Todohukanji Hodidọ Tọn Yiyizan

LINLẸN lọ nado dọho sọn todohukanji de mẹ nọ dobuna mẹsusu. Ayiha yetọn nọ jai hugan eyin nuhe yé jlo na dọ lẹpo yin kinkàndai kavi yin pinplọn do tamẹ.

Ṣogan, nado dọhojọho, mímẹpo wẹ nọ dọho to jọwamọ-liho to azán lẹpo gbè. Mí nọ wàmọ to hodọdopọ hẹ hagbẹ whẹndo tọn lẹ po họntọn lẹ po whenu. Mí nọ wàmọ to mahẹ tintindo to lizọnyizọn kunnudegbe tọn mẹ whenu. Podọ mí nọ wàmọ to whenuena mí to dẹ̀ho sọn ahun mẹ wá, vlavo na míde kavi na mẹdevo lẹ.

To whenuena hiẹ to hodidọ de na, be vogbingbọn nọ tin to alọnuwe yiyizan kavi todohukanji hodidọ tọn de yiyizan mẹ ya? Dile etlẹ yindọ alọnuwe hodidọ tọn he ko yin awuwlena de hihia sọgan hẹn ẹn yọnbasi nado dọho po gbesisọ po bo yí hogbe dagbe lẹ zan, e ma nọ biọ ahun mẹ namẹ sọmọ gba. To whenuena hiẹ hiawe yì nukọn vude, to paa mẹ hiẹ na nọ yawu bo nọ diọ ogbè to aliho de mẹ he gbọnvona lehe hiẹ nọ dọho to jọwamọ-liho do. Eyin ayidonugo towe tin to kandai-wema towe ji hugan mẹplidopọ towe lẹ, mẹsusu sọgan nọma dotoai ganji sọ lehe yé na wà do eyin yé doayi e go dọ a ze yé do lẹnpọn mẹ bo diọadana nudọnamẹ towe sọgbe hẹ ninọmẹ yetọn lẹ. Hodidọ to jọwamọ-liho wẹ yọnhugan nado whàn mẹplidopọ lẹ.

Wehọmẹ Lizọnyizọn Yẹwhehọluduta tọn yin awuwlena nado gọalọna mí to adà gbẹninọ tọn lẹpo mẹ. To whenuena mí mọ họntọn mítọn lẹ, mí ma nọ de wema tọ́n bo nọ jẹ linlẹn mítọn lẹ hia na yé ji na mí jlo na zan hogbe he sọgbe lẹ wutu gba. To sinsẹ̀nzọn kunnudegbe tọn mẹ, mí ma nọ hẹn alọnuwe gaa de nado hia na gbẹtọ lẹ, na mí to budi dọ mí sọgan wọn delẹ to nuagokun he mí jlo na má hẹ yé lẹ mẹ gba. Plọn nado nọ dọho to jọwamọ-liho dile e sọgan yọnbasi do to whenuena a to wadohia lehe mí sọgan dekunnu to ninọmẹ mọnkọtọn lẹ mẹ tọn basi to wehọ lọ mẹ. Po awuwle dagbe po, a na mọ dọ eyin todohukanji hodidọ tọn yin awuwlena do ayiha mẹ kavi yin kinkàn, enẹ ko pé nado flin we nuagokun tangan he ji a jlo na dọhodo lẹ. Ṣigba nawẹ hiẹ sọgan wleawuna jidide he e biọ nado yí ì zan gbọn?

Tò Linlẹn Towe lẹ Hanuhanu. Nado sọgan yí todohukanji zan to hodidọ whenu, hiẹ dona tò linlẹn towe lẹ hanuhanu. Ehe ma zẹẹmẹdo dọ hiẹ dona ṣinyan hogbe he a jlo na yizan lẹ gba. Kakatimọ, e zẹẹmẹdo dọ hiẹ ni lẹnnupọn whẹpo do dọho.

To gbẹninọ egbesọ tọn mẹ, sọmawhenọ de sọgan mọ ede nado to nuhe na vẹ́ na ẹn to nukọn mẹ de dọ. Mẹdevo sọgan nọ wláhódọ, bo na to dindanpe sọn linlẹn de ji jẹ devo ji. Nuhahun awe ehelẹ sọgan yin dududeji eyin mí nọ yì agbọji bo nọ wleawuna todohukanji he bọawu de to ayiha mẹ whẹpo do jẹ hodọ ji. Tintan whẹ́, hẹn yanwle towe do ayiha mẹ, enẹgodo wleawuna afọdide he a dona ze nado sọgan jẹ e kọ̀n. To ehelẹ bibasi godo, jẹ hodọ ji.

