Weta 83

Falesi de Hẹjó E

JESU gbẹ́ pò to owhé Falesi nukundeji de tọn gbè bo ko ṣẹṣẹ hẹnazọngbọna dawe de he to jíjízọ̀n jẹ. Dile e mọ jonọ he pò lẹ to aisin to otẹn nukundeji lẹ mẹ to núdùdù lọ whenu, e plọnmẹ nuplọnmẹ de dogbọn whiwhẹ dali.

Enẹgodo Jesu basi zẹẹmẹ dọmọ: “Whenuena yè gbọn alọ mẹde tọn mẹ ylọ we wá alọwle hùnwhẹ kọ̀n, mì jagla to otẹn daho gbahú mẹ blo; vlavo yè nikaa ko ylọ omẹ he klohú hiẹ de; whenuena ewọ he ylọ we po ewọ po na wá bo dọ hlan we, dọmọ, Na otẹn dawe he; hiẹ nasọ yí winyan do ṣẹ̀ otẹn godo tọn yí.”

Enẹwutu Jesu na ayinamẹ dọmọ: “Whenuena yè ylọ we, yì, bo jagla to otẹn godo tọn mẹ, na whenuena ewọ he ylọ we wá, e nido dọ hlan we, dọmọ, Họntọn, yì aga; whenẹnu wẹ hiẹ na do gigo to omẹ he jagla to núdùdù kọ̀n hẹ we lẹ dè.” Nado dotana, Jesu dọmọ: ‘Na mẹdepope he ze ede daga, na yin zínzíndai; podọ ewọ he sọ zín ede dai, na yin zize daga.’

Enẹgodo, Jesu dọho hlan Falesi he basi oylọ na ẹn lọ bo basi zẹẹmẹ na ẹn lehe yè sọgan wleawu núdùdù he tindo ale taun to Jiwheyẹwhe dè gbọn. “Whenuena hiẹ da núdùdù whèmẹ tọn, kavi tenu tọn, a ylọ họntọn towe lẹ, kavi hẹnnumẹ towe lẹ, kavi kọmẹnu adọkunnọ lẹ blo; vlavo yé ga nikaa ylọ we do sú ahọsu we. Ṣigba whenuena hiẹ da núdùdù de, ylọ wamọnọ lẹ, pòtẹnnọ lẹ, sẹkunọ lẹ, nukuntọnnọ lẹ. Hiẹ nasọ yin [ayajẹnọ, NW ]; na yé ma sọgan suahọ etọn we gba.”

Núdùdù mọnkọtọn didà na madogannọ lẹ na hẹn ayajẹ wá na mẹhe dà ẹ, dile Jesu basi zẹẹmẹ na johẹmẹtọ etọn do, “Yè nasọ suahọ etọn we to fọnsọnku nugbonọ lẹ tọn gbè.” Zẹẹmẹ Jesu tọn gando núdùdù gbégbònamẹ tọn ehe go hẹn núdùdù wunmẹ devo wá ayiha mẹ na jonọ hatọ dopo. “[Ayajẹnọ, NW ] wẹ ewọ he na dùnú to ahọludu Jiwheyẹwhe tọn mẹ,” wẹ jonọ lọ dọ. Ṣogan, e ma yin mẹlẹpo wẹ yí nukun nujọnu tọn do pọ́n nukundido ayajẹ tọn enẹ gba, dile Jesu zindonukọn nado dohia gbọn oló de dali do.

“Dawe de da núdùdù tenu tọn daho de, bosọ ylọ gbẹtọ susu: e sọ do afanumẹ etọn jẹgbonu hlan . . . nado dọ hlan yé he yè ylọ dai lẹ, dọmọ, Mì wá, na onú lẹpo wleawu dinvie. Yemẹpo sọ dogbepọ, bo ṣẹ̀ hópladọ. Tintan dọ hlan ẹn, dọmọ, Yẹn họ̀ aigba pẹvide, yẹn ma sọgan nọ ma yì pọ́n ẹn, yẹn vẹ̀ we na a ni jotẹnna mi. Awetọ sọ dọmọ, Yẹn họ̀ glèpọnu atọ́n oyìn tọn, yẹn sọ jei whiwhlé yé pọ́n gbé: yẹn vẹ̀ we na a ni jotẹnna mi. Mẹdevo sọ dọmọ, Yẹn wlealọ hẹ asi de, enẹwutu yẹn ma sọgan wá gba.”

