Alọwle He Tindo Yẹyi to Nukun Jiwheyẹwhe po Gbẹtọ Tọn po Mẹ
“Alọwle de tin to Kana . . . yè sọ ylọ Jesu po nuplọntọ etọn lẹ po do alọwle lọ kọ̀n.”—JOHANU 2:1, 2.
1. Etẹ ji wẹ nuhe Jesu wà to Kana dọ̀n ayidonugo mítọn wá?
JESU, onọ̀ etọn, po delẹ to devi etọn lẹ mẹ po yọ́n ayajẹ he alọwle yẹyinọ he omẹ Jiwheyẹwhe tọn lẹ nọ basi sọgan hẹnwa. Klisti tlẹ hẹn alọwle dopo yin nuhe jẹna ayidego gbọn azọ́njiawu etọn tintan he e wà to finẹ dali, bo gbọnmọ dali yidogọna ayajẹ nujijọ lọ tọn. (Johanu 2:1-11) Hiẹ sọgan ko yì bo duvivi alọwle Klistiani he jlo nado sẹ̀n Jehovah taidi alọwlemẹ ayajẹnọ lẹ tọn. Kavi hiẹ sọgan to nukọnpọnhlan nado basi alọwle mọnkọtọn de kavi nado gọalọna họntọn de nado hẹn hùnwhẹ alọwle etọn tọn tindo kọdetọn dagbe. Etẹwẹ sọgan hẹn ehe yọnbasi?
2. Nudọnamẹ tẹwẹ Biblu bẹhẹn gando alọwle lẹ go?
2 Klistiani lẹ ko mọ dọ ayinamẹ he tin to Ohó gbọdo Jiwheyẹwhe tọn mẹ nọ gọalọ taun to whenuena sunnu po yọnnu de po to tito basi nado wlealọ. (2 Timoti 3:16, 17) Nugbo wẹ dọ Biblu ma basi todohukanji lehe alọwle Klistiani tọn dona yin bibasi do pẹpẹ tọn gba. Enẹ ma dona paṣa mí na aṣa gọna nubiọtomẹsi osẹ́n otò dopodopo tọn po ojlẹ dopodopo po nọ gbọnvo wutu. Di apajlẹ, to Islaeli hohowhenu tọn mẹ, aliho nuyiwa alọwle tọn he nọ yin hihodo todin lẹ ma tin gba. To azán alọwle tọn gbè, asisunọ lọ nọ plan asiyọyọ etọn wá owhé etọn kavi otọ́ etọn tọn gbè. (Gẹnẹsisi 24:67; Isaia 61:10; Matiu 1:24) Nuyiwa gbangba tọn ehe wẹ nọtena alọwle lọ, bo ma nọ bẹ afọdide sọgbe hẹ osẹ́n he nọ yin zize to kọndopọ mẹ hẹ alọwle egbezangbe tọn delẹ hẹn.
3. Ayajẹ nuwiwa tẹ tọn wẹ Jesu yidogọna to Kana?
3 Islaelivi lẹ nọ pọ́n afọdide enẹ hlan taidi dehe nọtena alọwle lọ. Enẹgodo, yé sọgan duvivi hùnwhẹ jonọyiyi tọn de, taidi dehe yin nùdego to Johanu 2:1 mẹ. Lẹdogbedevomẹ Biblu tọn susu taidi Biblu Wiwe Gun-Alada tọn lilẹ́ wefọ enẹ dole: ‘Alọwle de tin to Kana.’ Ṣigba hogbe dowhenu Glẹki tọn yin lilẹ́ po gbesisọ po dọ “hùnwhẹ jonọyiyi alọwle tọn.”a (Matiu 22:2-10; 25:10; Luku 14:8) Kandai lọ hẹn ẹn họnwun dọ Jesu yì bosọ yidogọna ayajẹ hùnwhẹ jonọyiyi tọn he yin bibasi to pọmẹ hẹ alọwle Ju de tọn. Nalete, onú titengbe lọ wẹ yindọ nuhe hùnwhẹ alọwle tọn bẹhẹn to whenẹnu lẹ gbọnvo na nuhe nọ yin wiwà to egbehe lẹ.
