Weta 107

Oló Hùnwhẹ Alọwle Tọn

GBỌN oló awe dali, Jesu ko hùngona wekantọ lẹ po ogán yẹwhenọ lẹ tọn po, podọ yé jlo nado hù i. Ṣigba Jesu ma ko dotana po yé po gba. E sọ zindonukọn nado do oló devo de na yé, dọmọ:

“Ahọludu olọn tọn sọ tin jijlẹ do ahọlu de go, he basi alọwle hùnwhẹ de na visunnu etọn. Bo do afanumẹ etọn lẹ hlan nado ylọ yé mẹhe yè ko ylọ do alọwle hùnwhẹ kọ̀n dai lẹ: yé ma sọ jlo na wá.”

Jehovah Jiwheyẹwhe wẹ Ahọlu he wleawuna hùnwhẹ alọwle tọn na Visunnu etọn, yèdọ Jesu Klisti. To godo mẹ, asi yọyọ hodotọ 144 000 yiamisisadode lẹ tọn na yin kinkọndopọ hẹ Jesu to olọn mẹ. Mẹjidugando Ahọlu lọ tọn lẹ wẹ omẹ Islaeli tọn lẹ, mẹhe, to yinyin hinhẹn biọ alẹnu Osẹ́n tọn mẹ to owhe 1513 J.W.M., mọ lẹblanulọkẹyi lilẹzun ‘ahọluduta yẹwhenọ lẹ tọn de’ yí. Gbọnmọ dali, to nujijọ enẹ whenu, oylọ lọ yin kandlẹnna hlan yé tlọlọ to tintan whenu wá hùnwhẹ alọwle lọ tọn tẹnmẹ.

Ṣigba, oylọ tintan lọ hlan mẹhe yin oylọ-basina lẹ mayin bibasi kakajẹ vivọnu owhe 29 W.M. gba, to whenuena Jesu po devi etọn lẹ po (afanumẹ ahọlu lọ tọn lẹ) jẹ azọ́n yẹwhehodidọ Ahọluduta yetọn tọn ji. Ṣigba Islaelivi jọwamọ tọn lẹ he mọ oylọ ehe heyin bibasi gbọn afanumẹ lọ lẹ dali sọn owhe 29 W.M. jẹ 33 W.M. yí ma to jijlo nado wá gba. Enẹwutu Jiwheyẹwhe na dotẹnmẹ hundote devo akọta mẹhe yin oylọ basina lẹ tọn, dile Jesu basi zẹẹmẹ do dọmọ:

“E sọ vọ́ do afanumẹ devo lẹ hlan, dọmọ, mì dọna yé mẹhe yè ylọ lẹ, dọ, pọ́n, yẹn ko wleawu núdùdù ṣie tọn pó: yè ko hù oyìnsu ṣie lẹ, po kanlin winyanwinyan ṣie lẹ po, podọ yè ko wà onú lẹpo vọ̀, mì wá alọwle hùnwhẹ kọ̀n.” Oylọ awetọ po godo tọn ehe po na mẹhe yin oylọ basina lẹ bẹjẹeji to Pẹntikọsti owhe 33 W.M., to whenuena gbigbọ wiwe yin kinkọn jẹgbonu do hodotọ Jesu tọn lẹ ji. Oylọ ehe zindonukọn kakajẹ owhe 36 W.M.

Ṣigba, suhugan Islaelivi lẹ lọsu gbẹ́ oylọ ehe lọ dai gbidigbidi. Jesu dọmọ: “Yé ma hò e pọ́n, yé tọ́n, ode yì ogle etọn titi mẹ, awetọ yì ajọ́ etọn gbé. Mẹhe pò lẹ sọ hẹn afanumẹ etọn lẹ go, bo saya hẹ yé, bo hù yé.” “Ṣigba,” wẹ Jesu zindonukọn dọ, “homẹgble ahọlu lọ: e sọ do [awhànpa] etọn hlan gbonu, bosọ hù hlọnhutọ nẹlẹ sudo, bosọ mẹ̀ todaho yetọn.” Ehe jọ to owhe 70 W.M., to whenuena Jelusalẹm yin hihọ́liai pete gbọn Lomunu lẹ dali, bọ hlọnhutọ enẹlẹ yin hùhù.

