin ovi towe zan jijọ dagbe to nude mẹ, nọ pà ẹ bo nọ dọ nuhewutu a do pà ẹ. Di apajlẹ, a gán dọmọ: “E vivi na mi dọ a dọ nugbo.” Eyin ovi towe yigbe dọ emi wà nuhe ma sọgbe, pà ẹ ganji dọ e dọ nugbo whẹpo do wọhẹ ẹ.
Nọ gbẹnuna ovi he zan jijọ ylankan. Plọn ovi towe lẹ nado nọ yigbena nuhe yé wà yindo. Dọ nuhe ovi lọ wà yindo na ẹn, podọ lehe nuhe e wà, gbọnvona jijọ whẹndo lọ tọn do. Mẹjitọ delẹ ma nọ jlo na gblewhẹdo ovi yetọn, na yé ma nọ jlo dọ ovi lẹ ni gblehomẹ, amọ́ whẹgbigbledo ovi he wanu yindo na zọ́n bọ e na plọn nado nọ yọ́n dagbe dovo na oylan.