Azọ́njiawu Awetọ to Whenuena E Tin to Kana — WESẸDOTẸN INTẸNẸT JI TỌN Watchtower Tọn

Weta 20

Azọ́njiawu Awetọ to Whenuena E Tin to Kana

TO WHENUENA Jesu lẹkọwa otò etọn mẹ to nujijla yẹwhehodidọ tọn gbloada de godo to Judé, e mayin nado gbọjẹ gba. Kakatimọ, e bẹ lizọnyizọn he gbloada hugan de jẹeji to Galili, yèdọ otò he mẹ e whẹ́n te. Ṣigba devi etọn lẹ, kakati nado nọ̀ hẹ ẹ, yé lẹkọyi whé yì whẹndo yetọn lẹ dè po agbasazọ́n yetọn hoho lẹ po kọ̀n.

Wẹndomẹ tẹwẹ Jesu jẹ yẹwheho etọn dọ ji? Ehe: “Ahọludu Jiwheyẹwhe tọn sẹpọ: mì lẹnvọjọ, bo yí wẹndagbe sè.” Podọ etẹwẹ yin kọdetọn lọ? Galilinu lẹ kẹalọyi Jesu. E yin gbégbòna gbọn mẹlẹpo dali. Etomọṣo, ehe na titengbe tọn ma yin na wẹndomẹ etọn wutu gba ṣigba, kakatimọ, na susu yetọn lẹ tin to Juwayi lọ tẹnmẹ to osun delẹ die wayi to Jelusalẹm bo mọ azọ́njiawu ayidego tọn he e basi lẹ wutu.

E họnwun dọ Jesu bẹ lizọnyizọn daho Galili tọn etọn jẹeji to Kana. Jẹnukọn, hiẹ sọgan flin dọ, to kọlilẹ sọn Judé whenu, e lẹ́ osin zun ovẹn to hùnwhẹ alọwle tọn de whenu to finẹ. To nujijọ awetọ ehe whenu, ovi ahọluzọnwatọ Ahọlu Hẹlodi Antipas tọn de to azọ̀njẹ sinsinyẹn. To sisè dọ Jesu ko tọ́nsọn Judé wá Kana, ahọluzọnwatọ lọ zin gbejizọnlin gaa sọn owhé etọn gbè to Kapẹlnaumi nado dín Jesu mọ. Po awubla po, dawe lọ vẹvẹ dọmọ: ‘Jaale wá to afọdopolọji, whẹpo ovi ṣie nido kú.’

Jesu gblọn dọmọ: ‘Lẹkọyi whé. Visunnu towe ko yin azọ̀nhẹngbọna!’ Ahọluzọnwatọ Hẹlodi tọn yise bosọ bẹ gbejizọnlin gaa jẹeji jei whé. Afanumẹ etọn lẹ pe e to aliho ji, mẹhe ko to whlẹndo ji nado yì dọna ẹn dọ nulẹpo ko diọ jẹ dagbe—visunnu etọn ko jẹ gángán! ‘Whetẹnu wẹ e pọnte na ẹn?’ wẹ e kanse.

‘Osọ to ogàn dopo mẹ whèmẹ,’ wẹ yé gblọn dọ.

Ahọluzọnwatọ lọ doayi e go dọ ojlẹ enẹ yin ogàn lọ mẹ pẹpẹ he Jesu dọ te dọ, ‘Visunnu towe ko jẹ gángán!’ To enẹgodo, dawe lọ po whédo etọn pete po lẹzun devi Klisti tọn lẹ.

Gbọnmọ dali Kana mọ nukundagbe yí taidi nọtẹn lọ fie, to ohia kọlilẹ etọn tọn sọn Judé didohia mẹ, Jesu wà azọ́njiawu te whlaawe. Na nugbo tọn, ehelẹ ma yin azọ́njiawu he e basi lẹpo kakajẹ ojlẹ ehe mẹ gba, ṣigba yé yin ayidego tọn lẹ na yé dohiagona kọlilẹ etọn wá Galili wutu.

Todin Jesu pànta whé to Nazalẹti. Etẹwẹ to tenọpọn ẹn to finẹ? Johanu 4:43-54; Malku 1:14, 15; Luku 4:14, 15.

▪ To whenuena Jesu lẹkọyi Galili, etẹwẹ jọ do devi etọn lẹ go, podọ nawẹ gbẹtọ lẹ kẹalọyi i gbọn?

▪ Azọ́njiawu tẹwẹ Jesu wà, podọ nawẹ e yinuwado mẹhe go e gando lẹ ji gbọn?

▪ Nawẹ Kana mọ nukundagbe gbọn Jesu dali do?