Adà 6
Nuhewutu Jiwheyẹwhe Do Jotẹnna Yajiji
1, 2. Nawẹ mẹjitọ mítọn tintan lẹ hẹn bẹjẹeji dagbe he Jiwheyẹwhe na yé gble gbọn?
ETẸWẸ whànnu? Etẹwẹ jọ he hẹn bẹjẹeji dagbe he Jiwheyẹwhe na mẹjitọ tintan mítọn lẹ to Paladisi Edẹni tọn mẹ gble? Etẹwutu, kakati nido yin Paladisi jijọho po kọndopọ tọn po, bọ danuwiwa po yajiji po do gbayipe na owhe fọtọ́n susu lẹ?
2 Whẹwhinwhẹ́n lọ wẹ yindọ Adam po Ẹvi po ṣi ojlo mẹdekannujẹ tọn yetọn zán. Yé gboawupo nado lẹnnupọn do nugbo lọ ji dọ yé ma yin didá nado tindo kọdetọn dagbe matin Jiwheyẹwhe po osẹ́n etọn lẹ po gba. Yé basi dide nado tin to yede kannu sọn Jiwheyẹwhe dè, po lẹnpọn lọ po dọ ehe na hẹn gbẹ̀zan yetọn lẹ pọnte. Enẹwutu yé tọ́n sọn dogbo ojlo mẹdekannujẹ tọn he yin zizedai gbọn Jiwheyẹwhe dali mẹ.—Gẹnẹsisi, weta 3.
Whẹho Nupojipetọ-yinyin Wẹkẹ Lẹpo Tọn
3-5. Naegbọn Jiwheyẹwhe ma do và Adam po Ẹvi po sudo poun bo vọ bẹjẹeji?
3 Naegbọn Jiwheyẹwhe ma do và Adam po Ẹvi po sudo poun bo vọ bẹjẹeji po asu po asi devo tọn po? Na nupojipetọ-yinyin wẹkẹ lẹpo etọn tọn, enẹ wẹ yindọ, jlọjẹ etọn nado dugan he yè ma sọgan desẹ, ko yin avùnnukundiọsọ wutu wẹ.
4 Kanbiọ lọ wẹ yindọ: Mẹnu wẹ tindo jlọjẹ nado dugan, podọ gandudu mẹnu tọn wẹ jlọ? Ganhunupotọ-yinyin etọn po Didatọ onu lẹpo tọn etọn po na Jiwheyẹwhe jlọjẹ lọ nado dugan do yé ji. To whenue eyin dọ eyin nuyọnẹn lẹponọ, gandudu etọn yin dagbe na nudida lẹpo. Ṣigba gandudu Jiwheyẹwhe tọn ko yin avùnnukundiọsọ todin. Humọ, be nude ka jẹagọdo nudida etọn—yèdọ gbẹtọ wẹ ya? Mí na gbadopọnna lehe e bẹ́ kanbiọ tenọgligo hinhẹn gbẹtọvi lẹ tọn hẹn do to nukọnmẹ.
5 Gbọn tintin to mẹdekannu gbẹtọvi lẹ tọn sọn Jiwheyẹwhe dè dali, kanbiọ devo sọ dohia dọmọ: Be gbẹtọvi lẹ na wà dagbe eyin yé ma yin mẹjidugando gbọn Jiwheyẹwhe dali ya? Na jide tọn Mẹdatọ lọ yọ́n gblọndo lọ, ṣigba aliho nujikudo tọn de na gbẹtọvi lẹ nado dindona wẹ nado na yé mẹdekannujẹ mlẹnmlẹn he yé jlo. Yé dè yanwle enẹ na ojlo mẹdekannujẹ yedetiti tọn, enẹwutu Jiwheyẹwhe jotẹndona ẹn.
6, 7. Naegbọn Jiwheyẹwhe na dotẹnmẹ mẹdekannujẹ mlẹnmlẹn tọn gbẹtọvi lẹ na whenu dindẹn sọmọ?