4. Wunmẹ hùnwhẹ alọwle tọn tẹwẹ Klistiani delẹ nọ de, podọ etẹwutu?
4 To otò susu mẹ to egbehe, Klistiani he jlo na wlealọ lẹ dona jẹ nubiọtomẹsi osẹ́n tọn delẹ kọ̀n. To enẹ wiwà godo, yé sọgan wlealọ to aliho depope he yin alọkẹyi to osẹ́n-liho mẹ. Enẹ sọgan yin wiwà taidi hùnwhẹ kleun, he to jlẹkaji de he yin anadena gbọn whẹdatọ, ahọluzọnwatọ, kavi lizọnyizọnwatọ sinsẹ̀n tọn de he Tohọluduta na jlọjẹ dali. Mẹdelẹ nọ de nado wlealọ to aliho mọnkọtọn mẹ, bo sọgan basi oylọna hẹnnumẹ kavi họntọn Klistiani kleun delẹ nado tin to finẹ taidi kunnudetọ he na doalọwemẹ lẹ kavi nado má ayajẹ nujijọ titengbe ehe tọn hẹ yé poun. (Jẹlemia 33:11; Johanu 3:29) Mọdopolọ, Klistiani devo lẹ sọgan de ma nado ylọ mẹsusu wá hùnwhẹ jonọyiyi alọwle lọ tọn he na biọ tito bibasi po akuẹzinzan susu po. Kakatimọ, yé sọgan basi tito nado dùnú dopọ hẹ họntọn vivẹ delẹ. Mahopọnna nudide he mí basi to whẹho ehe mẹ, mí dona yọnẹn dọ Klistiani he whèwhín devo lẹ sọgan tindo pọndohlan he gbọnvo na mítọn.—Lomunu lẹ 14:3, 4.
5. Naegbọn Klistiani susu nọ jlo dọ hodidọ de ni yin nina do alọwle yetọn ji, podọ etẹwẹ e nọ bẹhẹn?
5 Klistiani susu nọ jlo dọ hodidọ sinai do Biblu ji de ni yin nina do alọwle yetọn ji.b Yé yọnẹn dọ Jehovah wẹ yin Dowatọ alọwle tọn bo ko sọ hẹn ayinamẹ nuyọnẹn tọn tin-to-aimẹ to Ohó etọn mẹ do lehe alọwle sọgan tindo kọdetọn dagbe bo hẹn ayajẹ wá do ji. (Gẹnẹsisi 2:22-24; Malku 10:6-9; Efesunu lẹ 5:22-33) Podọ suhugan yetọn nọ jlo dọ họntọn po hẹnnumẹ Klistiani lẹ po ni má ayajẹ nujijọ lọ tọn hẹ yé. Ṣogan, nukun tẹwẹ mí dona yí do pọ́n nubiọtomẹsi po afọdide voovo he dona yin zize to osẹ́n-liho lẹ po, gọna aṣa he gbayipe to lẹdo mítọn mẹ lẹ? Hosọ ehe na dọhodo ninọmẹ he nọ wá aimẹ to otò voovo mẹ lẹ ji. Delẹ sọgan gbọnvo taun na nuhe hiẹ jẹakọ hẹ kavi nuhe nọ yin wiwà to lẹdo towe mẹ. Etomọṣo, hiẹ sọgan doayi nunọwhinnusẹ́n he nọ deanana ninọmẹ lọ lẹpo kavi adà he yin nujọnu na devizọnwatọ Jiwheyẹwhe tọn lẹ go.
Alọwle He Tindo Yẹyi Dona Jẹ Nubiọtomẹsi Osẹ́n Tọn lẹ Kọ̀n
6, 7. Naegbọn mí dona tindo ojlo to osẹ́n he gando alọwle go lẹ mẹ, podọ nawẹ mí na do enẹ hia gbọn?
