Weta 53
Gandutọ He Hugan Gbẹtọvi Tọn He Yin Ojlo Tindo Na De
TO WHENUENA Jesu na núdùdù gbẹtọ fọtọ́n susu to azọ́njiawu liho, awuji gbẹtọ lọ lẹ. “Nugbo, ehe wẹ yẹwhegán he ja aihọn mẹ lọ,” wẹ yé dọ. E ma yindọ yé wá tadona lọ kọ̀n dọ Jesu dona yin yẹwhegán he klohugan Mose kẹdẹ wẹ gba ṣigba dọ ewọ na yin gandutọ he yin ojlo tindo na hugan lọ ga. Enẹwutu yé blasé nado hẹn ẹn zun ahọlu gánnu-gánnu.
Ṣigba, Jesu yọ́n osé he gbẹtọ lẹ to biblá. Enẹwutu e yawu sẹtẹn yì nado dapana yinyin hinhẹn po huhlọn po gbọn yé dali. E jo gbẹtọgun lẹ nado yì bosọ dapàpàna devi etọn lẹ nado biọ tọjihun yetọn mẹ bo lẹkọ pànta Kapẹlnaumi waji. Enẹgodo e lẹkọyi osó ji nado hodẹ̀. To ozán enẹ mẹ Jesu tin to finẹ ewọ ṣokẹdẹ.
Ojlẹ kleun de whẹpo ai do họ́n Jesu yìnkọ pọ́n sọn ofi yiaga he e tin te bo doayi agbówhẹn he to mimlin daga to ohù ji gbọn jẹhọn sinsinyẹn de dali go. To hinhọ́n he diblayin sùndọ́ji tọn mẹ, to whenuena e yindọ Juwayi whenu ko sẹpọ, Jesu mọ tọjihun lọ po devi etọn lẹ po to vivẹnudo sinsinyẹn nado dasá agbówhẹn lọ. Sunnu lọ lẹ to hlọnhlọn yetọn lẹpo yí do to ohún-kùn.
To ehe mimọ mẹ, Jesu jẹte sọn osó lọ ji bo jẹ zọnlinzin ji yì tọjihun lọ kọ̀n gbọn agbówhẹn lọ ji. Tọjihun lọ ko yì sọ nudi kilomẹtlu atọ́n kavi ṣidopo nkọ to whenuena Jesu plá ẹ. Ṣigba, e zindonukọn taidi dọ e jlo na zẹ e go wẹ nkọ. To whenuena devi lẹ mọ ẹn, yé dawhá dọmọ: “Obló de wẹ!”
Jesu gblọn po homẹmiọnnamẹ po dọmọ: “Yẹn wẹ; mì yin avosatọ blo.”
Ṣigba Pita dọmọ: “Oklunọ, eyin e yin hiẹ wẹ, degbena mi wá dè we to osin ji.”
Jesu gblọn dọmọ: “Wá.”
Enẹwutu, Pita, to tejijẹ sọn tọjihun lọ mẹ godo, zinzọnlin to osin ji yì Jesu dè. Ṣigba to pinpọn yujẹhọn lọ, Pita jẹ budi ji, bosọ jẹ sisiọ ji, e dawhá dọmọ: “Oklunọ, whlẹn mi.”
Tlolo he e dlẹnalọ etọn jẹgbonu, Jesu hẹn e go, bo dọmọ: “Hiẹ yise pẹvinọ, etẹwutu wẹ hiẹ savò?”
To godo he Pita po Jesu po lẹkọ biọ tọjihun lọ mẹ, jẹhọn lọ doalọte, bọ awuji devi lẹ. Ṣigba be e dona yin mọ na yé ya? Eyin yé ko tunwun zẹẹmẹ “akla lọ tọn” go gbọn nukunnumimọjẹ azọ́njiawu daho he Jesu wà to ganhiho vude lẹ die jẹnukọn to whenuena e na núdùdù gbẹtọ fọtọ́n susu po akla atọ́n poun po gọna whèvi flinflin awe dali wẹ, to whenẹnu e ma dona ko paṣa yé sọmọ dọ ewọ sọgan zinzọnlin gbọn osin ji bo hẹn jẹhọn lọ nado doalọte. Ṣigba, todin, devi lẹ litai na Jesu bosọ dọmọ: “Nugbo, Ovi Jiwheyẹwhe tọn wẹ hiẹ.”
To ojlẹ gli de godo, yé jẹ Genezalẹti, yèdọ danfafa he yọnwhanpẹ, bo yin sinsẹ́nnọ de sẹpọ Kapẹlnaumi. Finẹ wẹ yé sìn tọjihun lọ do. Ṣigba to whenuena yé jẹte yì huto, gbẹtọ lọ lẹ yọ́n Jesu bo yì otò he tin to lẹdo lọ mẹ, bo dín mẹhe to azọ̀njẹ lẹ. To whenuena omẹ ehelẹ yin hinhẹnwa to adọ́zan yetọn lẹ ji bọ yé doalọ okẹyẹ awu Jesu tọn go poun, yé yin hinhẹn jẹ gángán mlẹnmlẹn.
Mọdopolọ, gbẹtọgun he dekunnu na núdùdù nina gbẹtọ fọtọ́n susu to azọ́njiawu liho lọ doayi e go dọ Jesu ko tọ́nsọn finẹ. Enẹwutu to whenuena tọjihun pẹvi lẹ wá sọn Tibelia, yé biọ yé mẹ bo kùnhún yì Kapẹlnaumi nado dín Jesu mọ. To whenuena yé mọ ẹn, yé kanse dọmọ: “Labbi, whetẹnu wẹ hiẹ wafi?” Jesu wọhẹ yé, dile mí na mọ do to madẹnmẹ. Johanu 6:14-25; Matiu 14:22-36; Malku 6:45-56.
▪ To whenuena Jesu na núdùdù gbẹtọ fọtọ́n susu to azọ́njiawu liho godo, etẹwẹ gbẹtọ lọ lẹ jlo nado wà na ẹn?
▪ Etẹwẹ Jesu mọ hlan sọn osó he ji e tin te, podọ etẹwẹ e wà to whenẹnu?
▪ Naegbọn onú ehelẹ ma dona hẹn awuji devi lẹ sọmọ?
▪ Etẹwẹ jọ to whenuena yé jẹ huto godo?