Be a to awuwlena sinsẹ̀nzọn kunnudegbe tọn wẹ ya? Ma yí whenu towe lẹpo zan nado tò owe lẹ do saki mẹ kẹdẹ blo, ṣigba yí ì zan nado tò linlẹn towe lẹ ga. Eyin hiẹ jlo na yí dopo to nuzedonukọnnamẹ heyin ayinamẹ etọn na to Lizọnyizọn Ahọluduta Tọn Mítọn mẹ lẹ zan, hia ẹ whlasusu nado mọnukunnujẹ nuagokun tangan he tin to e mẹ lẹ mẹ ganji. Tẹnpọn nado dọ bladopọ etọn to hogbe kleun lẹ mẹ. Diọadana nuhe yin didọ lẹ sọgbe hẹ gbẹtọ-yinyin towe po ninọmẹ aigba-denamẹ agun mìtọn tọn po. Awuwiwlena todohukanji de to ayiha mẹ na gọalọna we. Etẹwẹ enẹ sọgan bẹhẹn? (1) Taidi homẹbibiọ de, a sọgan dọ nuhe to ahunmẹduna gbẹtọ susu lẹ to lẹdo mìtọn mẹ. Na tuli whétọ lọ nado dọ linlẹn etọn. (2) Tindo onú tangan he a sọgan dọ do hosọ lọ ji to ayiha mẹ, gọna wefọ dopo kavi awe he do nuhe Jiwheyẹwhe ko dopagbe nado wà nado hẹn kọgbọ wá hia. Eyin dotẹnmẹ lọ yin nina we, zinnudeji dọ Jehovah na wà ehe gbọn Ahọluduta etọn gblamẹ, yèdọ gandudu olọn mẹ tọn etọn. (3) Na tuli mẹlọ nado ze afọdide delẹ do nuhe ji a ko dọhodo lẹ. A sọgan ze owe kavi plọnmẹ Biblu de donukọnna ẹn bo basi tito nujikudo tọn lẹ nado zindonukọn to hodọdopọ lọ mẹ.

Todohukanji heyin awuwlena to ayiha mẹ kẹdẹ wẹ a sọgan yizan na nuzedonukọnnamẹ mọnkọtọn. Eyin a jlo na pọ́n todohukanji kinkàn de mẹ whẹpo do bẹ hodidọ jẹeji to kunnudegbe, hogbe vude he a na yizan na homẹbibiọ, wefọ dopo kavi awe de, po kandai kleun nuhe hiẹ jlo na yidogọ to tadonahó towe mẹ po wẹ na tin to todohukanji lọ mẹ. Eyin mí wleawuna todohukanji mọnkọtọn bo yí i zan, e na glọnalina mí sọn hòglelilẹ mẹ, bo na gọalọna mí nado dó owẹ̀n lọ to aliho he họnwun bo na yin finflin po awubibọ po mẹ.

Eyin kanbiọ kavi agọjẹdomẹ delẹ nọ saba fọndote to aigba-denamẹ mìtọn ji, a sọgan mọ ẹn yin alọgọnamẹnu nado basi dodinnanu do whẹho lọ ji. To paa mẹ, nuhe hiẹ tindo nuhudo etọn lẹpo wẹ nuagokun tangan awe kavi atọ̀n po wefọ he ji yé sinai do lẹ po. Hogo Biblu Tọn lẹ na Nujidọhodo Tọn kavi hóvila wekun titlinọ he tin to Comment raisonner à partir des Écritures mẹ lẹ sọgan wleawuna todohukanji he a tindo nuhudo etọn lọ. A sọgan mọ hoyidọ dagbe de sọn asisa devo mẹ he hiẹ na jlo nado yidogọ. Wleawuna todohukanji kinkàn kleun de to pọmẹ po vọkan hoyidọ lọ tọn po, bo bẹ yé do saki kunnudegbe tọn towe mẹ. Eyin whétọ de fọ́n kanbiọ kavi agọjẹdomẹ lọ dote, dike e ni yọnẹn dọ homẹ towe na hùn nado basi zẹẹmẹ nuyise towe tọn na ẹn. (1 Pita 3:15) Yí todohukanji lọ zan taidi asisa gblọndo towe tọn.

Onú dagbe wẹ e yin ga nado tò linlẹn towe lẹ hanuhanu to whenuena hiẹ jlo na nọ nukọnna whẹndo towe, pipli oplọn agunwe tọn de, kavi agun to odẹ̀ mẹ. Sọgbe hẹ Luku 11:2-4, Jesu basi todohukanji he bọawu de na devi etọn lẹ gando odẹ̀ he gọ́ na zẹẹmẹ de go. To nujijọ klandowiwe tẹmpli Jelusalẹm tọn whenu, Sọlọmọni hodẹ̀ he gbloada taun. E họnwun dọ e na ko lẹnnupọndo whẹho lọ ji jẹnukọn. Tintan whẹ́, e ze ayidonugo do Jehovah po opagbe he E dó na Davidi po ji; enẹgodo do tẹmpli lọ ji; podọ to enẹgodo, do ninọmẹ voovo po pipli gbẹtọ lẹ tọn po ji to aliho debọdo-dego tọn mẹ. (1 Ahọ. 8:22-53) Mí sọgan mọaleyi sọn apajlẹ ehelẹ mẹ.