6 Dile etlẹ yindọ Jehovah wẹ yin Dowatọ alọwle tọn, gandudu gbẹtọvi tọn lẹ tindo aṣẹpipa jẹ obá de mẹ do nuyiwa mẹhe to alọwle lẹ tọn ji. Ehe sọgbe na Jesu dọmọ: “Mì yí onú he yin Sesali tọn hlan Sesali, podọ onú he yin Jiwheyẹwhe tọn hlan Jiwheyẹwhe.” (Malku 12:17) Mọdopolọ, Apọsteli Paulu dọmọ: “Mì gbọ gbigbọ lẹpo ni yin mẹmẹglọ hlan huhlọn daho lẹ. Na huhlọn de ma tin adavo sọn Jiwheyẹwhe dè; huhlọn he tin lẹ Jiwheyẹwhe dè wẹ yè do yé ai sọn.”—Lomunu lẹ 13:1; Titu 3:1.
7 To otò susu mẹ, Sesali kavi aṣẹpipa gbẹtọvi tọn lẹ wẹ nọ basi dide eyin mẹde ko jẹ nubiọtomẹsi osẹ́n tọn lẹ kọ̀n nado wlealọ kavi lala. Enẹwutu, to whenuena Klistiani awe he ko jẹ nubiọtomẹsi Owe-wiwe tọn lẹ kọ̀n de nado wlealọ, yé nọ yí sọwhiwhe do setonuna osẹ́n otò tọn lẹ gando alọwle go. Ehe sọgan biọ dọ yé ni mọ gbedewema alọwle tọn yí sọn afọzedaitọ gandudu tọn he tindo jlọjẹ nado basi alọwle lọ kavi nado basi kandai etọn de si. To whenuena Sesali Augusti biọ dọ yè ni ‘wlan’ kavi basi kandai yinkọ gbẹtọ lẹ tọn do owe mẹ, Malia po Josẹfu po setonu, bo basi gbejizọnlin sọyi Bẹtlẹhẹm “nado wlan oyín” yetọn dai.—Luku 2:1-5.
8. Nuyiwa tẹlẹ wẹ Kunnudetọ Jehovah tọn lẹ nọ dapana, podọ etẹwutu?
8 Eyin alọwle Klistiani awe tọn sọgbe hẹ osẹ́n bosọ yin alọkẹyi, Jiwheyẹwhe nọ pọ́n yé hlan taidi mẹhe yin sinsindopọ lẹ. Enẹwutu, Kunnudetọ Jehovah tọn lẹ ma nọ basi alọwle devo kavi basi pàdido alọwle tọn devo, vlavo to hùnwhẹ owhe 25tọ kavi 50tọ alọwle yetọn tọn whenu. (Matiu 5:37) (Sinsẹ̀n delẹ ma nọ ylọ alọwle ahọluwhé tọn he yin alọkẹyi sọgbe hẹ osẹ́n dọ nujọnu, bo nọ dọ dọ alọwle mọnkọtọn lẹ ma sọgbe adavo yẹwhenọ kavi sinsẹ̀ngán de deanana alọwle lọ kavi kọ̀n asu po asi po dopọ.) Gandudu otò susu tọn ko na aṣẹ lizọnyizọnwatọ Kunnudetọ Jehovah tọn lẹ tọn de nado nọ wlealọ na mẹdevo lẹ. Eyin enẹ yọnbasi, mẹmẹsunnu lọ sọgan jlo nado basi kandai alọwle lọ tọn to Plitẹnhọ Ahọluduta tọn mẹ bọ hodidọ alọwle tọn na bọdego. Finẹ wẹ sinsẹ̀n nugbo nọ yin bibasi te bosọ yin nọtẹn he sọgbe hugan lọ nado dọhodo tito alọwle tọn he Jehovah Jiwheyẹwhe doai ji.
