Weta 68
Nuplọnmẹ Yinukọn Dogọ to Azán Ṣinawetọ Gbè
AZÁN godo tọn Hùnwhẹ Gòhọtúntún tọn, heyin azán ṣinawetọ, gbẹ́ pò to nukọnzindo. Jesu to mẹplọ́n to adà tẹmpli lọ tọn mẹ he yin yiylọdọ “adọkunnu tẹnmẹ.” Kunnudenu dohia dọ ehe tin to adà heyin yiylọdọ Akànmaho Yọnnu lẹ tọn mẹ fie adọkun-potin lẹ tin te ehe mẹ gbẹtọ lẹ nọ ze nunina yetọn lẹ do.
To ozán lẹpo mẹ to hùnwhẹ lọ whenu, miyọ́n vonọtaun de nọ tá hinhọ́n to lẹdo tẹmpli lọ tọn ehe mẹ. Miyọ́n ote tọn daho ẹnẹ yin zize dote tofi, dopodopo tindo amì-hẹnnu daho ẹnẹ heyin gigọ́ po amì po. Hinhọ́n lọ he tá sọn miyọ́n ehelẹ, he to jiji sọn amì-hẹnnu 16 lẹ mẹ, tindo huhlọn he pé nado tá hinhọ́n na lẹdo lọ lẹ yì fidindẹn to zanmẹ. Nuhe Jesu dọ todin sọgan flin hosetọ etọn lẹ dogbọn dohia ehe dali. “Yẹn wẹ hinhọ́n aihọn tọn,” wẹ Jesu lá dọ. “Mẹhe hodo mi ma na zinzọnlin zinvlu mẹ, ṣigba e na tindo hinhọ́n ogbẹ̀ tọn.”
Falesi lẹ jẹagọdo dọmọ: “Hiẹ to kunnude na dewe; okunnu towe ma yin nugbo.”
To gblọndo mẹ Jesu dọmọ: “Eyin yẹn dekunnu na dee, nugbo wẹ okunnu ṣie; na yẹn yọ́n fihe yẹn sọn wá, po fihe yẹn jei po; ṣigba mìwlẹ ma sọgan dọ fihe yẹn sọn wá, po fihe yẹn jei po.” E yidogọ dọmọ: “Yẹn wẹ mẹhe to kunnude na dee, Otọ́ he do mi hlan sọ to kunnude na mi ga.”
“Fie wẹ Otọ́ towe te?” wẹ Falesi lẹ kanse.
“Mì ma yọ́n mi, mì ma sọ yọ́n Otọ́ ṣie,” wẹ Jesu gblọn. “Eyin mì ko yọ́n mi, mì na ko yọ́n Otọ́ ṣie ga.” Dile etlẹ yindọ Falesi lẹ gbẹ́ jlo nado wle Jesu, mẹdepope ma doalọ e go gba.
“Yẹn jei,” wẹ Jesu sọ vọ́ dọ. “Fie yẹn jei, mìwlẹ ma sọgan wá.”
Na ehe wutu Ju lẹ jẹ nulẹnpọn ji dọmọ: “Ewọ to na hù ede wẹ? Na e dọmọ, Fie yẹn jei, mìwlẹ ma sọgan wá.”
“Odò wẹ mìwlẹ tin sọn,” wẹ Jesu basi zẹẹmẹ dọ. “Aga wẹ yẹn tin sọn: aihọn he tọn wẹ mìwlẹ; yẹn ma yin aihọn he tọn gba.” Enẹgodo e yidogọ dọmọ: “Eyin mì ma yise dọ yẹn lọ wẹ, mì na kú to ylando mìtọn mẹ.”
Jesu, na nugbo tọn, to alọdlẹndo tintin etọn jẹnukọnna gbẹtọ-yinyin po yinyin Mẹssia dopagbe lọ, kavi Klisti po. Etomọṣo, yé kanse, matin ayihaawe po wangbẹnamẹ daho po dọmọ: “Mẹnu wẹ hiẹ?”
