Plidopọ Akọjọpli Tọn lẹ to 2003

TO SAMEDI 7 octobre 2001, opli whemẹwhemẹ hagbẹ Watch Tower Bible and Tract Society of Pennsylvania tọn yin bibasi to Tòdaho Jersey tọn mẹ, to New Jersey, États-Unis. To opli enẹ godo, hagbẹ lọ lẹ po jonọ yetọn lẹ po duvivi tito-to-whinnu vonọtaun de tọn. To wunkẹngbe, to opli dogọ heyin bibasi to tòdaho ẹnẹ mẹ to Canada po États-Unis po lẹ ji, Hagbẹ Anademẹtọ Kunnudetọ Jehovah tọn lẹ tọn basi nulila he bọdego ehe to hodidọ tadona tọn godo:

“Dile mí to nukọn pọnhlan sọgodo, onú titengbe wẹ e yin dọ omẹ Jiwheyẹwhe tọn lẹpo ni ma gbẹ́ pipli dopọ yede tọn lẹ dai blo. Apọsteli Paulu dotuhomẹnamẹ dọ ehe, gọna tulinina ode awetọ, ni nọ yin wiwà titengbe dile mí mọ bọ azán daho bosọ dobu Jehovah tọn to sisẹpọ. (Heblu lẹ 10:24, 25) To kọndopọmẹ hẹ gbedide Owe-wiwe tọn ehe, mí lẹn nado basi plidopọ agbegbe lẹ to adà aihọn lọ tọn lẹpo ji to owhe he ja [2002] mẹ. Enẹgodo to owhe 2003 mẹ, eyin ojlo Jehovah tọn wẹ e yin, e sọgan yọnbasi nado basi plidopọ akọjọpli tọn vonọtaun lẹ to adà aihọn lọ tọn delẹ mẹ. Din wẹ ojlẹ lọ nado nọ nukle bo to alihọ́, bo tunwun lehe onú lẹ to jijọ to aihọn lọ mẹ do go.”

Mahopọnna bẹwlu po nuhahun lẹ po he to jijideji dile titonu ehe to sisẹpọ vivọnu etọn, nuwiwa omẹ Jiwheyẹwhe tọn lẹ tọn dona zindonukọn. Wẹndagbe Ahọluduta lọ tọn, he bẹ owẹ̀n avase Biblu tọn hẹn, dona yin lilá hlan akọta, akọ̀, ogbè, po gbẹtọ lẹ po, bo basi oylọna yé nado ‘dibusi Jiwheyẹwhe bo pagigona ẹn na ojlẹ whẹdida etọn tọn ko sẹpọ hugan wutu.’ (Osọhia 14:6, 7) Enẹwutu, sọgbe hẹ ojlo po homẹhunhun Otọ́ olọn mẹ mítọn tọn po, plidopọ akọjọpli tọn lẹ na yin tito-basina do adà voovo aihọn lọ tọn lẹ mẹ na owhe 2003.

Nado bẹjẹeji, pipli mọnkọtọn lẹ to yinyin tito-basina do tòdaho vude lẹ mẹ to Agewaji Amelika tọn podọ bọdego tlolo to Europe. Ojlẹ vude godo to 2003, tito lẹ na yin bibasi na pipli afọzedaitọ lẹ tọn nado yì tòdaho vude lẹ mẹ to Asia; podọ sẹpọ vivọnu owhe lọ tọn, pipli devo lẹ na yì Aflika, Hùwaji Amelika tọn, po lẹdo Pacifique tọn po mẹ. Alahọ delẹ na yin bibiọ nado do afọzedaitọ sọha tangan de hlan nọtẹn plidopọ tọn delẹ, enẹwutu e ma na yọnbasi nado basi oylọ pọmẹ tọn na mẹlẹpo nado yì gba. Etomọṣo, tulinamẹnu de wẹ e na yin nado tindo afọzedaitọ sọha tangan he na ze afọ otò voovo lẹ tọn dai to ofi dopodopo.

Agun Kunnudetọ Jehovah tọn lẹ tọn na jẹ nudọnamẹ lẹ mọyi ji to madẹnmẹ gando pipli ehelẹ go. Nudọnamẹ lẹ gando azán tangan po tòdaho tangan he mẹ afọzedaitọ heyin oylọ basina lẹ na penugo nado yì na yin awuwlena gbọn alahọ yetọn lẹ dali. Enẹwutu, mí biọ dọ mì ni ma kàn owe kavi basi dodinnanu gando whẹho ehe go todin blo.

Mẹhe yin dide to godo mẹ taidi afọzedaitọ lẹ na yin Kunnudetọ klandowiwe he ko yí baptẹm he na yin apajlẹ dagbenọ bo do owanyi mẹmẹsunnu tọn hia mẹmẹsunnu lẹdo lọ tọn lẹ. To godo mẹ, yewlẹ na tindo dotẹnmẹ hundote dagbe lẹ nado do kuavọ owanyinọ gọna johẹmẹ alọtutlu tọn hia jonọ lọ lẹ. (Heblu lẹ 13:1, 2) Ehe na dekọtọn do ‘tulinina ode awetọ mẹ.’ (Lomunu lẹ 1:11, 12) Zẹẹmẹ dogọ lẹ gando tito ehelẹ go na yin nina gbọn alahọ he yin bibiọ nado do afọzedaitọ lẹ hlan otò tangan lẹ mẹ dali.

Plidopọ agbegbe azán atọ̀n tọn lẹ na owhe 2003 na yin tito-basina to otò susu mẹ dile e ko nọ yin do. Gbọn pipli dopọ dali, mẹlẹpo na tindo dotẹnmẹ hundote nado ‘dotoai, plọnnu, bo yin tulina.’ (Deutelonomi 31:12; 1 Kọlintinu lẹ 14:31) Ehe na hùn dotẹnmẹ dote na omẹ Jiwheyẹwhe tọn lẹpo nado ‘dọpọ́n bosọ mọdọ yinyọ́n wẹ Jehovah.’ (Psalm 34:8) To plidopọ akọjọpli tọn lẹpo ji, podọ to plidopọ agbegbe tọn susu ji, mẹdehlan lẹ na tin to finẹ, he delẹ to yé mẹ na sọawuhia to tito-to-whinnu lọ mẹ.

To owhe 2002 tọn ehe mẹ, mí to vivi Plidopọ Agbegbe “Lilatọ Zohunhunnọ Ahọluduta lọ Tọn Lẹ” tọn dù, ehe nọ whàn mí nado dekunnu dogọ. Dile mí to ehe wà, nukundido mítọn na jideji gando nuhe Jehovah tindo to sẹdotẹnmẹ na mí to owhe he ja mẹ go. Ehe na gọalọna mí nado ‘tin to aṣeji, nọ nukle, bo wleawudai’ to pọndohlan mẹ na ojlẹ sinsinyẹn po ayidego tọn ehelẹ po.—Matiu 24:42-44.