Jesu Sọgan Basi Hihọ́na Mí

TO WHENUENA Jesu whẹ́n mẹho bo sè lehe e ko yin hihọ́-basina do to whenuena e gbẹ́ pò to pẹvi, be a lẹndọ e hodẹ̀ hlan Jehovah bo dopẹ́ na ẹn ya?⁠— To whenuena Jesu wá yọnẹn dọ mẹjitọ emitọn lẹ wẹ ze emi yì Egipti nado whlẹn ogbẹ̀ emitọn, etẹwẹ a lẹndọ Jesu na ko dọna Malia po Josẹfu po?⁠—

Todin, Jesu masọ yin viyẹyẹ de ba. E ma tlẹ sọ pò to aigba ji ba. Ṣigba be a doayi e go dọ mẹdelẹ gbẹ́ nọ pọ́n Jesu hlan taidi viyẹyẹ de to otò he mẹ kanlin nọ dùnú te de mẹ ya?⁠— Ehe nọ jọ to owhe Noẹli tọn whenu he yẹdide Jesu tọn nọ yin mimọ to fisusu he nọ do e hia di viyẹyẹ de.

Dile etlẹ yindọ Jesu ma gbẹ́ pò to gbẹ̀nọ to aigba ji, be hiẹ yise dọ e gbẹ́ pò to ogbẹ̀ ya?⁠— Mọwẹ, e ko yin finfọnsọnku, podọ todin e ko lẹzun Ahọlu huhlọnnọ de to olọn mẹ. Etẹwẹ a lẹndọ e sọgan wà nado basi hihọ́na mẹhe nọ sẹ̀n ẹn lẹ?⁠— Di apajlẹ, to whenuena Jesu pò to aigba ji, e do lehe e sọgan basi hihọ́na mẹhe yiwanna ẹn lẹ gbọn hia. Dike mí ni pọ́n lehe e wà enẹ gbọn to gbèdopo to whenuena e tin to tọjihun de mẹ hẹ devi etọn lẹ.

To whèjai de wẹ. Jesu ko to mẹplọn sọn afọnnu to Ohù Galili tọn tó, ehe yin otọ̀ daho de he tedidi etọn sọ nudi kilomẹtlu 20, bọ gbigblo etọn sọ kilomẹtlu 12. To whenuena e yá, e dọna devi etọn lẹ dọmọ: ‘Mì gbọ mí ni yì awà awetọ otọ̀ lọ tọn ji.’ Enẹwutu yé biọ tọjihun de mẹ bo kùnhún jei awà awetọ otọ̀ lọ tọn ji. Agbọ́ ko pé Jesu tlala, enẹwutu e yì tọjihun lọ mẹ to odò bo mlọnai do kọ̀donu de ji. To ojlẹ vude godo, e damlọn yìkànmẹ.

Devi lẹ tin to nukle nado to anadena tọjihun lọ. Nuhahun de ma tin na ojlẹ de, ṣigba to madẹnmẹ jẹhọn sinsinyẹn de fọ́n. Jẹhọn lọ to sinsinyẹn deji, bọ agbówhẹn lọ sọ to yinylan deji. Agbówhẹn lọ jẹ hihò biọ tọjihun lọ mẹ ji, bọ tọjihun lọ jẹ dòyi ji.

Devi lọ lẹ jẹ budi ji dọ yé na siọ. Ṣigba Jesu ma dibu. Ewọ gbẹ́ pò to amlọndọ to tọjihun lọ mẹ. To godo mẹ, devi etọn lẹ fọ́n ẹn, bo dọmọ: ‘Mẹplọntọ, Mẹplọntọ, whlẹn mí, jẹhọn daho ehe jlo na hù mí.’ To whenẹnu, Jesu fọ́n sọn amlọn mẹ bo dọho hlan jẹhọn lọ po agbówhẹn lẹ po dọmọ: “Dánido, nọ̀ guun.”

Jẹhọn lọ sọ doalọte to afọdopolọji, bọ otọ̀ lọ sọ nabọẹ. E paṣa devi etọn lẹ tlala. Yé ma ko mọ onú mọnkọtọn de pọ́n gbede. Yé jẹ didọna ode awetọ yetọn ji dọmọ: ‘Mẹnu wẹ ehe, bọ e degbè dó jẹhọn po osin po, bọ yé sọ setonuna ẹn?’—Luku 8:22-25; Malku 4:35-41.

Be hiẹ yọ́n mẹhe Jesu yin ya?⁠— Be a yọ́n fie e hẹn huhlọn etọn sọn ya?⁠— Obu ma dona ko di devi lẹ to whenuena Jesu tin to finẹ hẹ yé, na Jesu ma yin gbẹtọ tata de gba. E sọgan wà onú jiawu lẹ he gbẹtọ depope ma sọgan wà. Dike ma dọ onú devo de na we he Jesu wà to gbèdopo to agbówhẹn sinsinyẹn ohù tọn de whenu.

