Be Hiẹ Nọ Jlo Nado Yin Omẹ Tintan to Whepoponu Wẹ Ya?

BE A yọ́n mẹde he nọ jlo nado tin to otẹn tintan mẹ to whepoponu ya?⁠— E sọgan sisẹ́ mẹdevo lẹ do apadopo nado jẹ nukọn. Be a ko mọ onú mọnkọtọn pọ́n ya?⁠— Mẹplọntọ Daho lọ mọ bọ mẹhe tlẹ ko whẹ́n mẹho lẹ tẹnpọn nado jẹ otẹn tintan, kavi otẹn he diyin hugan lẹ mẹ. Podọ e ma yiwanna ehe. Gbọ mí ni pọ́n nuhe jọ.

Biblu dọna mí dọ Jesu yin oylọ-basina yì hùnwhẹ daho de tẹnmẹ to owhé Falesi de, he yin sinsẹ̀ngán nukundeji de tọn gbè. To whenuena Jesu jẹ finẹ, e jẹ ayidego ji dọ jonọ devo he to wiwá lẹ to aisin do otẹn dagbe hugan lẹ mẹ. Enẹwutu e pìntàn de na jonọ he wá otẹn lọ mẹ lẹ. Be hiẹ lọsu jlo na sè otàn lọ ya?⁠—

Jesu dọmọ: ‘To whenuena mẹde basi oylọna we do hùnwhẹ alọwle tọn de tẹnmẹ, ma yì sinai do otẹn dagbe hugan, kavi otẹn daho hugan de mẹ blo.’ Be a yọ́n nuhe zọ́n Jesu do dọmọ ya?⁠— E basi zẹẹmẹ dọ, vlavo mẹhe diyin hugan we de sọgan ko yin oylọ-basina. Enẹwutu, dile a to mimọ to yẹdide lọ mẹ do, mẹhe to hùnwhẹ basi lọ wá bo dọmọ: ‘Na otẹn dawe he, podọ hiẹ ni fọ́n yì dọ́n.’ Etẹwẹ na yin numọtolanmẹ jonọ he ko sinai do otẹn daho mẹ lọ tọn?⁠— Winyan na hù i taun na jonọ he pò to otẹn lọ mẹ lẹpo na jẹ pinpọn ẹn ji dile e na lẹkọwa otẹn pẹvi pete mẹ.

Jesu to didohia dọ e ma sọgbe nado nọ dín otẹn he yiaga hugan lẹ gba. Enẹwutu e dọmọ: ‘To whenuena hiẹ yin oylọ-basina yì hùnwhẹ alọwle tọn de tẹnmẹ, yì sinai do otẹn he yido hugan mẹ. Enẹgodo, mẹhe basi oylọna we sọgan wá bo dọna we dọ, “Họntọn ṣie, yì otẹn aga tọn mẹ.” To whenẹnu wẹ hiẹ na tindo gigo to jonọ he pò lẹ nukọn dile hiẹ to finfọ́n yì otẹn he yọnhugan lọ mẹ.’—Luku 14:1, 7-11.

Be a mọnukunnujẹ nuhe otàn Jesu tọn to didohia mẹ ya?⁠— Gbọ ma na we apajlẹ dopo nado pọ́n eyin a mọnukunnujẹemẹ ganji. Mí ni dọ dọ a jlo na biọ mọto he mẹ gbẹtọ sù te de mẹ. Be a na whlẹndo bo yì sinai bo dike mẹhomẹ de ni ṣite to mọto lọ mẹ wẹ ya?⁠— Eyin a wàmọ, be homẹ Jesu tọn na hùn ya?⁠—

Mẹde sọgan dọ dọ nude ma dù Jesu to nuhe mí wà lẹ mẹ. Ṣigba be hiẹ yí enẹ sè ya?⁠— To whenuena Jesu yì hùnwhẹ daho lọ tẹnmẹ to Falesi lọ whé, e doayi gbẹtọ lẹ go dile yé to aisin do otẹn he jlo yé lẹ mẹ. Be a ma lẹndọ e gbẹsọ tindo ojlo dopolọ to nuhe mí to wiwà to egbehe lẹ mẹ ya?⁠— Todin he Jesu ko tin to olọn mẹ, e họnwun dọ din wẹ e tin to otẹn he yọnhugan mẹ nado doayi mí go.

To whenuena mẹde tẹnpọn nado yin omẹ tintan, e sọgan hẹn nuhahun lẹ wá. Nudindọn lẹ nọ saba fọ́n, bọ gbẹtọ lẹ nọ gblehomẹ. Ehe nọ jọ to whedelẹnu eyin yọpọvu lẹ dó mọto dopọ. Tlolo he ohọ̀n mọto lọ tọn yin hùnhùn, yọpọvu lọ lẹ nọ whlẹndo nado biọ e mẹ jẹnukọn. Yé nọ jlo nado sinai do otẹn dagbe hugan lẹ mẹ, otẹn he sẹpọ fleṣenu lẹ. Etẹwẹ sọgan jọ to whenẹnu?⁠— Mọwẹ, yé sọgan bẹ zingidi hẹ yedelẹ.