9. (a) Etẹwẹ Klistiani sunnu po yọnnu de po sọgan de nado basi na nuhe dù alọwle ahọluwhé tọn? (b) Nawẹ tito alọwle lọ tọn lẹ sọgan bẹ mẹho agun tọn lẹ hẹn gbọn?
9 To otò devo lẹ mẹ, osẹ́n nọ biọ dọ sunnu po yọnnu po ni wlealọ to ahọluwhé, taidi to tòhọ̀ de mẹ, kavi to ahọluzọnwatọ he ko yin dide de nukọn. To afọdide osẹ́n tọn enẹ zize godo, Klistiani lẹ nọ de nado yì Plitẹnhọ Ahọluduta tọn mẹ na hodidọ alọwle tọn de to azán dopolọ ji kavi to wunkẹngbe. (Yé ma na jlo dọ azán susu ni juwayi to alọwle ahọluwhé tọn godo whẹpo hodidọ Biblu tọn lọ nido yin nina gba, na sọgbe hẹ osẹ́n yé ko wlealọ to nukun Jiwheyẹwhe po gbẹtọ po tọn mẹ, ehe bẹ agun Klistiani tọn hẹn ga.) Eyin sunnu po yọnnu de po jlo dọ hodidọ ni yin nina do alọwle yetọn ji to Plitẹnhọ Ahọluduta tọn tangan de mẹ to alọwle ahọluwhé tọn bibasi godo, yé dona biọgbè Wedegbẹ́ Sinsẹ̀nzọn Agun lọ tọn domẹwhenu. Nugopọntọ ehelẹ dona dindona nado yọnẹn eyin sunnu po yọnnu lọ po tindo teninọ dagbe to agun yetọn mẹ, podọ yé dona hẹn ẹn diun dọ ganmẹ alọwle lọ tọn ma na hẹnalọdotena opli agun tọn lẹ po tito-to-whinnu gbigbọmẹ tọn devo lẹ po to plitẹnhọ lọ mẹ. (1 Kọlintinu lẹ 14:33, 40) Yé nasọ lẹnnupọndo obiọ he mẹhe jlo na wlealọ lọ lẹ basi gando lehe plitẹnhọ lọ na yin awuwlena do go ji bo basi dide eyin nulila dona yin bibasi gando yizan etọn go.
10. Eyin alọwle ahọluwhé tọn na yin bibasi, nawẹ ehe na gando hodidọ alọwle lọ tọn go gbọn?
10 Mẹho he na dọhodo alọwle lọ ji dona dovivẹnu nado hẹn hodidọ lọ tin to ogbẹ̀, bo jlọmẹdote to gbigbọ-liho bosọ tindo yẹyi. Eyin yé ko basi alọwle ahọluwhé tọn jẹnukọnna hodidọ lọ, e na hẹn ẹn họnwun dọ yé ko wlealọ sọgbe hẹ osẹ́n Sesali tọn. Eyin yé ma ko dopà alọwle tọn to ahọluwhé, yé sọgan wàmọ to hodidọ lọ whenu.c Eyin alọwlemẹ yọyọ lọ lẹ ko dopà to ahọluwhé ṣigba bosọ jlo nado vọ́ opà lọ dó to Jehovah po agun po nukọn, yé na diọ adà bẹjẹeji opà he tin to odò lọ tọn dole: “Yẹn ko dopà wayi [dọ] . . . ,” bo gbọnmọ dali dohia dọ yé ko yin ‘kinkọndopọ’ dai.—Matiu 19:6; 22:21.