Hópladọ he ma họ̀ali nankọ die! Na taun tọn ogle de kavi kanlin-yìnyìn de ko nọ yin tintẹnpọn whẹpo do yin hihọ̀, enẹwutu plaplajininọ nujọnu tọn depope ma tin to finẹ ba nado vọ́ yé pọ́n to enẹgodo gba. Mọdopolọ, alọwle mẹde tọn ma dona glọnalina ẹn sọn alọkikẹyi oylọ-basinamẹ titengbe mọnkọtọn mẹ gba. Enẹwutu to sisè dogbọn hópladọ ehelẹ dali, ogán lọ gblehomẹ bo degbena afanumẹ etọn dọmọ:

“Yì alihogbo lẹ ji, po aliklán tòdaho tọn lẹ po, bo hẹn biọ ofi wá wamọnọ po pòtẹnnọ lẹ po po nukuntọnnọ lẹ po po sẹkunọ lẹ po. Afanumẹ lọ sọ dọmọ, Oklunọ, yè ko basi dile hiẹ dọ do, ganṣo otẹn sọ tin ai. Oklunọ sọ dọ hlan afanumẹ lọ, dọmọ. Tọ́n yì otò ligbóji, po mọji lẹ po, bo vẹvẹna yé nado wá, na owhé ṣie gbè ni gọ́. . . . Mẹdepope to yé he yè ko ylọ lẹ mẹ, ma na dọ́pọn to tenu núdùdù ṣie mẹ.”

Ninọmẹ tẹwẹ oló lọ basi zẹẹmẹ etọn? Eyọn, “oklunọ” he wleawuna núdùdù lọ nọtena Jehovah Jiwheyẹwhe; “afanumẹ” he dlẹnkan oylọ-basinamẹ tọn lọ, yin Jesu Klisti; podọ “núdùdù tenu tọn daho” lọ, yin dotẹnmẹ hundote lẹ nado tin to hukan ji na Ahọluduta olọn tọn.

Omẹ tintan he mọ oylọ-basinamẹ lọ nado wá hukan ji na Ahọluduta lọ, jẹnukọnna mẹdevo lẹpo wẹ, sinsẹ̀ngan Juvi azán Jesu gbè tọn lẹ. Ṣigba, yé gbẹ́ oylọ-basinamẹ lọ dai. Gbọnmọ dali, titengbe bẹsọn Pẹntikọsti 33 W.M., oylọ-basinamẹ awetọ yin kandlẹnna hlan omẹ vivlẹko he ma diyin to akọta Juvi tọn mẹ lẹ. Ṣigba mẹhe yigbe lẹ ma pé nado gọ́ otẹn 144 000 lẹ mẹ to Ahọluduta Jiwheyẹwhe tọn to olọn mẹ gba. Enẹwutu to owhe 36 W.M., yèdọ owhe atọ̀n daa godo, oylọ-basinamẹ atọ̀ntọ heyin godo tọn lọ yin kandlẹnna hlan mẹhe ma yin Ju he ma gbowhẹ̀ lẹ, podọ bibẹpli omẹ mọnkọtọn lẹ tọn zindonukọn jẹ azán mítọn gbè. Luku 14:1-24.

▪ Nuplọnmẹ tẹwẹ Jesu plọnmẹ dogbọn whiwhẹ dali?

▪ Nawẹ johẹmẹtọ de sọgan wleawuna núdùdù de he tindo ale to Jiwheyẹwhe dè gbọn, podọ naegbọn e na do hẹn ayajẹ wá na ẹn?

▪ Naegbọn hópladọ jonọ he yin yiylọ lọ lẹ tọn yin dehe ma họ̀ali?

▪ Etẹwẹ oló Jesu tọn heyin “núdùdù tenu tọn daho” lọ tọn nọtena?