Wehihia He Sọgbe

OWE-WIWE dọ dọ ojlo Jiwheyẹwhe tọn wẹ e yin dọ wunmẹ gbẹtọ lẹpo tọn “ni wá oyọnẹn [he pegan] nugbo tọn kọ̀n.” (1 Tim. 2:4) To kọndopọmẹ hẹ enẹ, to whenuena mí hia Biblu daga, ojlo mítọn nado do oyọnẹn he pegan hia dona yinuwado lehe mí nọ hiawe do ji.

Nugopipe lọ nado hia Biblu po owe he basi zẹẹmẹ Biblu tọn lẹ po daga yin nujọnu na jọja po mẹhomẹ lẹ po. Taidi Kunnudetọ Jehovah tọn lẹ, mí tindo azọngban nado má oyọnẹn Jehovah tọn po aliho etọn lẹ po hẹ mẹdevo lẹ. Enẹ nọ saba bẹ wehihia na mẹde kavi na pipli pẹvi de hẹn. Mí sọ nọ hiawe mọnkọtọn to whẹndo mẹ. To Wehọmẹ Lizọnyizọn Yẹwhehọluduta tọn mẹ, dotẹnmẹ hundote dagbe lẹ tin na mẹmẹsunnu lẹ po mẹmẹyọnnu lẹ po, jọja po mẹhomẹ po, nado mọ ayinamẹ yí nado sọgan hẹn wehihia daga yetọn pọnte.

Biblu hihia to gbangba, vlavo na mẹde kavi na agun, yin nude he dona yin pinpọn po nukun nujọnu tọn po. Biblu yin gbigbọdo sọn Jiwheyẹwhe dè. Humọ, “ohó Jiwheyẹwhe tọn tin to ogbẹ̀, e do huhlọn, . . . ewọ sọ wẹ linlẹn ayiha tọn po ojlo ayiha tọn po yọnẹntọ.” (Heb. 4:12) Ohó Jiwheyẹwhe tọn bẹ oyọnẹn họakuẹ he ma sọgan yin mimọ to asisa devo depope mẹ hẹn. E sọgan gọalọna mẹde nado yọ́n Jiwheyẹwhe nugbo dopo akàn lọ bo wleawuna haṣinṣan dagbe de hẹ ẹ bosọ pehẹ nuhahun gbẹ̀mẹ tọn lẹ po kọdetọn dagbe po. E basi zẹẹmẹ aliho he nọ planmẹ sọyi ogbẹ̀ mavọmavọ mẹ to aihọn yọyọ Jiwheyẹwhe tọn mẹ tọn. Enẹwutu, yanwle mítọn dona yin nado nọ hia Biblu jẹ obá he mẹ mí penugo jẹ.—Ps. 119:140; Jẹl. 26:2.

Lehe Yè Nọ Hiawe po Gbesisọ po Do. Wehihia kọdetọn dagbenọ bẹ adà susu hẹn, ṣigba awuwiwlena wehihia po gbesisọ po wẹ afọdide tintan. Enẹ zẹẹmẹdo vivẹnudido nado hia nuhe tin to zinjẹgbonu lọ mẹ pẹpẹ. Payi ma nado lọ́n dasá hogbe lẹ, bo jo wekun tangan lẹ do, kavi ṣì hogbe lẹ hia na yé taidi wekun devo lẹ wutu blo.

Nado sọgan hiawe po gbesisọ po, hiẹ dona mọnukunnujẹ lẹdo hodidọ lọ tọn mẹ. Enẹ na biọ awuwiwle po sọwhiwhe po. To madẹnmẹ, dile hiẹ wleawuna nugopipe lọ nado pọ́n nukọn hlan bo lẹnnupọndo lehe linlẹn lọ to tintọ́n debọdo-dego do ji, gbesisọ towe to wehihia mẹ na yin hinhẹn pọnte.

Ohia weyọ́nhia tọn po ohia he nọ nọ̀ wekun ji lẹ po yin nugonu titengbe lẹ na ogbè he nọ yin kinkàn de. Ohia weyọ́nhia tọn sọgan do fie yè na mìtán te hia, lehe yè na mìtán dẹnsọ, podọ vlavo nuhudo lọ na ogbè didiọ. To ogbè delẹ mẹ, awugbopo nado diọ ogbè to whenuena ohia weyọ́nhia tọn biọ domọ sọgan diọ kanbiọ zun hodidọ, kavi e sọgan diọ zẹẹmẹ lọ pete. Nugbo wẹ dọ to whedelẹnu, lẹndai ohia weyọ́nhia tọn nọ sinai taun do yizan hogbe lẹ tọn ji. To ogbè susu mẹ e ma yọnbasi nado hiawe po gbesisọ po matin ayidonugo sọwhiwhe tọn nina hlan ohia he nọ nọ̀ wekun ji lẹ—yèdọ dehe nọ yin kinkàn lẹ po dehe nọ yin nukunnumọjẹemẹ sọn lẹdo hodidọ lọ tọn mẹ lẹ po. Ehelẹ nọ yinuwado yiylọ wekun he ji yé tin te lẹ tọn ji. Hẹn ẹn diun dọ hiẹ jẹakọ hẹ lehe ohia weyọ́nhia tọn po ohia he nọ nọ̀ wekun ji lẹ po nọ yin yiyizan do to ogbè towe mẹ. Họ̀nhungàn de wẹ ehe yin nado hiawe to aliho he tindo zẹẹmẹ de mẹ. Flin dọ yanwle towe dona yin nado de linlẹn lẹ tọ́n, e mayin nado ylọ hogbe lẹ poun gba.