To ma hò mẹgbigbẹ dai yetọn pọ́n, Jesu gblọn dọmọ: ‘Etẹwutu wẹ yẹn tlẹ do to hodọ hlan mì?’ Ṣogan e zindonukọn bo dọmọ: “Nugbo wẹ mẹhe do mi hlan; yẹn sọ dọ hlan aihọn onú he yẹn sè sọn e dè lẹ.” Jesu sọ zindonukọn dọmọ: “Whenuena mì ko ze Ovi gbẹtọ tọn daga, whenẹnu wẹ mì na yọnẹn dọ yẹn wẹ ewọ lọ, na yẹn ma wà nude na dee; ṣigba le Otọ́ ṣie plọn mi do, wẹ yẹn to onú helẹ dọ. Ewọ mẹhe do mi hlan tin to dee: Otọ́ lọ ma jo yẹn dopo do gba; na yẹn to onú he yin homẹhun hlan ẹn lẹ wà to whepoponu.”
To whenuena Jesu dọ onú helẹ, mẹsusu tindo yise to ewọ mẹ. Hlan omẹ ehelẹ e dọmọ: “Eyin mìwlẹ nọte to ohó ṣie mẹ, whenẹnu mìwlẹ yin nuplọntọ ṣie nugbo; mìwlẹ nasọ yọ́n nugbo, nugbo lọ nasọ hẹn mì jẹ mẹdekannu.”
“Okún Ablaham tọn wẹ míwlẹ,” wẹ agọjẹdomẹtọ etọn lẹ gbòhó-donù na ẹn dọ, “mí ma ko tin to mẹglọnọ mẹ hlan mẹde gbede: nawẹ hiẹ dọ do, Mìwlẹ na yin hinhẹn jẹ mẹdekannu?”
Dile etlẹ yindọ Ju lẹ ko nọ saba tin to gandudomẹji jonọ tọn glọ, yé ma yọ́n kọgbidinamẹtọ depope taidi ogán gba. Yé gbẹ́ pete nado yin yiylọdọ afanumẹ lẹ. Ṣigba Jesu dohia dọ na nugbo tọn afanumẹ lẹ wẹ yé yin. To aliho tẹ mẹ? “Nugbo, nugbo, wẹ yẹn dọ hlan mì,” wẹ Jesu dọ, “mẹdepope he waylando wẹ afanumẹ ylando tọn.”
Gbigbẹ́ nado yigbe na afanumẹ-yinyin hlan ylando yetọn hẹn Ju lẹ tin to ninọmẹ he gọ́ na owù de mẹ. “Afanumẹ ma nọ nọ̀ owhé gbè kakadoi,” wẹ Jesu basi zẹẹmẹ dọ. “Ovi wẹ nọ nọ̀ kakadoi.” To whenuena e yindọ afanumẹ de ma tindo jlọjẹ ogú dùdù tọn lẹ, ewọ sọgan tin to owù yinyin yinyan to whedepopenu tọn mẹ. Visunnu lọ he yin jiji kavi yin sọdodo-ovi to whédo lọ mẹ kẹdẹ wẹ nọ gbọṣi finẹ “kakadoi,” yèdọ, dile ewọ na nọgbẹ̀ dẹn sọ.
“Enẹwutu eyin Ovi na hẹn mì jẹ mẹdekannu,” wẹ Jesu zindonukọn dọ, “mìwlẹ na jẹ mẹdekannu nugbo.” Gbọnmọ dali, nugbo lọ he nọ hẹnmẹ jẹ mẹdekannu wẹ nugbo lọ gando Visunnu lọ, yèdọ Jesu Klisti go. Gbọn avọ́sinsan ogbẹ̀ gbẹtọvi pipé tọn etọn gblamẹ kẹdẹ wẹ mẹdepope sọgan yin hinhẹn jẹ mẹdekannu te sọn ylando he nọ hẹn okú wá si. Johanu 8:12-36.
▪ Fie wẹ Jesu plọnmẹ te to azán ṣinawetọ lọ gbè? Etẹwẹ nọ jọ to finẹ to zanmẹ, podọ nawẹ ehe gando mẹpinplọn Jesu tọn go gbọn?
▪ Etẹwẹ Jesu dọ dogbọn bẹjẹeji etọn dali, podọ etẹwẹ ehe dona dohia dogbọn mẹhe ewọ yin dali?
▪ To aliho tẹ mẹ wẹ Ju lẹ yin afanumẹ lẹ te, ṣigba nugbo tẹwẹ na hẹn yé jẹ mẹdekannu?