Weta 82
Jesu Pànta Jelusalẹm Whladopo Dogọ
TO MADẸNMẸ Jesu ko sọ tin to aliho ji whladopo dogọ, bo to mẹplọn sọn tòdaho mẹ jẹ tòdaho mẹ podọ sọn gbetato mẹ jẹ gbetato mẹ. Kunnudenu dohia dọ agbegbe Pelea tọn ji wẹ e tin te, to gbòplá Otọ̀ Jọdani tọn sọn Judé. Ṣigba fie e jei wẹ Jelusalẹm.
Vlavo tamẹnuplọnmẹ Juvi lẹ tọn dọ omẹ sọha vude poun wẹ na jẹ na whlẹngán wẹ sọgan ko whàn dawe de nado kanse dọmọ: “Oklunọ, be vude wẹ ehe yè na whlẹngán?” Po gblọndo etọn po, Jesu yí huhlọn do hẹn gbẹtọ lẹ nado lẹnnupọn do nuhe yin nuhudo etọn tindo nado mọ whlẹngán ji dọmọ: “Mì sinyẹnlin [enẹ yin, dovivẹnu, kavi jiya] nado gbọn họntonu bibó mẹ biọ họmẹ.”
Vivẹnudido sinsinyẹn mọnkọtọn yin niyaniya tọn na Jesu zindonukọn dọmọ: “Omẹ susu na dín nado biọ e mẹ bo ma na sọgan biọ e mẹ.” Naegbọn yé ma na do penugo? E basi zẹẹmẹ dọ ‘to whenuena whétọ lọ ko fọ́n bo ko sú ohọ̀n lọ wẹ gbẹtọ lẹ na nọte to gbonu bo húhúhọ̀n, bo dọ, “Oklunọ, hùn hlan mí,” ewọ na dọmọ: “Yẹn ma yọ́n fie mì sọn gba, mì tọ́n sọn dee, mì azọ́n ylankan watọ lẹpo.”
E họnwun dọ mẹhe yè sú ohọ̀n do to gbonu lẹ wá to ojlẹ de mẹ he bọawu na yé lọsu titi lẹ kẹdẹ. Ṣigba to whenẹnu ohọ̀n dotẹnmẹ hundote tọn ko yin súsú gbanun-gbanun po ogàn po. Nado biọ họmẹ, yé dona ko wá domẹwhenu, dile etlẹ yindọ e sọgan ko gọ̀n ma bọawu na yé nado wà mọ to whenẹnu. Na nugbo tọn, kọdetọn awubla tọn wẹ to tenọpọn mẹhe to sinsẹ̀n-bibasi Jehovah tọn yíyí do basi lẹndai titengbe to gbẹzan yetọn mẹ sisẹ́ do apadopo lẹ!
Ju he dè Jesu yin didohlan nado yilizọn na lẹ, to adà he suhugan mẹ, ko gboawupo nado yí dotẹnmẹ hundote jiawu yetọn zan nado kẹalọyi nuwleawudai Jiwheyẹwhe tọn na whlẹngán. Enẹwutu Jesu dọ dọ yé na viavi bo dù adúkúnkún to whenuena yé yin zizedlan gbonu. To alọ devo mẹ, gbẹtọ lẹ sọn “whèzizẹ dali wá, sọn whèyihọ dali, sọn agewaji dali, podọ sọn hùwaji dali,” mọwẹ, yèdọ sọn akọta lẹpo mẹ, “na jagla to ahọludu Jiwheyẹwhe tọn mẹ.”
Jesu zindonukọn dọmọ: “Godotọ delẹ [mẹhe ma yin Ju he yin vivlẹko lẹ, gọna Ju he yin kọgbidina lẹ] na yin nukọntọ, podọ nukọntọ delẹ [Ju he yin adọkunnọ to agbasa-liho podọ to sinsẹ̀n-liho lẹ] nasọ yin godotọ.” Godotọ yinyin yetọn zẹẹmẹdo dọ omẹ adidọnọ, mayọn-dagbenọ mọnkọtọn lẹ ma na tin to Ahọluduta Jiwheyẹwhe tọn mẹ paali.
