Weta 11
Naegbọn Jiwheyẹwhe Ko Jotẹndona Ylanwiwa?
1. (a) Etẹwẹ yin ninọmẹ lọ to egbehe to aigba ji? (b) Mọdọ tẹwẹ mẹdelẹ tindo?
FIDEPOPE he a pọn hlan to aihọn mẹ, finẹ wẹ owalọ osẹ́nhẹngba tọn, wangbẹnamẹ po tukla po tin te. E nọ saba yindọ homẹvọnọ lẹ wẹ nọ jiya. Gbẹtọ delẹ nọ dọ dọ Jiwheyẹwhe wẹ zọn. Ye sọgan dọ dọ: ‘Eyin Jiwheyẹwhe de tin, naegbọn e do jotẹndona onu dakandakan helẹ nado to jijọ?’
2. (a) Mẹnu wẹ to onu ylankan lẹ wà? (b) Nawẹ ye na ko gbẹkọ oyajiji susu he to tintin to aigba ji lẹ go gbọn?
2 Ṣogan mẹnu wẹ to onu ylankan helẹ wà do mẹdevo lẹ? Gbẹtọ lẹ wẹ, e ma yin Jiwheyẹwhe gba. Jiwheyẹwhe gblewhẹdo onu ylankan lẹ wiwà. Na nugbo tọn, susu oyajiji lẹ tọn to aigba ji wẹ na ko yin apadana eyin gbẹtọ lẹ setonuna osẹ́n Jiwheyẹwhe tọn lẹ. E degbena mí nado yiwannamẹ. E gbẹ mẹhuhu, ajojijẹ, ogalilọ, nukunkẹn, ahannumu po nuwiwa ylankan devo lẹ po he nọ hẹn gbẹtọvi lẹ nado jiya. (Lomunu lẹ 13:9; Efesunu lẹ 5:3, 18) Jiwheyẹwhe da Adam po Evi po apọn po agbasa jiawu de po podọ po nugopipe lọ nado duvivi ogbẹ̀ tọn to gigọ mẹ po. Uwọ ma ko jlo na ye gbede kavi na ovi yetọn lẹ nado jiya kavi nado tindo tukla gba.
3. (a) Mẹnu lẹ wẹ tindo azọngban na oylanwiwa? (b) Etẹwẹ dohia dọ Adam po Evi po sọgan ko diọnukunsọ whlepọn Satani tọn lẹ?
3 Satani Lẹgba wẹ yin omẹ lọ he jẹ ylanwiwa ji to aigba ji. Ṣigba whẹhuhu lọ sọ tin to Adam po Evi po ji ga. Yelẹ ma yin madogannọ sọmọ bọ ye ma na ko nọte sinsinyẹn whenuena Lẹgba whle ye pọn. Yewlẹ sọgan ko dọ na Satani nado “tọ́n sọn ofi,” mọpẹpẹ dile na omẹ pipe lọ Jesu wà do to godo etọn. (Matiu 4:10) Ṣigba ye ma wà mọ gba. Taidi kọdetọn etọn, ye lẹzun mapenọ. Ovi yetọn lẹpo, gọna mílọsu, ko dugu mape enẹ lọ, ehe hẹnwa po e po azọnjijẹ, awubla po oku po. (Lomunu lẹ 5:12) Ṣigba naegbọn Jiwheyẹwhe ko jotẹndona oyajiji nado to nukọnyi?
4. Etẹwẹ gọalọ na mí nado mọnukunnujẹ e mẹ dọ Jiwheyẹwhe owanyinanọ de sọgan jotẹndona oylanwiwa na whenu pẹẹde?
4 Mẹde to tintan whẹ sọgan lẹndọ whẹwhinwhẹn depope ma sọgan klo sọmọ na Jiwheyẹwhe nado dike na gbẹtọvi lẹ nido tindo numimọ oyajiji tọn na owhe kanweko susu lẹ gba. Ṣogan, be nusọgbe de wẹ e yin nado wà tadona mọnkọtọn kọn? Be mẹjitọ lẹ he yiwanna ovi yetọn lẹ sọmọ ma nọ dike na ye ni tindo mẹzizẹ awuvẹ tọn de nado sọgan basi vọjlado nuhahunnamẹ delẹ tọn? Mọwẹ, gbeyiyi na oyajiji na whenu pẹẹde ko nọ saba hẹn ẹn yọnbasi na ovi lẹ nado duvivi agbasalilo he yọnwhanpẹhu to godo etọn to gbẹ̀ninọ mẹ. Dagbe tẹwẹ ko yin wiwà gbọn tẹnmẹ he Jiwheyẹwhe ko jo na ylanwiwa dali?
