Adà 4

Jiwheyẹwhe Nọ Na Mí Nudọnamẹ Dogbọn Lẹndai Etọn lẹ Dali

1, 2. Nawẹ mí yọnẹn gbọn dọ Jiwheyẹwhe nọ wleawu gblọndo lẹ tọn na enẹnọ he kanse po homẹdopo po lẹ gbọn?

JIWHEYẸWHE owanyinọ de na taun tọn nọ do lẹndai etọn lẹ hia enẹnọ he nọ dín ìn po ahúndopo po lẹ. Ewọ nọ wleawuna gbẹtọvi dodinnanutọ lẹ po gblọndo lẹ po do kanbiọ lẹ ji taidi nuhewutu ewọ do jotẹnna yajiji.

² Biblu dọmọ: “Eyin hiẹ dín [Jiwheyẹwhe], yè na mọn ẹn sọn de we.” “Jiwheyẹwhe de tin to olọn mẹ he nọ dè aṣli lẹ hia.” “Oklunọ [“Jehovah,” NW] Jiwheyẹwhe ma na wà nude, adavo ewọ dè aṣli etọn hia hlan devi etọn yẹwhegán lẹ.”—1 Otannugbo lẹ 28:9; Daniẹli 2:28; Amọsi 3:7.

Fie Wẹ Gblọndo lọ lẹ Tin Te?

3. Fie wẹ mí sọgan mọ nuhewutu Jiwheyẹwhe do jotẹnna yajiji te?

³ Gblọndo kanbiọ lọ lẹ tọn taidi nuhewutu Jiwheyẹwhe do jotẹnna yajiji po nuhe e na wà dogbọn dali etọn po yin mimọ to kandai he ewọ gbọdo na alèmọyi mítọn mẹ. Kandai enẹ wẹ yin Ohó etọn, yèdọ Biblu Wiwe lọ. “Owe wiwe lẹpo gbingbọ́n sọn Jiwheyẹwhe mẹ yin alènọ ga na mẹpinplọn, na wọhẹmẹ, na anadèmẹ, na nuplọnmẹ he tin to dódó mẹ: na Jiwheyẹwhe gbẹtọ nido pegan, he yè hẹn sọgbe mlẹnmlẹn hlan azọ́n dagbe lẹpo.”—2 Timoti 3:16, 17.

4, 5. Etẹwẹ hẹn Biblu nado yin owe matin awetọ de?

⁴ Biblu na nugbo tọn yin owe he ma tindo awetọ de. E bẹ́ kandai whenuho gbẹtọvi tọn he sọgbe hugan hẹn bo tlẹ sọ yigodo zẹ dida gbẹtọvi lẹ tọn go. E sọ pé mlẹnmlẹn, na dọdai etọn lẹ tindo onu nado wà po nujijọ ojlẹ mítọn mẹ tọn lẹ po gọna sọgodo he tin to yakẹ po ga.

⁵ Owe devo depope ma tindo kunnudenu mọnkọtọn lẹ na gbesisọ-yinyin to whenuho mẹ gba. Di dohia, vude poun to alọnuwe dowhenu kantọ tọn lẹ mẹ wẹ tin. Ṣigba alọnuwe susu Biblu tọn kleun po dehe tin to gigọ́ mẹ po wẹ tin: nudi 6 000 Owe wiwe Heblu tọn lẹ (owe 39 “Alẹnu Hoho” tọn lẹ) po nudi 13 000 Owe wiwe Klistiani Greek tọn lẹ (owe 27 “Alẹnu Yọyọ”) tọn lẹ po.

