WETA 24

Lizọnyizọn Etọn Hinhẹn Gbloada to Galili

MATIU 4:23-25 MALKU 1:35-39 LUKU 4:42, 43

JESU GBỌN GALILI PÉ PO DEVI ẸNẸ PO
YẸWHEHODIDỌ PO AZỌ́N ETỌN LẸ PO YIN YINYỌNẸN GBAYIPE

Alọnu Jesu po devi etọn lẹ po tọn ján taun to azán he yé yizan to Kapẹlnaumi lọ gblamẹ. To whèjai, omẹ Kapẹlnaumi tọn lẹ hẹn awutunọ yetọn lẹ wá nado yin azọ̀nhẹngbọna. Jesu ma tindo whenu susu nado nọ edeṣo.

Todin, to wunkẹngbe afọnnu fuu, dile zinvlu gbẹ́ do, Jesu fọ́n bo tọ́njẹgbonu edeṣo. E mọ nọtẹn he to olá de fie e sọgan hodẹ̀ hlan Otọ́ etọn te edeṣo. Ṣigba, Jesu ma na nọ edeṣo na ojlẹ dindẹn. Whenue “Simọni po mẹhe to e dè lẹ po” ba Jesu pò, yé jẹ dindin in pé ji. Pita sọgan ko nọ nukọnna yé, na owhé etọn gbè wẹ Jesu nọ.—Malku 1:36; Luku 4:38.

Whenue yé mọ Jesu, Pita dọmọ: “Mẹlẹpo wẹ to dindin we.” (Malku 1:37) Matin ayihaawe, omẹ Kapẹlnaumi tọn lẹ jlo dọ Jesu ni gbọṣi yé dè. Yé yọ́n pinpẹn nuhe e ko wà lẹ tọn taun, enẹwutu yé tẹnpọn “nado glọnalina ẹn ma nado yì sọn yé dè.” (Luku 4:42) Ṣigba, be azọ́njiawu azọ̀nhẹngbọ tọn lẹ wẹ yin onú tintan he hẹn Jesu wá aigba ji ya? Podọ be lẹdo ehe kẹdẹ mẹ wẹ e na wà azọ́n etọn lẹ te ya? Etẹwẹ e dọ gando ehe go?

Jesu to alọdlẹndo tòdaho he sẹpọ finẹ de dile e to hodọ hẹ Pita, Andle, Jakọbu po Johanu po

Jesu gblọnna devi etọn lẹ dọmọ: “Mì gbọ mí ni yì fidevo, yèdọ tòpẹvi he sẹpọ lẹ mẹ, na yẹn nido dọyẹwheho to finẹ ga, na ehe wutu wẹ yẹn do wá.” Na nugbo tọn, Jesu tlẹ sọ dọna mẹhe jlo dọ e ni gbọṣi finẹ lẹ dọ: “Yẹn dona yì tòdaho devo lẹ mẹ ga nado lá wẹndagbe Ahọluduta Jiwheyẹwhe tọn, na ehe wutu wẹ yẹn do yin didohlan.”—Malku 1:38; Luku 4:43.

Mọwẹ, dopo to whẹwhinwhẹ́n tangan he wutu Jesu do wá aigba ji lẹ mẹ wẹ nado dọyẹwheho gando Ahọluduta Jiwheyẹwhe tọn go. Ahọluduta enẹ wẹ na klan oyín Otọ́ etọn tọn do wiwe bo na hẹn azọ̀n gbẹtọvi lẹpo tọn gbọ kakadoi. Gbọn azọ́njiawu azọ̀nhẹngbọ tọn lẹ wiwà dali, Jesu do kunnudenu hia dọ Jiwheyẹwhe wẹ do emi hlan. Mọdopolọ, to owhe kanweko delẹ jẹnukọn, Mose ko wà azọ́n huhlọnnọ delẹ nado hẹn ẹn họnwun dọ Jiwheyẹwhe wẹ do emi hlan.—Eksọdusi 4:1-9, 30, 31.

Enẹwutu, Jesu tọ́n sọn Kapẹlnaumi nado yì dọyẹwheho to tòdaho devo lẹ mẹ, devi etọn ẹnẹ lẹ sọ hodo e. Yé omẹ ẹnẹ ehelẹ wẹ Pita po nọvisunnu etọn Andle po, gọna Johanu po nọvisunnu etọn Jakọbu po. Osẹ he jẹnukọn mẹ wẹ yé ko yin oylọ basina te nado lẹzun azọ́nwatọ tomẹyitọ hatọ Jesu tọn tintan lẹ.

Yẹwhehodidọ Jesu po devi ẹnẹ ehelẹ po tọn gbọn Galili blebu tindo kọdetọn dagbe taun! Na nugbo tọn, filẹpo wẹ gbẹtọ lẹ sè gando Jesu go te. “Linlin etọn sọ gbàpe to Silia lẹpo mẹ,” to lẹdo tòdaho ao he nọ yin yiylọdọ Dekapole tọn lẹ mẹ, podọ kaka yì awà awetọ Tọ̀sisa Jọdani tọn ji. (Matiu 4:24, 25) Gbẹtọgun daho lẹ sọ hodo Jesu po devi etọn lẹ po sọn lẹdo enẹlẹ mẹ podọ sọn Jude. Mẹsusu nọ hẹn mẹhe to azọ̀nhẹngbọ dín lẹ wá e dè. Jesu ma nọ hẹn yé jẹflumẹ—e nọ hẹnazọ̀ngbọna awutunọ lẹ bo nọ yàn gbigbọ ylankan lẹ jẹgbonu sọn mẹhe tindo aovi lẹ mẹ.