WHẸHO TITENGBE DE DONA YIN DIDEDẸ
5. (a) Nawẹ Satani dọ onu he gbọnvo na Jiwheyẹwhe tọn gbọn? (b) Opagbe etẹ tọn wẹ Satani do na Evi?
5 Atẹṣiṣi lọ jẹagọdo Jiwheyẹwhe go to jipa Edẹni tọn mẹ fọn whẹho titengbe de kavi kanbiọ de dote. E jẹ mí ni dindona ẹn pọn nado sọgan mọnukunnujẹ e mẹ nuhewutu Jiwheyẹwhe do jotẹndona ylanwiwa. Jehovah ko dọ na Adam ma nado du sọn atin de mẹ to jipa lọ mẹ. Eyin Adam wà mọ, etẹwẹ na jọ? Jiwheyẹwhe dọ: “Hiẹ na ku dandan.” (Gẹnẹsisi 2:17) Ṣigba, Satani dọ nuhe jẹagọ do enẹ. E dọ na Adam sin asi, Evi, nado yi bo du sọn atin-gbẹnamẹ lọ mẹ. “Mì ma na ku dandan gba,” wẹ Satani dọ. Na nugbo tọn, e to nukọnyi nado dọ na Evi dọ: “Na Jiwheyẹwhe yọnẹn dọ azan he gbe mìwlẹ du to e mẹ te, whenẹnu wẹ yè na hun nukun mìtọn, bọ mìwlẹ na tin di Jiwheyẹwhe, bo nọ yọn onu dagbe po oylan po.”—Gẹnẹsisi 3:1-5.
6. (a) Naegbọn Evi do vẹtoli na Jiwheyẹwhe? (b) Etẹ mẹ wẹ e zẹẹmẹdo nado du to atin-gbẹnamẹ lọ mẹ?
6 Evi vẹtoli na Jiwheyẹwhe bosọ du. Etẹwutu wẹ? Evi yi Satani se. E gbọn ṣejannabi dali do lẹndọ emi na yin alenọ gbọn tolivivẹ dohlan Jiwheyẹwhe dali. E lẹnpọn dọ e ma nasọ yin nuhe jẹ na ẹn po Adam po nado nọ jota na Jiwheyẹwhe. Ye ma sọ dona litai hlan osẹ́n etọn lẹ ba. Ye sọgan nọ dè dide na yede nuhe yin “dagbe” po nuhe yin “oylan” po. Adam hodo Evi bosọ du ga. To ohodidọ dogbọn ylanwiwa dowhenu gbẹtọ tọn dali do Jiwheyẹwhe, zẹẹmẹ odo tọn de to The Jerusalem Bible mẹ dọmọ: “E yin huhlọn lọ nado dè dide na ede onu he yin dagbe po onu he yin oylan po podọ nado yinuwa mọpẹpẹ, nudidọ de dohlan mẹdekannujẹ mlẹnmlẹn to walọyizan mẹ . . . Ylando tintan lọ yin avunhiho de jẹagọdo nupojipetọ-yinyin Jiwheyẹwhe tọn.” Enẹwẹ yindọ, eyin avunhiho de do jlọjẹ Jiwheyẹwhe tọn nado yin ogan pete kavi mẹdaho hugan gbẹtọ tọn.
7. (a) Whẹho tẹwẹ yin finfọndote gbọn tolivivẹ gbẹtọ tọn dali? (b) Kanbiọ tẹlẹ wẹ biọ dọ yè ni na gblọndo yetọn to kọndopọ mẹ po whẹho ehe lọ po?