Jijlo nado tin to otẹn tintan mẹ sọgan fọ́n nuhahun susu dote. E tlẹ fọ́n nuhahun dote to apọsteli Jesu tọn lẹ ṣẹnṣẹn. Dile mí plọn to Weta 6 owe ehe tọn mẹ do, yé dọnnu to yedelẹ ṣẹnṣẹn dogbọn mẹhe klohugan to yé mẹ dali. Etẹwẹ Jesu wà to whenẹnu?⁠— E vọ́ linlẹn yetọn jlado. Ṣigba yé sọ vọ́ núdọ̀n to godo mẹ. Dike mí ni pọ́n lehe e bẹ gbọn.

Apọsteli lẹ, po mẹdevo lẹ po to gbejizọnlin godo tọn basi hẹ Jesu jei tòdaho Jelusalẹm tọn mẹ. Jesu to hodọna yé dogbọn Ahọluduta etọn dali, enẹwutu Jakobu po Johanu po ko to nulẹnpọn dogbọn gandudu hẹ ẹ taidi ahọlu dali. Yé tlẹ ko dọ ẹ na onọ̀ yetọn, Salomi ga. (Matiu 27:56; Malku 15:40) Enẹwutu dile yé to aliho ji jei Jelusalẹm, Salomi wá Jesu dè bo jẹklo to nukọn na ẹn, bo biọ nude to Jesu si.

Jesu kanse e dọ: “Etẹwẹ hiẹ jlo.” E gblọn dọ emi jlo dọ Jesu ni dike visunnu emitọn lẹ ni sinai do apá na ẹn to Ahọluduta etọn mẹ, dopo to adusiwhé na ẹn podọ awetọ to amiyọnwhé. Do glido, to whenuena apọsteli he pò lẹ sè nuhe Jakobu po Johanu po dọna onọ̀ yetọn nado biọ, numọtolanmẹ tẹwẹ a lẹndọ yé tindo?⁠—

Homẹgble yé do Jakobu po Johanu po go taun. Enẹwutu Jesu na ayinamẹ dagbe de apọsteli etọn lẹpo to pọmẹ. Jesu dọna yé dọ, ahọlu aihọn tọn lẹ wẹ nọ yiwanna yede zizedaga bo do yede hia di mẹjọmẹ hugan. Yé nọ jlo nado ze yede do otẹn he yiaga mẹ fie mẹlẹpo na nọ setonuna yé te. Ṣigba Jesu dọna hodotọ etọn lẹ dọ yewlẹ ma dona wàmọ. Kakatimọ, Jesu dọmọ: “Mẹdepope he sọ jlo na yin nukọntọ to mì mẹ na yin afanumẹ mìtọn.” Lẹnnupọndo enẹ ji!—Matiu 20:20-28.

Be a yọ́n nuhe afanumẹ de nọ wà ya?⁠— E nọ yilizọn na mẹdevo lẹ, e ma nọ donukun mẹdevo lẹ nado yilizọn na ẹn gba. Ewọ wẹ nọ nọ̀ otẹn he yido hugan mẹ, e mayin otẹn tintan mẹ gba. E nọ yinuwa di mẹhe yido hugan, e mayin mẹhe yiaga hugan gba. Podọ flindọ, Jesu dọ dọ mẹhe jlo na yin tintan dona yinuwa di afanumẹ de na mẹdevo lẹ.

Eyọn, etẹwẹ a lẹndọ enẹ zẹẹmẹdo na mí?⁠— Be afanumẹ de sọgan dọnnu hẹ ogán etọn gando mẹhe dona sinai do otẹn he yiaga hugan mẹ go wẹ ya? Kavi be e na dọnnu dogbọn mẹhe dona dùnú jẹnukọn dali wẹ ya? Etẹwẹ hiẹ lẹn?⁠— Jesu basi zẹẹmẹ dọ afanumẹ de nọ lẹn ogán etọn tọn pọ́n jẹnukọn.—Luku 17:7-10.

Enẹwutu kakati nado tẹnpọn nado yin nukọntọ, etẹwẹ mí dona wà?⁠— Mí dona yinuwa di afanumẹ de na mẹdevo lẹ. Podọ enẹ zẹẹmẹdo nado nọ ze mẹdevo lẹ do otẹn nukọn tọn mẹ. E zẹẹmẹdo nukun nujọnu tọn yiyido pọ́n mẹdevo lẹ. Be a sọgan lẹnnupọndo aliho delẹ ji he mẹ a sọgan ze mẹdevo lẹ do otẹn nukọntọn mẹ te ya?⁠— Wá mí ni lẹkọyi weda 40 po 41 po mẹ bo pọ́n whladopo dogọ aliho he mẹ hiẹ sọgan ze mẹdevo lẹ do otẹn nukọntọn mẹ bo yilizọn na yé te.

Hiẹ na flindọ Mẹplọntọ Daho lọ ze mẹdevo lẹ do otẹn nukọntọn mẹ gbọn lizọnyi na yé dali. To ozán godo tọn he e yizan hẹ apọsteli etọn lẹ mẹ, e tlẹ jẹklo bo klọ́ afọ na apọsteli etọn lẹ. Eyin mílọsu ze mẹdevo lẹ do otẹn nukọntọn mẹ gbọn lizọnyi na yé dali, mí na hẹn homẹ Mẹplọntọ Daho lọ po Otọ́ etọn, Jehovah Jiwheyẹwhe tọn po hùn.