Ogbè Didiọ

MẸPLIDOPỌ lẹ na mọnukunnujẹ nuhe dọ a te mẹ eyin a zinnudo linlẹn lẹ ji to aliho he bọawu mẹ. Ṣigba eyin hiẹ nọ diọ ogbè, po awuyiya towe po ganji, hodidọ towe sọgan yin todoaina po awuvivi susu dogọ po. Humọ, e sọgan hẹn mẹplidopọ towe lẹ yọ́n numọtolanmẹ towe gando nuhe dọ a te go. Nuyiwa towe dohlan nujidọhodo lọ sọgan yinuwado numọtolanmẹ yetọn dohlan ẹn ji. Ehe yin nugbo vlavo hiẹ to hodọ sọn oplò ji kavi na mẹde to lizọnyizọn kunnudegbe tọn mẹ.

Ogbè gbẹtọvi tọn yin azọ́nwanu jiawu de, he penugo nado basi diọdo susu. Eyin yè yí ì zan ganji, e sọgan hẹn hodidọ de tindo zohunhun, biọ ahun mẹ, fọ́n numọtolanmẹ lẹ dote, bo whànmẹ nado yinuwa. Ṣigba, hiẹ ma sọgan jẹ ehe kọ̀n gbọn didohiagona kandai towe lẹ poun nado yọ́n fie ogbè kavi awuyiya na yin didiọ te dali gba. Ogbè didiọ nado hẹn pekọ wá na ohia mọnkọtọn lẹ ma na dọnú to jọwamọ-liho gba. Kakati nado hẹn azọ́nwiwa towe tindo zohunhun bo họnwun, e sọgan hẹn ayimajai wá na mẹplidopọ towe lẹ. Ogbè didiọ he sọgbe nọ wá sọn ahun mẹ.

Eyin e yin yiyizan po nuyọnẹn po, ogbè didiọ ma na dọ̀n ayidonugo he ma jẹ wá hodọtọ lọ ji gba. Kakatimọ, e na gọalọna mẹplidopọ lẹ nado mọnukunnujẹ zẹẹmẹ hosọ he to yinyin hodọdeji lọ tọn mẹ.

Vọ́ Ogbè lọ Jlado. Aliho dopo nado hẹn hodidọ towe lẹ tindo vogbingbọn wẹ nado basi vọjlado na ogbè towe. Ṣigba ehe ma dona yin nuyiwa aṣa tọn de poun nado to ogbè lọ dó e ji kavi de e pò whẹwhẹ to aliho he na hẹn ẹn yin apọṣimẹnu de mẹ gba. Enẹ na hẹn linlẹn nuhe hiẹ to didọ tọn dozín. Eyin hiẹ nọ yawu zegbeyiaga gbọzangbọzan, nuyiwadomẹji lọ ma na yin awuvivinu gba.

Ogbè towe dona sọgbe hẹ nujidọhodo lọ. Vlavo hiẹ to gbedide niyaniya tọn de hia, taidi dehe yin mimọ to Osọhia 14:6, 7 kavi to Osọhia 18:4 mẹ, kavi hodidọ nujikudo dolido tọn, taidi dehe yin kinkàndai to Eksọdusi 14:13, 14 mẹ, gbèzeyiaga he jẹ yin ayinamẹ etọn na. Mọdopolọ, eyin a to whẹgbledomẹ sinsinyẹn de hia sọn Biblu mẹ, taidi dehe yin mimọ to Jẹlemia 25:27-38 mẹ, ogbè towe didiọ na hẹn hodidọ delẹ yin ayidego tọn hugan devo lẹ.

Lẹnnupọndo yanwle towe ji ga. Be hiẹ jlo na whàn mẹplidopọ towe lẹ nado yinuwa wẹ? Be a jlo na de nuagokun tangan he tin to hodidọ towe mẹ lẹ tọ́n wẹ ya? Ogbè zizeyiaga po zìnzìn po nọ gọalọ nado jẹ yanwle ehelẹ kọ̀n. Ṣigba, ogbè towe zizeyiaga poun sọgan dù to lẹndai towe ji. Gbọnna? Hodidọ towe sọgan biọ numọtolanmẹ po awuvẹmẹ po poun kakati nado ze ogbè yiaga. Mí na dọhodo ehe ji to Oplọn 11tọ mẹ.