7 Enẹwutu gbọn dudu to atinsinsẹ́n gbẹnamẹ lọ mẹ dali, Adam po Evi po dè yede sẹ sọn gandudu Jiwheyẹwhe tọn glọ. Ye tọnjẹgbonu na yede, bo to wiwà onu he yin “dagbe” kavi “oylan” mọpẹpẹ di nudide yetọn titi lẹ. Enẹwutu whẹho titengbe kavi kanbiọ he fọn lọ wẹ yin: Be Jiwheyẹwhe tindo jlọjẹ lọ nado yin ogan mlẹnmlẹn gbẹtọvi lẹ tọn? To hogbe devo mẹ, be Jehovah wẹ yin Omẹ lọ nado de dide onu he yin dagbe po oylan po tọn na gbẹtọvi lẹ? Be uwọ wẹ yin Omẹ lọ nado dọ nuhe yin walọ dagbe po ehe ma yin mọ po? Kavi gbẹtọ sọgan wa onu dagbe humọ na ede gbọn gandudu do ede ji tọn dali? Mẹnu sin wunmẹ gandudu tọn wẹ yọn hugan? Be gbẹtọvi lẹ to anademẹ mayinukundomọ Satani tọn glọ, na dugan po kọdetọn dagbe de po matin anademẹ Jehovah tọn? Kavi anadẹnamẹ Jiwheyẹwhe tọn yin nuhe jẹ nado sọgan ze gandudu dodo tọn de dai ehe na hẹn jijọho kakadoi wa aigba ji? Kanbiọ mọnkọtọn lẹpo wẹ yin finfọndote to nukundiọsọ nupojipetọ-yinyin Jiwheyẹwhe tọn lọ mẹ, do jlọjẹ etọn tọn ji nado yin gandutọ lọ kẹdẹ po ehe yiaga mlẹnmlẹn gbẹtọvi lẹ tọn.
8. Naegbọn Jehovah ma do hu atẹṣitọ lọ lẹ sudo to afọdopolọji?
8 Nalete, to afọdopolọji hetọn atẹṣiṣi lọ jọ Jehovah sọgan ko hù atẹṣitọ atọ̀n lẹ sudo. Ayihaawe depope matin vlavo eyin uwọ yin huhlọnnọ hugan Satani kavi Adam po Evi po. Ṣigba hùhù ye sudo ma na ko didẹ whẹho lọ lẹ to aliho he yọn hugan mẹ gba. Di dohia, e ma na ko na gblọndo kanbiọ lọ tọn eyin vlavo gbẹtọvi lẹ sọgan gbọn kọdetọn dagbe dali do dugan do yede ji matin alọgọ sọn Jiwheyẹwhe de. Enẹwutu Jehovah dike na whenu ni tin nado didẹ whẹho titengbe lọ he ko yin finfọndote.
DIDEDẸ WHẸHO LỌ TỌN
9, 10. Etẹwẹ ko yin kọdetọn lọ lẹ na gbẹtọ lẹ sin vivẹnudido nado dugan do ede ji matin alọgọ Jiwheyẹwhe tọn?
9 Todin he ojlẹ kavi whenu ko juwayi, etẹwẹ ko yin kọdetọn lọ? Eyọn, etẹwẹ hiẹ na dọ? Be owhe 6 000 he juwayi to whenuho mẹ ko dohia dọ gbẹtọ lẹ to gandu do ede ji gbọn kọdetọn dagbe dali matin anadena Jiwheyẹwhe tọn? Be gbẹtọvi lẹ ko wleawuna gandudu dagbe de na dona po ayajẹ mẹlẹpo tọn? Kavi be kandai whenuho tọn ko dohia dọ oho yẹwhegan Jẹlemia tọn lẹ wẹ sọgbe: “Aliho gbẹtọ tọn ma tin to ewlọsu mẹ gba: e ma tin to omẹ he to zọnlinzin mẹ nado do afọdide etọn lẹ gba”?—Jẹlemia 10:23.
