Kanbiọ lẹ sọn Wehiatọ lẹ Dè

Be nuyiwa Jakobu tọn sọgbe to whenuena e do ede hia taidi Esau, dile e yin kinkàndai to Gẹnẹsisi 27:18, 19 mẹ do ya?

Hiẹ sọgan ko jẹakọ hẹ otàn ehe. To yọnhowhe etọn mẹ, Isaki dọna Esau nado yì hù gbélàn wá na ẹn po hogbe helẹ po dọmọ: “Na yẹn ni dù: na yẹn nido dona we whẹpo yẹn nado kú.” To whenuena Lebeka gblató nuhe asu etọn dọ, e dà núdùdù vivi de bo dọna Jakobu dọmọ: “Hiẹ nasọ ze [núdùdù lọ] yì otọ́ towe dè, na e nido dù bọ e na do dona we jẹnukọnna okú etọn.” Enẹgodo, po awù Esau tọn po to okọ̀ gọna ayú gbọgbọẹvu lẹ tọn to okọ̀ po alọ po, Jakobu ze núdùdù vivi lọ yì na otọ́ etọn. Whenuena Isaki kanse e dọ, “Hiẹ mẹnu wẹ, visunnu ṣie?” Jakobu gblọn dọmọ: “Yẹn Esau plọnji towe wẹ.” Isaki yí ì sè bo dona ẹn.—Gẹnẹsisi 27:1-29.

Biblu ma basi zẹẹmẹ gigọ́ do nuhewutu Lebeka po Jakobu po do wàmọ ji, dile etlẹ yindọ e dohia dọ nujijọ lọ wá aimẹ to ajiji mẹ. Mí dona flindọ Ohó Jiwheyẹwhe tọn ma suwhẹna kavi gblewhẹdo nuhe Lebeka po Jakobu po wà, bo gbọnmọ dali nọgodona lalo po mẹkiklọ po gba. Ṣigba, Biblu tá hinhọ́n do whẹho lọ ji.

Tintan whẹ́, kandai lọ dohia hezeheze dọ Jakobu wẹ jẹ nado mọ dona otọ́ etọn tọn yí; e ma yin Esau. Jẹnukọnna nujijọ enẹ, Jakobu ko họ̀ jlọjẹ viplọnji tọn sọn nọvisunnu ahoho etọn si, mẹhe ma yọ́n pinpẹn jlọjẹ enẹ tọn bo sà ẹ do núdùdù tamẹ nado gbọ̀ huvẹ. Esau ‘vlẹ jlọjẹ viplọnji tọn etọn.’ (Gẹnẹsisi 25:29-34) Enẹwutu, to whenuena Jakobu yì otọ́ etọn dè, dona he yin etọn gbọn jlọjẹ dali lọ dín wẹ e te.

Awetọ, whenuena Isaki wá mọdọ Jakobu wẹ emi dona, e ma tẹnpọn nado diọ nuhe e ko wà lọ gba. Vlavo e na ko flin nuhe Jehovah dọna Lebeka whẹpo ahoho lọ lẹ do yin jiji dọmọ: “Mẹho wẹ na sẹ̀n yọpọ.” (Gẹnẹsisi 25:23) E sọ jẹna ayidego dọ to whenuena Jakobu jei Halani, Isaki sọ yí dona devo lẹ dogọ dehe e ko na ẹn dai lẹ.—Gẹnẹsisi 28:1-4.

To tadona mẹ, mí dona flindọ Jehovah mọdona nuhe to jijọ lọ lẹpo bosọ tindo ojlo to e mẹ. Dona he Isaki na lọ tindo kanṣiṣa pẹkipẹki hẹ opagbe he Jiwheyẹwhe do na Ablaham. (Gẹnẹsisi 12:2, 3) Eyin Jiwheyẹwhe ma ko jlo dọ Jakobu ni mọ dona lọ yí wẹ, e sọgan ko dádo whẹho lọ mẹ to aliho de mẹ. Kakatimọ, Jehovah vọ́ nùzindo dona lọ ji hlan Jakobu dọmọ: “Okún towe mẹ wẹ yè na dona hẹnnu he to aigba ji lẹpo te.”—Gẹnẹsisi 28:10-15.