Weta 75

Asisa Ayajẹ Tọn

TO LIZỌNYIZỌN etọn whenu to Galili, Jesu wà azọ́njiawu lẹ, bọ e sọ vọ́ ehelẹ basi to Judé. Di apajlẹ, e yàn aovi de jẹgbonu sọn dawe de mẹ ehe ko glọnalina ẹn nado dọho. Awuji gbẹtọgun lọ lẹ, ṣigba homọdọdomẹgotọ lẹ fọ́n agọjẹdomẹ dopolọ dote taidi dehe yin finfọ́n dote to Galili. “Gbọn huhlọn Beẹlzebuli, ogán aovi lẹ tọn dali, wẹ ewọ do to aovi lẹ yàn jẹgbonu,” wẹ yé sọalọakọ́n dọ. Mẹdevo lẹ jlo kunnudenu he yiaga sọn Jesu si gando mẹhe ewọ yin go, bọ yé tẹnpọn nado whlé e pọ́n gbọn bibiọ ohia de sọn olọn mẹ dali.

To yinyọ́n nuhe yé to linlẹn, Jesu na gblọndo dopolọ hlan homọdọdomẹgotọ etọn lẹ to Judé dile e na hlan mẹhe tin to Galili lẹ do. E dohia dọ ahọluduta lẹpo he klán sọta edetiti na jai. “Eyin Satani ga sọ yin kinklan do ede ji, nawẹ ahọluduta etọn na nọte do?,” wẹ e kanse. E do otẹn owù tọn he mẹ homọdọdomẹgotọ etọn lẹ tin te hia gbọn didọ dali dọmọ: “Eyin yẹn gbọn alọviyẹyẹ Jiwheyẹwhe tọn mẹ to aovi lẹ yàn jẹgbonu, be ahọludu Jiwheyẹwhe tọn wá mì ji.”

Mẹhe to azọ́njiawu Jesu tọn mọ lẹ dona yinuwa hlan yé to aliho dopolọ mẹ dile mẹhe mọ azọ́njiawu he Mose basi to owhe kanweko lẹ die jẹnukọn basi do. Yé dawhá dọmọ: “Alọviyẹyẹ Jiwheyẹwhe tọn wẹ.” “Alọviyẹyẹ Jiwheyẹwhe tọn” wẹ sọ pà Gbedide Ao lẹ do zannu plẹ́bẹ́ lọ lẹ ji ga. Podọ “alọviyẹyẹ Jiwheyẹwhe tọn”—yèdọ gbigbọ wiwe etọn, kavi huhlọn yí do wazọ́n etọn—wẹ hẹn Jesu penugo nado yàn aovi lẹ jẹgbonu bo hẹnazọ̀ngbọna awutunọ lẹ. Enẹwutu Ahọluduta Jiwheyẹwhe tọn ko wá homọdọdomẹgotọ ehelẹ ji nugbonugbo, to whenuena e yindọ Jesu, heyin Ahọlu dide Ahọluduta lọ tọn, tin to ṣẹnṣẹn yetọn to finẹ.

Enẹgodo Jesu dohia dọ nugopipe emitọn nado yàn aovi lẹ jẹgbonu yin kunnudenu huhlọn etọn tọn do Satani ji, yèdọ dile sunnu huhlọnnọ de nọ wá bo nọ gbawhàn dawe de he tindo awhànfunnu bo to họ̀nmẹ etọn ṣọ́ tọn do nkọtọn. E sọ vọ́ oló he e dó to Galili gando gbigbọ mawé de go dó ga. Gbigbọ lọ tọ́nsọn dawe de mẹ, ṣigba whenuena dawe lọ ma yí onú dagbe lẹ do gọ́ otẹn vọtọ́ lọ mẹ, gbigbọ lọ lẹkọwa po ṣinawe devo lẹ po, bọ ninọmẹ dawe lọ tọn sọ lẹzun nuhe ylan hugan tintan whenu tọn.

Dile yè to todoai hlan mẹpinplọn ehelẹ, yọnnu de sọn gbẹtọgun lọ mẹ yin whinwhàn nado dawhá po ogbè lele po dọmọ: “[Ayajẹnọ, NW ] wẹ adọ̀ he ji we, po anọ́ he hiẹ nọ́ lẹ po.” To whenuena e yindọ ojlo yọnnu Juvi lẹpo tọn wẹ nado yin onọ̀ yẹwhegán de tọn podọ titengbe Mẹssia lọ tọn, e yin nukunnumọjẹemẹ nuhewutu yọnnu ehe do dọ ehe. E họnwun dọ ewọ lẹndọ Malia na yin ayajẹnọ titengbe na yinyin onọ̀ Jesu tọn wutu.

