Weta 15
Azọ́njiawu Tintan Jesu Tọn
NUDI azán dopo kavi awe de poun wẹ todin sọn whenue gbọ́n Andlé, Pita, Johanu, Filippi, Natanaeli, podọ vlavo Jakobu lẹzun devi tintan Jesu tọn lẹ. Yé pànta whé todin jei agbegbe Galili tọn, fie yemẹpo tọ́nsọn. Kana wẹ yé jei, yèdọ otò Natanaeli tọn, he tin to pópló lẹ he ma dẹn do Nazalẹti ṣẹnṣẹn, fie Jesu lọsu whẹ́n te. Yé ko yin oylọ-basina do hùnwhẹ alọwle tọn de tẹnmẹ to Kana.
Onọ̀ Jesu tọn lọsu ko wá alọwle lọ tẹnmẹ. Taidi họntọn whẹndo mẹhe to alọwle lẹ tọn, Malia sọawuhia nado ko yin gingandego to lizọnyíyí hlan nuhudo jonọ susu lọ lẹ tọn mẹ. Enẹwutu e yawu doayi nuwhedomẹ de go, ehe e na linlin etọn hlan Jesu dọmọ: “Yé ma tindo ovẹn gba.”
Gbọnmọ dali, to whenuena Malia na ayinamẹ dọ Jesu ni wà nude dogbọn ovẹn he ma tin dali, Jesu whleawu to tintan whenu. “Etẹwẹ yẹn do na wà hẹ we?” wẹ e kanse. Taidi Ahọlu dide Jiwheyẹwhe tọn, e ma dona yin anadena gbọn whẹndo kavi họntọn lẹ dali to nuwiwa etọn mẹ gba. Enẹwutu Malia gbọn nuyọnẹn dali jo whẹho lọ dó alọ visunnu etọn tọn mẹ, bo dọna lizọnyitọ lẹ poun dọ: “Onú depope e dọ hlan mì, mì wà ẹ.”
Eyọn, ozẹ́n he yè yí zannu do basi ṣidopo wẹ tin to finẹ, dopodopo ehe tọn sọgan hẹn hugan lítlì 40. Jesu degbena mẹhe to lizọnyi lẹ dọmọ: “Mì dà osin gọ́ ozẹ́n lẹ.” Podọ lizọnyitọ lọ lẹ dàsin gọ́ yé mẹ jẹ onù. Enẹgodo Jesu dọmọ: “Mì bà ẹ dinvie, bo ze yì na ogán núdùdù tọn.”
Ogán lọ yin whinwhàn gbọn wunmẹ dagbe ovẹn lọ tọn dali, to mayọnẹn dọ e ko yin bibasi to azọ́njiawu liho. Yiylọ hlan asisunọ lọ, e dọmọ: “Omẹ popo to whẹwhẹwhenu nọ ze ovẹn dagbe jẹgbonu; whenuena gbẹtọ lẹ ko muahàn dagbedagbe, whenẹnu ehe ylanhú: ṣigba hiẹ to ovẹn dagbe gòpayi kakajẹ dinvie.”
Azọ́njiawu tintan Jesu tọn die, podọ to whenuena yé mọ ẹn godo, yise devi yọyọ etọn lẹ tọn yin hinhẹn lodo. Enẹgodo, to pọmẹ hẹ onọ̀ etọn po nọvisunnu daa etọn lẹ po, yé zìn gbejizọnlin yì tòdaho Kapẹlnaumi tọn mẹ sẹpọ Ohù Galili tọn. Johanu 2:1-12.
▪ Whetẹnu to lizọnyizọn Jesu tọn whenu wẹ alọwle lọ wá aimẹ to Kana?
▪ Naegbọn Jesu do jẹagọdo ayinamẹ onọ̀ etọn tọn?
▪ Azọ́njiawu tẹwẹ Jesu wà, podọ nugandomẹgo tẹwẹ e tindo do mẹdevo lẹ ji?