Devi Ẹnẹ Na Lẹzun Whèhutọ Gbẹtọ Tọn

Whenue omẹ Nazalẹti tọn lẹ ko tẹnpọn nado hù Jesu godo, e sẹtẹn yì tòdaho Kapẹlnaumi tọn mẹ, sẹpọ Ohù Galili tọn he sọ nọ yin yiylọdọ “tándo Genezalẹti tọn.” (Luku 5:1) Ehe hẹn dọdai he to owe Isaia tọn mẹ di dọ mẹhe nọ nọ̀ huto Galili tọn lẹ na mọ hinhọ́n daho de.—Isaia 9:1, 2.

Mọwẹ, Jesu zindonukọn nado to lilá to Galili dọ “Ahọluduta olọn tọn ko dọnsẹpọ.” (Matiu 4:17) Jesu mọ ẹnẹ to devi etọn lẹ mẹ. Yé ko zingbejizọnlin hẹ ẹ wayi, ṣigba to whenue yewlẹ po Jesu po lẹkọ sọn Jude, yé gọ̀ ajọ́ whèhuhu tọn yetọn bẹ. (Johanu 1:35-42) Ṣigba todin, ojlẹ ko sọ nado nọhẹ Jesu to whepoponu, na e nido plọnazọ́n yé nado zindonukọn to lizọnyizọn lọ mẹ to whenue e na ko yì godo.

Dile Jesu to zọnlinzin to huto, e mọ Simọni Pita, nọvisunnu etọn Andle po gbẹdohẹmẹtọ yetọn delẹ po to odọ̀ yetọn lẹ klọ́. Jesu sẹ̀ jẹ yé dè bo biọ tọjihun Pita tọn mẹ bosọ dọna ẹn nado sẹ̀ ohún lọ sọn agé. Whenue yé sẹyì nukọn vude, Jesu sinai bo jẹ nugbo he gando Ahọluduta lọ go plọn gbẹtọgun he pli do ohù lọ tó lẹ ji.

Enẹgodo, Jesu dọna Pita dọmọ: “Sẹ̀ ohún lọ yì fihe siso, na mì ni yìn odọ̀ mìtọn lẹ nado wle whèvi.” Pita gblọn dọmọ: “Nuplọnmẹtọ, ozán lọ pete wẹ mí ko yí do jẹtukla bo ma wle nudepope, ṣigba na hiẹ degbe wutu, yẹn na yìn odọ̀ lọ lẹ.”—Luku 5:4, 5.

Yé yìn odọ̀ lọ lẹ bo wle whèvi susu sọmọ bọ odọ̀ lọ lẹ jẹ tintlẹ́n ji! Sunnu lọ lẹ sọ yawu mìalọ hlan hagbẹ yetọn lẹ to tọjihun he to yakẹ de mẹ nado wá gọalọ. E ma dẹn bọ tọjihun awe lọ lẹ gọ́ na whèvi bo jẹ sisiọ ji. Whenue Pita mọ ehe, e jẹklo to Jesu nukọn bo dọmọ: “Yì sọn dè e, Oklunọ, na ylandonọ de wẹ yẹn.” Jesu gblọn dọmọ: “A dibu ba blo. Na sọn din sọyi, hiẹ na nọ wle gbẹtọ lẹ gbẹ̀te.”—Luku 5:8, 10.

Jesu dọna Pita po Andle po dọ: “Mì hodo mi, yẹn nasọ yí mì do basi whèhutọ gbẹtọ lẹ tọn.” (Matiu 4:19) E sọ ylọ whèhutọ awe devo lẹ, yèdọ Jakọbu po Johanu po he yin visunnu Zebede tọn lẹ. Yelọsu sọ kẹalọyi to afọdopolọji. Gbọnmọ dali, yé omẹ ẹnẹ ehelẹ jo ajọ́ whèhuhu tọn yetọn do bo lẹzun devi tintan he jẹ Jesu hodo ji na whenu-gigọ́ lẹ.