Hẹn Todohukanji Hodidọ Tọn Towe Bọawu. Etẹwẹ yin lẹndai todohukanji towe tọn? Be nado na hodidọ de wẹ ya? Eyin mọwẹ, etẹlẹ wẹ e dona bẹhẹn?

Flin dọ lẹndai todohukanji de tọn wẹ nado gọalọna we nado flin linlẹn lẹ. A sọgan mọ dọ e na yin alemọyinu nado kàn hogbe vude lẹ dai na homẹbibiọ. Ṣigba to enẹgodo, ze ayidonugo towe do linlẹn lẹ ji, e mayin do hogbe lẹ ji gba. Eyin a kàn linlẹn lọ lẹ dai, ma dike ni dite gbau blo. Hóvila he a basi tito nado gbà do flinflin lẹ dona sọawuhia hezeheze to todohukanji towe mẹ. Nado jẹ ehe kọ̀n, a sọgan wlan yé po wekun daho-daho po, zẹhù do oglọ na yé, kavi dohiagona yé. To hóvila dopodopo glọ, slẹ linlẹn he a jlo na yizan to whenuena a to hodọdeji. Kàn wefọ he a jlo na hia lẹ dai. E nọ saba yọnhugan nado hia ẹ sọn Biblu mẹ tlọlọ. Kàn apajlẹ he a jlo na yizan lẹ dai. A sọgan sọ tindo hoyidọ tangan he sọgbe delẹ sọn owe aihọn tọn lẹ mẹ. Dike kandai towe ni bẹ nugbo tangan he a jlo na zedonukọnnamẹ lẹpo hẹn. Todohukanji lọ na bọawu nado yizan eyin e to kannu-kannu.

Mẹdelẹ nọ yí todohukanji kleun lẹ zan. E sọgan bẹ hogbe tangan vude poun, nudọnamẹ wefọ he mẹ hodọtọ lọ na yihodọ sọn lẹ, po yẹdide kavi fọto he na gọalọna ẹn nado flin linlẹn lọ lẹ po hẹn. Po kandai he bọawu ehelẹ po, hodọtọ de nọ penugo nado ze hodidọ etọn donukọnnamẹ linsinlinsin taidi hodọdopọ de. Yanwle nupinplọn ehe tọn niyẹn.

To weda 39 jẹ 42 owe ehe tọn mẹ, a na mọ zẹẹmẹ heyin bibasi do “Awuwiwlena Todohukanji” ji. Alọgọnamẹnu daho wẹ e na yin nado hia nudọnamẹ enẹ eyin a to azọ́nwa do oplọn ehe, “Todohukanji Hodidọ Tọn Yiyizan” ji.

Lehe Todohukanji Nọ Yin Yiyizan Gbọn. Nalete, yanwle towe todin mayin nado wleawuna todohukanji hodidọ tọn poun gba. Ṣigba nado yí ì zan ganji.

Afọdide tintan nado yí todohukanji towe zan wẹ awuwiwlena hodidọ. Pọ́n hosọ lọ, hia hóvila dopodopo, bo yọ́n kanṣiṣa he hóvila dopodopo tindo hẹ hosọ lọ. Doayi sọha ojlẹ he a sọgan yizan nado gbà hóvila dopodopo do flinflin go. Todin, lẹkọyi godo bo plọn hóvila tintan lọ. Gbadopọnna hoyijlẹdohogo lẹ, wefọ lẹ, oló lẹ, po apajlẹ he a basi tito nado yizan nado dọhodo hóvila enẹ ji lẹ po. Vọ́ adà enẹ plọn whlasusu kakajẹ whenue a mọnukunnujẹemẹ hezeheze. Wà nudopolọ na dopodopo hóvila he pò lẹ tọn. Lẹnnupọndo nuhe a sọgan desẹ sọn e mẹ ji, eyin e biọ domọ, nado sọgan dotana hodidọ lọ domẹwhenu. Enẹgodo, gbadopọnna hodidọ lọ blebu. Ze ayidonugo do linlẹn lẹ ji, e mayin do hogbe lẹ ji gba. Ma plọn hodidọ lọ do tamẹ blo.

To hodidọ lọ nina whenu, a dona penugo nado nọ pọ́n nukunji na mẹplidopọ lẹ dile e jẹ do. To wefọ de hihia godo, hiẹ dona penugo nado yihojlẹdohogo do e ji gbọn Biblu kẹdẹ yiyizan dali, matin kandai towe mẹ pinpọ́n. Mọdopolọ, eyin hiẹ yí apajlẹ de zan, dọ ẹ dile hiẹ na basi zẹẹmẹ etọn na họntọn de do kakati nado hia ẹ sọn kandai towe mẹ. Dile hiẹ to hodọ, ma nọ to kandai towe mẹ pọ́n to ojlẹ lẹpo mẹ blo. Dọho sọn ahun mẹ wá, podọ ohó towe na biọ ahun todoaitọ towe lẹ tọn mẹ.

To whenuena hiẹ pegan nado dọho sọn todohukanji de mẹ, hiẹ na ko ze afọdide titengbe de nado lẹzun hodọtọ gbangba tọn kọdetọn dagbenọ de.