Weta 36

Yise Daho Awhàngán de Tọn

TO WHENUENA Jesu dọ Yẹwhehodidọ Osó ji tọn etọn, e ko jẹ nudi dáglámẹ lizọnyizọn gbangba tọn etọn mẹ. Ehe zẹẹmẹdo dọ ewọ tindo owhe dopo po osun ṣinẹnẹ po kavi onú mọnkọtọn de poun nado dotana azọ́n etọn to aigba ji.

Todin Jesu biọ tòdaho Kapẹlnaumi tọn mẹ, heyin wunmẹ otò dodonu tọn de na nuwiwa etọn lẹ. Tofi sunnu mẹho Ju lẹ tọn dọnsẹpọ ẹ po obiọ de po. Yé ko yin didohlan gbọn awhàngán de dali heyin Kosi de sọn awhànpa Lomunu lẹ tọn mẹ, yèdọ dawe akọ̀ devo tọn he mayin Juvi de.

Afanumẹ yiwanna awhàngán lọ tọn to kúkú jei sọn awutu sinsinyẹn de mẹ, bọ ewọ jlo dọ Jesu ni hẹnazọngbọna afanumẹ etọn. Juvi lẹ vẹvẹ vẹkuvẹku do ota awhàngán lọ tọn mẹ dọmọ: “E jẹ mẹhe [hiẹ] do wà ehe lọ na,” wẹ yé dọ, “na e yiwanna akọta mítọn, ewọ lọsu sọ dó sinagọgu mítọn dopo na mí.”

Matin awuwhiwhle, Jesu bẹ gbejizọnlin jẹeji po sunnu lọ lẹ po. Ṣigba, to whenuena yé sẹpọ, awhàngán lọ do họntọn lẹ hlan nado dọmọ: “Oklunọ, a dotukla dewe blo: na yẹn ma jẹ bọ hiẹ do biọ ohọ̀ ṣie glọ gba. Enẹwutu yẹn ma sọ lẹndọ yẹn lọsu jẹ nado wá dè we gba.”

Hodidọ whiwhẹ tọn nankọ die na awhàngán de he e ko yin aṣa etọn nado nọ degbè na mẹdevo lẹ! Ṣigba vlavo ewọ sọ to nulẹnpọn dogbọn Jesu dali, to yinyọnẹn mẹ dọ aṣa nọ glọnalina Juvi de ma nado dogbẹ́ hẹ mẹhe mayin Juvi lẹ. Pita tlẹ dọmọ: “Mìwlẹ yọ́n le e ma gbọn aliho osẹ́n tọn na yé he yin Ju, nado zọnhẹ kavi nado wá yé he yin akọta devo dè.”

Vlavo na e ma jlo dọ Jesu ni jiya kọdetọn tolivivẹ na aṣa ehe tọn wutu, awhàngán lọ dọna họntọn etọn lẹ nado biọ ehe sọn e dè dọmọ: “Dọ ohó lọ, yè nasọ hẹnazọngbọna yọpọ sunnu ṣie. Na mẹhe yè yí do oglọ aṣẹ tọn wẹ yẹn ga, yẹn sọ tindo awhànvipẹ́ to oglọ ṣie, yẹn dọ hlan ode, dọ, Yì, e nọ yì; hlan awetọ dọ, Wá, e nọ wá; podọ hlan afanumẹ ṣie dọ, Wà ehe, e sọ nọ wà ẹ.”

Eyọn, to whenuena Jesu sè ehe, awuji i tlala. “Yẹn dọ hlan mì” wẹ e dọ, “yẹn ma mọ yise daho di ehe lala, e mayin to Islaeli mẹ.” To whenuena e ko hẹnazọngbọna afanumẹ awhàngán lọ tọn godo, Jesu yí nujijọ lọ zan nado do lehe mẹhe mayin Juvi lẹ he tindo yise na mọ nukundagbe po dona lẹ po heyin gbigbẹdai gbọn Juvi he ma tindo yise lẹ dali hia.

“Omẹ susu” wẹ Jesu dọ, “wẹ na wá sọn whèzizẹ dali po whèyihọ po dali, bo na jagla hẹ Ablaham, Isaki, po Jakobu po, to ahọludu olọn tọn mẹ. Ṣigba visunnu ahọludu tọn lẹ wẹ yè nasọ yàn tọ́njẹgbonu do zinvlu he to gbonu mẹ: finẹ wẹ avi lọ po adúkúnkún lọ po na te.”

“Visunnu ahọludu tọn . . . he yè yàn tọ́njẹgbonu do zinvlu he to gbonu mẹ” lẹ wẹ Juvi jọwamọ tọn lẹ he ma kẹalọyi dotẹnmẹ hundote heyin nina yé jẹnukọn heyin yinyin ganduhẹmẹtọ hẹ Klisti. Ablaham, Isaki, po Jakobu po nọtena tito Ahọluduta Jiwheyẹwhe tọn. Gbọnmọ dali Jesu to hodọ do lehe Kosi lẹ na yin alọkẹyi to yẹhiadonu liho, nado jagla to tafo olọn mẹ tọn ji, “to ahọludu olọn tọn mẹ.” Luku 7:1-10; Matiu 8:5-13; Owalọ lẹ 10:28.

▪ Naegbọn Juvi lẹ vẹvẹ do ota awhàngán Kosi de tọn mẹ?

▪ Etẹwẹ sọgan ko yin whẹwhinwhẹ́n lọ he wutu awhàngán lọ ma do basi oylọ na Jesu nado biọ ohọ̀ etọn mẹ?

▪ Etẹ dọ wẹ Jesu te to hodidọ tadona tọn etọn lẹ mẹ?