Weta 22
Devi Ẹnẹ Yin Yiylọ
TO TINTẸNPỌN nado hù Jesu to otò etọn mẹ to Nazalẹti godo, e sẹtẹn yì todaho Kapẹlnaumi tọn mẹ sẹpọ Ohù Galili tọn. Ehe hẹn dọdai Isaia tọn devo di. E yin dehe dọ dọdai dọ omẹ Galili tọn he nọ nọ̀ ohù lọ tó lẹ na mọ hinhọ́n daho de.
Dile Jesu zindonukọn to azọ́n hinhọ́n-titá yẹwhehodidọ Ahọluduta tọn etọn mẹ tofi, e mọ ẹnẹ to devi etọn lẹ mẹ. Omẹ ehelẹ ko zin gbejizọnlin hẹ ẹ jẹnukọn ṣigba lẹkọyi azọ́n whehuhu tọn yetọn kọ̀n to whenuena yé lẹkọ sọn Judé hẹ Jesu. Vlavo, Jesu dín yé mọ todin, to whenuena e yindọ ojlẹ lọ ko wá nado tindo alọgọtọ pẹkipẹki gbesisọ tọn lẹ, mẹhe e sọgan plọn nado zindonukọn to azọ́n lizọnyizọn lọ tọn mẹ to whenuena ewọ na ko yì godo.
Enẹwutu dile Jesu to zọnlinzin to ohùtó bo mọ Simọni Pita po gbẹdohẹmẹtọ etọn lẹ po to odọ̀ yetọn lẹ klọ́, e dlí yì yé dè. E hẹji biọ tọjihun Pita tọn mẹ bo dọna ẹn nado joagọyigodo vude sọn ageklo ji. To whenuena yé yì godo vude, Jesu sinai to tọjihun lọ mẹ bosọ jẹ nuplọn gbẹtọgun he tin to ohùtó lẹ ji.
Enẹgodo, Jesu dọ hlan Pita dọmọ: “Sisẹ do odò ohù tọn mẹ; na mì ni kọ̀n odọ̀ mìtọn na bẹpli.”
“Oklunọ,” wẹ Pita gblọn dọ, “ozanmẹ osọ lẹpo wẹ mí ko jẹtukla, bo ma wle nudepope: ṣigba to ohó towe ji yẹn na kọ̀n odọ̀ lọ do odò mẹ.”
To whenuena odọ̀ lẹ yin kinkọ̀n do odò, whèvi susugege he yin wiwle lọ sù sọmọ bọ odọ̀ lọ jẹ tintlẹ́n ji. Po awuyiya po, sunnu lọ lẹ mìalọ hlan hatọ yetọn he tin to tọjihun he sẹpọ de mẹ nado wá gọalọ. To madẹnmẹ tọjihun awe lẹ yin hinhẹn gọ́ po whèvi susu po sọmọ bọ yé jẹ sisiọ ji. Mimọ ehe, Pita jẹklo do nukọnna Jesu bo dọmọ: “Yì sọn dee; na gbẹtọ ylandonọ wẹ yẹn, Oklunọ E.”
“A dibu blo,” wẹ Jesu gblọn dọ. “Sọn dinvie yì, hiẹ na wle gbẹtọ lẹ.”
Jesu sọ basi oylọ na nọvisunnu Pita tọn Andlé. “Mì to hihodo mi,” wẹ e dotuhomẹna yé dọ, “yẹn na hẹn mì zun whèhutọ gbẹtọ lẹ tọn.” Whèhutọ hatọ yetọn lẹ Jakobu po Johanu po, visunnu Zẹbede tọn lẹ, yin nina oylọ-basinamẹ dopolọ, podọ yé lọsu yigbe mawhleawu. Enẹwutu omẹ ẹnẹ helẹ jo ajọ́ whehuhu tọn yetọn do bo lẹzun hodotọ pẹkipẹki gbesisọ tọn ẹnẹ tintan Jesu tọn lẹ. Luku 5:1-11; Matiu 4:13-22; Malku 1:16-20; Isaia 9:1, 2.
▪ Naegbọn Jesu ylọ devi etọn lẹ nado hodo e, podọ mẹnu wẹ ehelẹ yin?
▪ Azọ́njiawu tẹwẹ dobuna Pita?
▪ Whehuhu wunmẹ tẹwẹ Jesu basi oylọ na devi etọn lẹ nado basi?