11. To fidelẹ, nawẹ alọwle nọ yin bibasi gbọn, podọ nawẹ enẹ nọ yinuwado hodidọ alọwle lọ tọn ji gbọn?
11 To fidelẹ, osẹ́n gandudu tọn sọgan nọma biọ to sunnu po yọnnu de po si nado wlealọ to afọzedaitọ gandudu tọn de nukọn. Alọwle lọ nọ wá aimẹ to whenuena yé doalọ kandai-wema alọwle tọn mẹ bo ze e jo na ahọluzọnwatọ de. To enẹgodo, gbedewema alọwle tọn nọ yin kandai basina. Gbọnmọ dali, yé nọ yin pinpọnhlan taidi asu po asi po bẹsọn azán he yin kinkàn do gbedewema lọ ji. Dile e yin nùdego do wayi, mẹhe wlealọ to aliho ehe mẹ lẹ sọgan jlo dọ hodidọ sinai do Biblu ji de ni yin nina bọdo kandai bibasi enẹ go tlolo to Plitẹnhọ Ahọluduta tọn mẹ. Mẹmẹsunnu he whèwhín to gbigbọ-liho he yin dide nado na hodidọ lọ na dọna mẹplidopọ lẹpo dọ yé ko wlealọ na kandai he ṣẹṣẹ yin bibasi lọ wutu. Opà depope he na yin didó dona yin bibasi sọgbe hẹ nuhe yin didọ to hukan 10tọ po nudọnamẹ odò tọn lọ po mẹ. Mẹplidopọ he tin to Plitẹnhọ Ahọluduta tọn lọ mẹ lẹ na jaya hẹ alọwlemẹ lọ lẹ bo mọaleyi sọn ayinamẹ he yin nina sọn Ohó Jiwheyẹwhe tọn mẹ lẹ mẹ.—Ohàn Sọlọmọni Tọn 3:11.
Alọwle Aṣa Tọn po Ahọluwhé Tọn lẹ Po
12. Etẹwẹ alọwle aṣa tọn yin, podọ etẹwẹ yin ayinamẹ etọn na nado wà to alọwle mọnkọtọn bibasi godo?
12 To otò delẹ mẹ, gbẹtọ lẹ nọ basi nuhe sọgan yin yiylọdọ alọwle aṣa tọn. Ehe ma dlẹnalọdo omẹ awe he nọ nọpọ́ poun, kavi haṣinṣan pọninọ ojlẹ dindẹn tọn he sọgan yin alọkẹyi jẹ obá de mẹ to lẹdo delẹ mẹ ṣigba he ma jẹ nubiọtomẹsi lẹpo kọ̀n to osẹ́n-liho gba.d Mí to hodọ gando alọwle aṣa tọn he yin alọkẹyi gbọn mẹlẹpo dali to akọ̀ kavi lẹdo de mẹ go. Ehe sọgan bẹ asigbàn nina po asigbàn yíyí po hẹn, he na dohia dọ alọwle sunnu po yọnnu de po tọn jẹ nubiọtomẹsi osẹ́n tọn lẹ kọ̀n bosọ sọgbe hẹ Owe-wiwe. Gandudu nọ pọ́n alọwle aṣa tọn mọnkọtọn hlan taidi nuhe sọgbe to osẹ́n-liho bosọ sìn omẹ awe dopọ kakadoi. Enẹgodo, e nọ saba yọnbasi nado basi kandai alọwle aṣa tọn lọ tọn, podọ to enẹ wiwà godo, alọwlemẹ lọ lẹ sọgan mọ gbedewema alọwle tọn yí. Kandai alọwle tọn bibasi sọgan basi hihọ́na alọwlemẹ lọ lẹ to osẹ́n-liho kavi na asi lọ eyin e wá lẹzun asuṣiọsi podọ na ovi depope he sọgan yin jiji to sọgodo. Agun Klistiani tọn na na tuli mẹdepope he basi alọwle aṣa tọn mọnkọtọn nado basi kandai to ahọluwhé dile e sọgan yawu yọnbasi do. Na nugbo tọn, e taidi dọ kandai alọwle tọn po kandai ovi he yin jiji lẹ tọn po nọ yin bibasi to Osẹ́n Mose tọn glọ.—Matiu 1:1-16.
