Weta 44
Alọhẹndotena Oyú-Jẹhọn Budonamẹ Tọn De
AZÁN lọ ko yin gigọ́ po nuwiwa po na Jesu, gọna gbẹtọgun lẹ pinplọn to huto podọ to enẹgodo zẹẹmẹ oló lẹ tọn bibasi to nuglọ na devi etọn lẹ. To whenuena whèjai wá, e dọmọ: “Mì gbọ mí ni juwayi awà awetọ ji.”
To dọ́n to huto whèzẹtẹn Ohù Galili tọn tó wẹ lẹdo he nọ yin yiylọdọ Dekapolé, sọn hogbe Glẹki tọn deʹka, he zẹẹmẹdo “ao,” po poʹlis, he zẹẹmẹdo “todaho” tin te. Tòdaho Dekapolé tọn lẹ yin ahọ́nkan aṣa Glẹki tọn, dile etlẹ yindọ ayihaawe depope matin dọ yé sọ yin owhé suhugan Juvi lẹ tọn. Nalete, nuwiwa Jesu tọn lẹ to lẹdo lọ mẹ tindo dogbo taun. Yèdọ etlẹ yin to dlapọn bibasi ehe whenu, dile mí na mọ do to nukọnmẹ, ewọ yin aliglọnna ma nado nọ finẹ dẹn.
To whenuena Jesu biọ dọ yé ni yì huto awetọ lọ, devi lẹ ze e do tọjihun mẹ. Ṣigba, finẹ tintọ́n sọn yetọn ma gọ̀n ma yin ayidego gba. To madẹnmẹ mẹhe pò lẹ biọ tọjihun yetọn lẹ mẹ nado hodo yé. Gbòplá lọ ma dẹn sọmọ gba. Na nugbo tọn, Ohù Galili tọn yin tándo daho nudi kilomẹtlu 21 na tedidi po gbigblo he ma hugan kilomẹtlu 12 de po poun.
Nuṣikọna Jesu na nugbo tọn. Enẹwutu, tlolo he yé ko súnhún, e mlọnai to godo tọjihun lọ tọn, ze ota etọn do kọdonu de ji, bo damlọn yìkànmẹ po awuyiya po. Suhugan apọsteli lọ lẹ tọn wẹ yin tọjihun-kuntọ numimọnọ lẹ, he ko nọ hù whèvi taun to Ohù Galili tọn ji. Enẹwutu yé penukundo tọjihun lọ kùnkùn go.
Ṣigba ehe ma na yin gbejizọnlin he bọawu de gba. Na gbigblọ nukunmẹ tándo lọ tọn, ehe yin nudi mẹtlu 210 do hugan aga wiwá ohù tọn, po jẹhọn fifá osó he tin to yakẹ lẹ tọn po wutu, to whedelẹnu jẹhọn sinsinyẹn lẹ nọ yìn bo nọ hẹn oyú-jẹhọn sinsinyẹn lẹ wá otọ̀ lọ ji. Ehe wẹ yin nuhe to jijọ todin. To madẹnmẹ agbówhẹn lẹ to gbigbà do tọjihun lọ go bo to hihò biọ e mẹ, bọ e ko diblayin gigọ́ po osin po. Ṣogan, Jesu gbẹ́ pò to amlọndọ!
Tọjihun-kuntọ numimọnọ lọ lẹ to azọ́n wà klinkan-klinkan nado deanana tọjihun lọ. Matin ayihaawe yé ko nọ deanana tọjihun lẹ po azọ́nyinyọnẹn po gbọn oyú-jẹhọn sinsinyẹn lẹ mẹ pọ́n dai. Ṣigba to ojlẹ ehe mẹ yé ko wà nuhe yé sọgan wà lẹpo. To obu mẹ na ogbẹ̀ yetọn lẹ, yé fọ́n Jesu sọn amlọn mẹ. ‘Oklunọ, be hiẹ ma hò mítọn pọ́n wẹ? Mí to sisiọ!’ wẹ yé dawhá dọ. ‘Whlẹn mí, na mí jlo na kútọ!’
To finfọnṣite mẹ, Jesu degbena oyú-jẹhọn lọ po ohù lọ po dọmọ: “Danido, nọ̀ gun un.” Podọ oyú-jẹhọn bẹwlunọ lọ sọ doalọte bọ ohù lọ sọ nọ whii. To lilẹ́ hlan devi etọn lẹ mẹ, e kanse dọmọ: ‘Naegbọn mìwlẹ to budi sọmọ? Be mìwlẹ ma gbẹsọ tindo yise depope wẹ?’
To enẹ mẹ, obu daho de jẹ devi lọ lẹ ji. ‘Mẹnu wẹ dawe he yin na nugbo tọn?’ wẹ yé kanse ode awetọ, yèdọ ‘na ewọ degbè do oyú-jẹhọn po osin po, bọ yé sọ setonuna ẹn.’
Huhlọn nankọtọn die he Jesu dohia! Lehe e yin mẹhẹn-deji do sọ nado yọnẹn dọ Ahọlu mítọn tindo huhlọn do nugonu jọwamọ tọn lẹ ji podọ dọ to whenuena ayidonugo gigọ́ etọn na yin lilẹ́ hlan aigba mítọn ji to gandudu Ahọluduta etọn whenu, gbẹtọ lẹpo na nọgbẹ̀ to bo na vò sọn nugbajẹmẹji budonamẹtọ jọwamọ tọn lẹ si.
To ojlẹ de godo he jẹhọn sinsinyẹn lọ ko doalọte, Jesu po devi etọn lẹ po jẹ hùto whèzẹtẹn-waji tọn to jijọho mẹ. Vlavo tọjihun devo lẹ yin hihọ́ basina sọn sinsinyẹn-yinyin jẹhọn lọ tọn mẹ bo lẹkọ yì whé to jijọho mẹ. Malku 4:35–5:1; Matiu 8:18, 23-27; Luku 8:22-26.
▪ Etẹwẹ Dekapolé yin, podọ fie wẹ e tin te?
▪ Nugonu yinukundomọ tẹlẹ wẹ hẹn oyú-jẹhọn sinsinyẹn Ohù Galili mẹ tọn wá?
▪ To whenuena azọ́nyinyọnẹn tọjihun kùnkùn tọn yetọn ma sọgan whlẹn yé, etẹwẹ devi lọ lẹ wà?