Ṣigba, po awuyiya po Jesu vọ́ linlẹn yọnnu lọ tọn jlado gando asisa nugbo ayajẹ tọn go. E gblọn dọmọ: “Nugbo yè ni kúkú dọmọ, [ayajẹnọ, NW ] wẹ yé he sè ohó Jiwheyẹwhe tọn, bosọ yí ì whlá.” Jesu ma dohia gbede pọ́n dọ onọ̀ etọn, Malia, ni yin nina gbégbigbò vonọtaun gba. Kakatimọ, e dohia dọ ayajẹ nugbo nọ yin mimọ to devizọnwatọ nugbonọ Jiwheyẹwhe tọn yinyin mẹ, e ma yin to kanṣiṣa agbasalan tọn kavi wadotana depope mẹ gba.

Dile e basi do to Galili, Jesu sọ zindonukọn nado wọhẹ gbẹtọ lẹ sinsinyẹn to Judé na bibiọ ohia de sọn olọn mẹ wutu. E dọna yé dọ ohia depope ma na yin nina gba adavo ohia Jona tọn. Jona lẹzun ohia de gbọn azán atọ̀n yiyizan to whèvi lọ homẹ dali podọ gbọn yẹwhehodidọ adọgbigbo tọn etọn dali, ehe kọdetọn etọn yindọ Ninevenu lẹ yin whinwhàn nado lẹnvọjọ. “Doayi e go,” wẹ Jesu dọ, “mẹhe klohú Jona de tin tofi.” Mọdopolọ, awuji ahọsi Ṣeba tọn na nuyọnẹn Sọlọmọni tọn wutu. “Doayi e go,” wẹ Jesu sọ dọ, “mẹhe klohú Sọlọmọni tin tofi.”

Jesu basi zẹẹmẹ dọ to whenuena gbẹtọ tá miyọngbán de, ewọ ma nọ ze e do nuglọ kavi do ohà de glọ gba ṣigba do miyọngbán-tin de ji na gbẹtọ lẹ nido sọgan mọ hinhọ́n lọ. Vlavo e to didohia dọ mẹpinplọn po azọ́njiawu lẹ wiwà to mẹplidopọ tasinyẹntọ ehelẹ nukọn yin yiyijlẹdo miyọngbán de zizewhla go. Nukun todoaitọ mọnkọtọn lẹ tọn ma yin dopo, kavi to jijlọ ji gba, enẹwutu lẹndai azọ́njiawu etọn lẹ tọn ma yin wiwadotana gba.

Jesu ko ṣẹṣẹ yàn aovi de jẹgbonu bo ko hẹn dawe unbọpẹnnọ de nado dọho. Ehe dona ko whàn gbẹtọ he hẹn nukun yetọn yin dopo, kavi jijlọ lẹ, nado pagigona nuwiwa gigonọ ehe bo lá wẹndagbe lọ! Ṣogan, ehe ma yin nuhe homọdọdomẹgotọ ehelẹ basi gba. Enẹwutu Jesu dotana dọmọ: “Enẹwutu hiẹ ni nọ doayi e go, na hinhọ́n he tin hiẹ mẹ yin zinvlu blo. Enẹwutu eyin agbasa towe lẹpo gọ́ na hinhọ́n, bọ apade ma do zinvlu gba, agbasa towe lẹpo nasọ tin di whenuena hinhọ́n zògbán tọn na hinhọ́n we.” Luku 11:14-36; Eksọdusi 8:18, 19; 31:18; Matiu 12:22, 28.

▪ Etẹwẹ yin gbeyiyi lọ to whenuena Jesu hẹnazọ̀ngbọna dawe lọ?

▪ Etẹwẹ yin “alọviyẹyẹ Jiwheyẹwhe tọn,” podọ nawẹ Ahọluduta Jiwheyẹwhe tọn ko wá todoaitọ Jesu tọn lẹ ji gbọn?

▪ Etẹwẹ yin asisa ayajẹ nugbo tọn?

▪ Nawẹ gbẹtọ sọgan hẹn nukun etọn yin dopo gbọn?