13. To alọwle aṣa tọn he osẹ́n kẹalọyi bibasi godo, etẹwẹ dona yin hinhẹn họnwun to hodidọ alọwle tọn mẹ?
13 Mẹhe yin kinkọndopọ to alọwle aṣa tọn he sọgbe hẹ osẹ́n mọnkọtọn mẹ lẹ nọ lẹzun asu po asi po. Dile e yin nùdego do wayi, Klistiani he basi alọwle mọnkọtọn lẹ sọgan jlo dọ hodidọ de ni yin nina do alọwle yetọn ji bọ yé na basi pàdido yetọn lẹ to Plitẹnhọ Ahọluduta tọn mẹ. Eyin mọ wẹ, hodọtọ lọ na hẹn ẹn họnwun dọ asu po asi po lọ lẹ ko wlealọ sọgbe hẹ osẹ́n Sesali tọn lẹ. Whladopo wẹ hodidọ mọnkọtọn na yin nina. Alọwle dopo wẹ nọ yin bibasi, ṣigba to whẹho ehe mẹ, alọwle lọ yin aṣa tọn he osẹ́n kẹalọyi, po hodidọ sinai do Owe-wiwe ji dopo po. Adà awe ehelẹ wiwà dopọ dile e sọgan yawu yọnbasi do nọ doyẹyigona alọwle Klistiani tọn dogọ to lẹdo lọ mẹ, titengbe eyin yé wá aimẹ to azán dopolọ gbè.
14. Etẹwẹ Klistiani de sọgan wà eyin alọwle aṣa tọn po ahọluwhé tọn po yin alọkẹyi?
14 To otò delẹ mẹ fie alọwle aṣa tọn yin alọkẹyi te taidi nuhe sọgbe to osẹ́n-liho, tito lẹ sọ nọ tin na alọwle ahọluwhé tọn ga. Alọwle ahọluwhé tọn nọ saba yin bibasi to afọzedaitọ gandudu tọn de nukọn, podọ e sọgan bẹ opà alọwle tọn lẹ didó po alọdido kandai-wema alọwle tọn mẹ po hẹn. Klistiani delẹ nọ de nado basi alọwle ahọluwhé tọn ehe kakati nido yin alọwle aṣa tọn. Sọgbe hẹ osẹ́n, nuhudo ma tin nado basi awe lẹpo to whenuena e yindọ alọwle lọ lẹ dopodopo wẹ yin alọkẹyi to osẹ́n-liho. Nuhe yin didọ to hukan 9 po 10 po mẹ gando hodidọ alọwle tọn po pàdido lẹ po go sọ yọn-na-yizan tofi ga. Onú titengbe lọ wẹ yindọ alọwle lọ ni yin bibasi to aliho he tindo yẹyi to nukun Jiwheyẹwhe po gbẹtọ po tọn mẹ.—Luku 20:25; 1 Pita 2:13, 14.
Nọ Gbògbéna Alọwlemẹ Towe
15, 16. Nawẹ gbégbò didohia yin nujọnu to alọwle mẹ gbọn?
15 To whenuena nuhahun fọ́n to alọwle ahọlu Pẹlsia tọn de mẹ, ayinamẹtọ-gán de he nọ yin Mẹmukani na ayinamẹ de he sọgan hẹn kọdetọn dagbe wá—‘dọ asi lẹpo ni nọ gbògbéna asu yetọn lẹ.’ (Ẹsteli 1:20) To alọwle Klistiani tọn lẹ mẹ, gbedide enẹ ma dona wá sọn ahọlu de dè dandan gba; asi lẹ dona nọ gbògbéna asu yetọn lẹ. Mọdopolọ, asu Klistiani lẹ dona nọ wleyẹyi kavi gbògbéna alọwlemẹ yetọn lẹ bo nọ pà yé. (Howhinwhẹn lẹ 31:11, 30; 1 Pita 3:7) Owhe susu ma dona juwayi to alọwle godo whẹpo mẹde nado gbògbéna alọwlemẹ etọn gba. E dona yin didohia sọn bẹjẹeji, mọwẹ, sọn gbeegbe mẹlọ wlealọ.