E biọ nupinplọn eyin hiẹ na wleawuna nugopipe lọ nado hiawe ganji. Hia hukan dopo poun, podọ to enẹgodo vọ́ hia ẹ pludopludo kakajẹ whenuena hiẹ penugo nado hia ẹ matin afọgbigbà depope. Enẹgodo yì hukan he bọdego ji. To godo mẹ, dovivẹnu nado hia weda susu owe lọ tọn matin linlọ́n dasá hogbe lẹ, afọgbigbà, kavi ṣìṣì hogbe depope hia. To afọdide enẹlẹ zize godo, dọna mẹde nado hodo wehihia towe bo dlẹnalọdo nuṣiwa lẹpo he hiẹ sọgan ko basi.

To awà aihọn lọ tọn delẹ ji, nukun he ma mọnú ganji po hinhọ́n he ma pemẹnu po nọ yidogọna nuhahun wehihia tọn. Eyin nude sọgan yin wiwà nado hẹn ninọmẹ ehelẹ pọnte, matin ayihaawe nukọnyiyi na tin to wehihia mẹ.

To madẹnmẹ, mẹmẹsunnu he nọ hiawe ganji lẹ sọgan yin oylọ-basina nado tindo mahẹ to owe oplọn tọn lẹ hihia mẹ to gbangba to Oplọn Agunwe kavi Oplọn Atọ̀họ̀-Nuhihọ́ Lọ Tọn tẹnmẹ. Ṣigba nado penukundo lẹblanulọkẹyi mọnkọtọn go ganji, e biọ nususu hugan nugopipe nado ylọ hogbe lẹ ganji poun. Nado lẹzun wehiatọ gbangba tọn kọdetọn dagbenọ de to agun mẹ, hiẹ dona wleawuna aṣa nuyiwa dagbe lẹ tọn to wehihia mẹdetiti tọn mẹ. Ehe nọ biọ dọ yè ni mọnukunnujẹemẹ dọ hogbe dopodopo to hodidọ blebu de mẹ nọ yí adà tangan de wà. Hiẹ ma sọgan gbẹkọ delẹ to yé mẹ go bo mọnukunnujẹ nuhe to yinyin didọ mẹ hezeheze gba. Eyin hiẹ ṣì hogbe lẹ ylọ, etlẹ yin to whenuena hiẹ to wehia na dewe, zẹẹmẹ hodidọ lọ blebu tọn na yin kọslona. Awugbopo nado doayi ohia he nọ nọ̀ wekun ji lẹ kavi lẹdo hodidọ he mẹ hogbe lẹ yin yiyizan te go sọgan dekọtọn do weṣìṣìhia mẹ. Dovivẹnu nado mọnukunnujẹ nuhe hogbe dopodopo zẹẹmẹdo mẹ to lẹdo hodidọ tọn he mẹ e sọawuhia te. Sọ lẹnnupọn, do lehe ohia weyọ́nhia tọn nọ yinuwado zẹẹmẹ hodidọ blebu de tọn ji do. Flin dọ linlẹn lẹ nọ saba yin didohia gbọn pipli hogbe lẹ tọn dali. Doayi ehelẹ go, bọ to wehihia daga whenu hiẹ nido sọgan hia pipli hogbe lẹ tọn—yèdọ hodidọ agbòte po adà voovo hodidọ tọn lẹ po—kakati nido yin hogbe lẹ poun. Nukunnumimọjẹ nuhe hiẹ to hihia mẹ hezeheze yin afọdide titengbe de nado sọgan penugo bo do oyọnẹn he pegan hia mẹdevo lẹ gbọn wehihia gbangba tọn dali.

Klistiani mẹho numimọnọ de wẹ apọsteli Paulu wlanwe hlan dọmọ: “Nọ to dewe yizan zọnmii na wehihia gbangba tọn.” (1 Tim. 4:13, NW) E họnwun dọ adà he mẹ mímẹpo sọgan basi nukọnyiyi te wẹ ehe yin.