Todin Falesi lẹ wá Jesu dè bo dọmọ: “Tọ́njẹgbonu, bo tọ́n sọn ofi: na Hẹlọdi [Antipas] jlo na hù we.” E sọgan yindọ Hẹlọdi lọsu wẹ fọ́n ajàn ehe dote nado hẹn Jesu họ̀n yì sọn aigba-denamẹ lọ ji. Hẹlọdi sọgan ko to budi nado tindo mahẹ to okú yẹwhegán Jiwheyẹwhe tọn devo mẹ kẹdẹdile e basi do to hùhù Johanu Baptizitọ lọ tọn mẹ. Ṣigba Jesu dọ na Falesi lẹ dọmọ: “Mì yì, bo dọ hlan wọtupọẹ nẹ, dọmọ, Pọ́n, yẹn to aovi lẹ yàn jẹgbonu, yẹn sọ to azọ̀nhẹngbọ to egbé po osọ̀ po, to azán atọ̀ntọ gbè, yẹn na wàvọ.”
To tadidona azọ́n etọn to finẹ godo, Jesu zindonukọn to gbejizọnlin etọn mẹ hlan Jelusalẹm na, dile e basi zẹẹmẹ do dọ, “e ma sọgan yin mọ dọ yẹwhegán ni dọ̀n to gbonu Jelusalẹm tọn.” Naegbọn e dona yin nukundo dọ Jesu na yin hùhù to Jelusalẹm? Na Jelusalẹm wẹ yin todaho tatọ-tònọ lọ wutu, fie hagbẹ 71 Tòhódọtọ whẹdatẹn daho Ju lẹ tọn tin te podọ fie avọ́sinsan kanlin tọn lẹ nọ yin bibasi te. Enẹwutu, e ma na yin alọkẹyi gba dọ “Lẹngbọvu Jiwheyẹwhe tọn” ni yin hùhù to fidevo depope adavo to Jelusalẹm.
Jesu doavigbe dọmọ: “Jelusalẹm, Jelusalẹm E, hiẹ he hù yẹwhegán lẹ, bosọ dlan zannu do yé he yè dohlan we lẹ; whla nẹmu wẹ yẹn ko jlo na bẹ ovi towe lẹ plidopọ, dile koklosi nọ bẹ ovi etọn lẹ pli do awà etọn glọ do, bọ mì ma sọ jlo! Pọ́n, yè jo owhé mìtọn do hlan mì jẹvọ́.” Na gbigbẹ́ Visunnu Jiwheyẹwhe tọn dai wutu, akọta lọ yin owhẹ̀ vasudo tọn gble do!
Dile Jesu pànta Jelusalẹm, e yin oylọ-basina yì owhé nukọntọ Falesi lẹ tọn de tọn gbè. Gbọjẹzangbe wẹ, bọ gbẹtọ lẹ to ṣíṣọ́ ẹ afọsu-afọsi, to whenuena e yindọ dawe de tin to finẹ he to jíjízọ̀n jẹ, vlavo osin ko hlá do awà po afọ etọn lẹ po mẹ. Jesu dọho hlan Falesi lẹ po Osẹ́n yọnẹntọ he tin to finẹ lẹ po, bo kanse dọmọ: “Be e jẹ na hẹnazọngbọ to gbọjẹzangbe?”
Mẹdepope ma kẹnù. Enẹwutu Jesu hẹnazọ̀ngbọna dawe lọ bo do e hlan nado yì. Enẹgodo e kanse dọmọ: “Mẹnu wẹ to mì mẹ bo na tindo [visunnu, NW ] de, kavi oyìn, he flẹ jẹ dòtọ mẹ bo ma na dọ̀n ẹn tọ́n to afọdoponẹji to gbọjẹzangbe?” Whladopo dogọ, mẹdepope ma kẹnù nado gblọn gba. Luku 13:22–14:6; Johanu 1:29.
▪ Etẹwẹ Jesu dohia dọ nuhudo etọn tin nado mọ whlẹngán, podọ naegbọn mẹsusu yin ohọ̀n sudo do gbonu?
▪ Mẹnu wẹ “godotọ” lẹ he lẹzun nukọntọ, podọ “nukọntọ” he lẹzun godotọ lẹ?
▪ Naegbọn e do yin didọ dọ vlavo Hẹlọdi jlo nado hù Jesu?
▪ Naegbọn e ma na yin alọkẹyi dọ yẹwhegán de ni yin hùhù to gbonu Jelusalẹm tọn?