Weta 23
Azọ́njiawu Dogọ lẹ to Kapẹlnaumi
TO GBỌJẸZANGBE he bọdo dehe Jesu ylọ devi etọn ẹnẹ tintan lẹ go—yèdọ Pita, Andlé, Jakobu, po Johanu po—yemẹpo yì sinagọgu lẹdo lọ tọn mẹ to Kapẹlnaumi. To finẹ Jesu jẹ mẹplọn ji, podọ gbẹtọ lẹ yin pipaṣa na e to yé plọn taidi mẹhe tindo aṣẹ e mayin taidi wekantọ lẹ gba.
To Gbọjẹzan ehe gbè dawe de he tindo gbigbọ aovi tọn tin to finẹ. To ojlẹ vude godo, e dawhá po ogbè lélé po dọmọ: “Etẹwẹ mí tindo nado wà po hiẹ po, hiẹ Jesu Nazalẹti tọn? Hiẹ wá nado hù mí sudo wẹ? Yẹn yọ́n we mẹhe hiẹ yin, Omẹ Wiwe Jiwheyẹwhe tọn.”
E họnwun dọ aovi he to anadena dawe lọ yin dopo to angẹli Satani tọn lẹ mẹ. Wiwọhẹ aovi lọ, Jesu dọmọ: “Nabọẹ, bo tọ́nsọn ewọ mẹ.”
Eyọn, gbigbọ aovi lọ ze dawe lọ biọ nujẹmẹji de mẹ bọ e yí ogbé lélé do dawhá. Ṣigba e tọ́nsọn dawe lọ mẹ magbleawu na ẹn. Awu sọ ji mẹlẹpo! “Etẹwẹ ehe?” wẹ yé kanse. “Na aṣẹ daho wẹ e yí do degbe yèdọ na gbigbọ mawé lẹ, bọ yé sọ [setonuna ẹn, NW ].” Linlin lọ dogbọn ehe dali gbayipe lẹdope.
Dile yé tọ́nsọn sinagọgu lọ mẹ, Jesu po devi etọn lẹ po yì owhé Simọni, kavi Pita tọn gbè. To finẹ onọ̀ asi Pita tọn to azọ̀n ovà sinsinyẹn tọn jẹ. ‘Jaale gọalọna ẹn,’ wẹ yé vẹvẹ dọ. Enẹwutu Jesu yì e dè, hẹn alọ etọn go, bo fọ́n ẹn ṣite. To afọdopolọji e jẹgangan bo jẹ awuwlena núdùdù ji na yé!
To godo mẹ, to whenuena owhè ko yìhọ, gbẹtọ lẹ sọn filẹpo jẹ wiwá owhé Pita tọn gbè ji po awutunọ yetọn lẹ po. To madẹnmẹ todaho lọ pete ko pli do ohọ̀n ji! Podọ Jesu hẹnazọ̀ngbọna awutunọ yetọn lẹpo, mahopọnna awutu depope he yé tindo. E tlẹ hẹn mẹhe tindo gbigbọ aovi lẹ jẹ mẹdekannu. Dile yé to tintọ́n yì, gbigbọ aovi he e yàn tọ́n lẹ nọ dawhá dọmọ: “Hiẹ wẹ . . . Ovi Jiwheyẹwhe tọn.” Ṣigba Jesu wọhẹ yé bo ma dike na yé ni dọho na yé yọnẹn dọ ewọ wẹ Klisti. Malku 1:21-34; Luku 4:31-41; Matiu 8:14-17.
▪ Etẹwẹ jọ to sinagọgu mẹ to Gbọjẹzangbe to whenuena Jesu ko ylọ devi etọn ẹnẹ lẹ godo?
▪ Fie wẹ Jesu yì to whenuena e tọ́nsọn sinagọgu mẹ, podọ azọ́njiawu tẹwẹ e wà to finẹ?
▪ Etẹwẹ jọ to godo mẹ to whèjai enẹ dopolọ?