Eyin e yin yiyizan po wuntuntun po, ogbè he yido sọgan fọ́n nukundido dote. Ṣigba enẹ nọ saba biọ dọ yè ni na huhlọn ogbè tlolo to enẹgodo. Ogbè he yido to pọmẹ hẹ huhlọn nina ogbè sọgan yin yiyizan nado do magbọjẹ kavi obu hia. Ogbè he yido sọgan sọ yin yiyizan nado dohia dọ nujọnu-yinyin nuhe to yinyin didọ tọn tin to otẹn awetọ mẹ eyin yè yí ì jlẹdo nuhe yin didọ lẹdo e lẹ go. Ṣigba, eyin ogbè towe nọ tin to odò to whepoponu, ehe sọgan do jide kavi nujikudo matindo towe hia kavi dohia dọ hiẹ ma tindo ojlo nujọnu tọn to hosọ towe mẹ. E họnwun dọ, ogbè he miọn taun lẹ dona yin yiyizan po zìnzìn po.

Diọ Awuyiya Towe. To hodidọ egbesọegbesọ tọn mẹ, hogbe lẹ nọ tọ́n to jọwamọ-liho dile mí to linlẹn mítọn lẹ dọ. To whenuena apàpà to mí sọ́, mí nọ tindo ayilinlẹn lọ nado dọho po awuyiya po. Eyin mí jlo dọ mẹdevo lẹ ni flin nuhe mí dọ pẹpẹ, mí dona dọho dẹẹdẹ.

Ṣigba, hodọtọ yọyọ vude poun wẹ nọ diọ awuyiya yetọn to oplò ji. Etẹwutu wẹ? Na yé nọ ze ayidonugo zẹjlẹgo do hogbe he yé to yiyizan lẹ ji wutu. Yé sọgan ko kàn nuhe yé jlo na dọ lẹpo dai. Eyin hodidọ lọ ma tlẹ yin alọnuwe-hihia, hogbe lọ lẹ nọ dibla yin hinhẹn do tamẹ. Taidi kọdetọn de, azọ́n lọ nọ yin zizedonukọnnamẹ po awuyiya dopolọ po. Pinplọn nado dọho sọn todohukanji de mẹ na gọalọ nado basi vọjladona madogán ehe.

Dapana awuyiya towe didó e ji to ajiji mẹ sọmọ bọ e na flinnumẹ gando asé he to dudlupé bo lọ́n to ajijimẹ whenuena e mọ avún de go. Podọ ma dọho po awuyiya po sọmọ bọ hiẹ na jẹ hogbe lẹ ṣìylọ ji gbede blo.

Nado jẹ vogbingbọn to awuyiya mẹ kọ̀n, ma nọ họnwezun bo nọ zọ̀n dẹẹdẹ sọn ojlẹ de mẹ jẹ devo mẹ poun blo. Wunmẹ azọ́nwiwa tọn enẹ na fẹayihasẹnamẹ sọn nudọnamẹ he a to zizedonukọnnamẹ ji kakati nado hẹn ẹn pọnte. Diọdo lẹ to awuyiya mẹ dona yin hinhẹn sọgbe hẹ nuhe dọ hiẹ te, numọtolanmẹ he a jlo na dohia, po yanwle towe po. Na hodidọ towe po awuyiya he tin to jlẹkaji po. Nado do homẹhunhun hia, dọho po awuyiya po, kẹdẹdile hiẹ na wà do to gbẹninọ egbesọegbesọ tọn mẹ. Ehe sọ sọgbe to whenuena hiẹ to hodọdo nuagokun he mayin nujọnu sọmọ lẹ ji kavi to linlin nujijọ de he ma biọ zẹẹmẹ gigọ́ lẹ tọn na. Ehe na hẹn ojẹ̀ pé hodidọ towe mẹ bọ hodidọ lọ ma na taidi nuhe pẹnzin hugan. To alọ devo mẹ, hoyijlẹdohogo he pẹnzin lẹ, nuagokun tangan lẹ, po tadona lẹ po to azọ́nwiwa de mẹ nọ saba biọ dọ yè ni dọho dẹẹdẹ.

Nọ Diọ-Gbè to Hodidọ Towe Mẹ. Yí nukun homẹ tọn do pọ́n mẹhe to hànjinu de hò na nudi ganhiho dopo kavi humọ. To ojlẹ enẹ lẹpo whenu, nudidọ dopo gee wẹ e to didetọ́n—jẹnukọn whẹ́ ogbè etọn yiaga, enẹgodo e miọn, to whedelẹnu nudidọ lọ nọ yá, enẹgodo e nọ depò. Diọdo tin to nudidọ po awuyiya po mẹ, ṣigba matin diọdo to ogbè mẹ, “húnhiho” lọ ma nọ dọnmẹdogo sọmọ gba. Mọdopolọ, matin ogbè didiọ, hodidọ mítọn ma na yọ́nsè gba.

