Jesu Zinzọnlin Gbọn Osin Ji

Gbọnvona dọ Jesu sọgan hẹnazọ̀ngbọ bo fọ́n oṣiọ lẹ, e sọ sọgan deanana jẹhọn po jikun po. To whenue Jesu ko hodẹ̀ to osó de ji godo, e pọ́n Ohù Galili tọn hlan to odò bo mọdọ yujẹhọn de to yìnyìn. Apọsteli etọn lẹ to tọjihun yetọn mẹ bo to tuklajẹ nado kùnhún pànta jẹhọn lọ. Jesu jẹte bo jẹ zọnlinzin ji gbọn osin ji dedo tọjihun yetọn kọ̀n. Whenue apọsteli lẹ mọdọ mẹde to zọnlinzin ja gbọn osin ji, obu jẹ yé ji. Ṣigba, Jesu dọna yé dọmọ: ‘Yẹn wẹ. Mì dibu blo.’

Pita dọmọ: ‘Oklunọ, eyin hiẹ wẹ nugbonugbo, degbena mi nado wá dè we.’ Jesu dọna Pita dọ: ‘Wá.’ Enẹwutu, Pita jẹte sọn tọjihun lọ mẹ dile yujẹhọn lọ to yìnyìn bo jẹ zọnlinzin ji gbọn osin ji jei Jesu dè. Amọ́, whenue Pita sẹpọ Jesu, e pọ́n yujẹhọn lọ bo jẹ budi ji. E sọ mọdọ emi jẹ sisiọ ji. To whenẹnu e dawhá dọmọ: ‘Oklunọ, whlẹn mi!’ Jesu wle alọ etọn hẹn bo dọmọ: ‘Naegbọn a do jẹ ayihaawe tindo ji? A ma tindo yise wẹ?’

Jesu po Pita po biọ tọjihun lọ mẹ bọ yujẹhọn lọ doalọte to afọdopolọji. Pọ́n numọtolanmẹ he apọsteli lẹ na ko tindo! Yé dọmọ: “Na nugbo tọn, Visunnu Jiwheyẹwhe tọn wẹ hiẹ.”

E ma yin whladopo ehe kẹdẹ wẹ Jesu deanana ninọmẹ aimẹ tọn. To whedevonu, dile ewọ po apọsteli lẹ po to tọjihun mẹ jei awà awetọ ohù lọ tọn ji, e to amlọndọ to húnyonu. Yujẹhọn sinsinyẹn de sọ fọ́n to whenue e to amlọndọ. Agbówhẹn lẹ gbaṣinyọ́n tọjihun lọ bọ osin gọ́ e mẹ. Apọsteli lẹ fọ́n Jesu bo dawhá dọmọ: ‘Mẹplọntọ, mí to na dọ̀n! Gọalọna mí!’ Jesu fọ́n bo dọna ohù lọ dọmọ: “Nọ whii!” To afọdopolọji, jẹhọn lọ po adánjijẹ ohù lọ tọn po doalọte. Jesu kanse apọsteli lẹ dọmọ: ‘Mì ma tindo yise wẹ?’ Yé sọ dọna ode awetọ dọmọ: “Jẹhọn po ohù po tlẹ nọ setonuna ẹn.” Apọsteli lẹ mọdọ eyin yé dejido Jesu go mlẹnmlẹn, yé ma dona dibuna nudepope.