10 To whenuho mẹ wunmẹ gandudu lẹpo tọn wẹ ko yin tintẹnpọn, ṣigba depope ma ko hẹn vivomẹninọ po ayajẹ nugbo tọn po wà na enẹnọ lẹ he nọnọ̀ gandudu yetọn glọ gba. Gbẹtọ delẹ sọgan dlẹnalọ dohlan ohia nukọnyiyi tọn lẹ. Ṣigba be mẹde sọgan dọho nukọnyiyi nugbo tọn de whenuena ye ko diọ oga lẹ po agaba lẹ po zun bọmbu lẹ, podọ whenuena aihọn lọ todin tin to obu awhan devo tọn mẹ? Wunmẹ nukọnyiyi tọn tẹwẹ e yin whenuena gbẹtọ lẹ sọgan zinzọnlin to osun mẹ ṣigba ma sọgan nọpọ po yede po to jijọho mẹ to aigba ji? Dagbe tẹwẹ e yin na gbẹtọvi lẹ nado gbà owhé he gọna núzinzan azọ́nhẹnbọawu egbezangbe tọn wunmẹ lẹpo whenuena whẹndo yetọn lẹ he nọnọ̀ ye mẹ yin tintlẹn do vovo gbọn tukla lẹ dali? Be gufinfọn he to tintin to aliho ji lẹ, husudo nutindo lẹ po ogbẹ̀ po tọn gọna gbigbayipe walọ osẹnhẹngba tọn yin nude nado yigo gbọn dali etọn? E ma yin mọ depope! Ṣigba ehelẹ wẹ ko yin kọdetọn vivẹnudido gbẹtọ tọn nado dugan do yedelẹ ji matin Jiwheyẹwhe.—Howhinwhẹn lẹ 19:3.
11. Enẹwutu, na jide tọn, etẹ din wẹ gbẹtọvi lẹ te?
11 Kunnudenu lọ dona yin nuhe họnwun na mẹlẹpo. Vivẹnudido gbẹtọ tọn lẹ nado dugan do ede ji matin Jiwheyẹwhe ko yin awugbopo daho de. Ye ko tọ́nta do oyajiji daho gbẹtọvi lẹ tọn mẹ. “Mẹde to gandu do omẹ awetọ ji na awugble etọn,” wẹ Biblu basi zẹẹmẹ etọn. (Yẹwhehodọtọ 8:9) E họnwun to whelọnu lo dọ gbẹtọ to dindin anadenamẹ Jiwheyẹwhe tọn nado penukundo whẹho yetọn lẹ go. Mọpẹpẹ dile Jiwheyẹwhe da gbẹtọ po nuhudo lọ po nado dunu bosọ nù osin, mọwẹ gbẹtọ yin dida po nuhudo lọ po nado setonuna osẹ́n Jiwheyẹwhe tọn lẹ. Eyin gbẹtọ dekọsẹ sọn osẹ́n Jiwheyẹwhe tọn lẹ go, e na biọ tukla mẹ, mọpẹpẹ po jide po dile na uwọ na jiya do eyin uwọ gbẹkọ nuhudo agbasa etọn tọn go na nududu po osin po.—Howhinwhẹn lẹ 3:5, 6.
NAEGBỌN E DO DẸN SỌMỌ?
