Jakọbu Mọ Ogú lọ Yí

Owhe 40 wẹ Isaki tindo to whenue e dà Lebeka. E yiwanna ẹn taun. To nukọn mẹ, yé ji visunnu awe—yèdọ ahoho lẹ.

Mẹho lọ nọ yin Esau bọ yọpọvu lọ nọ yin Jakọbu. Nuhe Esau yiwanna taun wẹ nado nọ tọ́nyi gbonu bo yangbé nado hù kanlin lẹ. Amọ́, Jakọbu uwọ yiwanna whégbè ninọ.

To ojlẹ enẹlẹ mẹ, visunnu mẹho wẹ nọ mọ suhugan aigba po akuẹ otọ́ etọn tọn po yí to whenue otọ́ lọ kú. Nuhe nọ yin yiylọdọ ogú niyẹn. To whẹndo Isaki tọn mẹ, ogú enẹ sọ bẹ adà de yíyí wà to hẹndi opagbe he Jehovah do na Ablaham tọn mẹ hẹn. Esau ma nọ yí nukun nujọnu tọn do pọ́n opagbe enẹlẹ, amọ́ Jakọbu yọnẹn dọ nujọnu wẹ yé yin.

To gbèdopo, Esau ko yangbé na azán lọ blebu bo lẹkọwa whé po nuṣikọ po. E sewán núdùdù dagbedagbe he dà Jakọbu te tọn bo dọmọ: ‘Huvẹ to hùhù mi! Na mi ayàn vẹẹ enẹ vude!’ Jakọbu dọmọ: ‘N’na na we, amọ́ dopà na mi whẹ́ dọ n’gán mọ ogú towe yí.’ Esau gblọn dọ: ‘Etẹ n’na yí ogú enẹ do wà! Saa yí i poun. Núdùdù dín yẹn te.’ Be a lẹndọ nuyọnẹnnu wẹ nuhe Esau wà enẹ ya? Lala. Esau ze nuhe họakuẹ taun de dlan na ayàn tata wutu.

To whenue Isaki ko poyọnho pete, ojlẹ lọ sọ̀ bọ e na dona visunnu etọn tintan. Ṣigba, Lebeka gọalọna Jakọbu, visunnu pẹvi lọ, bọ ewọ wẹ mọ dona lọ yí. To whenue Esau mọ domọ, e gblehomẹ taun bo jẹ ayiha kàn ji nado hù nọvisunnu ahoho etọn. Na Isaki po Lebeka po jlo na basi hihọ́na Jakọbu wutu, yé dọna ẹn dọmọ: ‘Họnyi nọvisunnu onọ̀ towe tọn, Labani dè, kakajẹ whenue homẹgble Esau tọn na wayi.’ Jakọbu dotoaina ayinamẹ mẹjitọ etọn lẹ tọn bo họnyi nado whlẹn ogbẹ̀ ede tọn.