16 E ma yin sunnu po yọnnu po—yèdọ asu po asi po lọ—kẹdẹ wẹ dona do gbégbò hia to alọwle-zán lọ gbè gba. Eyin mẹho Klistiani de na dọhodo alọwle lọ ji, hodidọ enẹ lọsu dona do gbégbò hia. Ohó lọ dona yin didọna mẹhe to alọwle lẹ tlọlọ. To whenuena e yindọ hodidọ lọ lọsu dona doyẹyigona yé, hodọtọ lọ ma dona dó nukiko namẹ kavi pìntàn he ma tindo dodonu depope gba. E ma dona dọhodo ayidonugo etọn titi lẹ ji he sọgan dowinyan alọwlemẹ yọyọ lọ lẹ po todoaitọ lẹ po. Kakatimọ, e na dovivẹnu nado na tulimẹ bo jlọmẹdote, bosọ zinnudo Dowatọ alọwle tọn po ayinamẹ dagbe hugan Etọn lẹ po ji. Mọwẹ, hodidọ yẹyinọ mẹho lọ tọn do alọwle lọ ji na yidogọna hùnwhẹ alọwle he nọ gbògbéna Jehovah Jiwheyẹwhe tọn.
17. Naegbọn alọwle Klistiani tọn lẹ dona jẹ nubiọtomẹsi osẹ́n tọn lẹ kọ̀n?
17 Hiẹ sọgan mọ dọ hosọ ehe basi zẹẹmẹ nuagokun susu tọn do alọwle he jẹ nubiọtomẹsi osẹ́n tọn lẹ kọ̀n ji. Adà zẹẹmẹ he yin bibasi delẹ tọn sọgan nọma gando lẹdo mìtọn go tlọlọ. Etomọṣo, mímẹpo dona yọnẹn dọ nujọnu wẹ e yin dọ tito alọwle tọn lẹ to Kunnudetọ Jehovah tọn lẹ ṣẹnṣẹn ni do sisi hia na osẹ́n otò dopodopo tọn lẹ, yèdọ na nubiọtomẹsi Sesali tọn lẹ. (Luku 20:25) Paulu dotuhomẹna mí dọmọ: “Enẹwutu mì suahọ mẹtọn-mẹtọn yé: tòkuẹ hlan mẹhe yè dù tòkuẹ do; odèkuẹ hlan mẹhe yè dù odèkuẹ do; . . . gbégbò hlan mẹhe gbégbò yin etọn.” (Lomunu lẹ 13:7) Mọwẹ, nuhe sọgbe wẹ e yin dọ sọn alọwle-zán lọ gbè, Klistiani lẹ ni do gbégbò hia na tito he Jiwheyẹwhe zedai to ojlẹ mítọn mẹ.
18. Adà alọwle tọn he ma yin dandan tẹwẹ jẹna ayidonugo mítọn, podọ fie wẹ mí sọgan mọ nudọnamẹ do whẹho ehe ji te?
18 Hùnwhẹ alọwle Klistiani tọn susu nọ bẹ pipli pọmẹ tọn de—yèdọ núdùdù to pọmẹ kavi jonọyiyi alọwle tọn hẹn. Flin dọ Jesu de nado tin to jonọyiyi mọnkọtọn de tẹnmẹ. Eyin pipli pọmẹ tọn mọnkọtọn de wá aimẹ, nawẹ ayinamẹ Biblu tọn lẹ sọgan gọalọna mí nado hẹn ẹn diun dọ enẹ lọsu na gbògbéna Jiwheyẹwhe bo tindo nuyiwadomẹji dagbe do alọwlemẹ yọyọ lọ lẹ po agun Klistiani tọn po ji gbọn? Hosọ he bọdego na dọhodo whẹho enẹ ji.e
[Nudọnamẹ Odò Tọn]
a Hogbe dopolọ sọgan yin yiyizan na hùnwhẹ he ma tindo kanṣiṣa hẹ alọwle.—Ẹsteli 9:22, Septante.