12. Naegbọn Jiwheyẹwhe do jotẹndona whenu dindẹn sọmọ nado didẹ whẹho lọ?
12 Ṣigba, mẹde sọgan kanse dọ, ‘Naegbọn Jiwheyẹwhe do jotẹndo na whenu susu sọmọ, dibla yi owhe 6 000 todin, nado didẹ whẹho lọ? Be e ma na ko yin nuhe ye didẹ etọn to aliho pekọnamẹ de mẹ to whenu dindẹn wayi?’ E ma yin mọ gba. Eyin Jiwheyẹwhe ko kẹnù demẹ whenu dindẹn die wẹ, whẹsadokọnamẹ lọ sọgan ko yin bibasi dọ gbẹtọvi lẹ ma ko yin nina whenu su sọmọ nado tẹnpọn gba. Ṣigba dile e te do, gbẹtọvi lẹ ko tindo whenu su sọmọ nado jlọ gandudu de dote he na na pekọ nuhudo mẹhe tin to glọ etọn tọn lẹpo, bosọ basi dodinnanu gbọn nuyọnẹn wintinwintin dali he sọgan na alọgọna na jijẹadọkun mẹlẹpo tọn. To owhe kanweko lẹ gblamẹ gbẹtọvi lẹ ko tẹn dibla yin wunmẹ gandudu lẹpo tọn pọn. Podọ nukọnyiyi yetọn to awa nuyọnẹn wintinwintin tọn mẹ yin onu daho de. Ye ko yi nuyọnẹn atome tọn zan bo basi gbejizọnlin sọyi osun mẹ. Ṣigba etẹwẹ ko yin kọdetọn etọn? Be e ko hẹn whenunu yọyọ daho dona tọn de wá na gbẹtọvi lẹ?
13. (a) Na mahopọnna nukọnyiyi nuyọnẹn wintinwintin tọn lẹpo he gbẹtọ ko tindo, etẹwẹ yin ninọmẹ lọ to egbehe? (b) Etẹwẹ ehe dohia gbangba?
13 Gbede pọn! Kakati mọ, matindo ayajẹ suhumọ po tukla po wẹ tin hugan dai tọn. Na nugbo tọn, walọ osẹnhẹngba tọn, hẹngble jẹhọn tọn, awhan, gbakija whẹndo tọn po nuhahunnamẹ devo lẹ po ko wa jẹ otẹn he gọna owu mẹ sọmọ bọ nuyọnẹntọ lẹ lọsu yise dọ tintin gbẹtọ tọn lọsu wẹ ye to nukunvando. Mọwẹ, to nudi owhe 6 000 gandudu yẹnlọsu tọn godo, podọ to “nukọnyiyi” he yiaga to nuyọnẹn wintinwintin tọn mẹ, gbẹtọvi lẹ todin wa pannukọn mẹdetiti-husudo tọn! Nawẹ e yin nuhe họnwun sọ dọ gbẹtọ ma sọgan dugan do ede ji matin Jiwheyẹwhe! Mọwẹ mẹdepope todin ma sọgan hlun dọ Jiwheyẹwhe ma na whenu su sọmọ nado didẹ whẹho lọ gba.
14. Naegbọn mí do yin nina tuli nado dindona pọn whẹho titengbe devo he yin finfọndote gbọn Satani dali?
14 Po jide po Jiwheyẹwhe ko tindo nujikudo dagbe nado jotẹndo na gbẹtọvi lẹ to gandudu Satani tọn glọ nado hẹn oylanwiwa lọ tin na ojlẹ su sọmọ. Gbọn atẹṣiṣi etọn dali Satani fọn whẹho devo dote he sọ biọ whenu ga nado didẹ etọn. Dogbapọnna whẹho ehe na na alọgọ yinukọn dogọ to nukunnumimọjẹ nuhewutu Jiwheyẹwhe do jotẹndo na ylanwiwa lọ mẹ. Hiẹ dona tindo ojlo to ehe mẹ na e gando hiẹ lọsu titi go wutu.
[Yẹdide to weda 100]
Po whẹwhinwhẹn dagbe po, onọ de sọgan yigbe dọ ovi yiwanna de ni yin zizẹ po awuvẹ po. Jiwheyẹwhe ga tindo whẹwhinwhẹn dagbe lẹ na tẹnmẹjijodona gbẹtọvi lẹ nado jiya na whenu pẹẹde
[Yẹdide to weda 101]
Adam po Evi po gbẹ gandudu Jiwheyẹwhe tọn dai gbọn dudu to atinsinsẹ́n gbẹnamẹ lọ mẹ dali. Ye jẹ nudidè lẹ basi na yede ji na nuhe du dagbe po oylan po
[Yẹdide to weda 103]
Mọpẹpẹ dile gbẹtọ yin dida po nuhudo lọ po nado dunu bo sọ nu osin, uwọ yin dida po nuhudo lọ po na anademẹ Jiwheyẹwhe tọn ga