Ehe lọ jọ to azán devo gbè. To whenuena ozán to kúkú, Jesu dọna devi etọn lẹ nado biọ tọjihun de mẹ bo jẹnukọnna ẹn zọnmii adà awetọ ohù lọ tọn ji. Enẹgodo Jesu kẹdẹ hẹ osó de ji. Eyin fihe to abọẹ de, fie e sọgan hodẹ̀ hlan Otọ́ etọn, Jehovah Jiwheyẹwhe te.

Devi etọn lẹ biọ tọjihun lọ mẹ bo jẹ húnkun ji jei adà awetọ ohù lọ tọn ji. Ṣigba to ojlẹ vude godo jẹhọn de jẹ yìnyìn ji. Jẹhọn lọ to sinsinyẹn janwẹ. Ozán ko kú to whenẹnu. Devi lọ lẹ sọ kẹ́ alà yetọn bo to yìyì. Ṣigba jẹhọn lọ to dindọ̀n yé do godo bo ma dike yé ni yì nukọn. Tọjihun lọ to godo yì bo to nukọn wá to agbówhẹn sinsinyẹn lọ mẹ, bọ osin to hihò biọ ohún lọ mẹ. Devi lẹ dovivẹnu nado gbòplá yì agé-go, ṣigba e glo yé.

Jesu kẹdẹ wẹ gbẹ́ pò to osó lọ ji to whenẹnu. E ko dẹn to finẹ taun. Ṣigba todin e to mimọ dọ devi emitọn lẹ to owù mẹ to agbówhẹn sinsinyẹn lọ mẹ. Enẹwutu e jẹte sọn osó lọ ji wá ohù lọ tó. Jesu jlo na gọalọna devi etọn lẹ, enẹwutu e jẹ zọnlinzin ji jei devi etọn lẹ dè to agbówhẹn ohù tọn lọ ji!

Etẹwẹ na jọ eyin a tẹnpọn nado zinzọnlin gbọn osin ji?⁠— Hiẹ na siọ, bo sọgan kútọ. Ṣigba Jesu gbọnvo. E tindo huhlọn vonọtaun. Jesu zinzọnlin na whenu dindẹn whẹpo do jẹ tọjihun lọ kọ̀n. Enẹwutu to afọnnu fliflimẹ wẹ devi lẹ mọ Jesu to zọnlinzin to ohù lọ ji ja yé dè. Ṣigba nuhe yé to mimọ lọ di odlọ de na yé. Obu di yé tlala, bọ yé yí obu do dawhá. To whenẹnu Jesu dọhona yé dọmọ: “Mì deji: yẹn wẹ; mì yin avosatọ blo.”

Tlolo he Jesu biọ tọjihun lọ mẹ, agbówhẹn lọ doalọte. E sọ paṣa devi lẹ whladopo dogọ. Yé jẹklo to Jesu nukọn bo dọmọ: “Nugbo, Ovi Jiwheyẹwhe tọn wẹ hiẹ.”—Matiu 14:22-33; Johanu 6:16-21.

Be e ma na ko yin awuvivinu de nado tin to ogbẹ̀ to ojlẹ enẹ mẹ bo yí nukun mítọn do mọ lehe Jesu basi onú ehelẹ do ya?⁠— Be a yọ́n nuhewutu Jesu wà onú jiawu enẹlẹ ya?⁠— E wàmọ na e yiwanna devi etọn lẹ bo jlo na gọalọna yé. Ṣigba e sọ wà onú ehelẹ nado dó huhlọn daho he e tindo lọ hia ehe e na yizan to sọgodo taidi Ahọlu Ahọluduta Jiwheyẹwhe tọn.

To egbehe ga, Jesu nọ yawu yí huhlọn etọn zan nado basi hihọ́na hodotọ etọn lẹ sọn vivẹnu he Satani to didó nado hẹnalọdotena yé sọn Ahọluduta Jiwheyẹwhe tọn lilá na mẹdevo lẹ mẹ. Ṣigba Jesu ma nọ yí huhlọn etọn zan nado basi hihọ́na devi etọn lẹ sọn azọ̀n si gba, mọjanwẹ e ma nọ hẹnazọ̀ngbọna yé do niyẹn. Mẹhe tlẹ yin apọsteli Jesu tọn lẹpo wẹ wá kú to godo mẹ. Jakobu he yin nọvi Johanu tọn yin hùhù, podọ Johanu lọsu yin wiwle do gànpamẹ.—Owalọ lẹ 12:2; Osọhia 1:9.

Mọdopolọ to egbehe, vlavo mẹde sẹ̀n Jehovah kavi lala, mẹlẹpo wẹ sọgan jẹazọ̀n bo kú. Ṣigba to madẹnmẹ, to gandudu Jesu tọn taidi Ahọlu gandudu Jiwheyẹwhe tọn whenu, onú lẹ na gbọnvo. To whenẹnu, mẹdepope ma dona dibu ba, na Jesu na yí huhlọn etọn zan nado hẹn dona wá na mẹhe setonuna ẹn lẹpo.—Isaia 9:6, 7.