Weta 16

Zohunhun Na Sinsẹ̀n-Bibasi Jehovah Tọn

NỌVISUNNU daa Jesu tọn lẹ—yèdọ visunnu Malia tọn devo lẹ—wẹ Jakobu, Josẹfu, Simọni, po Juda po. Whẹpo omẹ ehelẹ na zìn gbejizọnlin hẹ Jesu po devi etọn lẹ po yì Kapẹlnaumi, yèdọ tòdaho de he sẹpọ Ohù Galili tọn, vlavo yé nọte to owhé yetọn gbè to Nazalẹti na whẹndo lọ nido sọgan bẹ nuhe yé na tindo nuhudo etọn lẹ hẹn.

Ṣigba naegbọn Jesu do yì Kapẹlnaumi kakati nido zindonukọn to lizọnyizọn etọn mẹ to Kana, to Nazalẹti, kavi to ofi devo lẹ to pópló Galili tọn lẹ ji? Onú dopo wẹ yindọ, Kapẹlnaumi yin didoai do fihe diyin podọ kunnudenu dohia dọ e yin tòdaho de he klo taun. Mọdopolọ, suhugan devi yọyọ he Jesu bẹpli lẹ tọn nọ nọ̀ kavi sẹpọ Kapẹlnaumi, enẹwutu yé ma na jo owhé yetọn lẹ do nado mọ azọ́nplọnmẹ yí sọn e dè gba.

To ojlẹ he e yí do nọ̀ Kapẹlnaumi whenu, Jesu wà azọ́njiawu lẹ, dile ewọ lọsu dekunnu etọn do to osun delẹ godo. Ṣigba to madẹnmẹ Jesu po gbẹdohẹmẹtọ etọn lẹ po ko sọ tin to aliho ji whladopo dogọ. Amàkikọ-whenu wẹ, podọ yé tin to aliho ji jei Jelusalẹm nado yì Juwayi owhe 30 W.M. To whenuena yé tin to finẹ, devi etọn lẹ mọ nude dogbọn Jesu dali he vlavo yé ma ko mọ pọ́n.

Sọgbe hẹ Osẹ́n Jiwheyẹwhe tọn, e yin bibiọ to Islaelivi lẹ si nado nọ basi avọ́sinsan kanlin tọn lẹ. Enẹwutu, na kọgbọ yetọn, ajọwatọ lẹ to Jelusalẹm nọ sà kanlin lẹ po ohẹ̀ lẹ po na lẹndai ehe. Ṣigba yé to sisà ẹ to tẹmpli lọ lọsu mẹ, podọ yé sọ to titafú gbẹtọ lẹ gbọn ahivivẹ didona yé dali.

Yin gigọ́ po adi po, Jesu yí okàn tlẹ́lẹ́ de do basi obá bo yàn nusàtọ lẹ jẹgbonu. E diọ gànkuẹ akuẹdiọtọ lẹ tọn kọnyingbe bo takiti na tafo yetọn lẹ. “Mì ze onú helẹ sọn ofi” wẹ e dawhá dọ hlan mẹhe to apoe sà lẹ. “Mì yí ohọ̀ Otọ́ ṣie tọn do basi ohọ̀ ajọ́ tọn blo.”

To whenuena devi Jesu tọn lẹ mọ ehe, yé flin dọdai lọ dogbọn Visunnu Jiwheyẹwhe tọn dali dọmọ: “Vivẹnu ohọ̀ towe tọn dù mi pó.” Ṣigba Juvi lẹ kanse dọmọ: “Ohia tẹwẹ hiẹ yí hia hlan mí, hiẹ mẹhe to onú helẹ wà?” Jesu gblọn dọmọ: “Mì họ́ tẹmpli he liai, to azán atọ̀n mẹ yẹn nasọ ze e do ote.”

Juvi lẹ lẹndọ Jesu to hodọ dogbọn tẹmpli lọ lọsu dali, enẹwutu yé kanse dọmọ: “Owhe kande-ṣidopo wẹ yè do gbá tẹmpli he, be hiẹ na ze e do ote to azán atọ̀n mẹ?” Ṣigba, Jesu to hodọ dogbọn tẹmpli agbasa etọn tọn dali. Podọ to owhe atọ̀n godo, devi etọn lẹ flin ohó etọn ehe to whenuena e yin finfọn sọn oṣiọ lẹ mẹ. Johanu 2:12-22; Matiu 13:55; Luku 4:23.

▪ To hùnwhẹ alọwle tọn godo to Kana, fitẹ lẹ wẹ Jesu basi gbejizọnlin yì?

▪ Naegbọn Jesu lẹzun adìnọ, podọ etẹwẹ e wà?

▪ Etẹwẹ devi Jesu tọn lẹ flin to whenuena yé mọ nuyiwa etọn lẹ?

▪ Etẹwẹ Jesu dọ dogbọn “tẹmpli ehe” dali, podọ etẹ dọ wẹ e te taun?