Ayajijẹ po Jiwheyẹwhe Pipa po to Plidopọ lẹ Tẹnmẹ
Bẹsọn owhe tintan 1880 tọn lẹ mẹ Biblu Plọntọ lẹ mọ dọ, dogọ na opli kọmẹ tọn lẹ, e na yin alenu na yé nado jẹakọ hẹ hagbẹ yisenọ yetọn lẹ ganji sọn awa devo lẹ ji. Enẹwutu yé jẹeji nado basi tito na plidopọ daho whemẹwhemẹ tọn lẹ he yin Biblu Plọntọ lẹ tọn sọn Etats-Unis blebu mẹ, podọ to nukọnmẹ sọn Canada ga. Ehelẹ yin ojlẹ kọfifa gbigbọmẹ tọn lẹ; na azan susu lẹ nupinplọn Biblu tọn sisosiso yin awuwledaina, podọ mẹlẹpo nọ dùvivi tuli nina mẹnọzo dagbe de tọn. Yẹwhesinlilẹ yisenọ yọyọ lẹ tọn lẹzun ada whepoponu tọn de to plidopọ daho lẹ tẹnmẹ. Plidopọ daho lẹ sọ nọ yin yiyizan nado na kunnudide gbangba tọn he yinukọn dogọ de ga.—Lomunu lẹ 1:11, 12.
To egbehe Kunnudetọ Jehovah tọn lẹ nọ duvivi plidopọ gbesisọ tọn lẹ. Dibla yì agun 18 jẹ 25 lẹ nọ saba yin pipli dopọ to nuhe mí nọ ylọ dọ lẹdo lẹ mẹ, he nọ yin dlapọn basina, kavi sinsẹ̀nzọn wà na gbọn nugopọntọ tòmẹyìtọ lẹ dali. Whlaawe to owhe dopo mẹ, plidopọ lẹ nọ yin tito-basina, fie agun lẹ to lẹdo de mẹ, kavi apadewhe lẹdo lọ tọn, nọ plidopọ te to samedi podọ/kavi dimanche.
Whladopo to owhe dopo mẹ, plidopọ daho azan atọ̀n kavi ẹnẹ tọn lẹ, he yin yiylọ dọ plidopọ agbegbe tọn lẹ, nọ yin awuwlena to otò dopo dopo mẹ, fie fọtọ́n fotọ́n gbẹtọ lẹ tọn sọgan plidopọ do otẹn dopo mẹ te. Plidopọ ehelẹ nọ wleawuna mẹhẹnlodo gbigbọmẹ tọn na Kunnudetọ Jehovah tọn lẹ po mẹdevo he tindo ojlo to azọ́n yetọn mẹ lẹ po, podọ yé sọ nọ na kunnudide gbangba tọn de.
Tito-to-whinnu plidopọ po plidopọ daho ehelẹ po tọn nọ yin awuwlena gbọn Hagbẹ Anademẹtọ Kunnudetọ Jehovah tọn lẹ tọn dali podọ e nọ sinai do nuhudo Kunnudetọ lẹ tọn lẹdo aihọn pe ji. E nọ bẹ hodidọ lẹ, hodọdopọ lẹ, po nuzedonukọnnamẹ he to jijọ nugbo lẹ he nọ yin yiylọ dọ wadohia lẹ po hẹn, he nọ yin zizedonukọnnamẹ gbọn nugopọntọ tomẹyitọ lẹ po Kunnudetọ jẹhẹnunọ sọn agun lẹ mẹ po dali. Gbẹtọ hunkọ-hunkọ lẹ sọ nọ dọ numimọ lẹ dogbọn lehe ye to pipehẹ avunnukundiọsọmẹ gbẹninọ taidi Klistiani to aihọn mayọn Jiwheyẹwhe tọn de mẹ do kavi kọdetọn lẹ he ye to tintindo to lizọnyizọn lọ mẹ lẹ tọn. To plidopoọ agbegbe tọn lẹ tẹnmẹ ada yídogọ de tin—nuzedonukọnnamẹ he nọ jọ lẹ taidi nupọn-do-plọnnu he sinai do Biblu ji lẹ kavi nupọn-do-plọnnu to lẹdo egbezangbe tọn lẹ mẹ, he nọ to didohia lehe Klistiani lẹ nọ pehẹ nuhahun he yé nọ pannukọn to egbehe lẹ do.
Podọ núdùdù lẹ po kọfanamẹnu lẹ po nọ yin awuwlena, na akuẹ pẹvi de nina. Ehe nọ hun dotẹnmẹ dote na gbẹdido vivi dudu to whenue opli lẹ ma to yìyì to alọnu. Azọ́n lẹpo he gando plidopọ ehelẹ go nọ yin wiwà gbọn gbẹtọ he ze yede jo lẹ sọn Kunnudetọ Jehovah tọn lẹ mẹ dali. Akuẹzinzan awuwiwle lẹ tọn po akuẹzinzan devo lẹ po nọ yin bibasi po nunina sọn ojlo mẹ wá lẹ po. Wiwá plidopọ lọ tẹnmẹ yin vọnu, podọ akuẹ-ṣinṣinyan de ma tin.
Hiẹ sọgan dindona son agun kọmẹ tọn Kunnudetọ Jehovah tọn lẹ tọn de nado yọ́n whenue podọ fie plidopọ ehelẹ yin tito-basina to awa towe ji te. Nudọnamẹ na sọ yin awuwlena na nuhe du tito ohún-dido tọn lẹ, podọ lehe yè sọgan tindo adọtẹn lẹ do.
Plidopọ po plidopọ daho ehelẹ po nọ gọalọna Kunnudetọ Jehovah tọn lẹ po mẹhe nọ dogbẹ hẹ yé po lẹ nado mọnúhlan zẹ agun kọmẹ tọn yetọn lọ go podọ nado yọn pinpẹn nutọn na hagbẹ-yinyin mẹmẹsunnu yetọn lẹ tọn to aihọn mẹ.—1 Pita 2:17.
• Ale tẹlẹ wẹ Biblu Plọntọ fliflimẹ tọn lẹ mọyi sọn plidopọ daho yetọn lẹ mẹ?
• Basi zẹẹmẹ na tito po tito-to-whinnu plidopọ lẹdo tọn lẹ po plidopọ agbegbe tọn lẹ po.
[Yẹdide lẹ to weda 18]
Wadohia Biblu tọn to plidopọ agbegbe tọn, Etats-Unis
Plidopọ akọjọpli tọn, to Pologne
Plidopọ akọjọpli tọn, to Argentine
Plidopọ lẹdo tọn, to Japon
Plidopọ-wátọ lẹ to owe sinai do Biblu ji lẹ yí, to Suisse
Yẹwhesinlilẹ̀ to plidopọ akọjọpli tọn, to Afrique du Sud
Owe sinai do Biblu ji yọyọ lẹ didetọ́n, to Canada
Plidopọ daho wátọ lẹ to ohanji dopọ, to Espagne