Ahoho He Gbọnvo Lẹ

VISUNNU awe he tin tofi lẹ gbọnvo na yede taun, kavi e ma yin mọ wẹ? Be a yọ́n yinkọ yetọn ya? Gbéyantọ lọ nọ yin Esau, podọ omẹ awetọ he to nukunpedo lẹngbọ lẹ go wẹ Jakọbu.

Esau po Jakọbu po yin visunnu ahoho Isaki po Lebeka po tọn. Otọ́ yetọn Isaki yiwanna Esau taun, na e yọ́n gbéyàn ganji bo nọ hẹn núdùdù wá whégbè na whẹndo lọ. Ṣigba Lebeka yiwanna Jakọbu hugan, na e yin visunnu abọẹ-abọẹ he nọ dín jijọho wutu.

Babadaho yetọn Ablaham gbẹ́ pò to ogbẹ̀ to whenẹnu, podọ Jakọbu na ko yiwanna nado nọ dotoaina ẹn dile e to hodọ gando Jehovah go. Ablaham wá kú to owhe 175 mẹho yinyin mẹ, to whenuena ahoho lọ lẹ tindo owhe 15.

To whenuena Esau tindo owhe 40, e dà yọnnu awe to otò Kenani tọn mẹ. Ehe hẹn awubla wá na Isaki po Lebeka po tlala, na yọnnu ehelẹ ma nọ sẹ̀n Jehovah.

To gbèdopo, nude jọ he hẹn Esau gblehomẹ tlala do nọvi etọn Jakọbu go. Ojlẹ lọ wá bọ Isaki jlo na dona visunnu etọn mẹho. To whenuena e yindọ Esau wà mẹho na Jakọbu, Esau donukun nado mọ dona ehe yí. Ṣigba jẹnukọn dai, Esau ko sà jlọjẹ etọn nado mọ dona ehe yí na Jakọbu. Humọ, to ojlẹ he mẹ visunnu awe lọ lẹ yin jiji te, Jiwheyẹwhe ko dọ dọ Jakọbu wẹ na mọ dona lọ yí. Podọ nuhe jọ lọ pẹpẹ niyẹn. Isaki dona visunnu etọn Jakọbu.

To whenuena Esau wá yọ́n ehe to nukọn mẹ, e gblehomẹ do Jakọbu go. E gblehomẹ sọmọ bo dọ dọ emi na hù Jakọbu. Whenuena Lebeka sè ehe, ayiha etọn ma jai. Enẹwutu e dọna asu etọn Isaki dọmọ: ‘E na ylan taun eyin Jakọbu lọsu yì dà dopo to yọnnu Kenani tọn ehelẹ mẹ.’

Isaki sọ ylọ visunnu etọn Jakọbu bo dọna ẹn dọmọ: ‘Ma dà asi to Kenani blo. Kakatimọ, yì owhé babadaho towe Bẹtueli tọn gbè to Halani. Visunnu etọn Labani tindo viyọnnu lẹ; dà dopo to yé mẹ.’

Jakọbu dotoaina otọ́ etọn, podọ to afọdopolọji e bẹ gbejizọnlin gaa lọ jẹeji yì fie hẹnnumẹ etọn lẹ nọ nọ̀ to Halani.