Sọgodo Jiawu De
To madẹnmẹ Satani po aovi etọn lẹ po na yin miyọnṣina
Satani po aovi etọn lẹ po ma na klọ gbẹtọvi lẹ na whenu dindẹn dogọ gba. Jehovah ko yàn yé dlan odò sọn olọn mẹ. (Osọhia 12:9) To madẹnmẹ, Jiwheyẹwhe na yinuwà sọta Satani po aovi etọn lẹ po whladopo dogọ. To numimọ de mẹ sọn Jiwheyẹwhe de, apọsteli Johanu dọmọ: “Yẹn sọ mọ angẹli de jẹte sọn olọn mẹ ja odò, é tindo họ̀nhùngàn odò mapote lọ tọn, kọ̀gàn daho de sọ tin to alọ etọn mẹ. E sọ dè alọ bo hẹn dlagọni lọ, odàn hóhó lọ, he yín Lẹgba, Satani, bo dogàn ẹn họ̀ owhè fọtọ́n, bo sọ dọ̀n ẹn dlan odò mapote lọ mẹ, bo súnúdo e, bo yí hiadonu do tlẹ́ ẹ, na é klọ akọta lẹ ba blo, kaka owhè fọtọ́n na do pé.” (Osọhia 20:1-3) Enẹgodo, Lẹgba po aovi etọn lẹ po na yin vivasudo kakadoi.—Osọhia 20:10.
Omẹ ylankan he tin to aigba ji lẹ na yin hùhùsudo ga.—Psalm 37:9, 10; Luku 13:5.
Oṣiọ Lẹ Nasọ Gọwá Nọgbẹ̀ Whladopo Dogọ!
Oṣiọ lẹ na gọwá nọgbẹ̀ whladopo dogọ to aigba ji
To whenuena Satani po aovi lẹ po na ko tọn sọn aimẹ godo, Jehovah na hẹn dona susu lẹ wá na gbẹtọvi lẹ. Hiẹ na flin dọ oṣiọ ma tindo ogbẹ̀ gba, tin to ninọmẹ matin tọn mẹ. Jesu yi okú jlẹdo amlọn go—yedọ amlọn yikanmẹnamẹ de matin odlọ lẹ. (Johanu 11:11-14) Ewọ yi enẹ basi na é yọnẹn dọ ojlẹ lọ na wá to whenuena mẹhe to amlọndọ to okú mẹ lẹ na yin finfọ́n do ogbẹ̀. E dọmọ: “Ojlẹ lọ ja, to ehe mẹ omẹ he tin to yọ̀do mẹ lẹpo . . . na tọ́njẹgbonu.”—Johanu 5:28, 29; yijlẹdo Owalọ lẹ 24:15 go.
Yé na yin hinhẹn gọwá ogbẹ̀ tofi to aigba ji. Kakati nado basi nulila dọ gbẹtọ lẹ kú, linlin ayajẹ tọn lẹ na dọho dogbọn mẹhe ko yin hinhẹngọwá ogbẹ̀ whladopo dogọ lẹ dali! Ayajẹ nankọtọn wẹ e na yin nado do kuavọna mẹyiwanna lẹ sọn yọdo mẹ!