Mẹkanwekowhàngán de Do Yise Nujọnu Tọn Hia

To whenue Jesu ko dotana Yẹwhehodidọ Osó ji tọn etọn godo, e yì tòdaho Kapẹlnaumi tọn mẹ. To finẹ, sunnu mẹho Ju lẹ tọn delẹ dọnsẹpọ ẹ. Dawe he wá sọn akọ̀ devo mẹ de, yèdọ mẹkanwekowhàngán Lomunu de, wẹ do yé hlan.

Devisunnu vivẹ́ mẹkanwekowhàngán lọ tọn to azọ̀njẹ sinsinyẹn bo to kúdonu. Dile etlẹ yindọ Kosi de wẹ mẹkanwekowhàngán lọ, e to alọgọ Jesu tọn dín. Ju lẹ dọna Jesu dọ ‘awukuzọ̀n to yasana devisunnu dawe lọ tọn sinsinyẹn bọ e to aimimlọn to whégbè,’ vlavo bo to awufiẹsa sinsinyẹn mẹ. (Matiu 8:6) Mẹho Ju lẹ tọn lọ lẹ na jide Jesu bo dọna ẹn dọ, mẹkanwekowhàngán ehe jẹna alọgọ ehe. Yé basi zẹẹmẹ dọmọ: “E yiwanna akọta mítọn podọ ewọ lọsu wẹ gbá sinagọgu lọ na mí.”—Luku 7:4, 5.

E ma dẹn bọ Jesu hodo mẹho lọ lẹ nado yì owhé mẹkanwekowhàngán lọ tọn gbè. To whenue yé sẹpọ owhé lọ gbè, awhàngán lọ do họntọn lẹ hlan nado dọna ẹn dọmọ: “Oklunọ, a jẹtukla blo, na yẹn ma jẹ na hiẹ nido biọ owhé ṣie gbè. Na enẹwutu wẹ yẹn ma mọ dee taidi mẹhe jẹ nado wá dè we.” (Luku 7:6, 7) Whiwhẹ nankọ die mẹhe ko do aṣa lọ nado nọ degbe dohia! Enẹ sọ dohia dọ dawe ehe gbọnvo na Lomunu he nọ yinuwa hẹ afanumẹ yetọn lẹ po kanyinylan po lẹ.—Matiu 8:9.

Ayihaawe ma tin dọ mẹkanwekowhàngán lọ yọnẹn ganji dọ Ju lẹ ma nọ dogbẹ́ hẹ mẹhe ma yin Ju lẹ. (Owalọ lẹ 10:28) Vlavo enẹ wẹ na ko zọ́n bọ awhàngán lọ do dọna họntọn etọn lẹ nado biọ to Jesu si dọmọ: “Dọho, bo dike devizọnwatọ ṣie ni yin azọ̀nhẹngbọna.”—Luku 7:7.

Nuhe e dọ hẹn awuji Jesu bọ e dọmọ: “Yẹn ma ko mọ yise he klo sọmọ de, etlẹ yin to Islaeli.” (Luku 7:9) To whenue họntọn mẹkanwekowhàngán lọ tọn lẹ lẹkọyi owhé etọn gbè, yé mọdọ afanumẹ he to azọ̀njẹ sinsinyẹn lọ ko to gángán todin.

Tlolo he Jesu wà azọ́njiawu enẹ godo, e yí dotẹnmẹ lọ zan nado dohia dọ mẹhe ma yin Juvi bo tindo yise lẹ na yin didona. E dọmọ: “Mẹsusu na wá sọn whèzẹtẹn-waji po whèyihọ-waji po bo na jagla to tafo kọ̀n hẹ Ablaham, Isaki po Jakọbu po to Ahọluduta olọn tọn mẹ.” Bọ Ju he ma tindo yise lẹ lo? Jesu dọ dọ yé “na yin zizedlan zinvlu mẹ to gbonu. Finẹ wẹ yé na viavi bo dù adúkúnkún te.”—Matiu 8:11, 12.

Enẹwutu, Ju jọnun he ma kẹalọyi dotẹnmẹ hundote he yin nina yewlẹ jẹnukọn nado yin apadewhe Ahọluduta lọ tọn hẹ Klisti lẹ na yin gbigbẹdai. Ṣigba to linlẹn de mẹ, Kosi lẹ na yin alọkẹyi nado jagla to tafo etọn kọ̀n “to Ahọluduta olọn tọn mẹ.”