6. Naegbọn mí do sọgan tindo jide dọ Biblu egbehe tọn yin onu dopolọ mlẹnmlẹn taidi whenuena Jiwheyẹwhe gbọdo e?

⁶ Jiwheyẹwhe Ganhunupotọ lọ, mẹhe gbọdo Biblu, ko mọ dọ kandai tenọgli etọn tọn lẹ yin sisẹdo to vọkan alọnuwe enẹ lẹ mẹ. Enẹwutu Biblu mítọn egbehe tọn lẹ yin onu dopolọ taun taidi kandai gbọdo dowhenu tọn lẹ. Ninọmẹ devo he gọalọna mí nado yọn pinpẹn ehe tọn wẹ yindọ vọkan Owe wiwe Klistiani Glẹki tọn delẹ yigodo jẹ gblagbla ojlẹ owhe kandai dowhenu tọn lẹ mẹ. Vude to vọkan alọnuwe hóhó kantọ aihọnmẹ tọn lẹ he gbẹsọ tin to aimẹ mẹ ma tlẹ nọ saba dlẹnalọdo gblagbla ojlẹ owhe kanweko susu dowatọ dowhenu lẹ tọn mẹ gba.

Nunina Jiwheyẹwhe Tọn

7. Nawẹ mimá Biblu tọn gbayipe do sọ?

⁷ Biblu yin owe he mimá etọn gbayipe hugan to whenuho mẹ. Vọkan liva atọ̀n wẹ ko yin zinzin. Owe devo de ma sẹpọ sọha enẹ gba. Podọ Biblu, kavi apadewhe etọn ko yin lilẹdiọdo ogbè 2 000 delẹ mẹ. Nalete, e yin sọha yína dọ gbẹtọ sọha 98 to kanweko ji planẹti mítọn tọn sọgan tindo Biblu.

8-10. Etẹwẹ yin whẹwhinwhẹ́n delẹ hetọn wutu Biblu do jẹ na dogbapọn mítọn?

⁸ Na jide tọn owe de he sọalọakọn nado wá sọn Jiwheyẹwhe dè bo tindo kunnudenu nugbo-yinyin gbonu tọn po dehe mayọnmọ po jẹ na dogbapọn mítọn.a E basi zẹẹmẹ lẹndai ogbẹ̀ tọn, zẹẹmẹ ninọmẹ aihọn tọn lẹ, po nuhe sọgodo tindo to sẹdotẹnmẹ po. Owe depope ma sọgan wà ehe.

⁹ Mọwẹ, Biblu yin hodọdopọ Jiwheyẹwhe tọn hlan whẹndo gbẹtọvi tọn. E deanana kinkan etọn gbọn huhlọn-yido-wazọ́n, kavi gbigbọ etọn dali, po gbẹtọ 40 delẹ po he basi kandai lọ. Nalete Jiwheyẹwhe nọ dọho hlan mí gbọn Ohó etọn, yèdọ Biblu Wiwe lọ dali. Apọsteli Paulu wlan dọmọ: “ Whenuena mì yí ohó Jiwheyẹwhe tọn, ehe mì sè sọn mí dè, mì ma yí i di ohó gbẹtọ tọn gba, ṣigba le é te to nugbo mẹ, ohó Jiwheyẹwhe tọn.”—1 Tẹsalonikanu lẹ 2:13.

¹⁰ Abraham Lincoln, otògán 16tọ Etats-Unis tọn, ylọ Biblu dọ “nunina dagbe hugan lọ he Jiwheyẹwhe ko na gbẹtọvi lẹ pọn . . . Ṣigba eyin e ma yin etọn mí ma sọgan yọn vogbingbọn to nuhe jlọ po nuhe ylan po mẹ gba.” Enẹwutu, etẹwẹ nunina klo hugan ehe dọna mí dogbọn lehe yajiji bẹjẹeji gbọn, nuhewutu Jiwheyẹwhe do jotẹndona ẹn, podọ etẹwẹ e na wà dogbọn dali etọn?

[Nudọnamẹ odò tọn]

[Yẹdide to weda 10]

Biblu he yin gbigbọdo gbọn Jiwheyẹwhe dali, wẹ hodọdopọ etọn hlan whẹndo gbẹtọvi lẹ tọn