b Todohukanji hodidọ alọwle tọn nukunwhiwhe 30 tọn de he hosọ etọn yin “Alọwle He Tindo Yẹyi to Nukun Jiwheyẹwhe Tọn Mẹ” nọ yin yiyizan gbọn Kunnudetọ Jehovah tọn lẹ dali. Ehe yin zize sinai do ayinamẹ Owe-wiwe tọn he tin to owe lọ Aṣli Ayajẹ Whẹndo Tọn po owe Kunnudetọ Jehovah tọn lẹ tọn devo lẹ po mẹ ji. Hodidọ lọ nọ gọalọna mẹhe to alọwle lẹ gọna mẹhe wá alọwle lọ tẹnmẹ lẹpo.
c Adavo osẹ́n otò tọn biọ nudevo, opà he nọ gbògbéna Jiwheyẹwhe ehelẹ wẹ nọ yin yiyizan. Na asisunọ lọ: “Yẹn [yinkọ asisunọ lọ tọn] kẹalọyi hiẹ [yinkọ asiyọyọ lọ tọn] taidi asi ṣie he yẹn wlealọhẹ, nado nọ yiwanna we podọ nado nọ wlebòna we to kọndopọ mẹ hẹ osẹ́n Jiwheyẹwhe tọn dile e yin kinkàndai to Owe Wiwe mẹ na asu Klistiani lẹ do, dile e na dẹnsọ bọ mí omẹ awe lẹ na tin to ogbẹ̀ to pọmẹ to aigba ji sọgbe hẹ tito alọwle tọn he Jiwheyẹwhe zedai.” Na asiyọyọ lọ: “Yẹn [yinkọ asiyọyọ lọ tọn] kẹalọyi hiẹ [yinkọ asisunọ lọ tọn] taidi asu ṣie he yẹn wlealọhẹ, nado nọ yiwanna we podọ nado nọ wlebòna we bosọ nọ do sisi sisosiso hia we, to kọndopọ mẹ hẹ osẹ́n Jiwheyẹwhe tọn dile e yin kinkàndai to Owe Wiwe mẹ na asi Klistiani lẹ do, dile e na dẹnsọ bọ mí omẹ awe lẹ na tin to ogbẹ̀ to pọmẹ to aigba ji sọgbe hẹ tito alọwle tọn he Jiwheyẹwhe zedai.”
d Atọ̀họ̀-Nuhihọ́ Lọ Tọn [Flansegbe] 15 septembre 1963, weda 575 dọhodo haṣinṣan pọninọ ojlẹ dindẹn tọn mọnkọtọn ji.
e Pọ́n hosọ lọ “Hẹn Ayajẹ po Yẹyi Alọwle-Zán Towe Tọn po Sudeji,” he tin to weda 28.
Be Hiẹ Flin Ya?
• Naegbọn mí dona tindo ojlo to adà osẹ́n tọn po gbigbọmẹ tọn po he gando alọwle go lẹ mẹ?
• Eyin Klistiani awe basi alọwle ahọluwhé tọn, etẹwẹ yé sọgan basi dide nado wà to enẹgodo tlolo?
• Naegbọn hodidọ alọwle tọn lẹ nọ yin nina to Plitẹnhọ Ahọluduta tọn mẹ?
[Yẹdide to weda 18]
To alọwle he nọ yin bibasi to Islaeli hohowhenu tọn mẹ, asisunọ lọ nọ plan asiyọyọ lọ wá owhé etọn kavi otọ́ etọn tọn gbè
[Yẹdide to weda 21]
To alọwle aṣa tọn bibasi godo, Klistiani lẹ sọgan jlo dọ ohó ni yin didọ do alọwle lọ ji to Plitẹnhọ Ahọluduta tọn mẹ