6 Gbọn dotẹnmẹ he pé nina gbẹtọvi lẹ nado basi dodinnanu po mẹdekannujẹ mlẹnmlẹn po dali, Jiwheyẹwhe na zé dodonu etọn sinai pete vlavo eyin gbẹtọvi lẹ na tin to dagbe mẹ to gandudu Jiwheyẹwhe tọn glọ wẹo kavi tin na yede. Podọ ojlẹ he yin jijodo lọ dona sù ganji nado na dotẹnmẹ gbẹtọvi lẹ nado jẹ nuhe yé lẹn nado yin tonudidọ, azọ́nwhe, lẹnunnuyọnẹn, po amasinzọ́nwiwa kọdetọn dagbe yetọn lẹ tọn po kọ̀n.
7 Enẹwutu, Jiwheyẹwhe ko na gbẹtọ dotẹnmẹ hundote gigọ́ mẹdekannujẹ gó-dé-mẹ tọn kaka jẹ azán mítọn gbè nado dohia zẹ ayihaawe depope tintindo go vlavo eyin gandudu gbẹtọvi lẹ tọn matin ewọ sọgan tindo kọdetọn dagbe. Gbọnmọ gbẹtọ ko penugo nado basi dide to dagbewanyi po kanyinylan po ṣẹnṣẹn, to owanyi po wangbẹna po ṣẹnṣẹn, dodo po mawadodo po ṣẹnṣẹn. Ṣigba ewọ na sọ yin pinpannukọn po kọdetọn dide etọn lẹ tọn po: dagbewa po jijọho po kavi ylanwa po yajiji po.
Atẹṣiṣi Nudida Gbigbọnọ Lẹ Tọn
8, 9. (a) Nawẹ atẹṣiṣi gbajẹgbonu to lẹdo gbigbọ tọn mẹ gbọn? (b) Mẹnu gbọnvona Adam po Ẹvi po wẹ Satani yinuwadeji nado ṣiatẹ?
8 Ninọmẹ devo sọ tin nado lẹnnupọn deji. Mẹjitọ dowhenu mítọn lẹ kẹdẹ ma wẹ ṣiatẹ sọta gandudu Jiwheyẹwhe tọn gba. Ṣigba mẹdevo tẹwẹ sọ tin to ojlẹ enẹ mẹ? Nudida gbigbọnọ lẹ wẹ. Whẹpo Jiwheyẹwhe do dá gbẹtọvi lẹ, ewọ dá onu gbigbọnọ he yiaga de, yèdọ sọha susugege angẹli lẹ tọn, nado nọgbẹ̀ to lẹdo olọn tọn mẹ. Yé lọsu ga yin dida po ojlo mẹdekannujẹ tọn po gọna nuhudo lọ nado litaina gandudu Jiwheyẹwhe tọn.—Job 38:7; Psalm 104:4; Osọhia 5:11.
9 Biblu dohia dọ atẹṣitọ enẹ gbajẹgbonu tintan to lẹdo gbigbọ tọn mẹ. Nudida gbigbọnọ de jlo mẹdekannujẹ mlẹnmlẹn. E tlẹ sọ jlo dọ gbẹtọvi lẹ ni basi sinsẹ̀n hlan ẹn. (Matiu 4:8, 9) Gbigbọ atẹṣitọ ehe lẹzun ninọmẹ de he yinuwado Adam po Ẹvi po ji nado ṣiatẹ, bo sọalọakọn po lalodido po dọ Jiwheyẹwhe to alọ nudagbe tọn dọ̀ndogodo na yé. (Gẹnẹsisi 3:1-5) Enẹwutu e nọ yin yiylọ dọ Lẹgba (Mẹhẹngbletọ) po Satani (Agọjẹdomẹtọ) po. To godomẹ, e klọ̀ nudida gbigbọnọ devo lẹ nado ṣiatẹ. Yé wá yin yinyọnẹn di aovi lẹ.—Deutelonomi 32:17; Osọhia 12:9; 16:14.