Enẹgodo Jesu basi zẹẹmẹ nuhe jọ to ojlẹ lọ mẹ tọn dọmọ: “Whenẹnu wẹ [ahọlu lọ] sọ dọ hlan afanumẹ etọn lẹ, dọ, Yè ko da núdùdù asi yọyọ tọn vọ̀, ṣigba yé mẹhe yè ylọ dai lẹ ma jẹ. Enẹwutu mì yì jẹ kinklan alihogbo lẹ tọn ji, omẹ sọha he mì mọ, mì ylọ yé wá alọwle hùnwhẹ kọ̀n.” Afanumẹ lọ lẹ wà ehe, podọ ‘abò lọ na hùnwhẹ alọwle tọn lẹ sọ yin gigọ́ po mẹhe sinai to tafo kọ̀n lẹ po.’

Azọ́n jonọ lẹ bibẹpli sọn alihogbo lẹ ji to gbonu todaho mẹhe yin oylọ basina lẹ tọn ehe bẹjẹeji to owhe 36 W.M. Awhàngán awhànpa Lomu tọn Kọneliọsi po whẹndo etọn po wẹ yin omẹ tintan mẹhe mayin Juvi owhẹ̀gbonọ heyin bibẹpli lẹ. Bibẹpli mẹhe mayin Juvi lẹ tọn ehe, he yemẹpo yin tẹnmẹdiọnamẹtọ lẹ na mẹhe ko gbẹ́ oylọ lọ dai jẹnukọn lẹ, ko zindonukọn kakajẹ owhe kanweko 20tọ́ lọ mẹ.

To owhe kanweko 20tọ́ lọ whenu wẹ abò hùnwhẹ alọwle bibasi tọn lọ lẹ yin hinhẹn gọ́. Enẹgodo Jesu dọ nuhe jọ lọ, dọmọ: “Whenuena ahọlu biọ họmẹ wá nado pọ́n jonọ lẹ, e mọ dawe de to finẹ, he ma tindo avọ̀ asi yọyọ tẹnmẹ tọn de. E sọ dọ hlan ẹn dọmọ, Họntọn, nawẹ hiẹ biọ ofi wá do matindo avọ̀ asi yọyọ tẹnmẹ tọn de? E masọ sọgan kẹnù. Whenẹnu wẹ ahọlu dọ hlan devizọnwatọ etọn lẹ, dọmọ, Mì blá ẹ alọ po afọ po, bo ze e dlan zinvlu gbonu tọn mẹ; finẹ wẹ avi po adúkúnkún po na te.”

Dawe he ma do avọ̀ alọwle tọn lọ nọtena Klistiani nukunta tọn heyin Mẹylọhodotọklisti tọn lẹ. Jiwheyẹwhe ma ko yọ́n ehelẹ pọ́n gbede taidi mẹhe tindo mẹyinyọnẹn he sọgbe de taidi Islaelivi gbigbọmẹ tọn lẹ gba. Jiwheyẹwhe ma ko sá amisisana yé pọ́n gbede po gbigbọ wiwe po taidi whédutọ Ahọluduta lọ tọn lẹ gba. Enẹwutu yé yin yinyan jẹgbonu biọ zinvlu mẹ fie yé na jiya vasudo tọn te.

Jesu dotana oló etọn gbọn didọ dali dọmọ: “Na mẹsusu wẹ yè ylọ, ṣigba pẹvide wẹ yè na mọ dè.” Mọwẹ, mẹsusu wẹ yin oylọ basina sọn akọta Islaeli tọn mẹ nado lẹzun hagbẹ asi yọyọ Klisti tọn lẹ, ṣigba Islaelivi jọwamọ tọn vude poun wẹ yin dide. Suhugan jonọ 144 000 lẹ tọn he mọ ahọsumẹ olọn mẹ tọn yí lẹ sọawuhia nado yin mẹhe mayin Islaelivi lẹ. Matiu 22:1-14; Eksọdusi 19:1-6; Osọhia 14:1-3.

▪ Mẹnu lẹ wẹ yin mẹhe yin oylọ basina to tintan whenu do hùnwhẹ alọwle lọ tọn tẹnmẹ, podọ whetẹnu wẹ oylọ lọ yin bibasi hlan yé?

▪ Whetẹnu wẹ oylọ lọ jẹgbonu yì mẹhe yin oylọ basina lẹ dè to tintan whenu, podọ mẹnu lẹ wẹ yin afanumẹ heyin yiyizan nado dọ oylọ lọ jẹgbonu lẹ?

▪ Whetẹnu wẹ oylọ awetọ lọ yin didọ jẹgbonu, podọ mẹnu lẹ to enẹgodo wẹ yin oylọ basina?

▪ Mẹnu lẹ wẹ yin yẹdena dogbọn hagbẹ he ma do avọ̀ hùnwhẹ alọwle tọn lọ dali?

▪ Mẹnu lẹ wẹ yin mẹsusu heyin yiylọ lẹ, podọ vude heyin dide lẹ?