10. Etẹwẹ dekọtọn sọn atẹṣiṣi gbẹtọvi lẹ tọn po nudida gbigbọnọ lẹ tọn po mẹ?
10 Gbẹtọvi lẹ, gbọn atẹṣiṣi sọta Jiwheyẹwhe dali, jo yede do na nuyiwadomẹji Satani po aovi etọn lẹ po tọn. Enẹwutu wẹ Biblu ylọ Satani dọ “yẹwhe owhenu he tọn,” mẹhe ko “tọ́nnukunna nuyọnẹn omẹ he ma yise lẹ tọn.” Gbọnmọ, Ohó Jiwheyẹwhe tọn dọ dọ “aihọn lẹpo sọ mlọnai to omẹ ylankan lọ mẹ.” Jesu lọsu ylọ Satani dọ “ahọvi aihọn ehe tọn.”—2 Kọlintinu lẹ 4:4; 1 Johanu 5:19; Johanu 12:31.
Whẹho Awe Lẹ
11. Gando whẹho devo tẹlẹ go wẹ Satani diọavùnnukunsọ Jiwheyẹwhe?
11 Satani fọ́n whẹho devo dote he diọavùnnukunsọ Jiwheyẹwhe. Na taun tọn, e ylọwhẹ dọ Jiwheyẹwhe ṣinuwa to aliho he mẹ Ewọ dá gbẹtọvi lẹ te podọ mẹdepope ma na jlo nado wà nuhe jlọ gba eyin e tin to kọgbidinamẹnu glọ. Na nugbo tọn, e sọalọakọn dọ to whlepọn glọ́ yé na tlẹ zùn Jiwheyẹwhe. (Job 2:1-5) To aliho ehe mẹ Satani ylọ tenọgligo hinhẹn gbẹtọvi lẹ tọn wá kanbiọ mẹ.
12-14. Nawẹ ojlẹ na do nugbo dogbọn whẹho awe lọ lẹ hia gbọn?
12 Enẹwutu, Jiwheyẹwhe ko jotẹnna ojlẹ he pé na nudida nuyọnẹnnọ etọn lẹpo nado mọ lehe yè na didẹ̀ whẹho ehe gọna whẹho nupojipetọ-yinyin Jiwheyẹwhe tọn po gbọn. (Yijlẹdo Eksọdusi 9:16 go.) Numimọ godomẹ whenuho gbẹtọvi lẹ tọn tọn na do nugbo lọ dogbọn whẹho awe ehelẹ dali hia.
13 Jẹnukọn whẹ́, etẹwẹ ojlẹ na dohia gando whẹho nupojipẹtọ-yinyin wẹkẹ lẹpo tọn, yèdọ jlọjẹ-yinyin gandudu Jiwheyẹwhe tọn go? Be gbẹtọvi lẹ sọgan dugan do yedelẹ ji po kọdetọn dagbe po hugan Jiwheyẹwhe wẹ ya? Be tito gandudu gbẹtọvi lẹ tọn depope matin Jiwheyẹwhe na dekọtọn do aihọn ayajẹ tọn he tin to mẹdekannu sọn awhàn, sẹ́nhẹngba, po whẹdida agọ̀ po si ya? Be depope sọgan dè ohẹ́n sọn aimẹ bo wleawu adọkun-yinyin na mẹlẹpo ya? Be depope sọgan gbawhàn awutu, yọnhopipo, po okú po tọn ya? Gandudu Jiwheyẹwhe tọn yin awuwlena nado wà enẹ lẹpo.—Gẹnẹsisi 1:26-31.
14 Gando whẹho awetọ go, etẹwẹ ojlẹ lẹ na dohia gando nuhọakuẹ-yinyin nudida gbẹtọvi tọn go? Be nuṣiwa de wẹ eyin na Jiwheyẹwhe nado dá gbẹtọvi lẹ to aliho he mẹ e basi do ya? Be depope yetọn na wà nuhe jlọ to whlepọn glọ ya? Be mẹdepope na dohia dọ yé jlo gandudu Jiwheyẹwhe tọn kakati gandudu mẹdekannujẹ gbẹtọvi lẹ tọn ya?
[Yẹdide to weda 13]
Jiwheyẹwhe ko na dotẹnmẹ ojlẹ he pé gbẹtọvi lẹ nado jẹ wadotana kọdetọn dagbe yetọn lẹ kọn
[Asisa Yẹdide tọn]
Agahún: Yẹdide NASA tọn