E dona yin ayidego dọ ogbè didiọ ma nọ tindo nugandomẹgo dopolọ to ogbè lẹpo mẹ gba. To ogbè he nudidọ yetọn lẹ nọ tọ́n taidi Chine tọn mẹ, ogbè didiọ sọgan diọ zẹẹmẹ hogbe de tọn. Etomọṣo, etlẹ yin to ogbè mọnkọtọn mẹ, onú lẹ tin he mẹde sọgan wà nado hẹn vogbingbọn susu tin to hodidọ etọn lẹ mẹ. E sọgan wazọ́n nado hẹn nugopipe yizan ogbè etọn tọn pọnte dile e hẹn obá dopolọ lẹ go na nudidọ voovo lẹ. Gbọnmọ dali e sọgan hẹn nudidọ aga tọn lẹ yiaga bo hẹn odò tọn lẹ yidò.

Etlẹ yin to ogbè he nudidọ yetọn ma nọ tọ́n lẹ mẹ, ogbè didiọ sọgan do linlẹn voovo lẹ hia. Di apajlẹ, ogbè zizeyiaga vude to pọmẹ hẹ ogbè zizeyiaga jẹ obá de mẹ sọgan yin yiyizan na nùzindo linlẹn ji. Kavi ogbè didiọ sọgan yin aliho de nado do kiklo kavi tedidi hia. Ogbè zizeyiaga to vivọnu hodidọ blebu de tọn sọgan dohia dọ kanbiọ de wẹ. E sọgan biọ dọ yè ni zegbeyidò to ogbè delẹ mẹ.

Homẹhunhun po zohunhun po sọgan yin didohia po ogbè he yiaga po. (To ogbè he nudidọ etọn nọ tọ́n mẹ, enẹ sọgan biọ dọ yè ni hẹn ogbè klo dogọ.) Awubla po magbọjẹ po sọgan biọ kọnugbè he yido. (Kavi to ogbè he nudidọ etọn nọ tọ́n mẹ, e sọgan biọ dọ ogbè lọ ni flín vude poun.) Numọtolanmẹ heyin nùdego tofi lẹ yin dehe nọ gọalọna hodọtọ nado biọ ahun mẹ. To whenuena hiẹ jlo na do yé hia, ma ylọ hogbe lọ lẹ poun blo. Yí ogbè towe zan to aliho de mẹ he na do numọtolanmẹ towe hia.

Dodonu de Zizedai. To whelọnu lo, fie wẹ ogbè didiọ nọ bẹsọn? Sọn nujidọhodo lẹ dide na hodidọ towe mẹ. Eyin hoyijlẹdohogo kẹdẹ kavi tudohomẹnamẹ kẹdẹ wẹ e bẹhẹn, hiẹ ma na tindo dotẹnmẹ hundote susu nado basi diọdo lẹ to hodidọ towe mẹ. Enẹwutu keje todohukanji towe pọ́n, bo hẹn ẹn diun dọ hiẹ tindo dàdónu he pé lẹ na nuzedonukọnnamẹ dojó, he plọnnumẹ de.

Mí ni dọ dọ to ṣẹnṣẹn hodidọ towe tọn mẹ, hiẹ mọ dọ nuhudo tin nado basi diọdo susu na nuzedonukọnnamẹ towe ma hunzo wutu. Etẹwẹ dona yin wiwà? Diọ aliho nuzedonukọnnamẹ towe tọn. Gbọnna? Aliho dopo wẹ nado hùn Biblu, basi oylọna mẹplidopọ lẹ nado hùn yetọn, bo hia wefọ de kakati nado to hodọ poun. Kavi diọ hodidọ delẹ zun kanbiọ, bo yí otán mìmì na nùzindonuji dogọ. Yí apajlẹ he bọawu de zan. Aliho azọ́nyinyọnẹn tọn ehelẹ wẹ hodọtọ numimọnọ lẹ nọ yizan. Ṣigba mahopọnna obá he mẹ numimọ towe jẹ, hiẹ sọgan yí linlẹn dopolọ lẹ zan to awuwlena nujidọhodo towe whenu.

E sọgan yin didọ dọ ogbè didiọ wẹ nọ hẹn hodidọ de vivi. Eyin dehe sọgbe lọ yin yiyizan jẹ obá he pé lọ mẹ, e na dè vivi he tin to nujidọhodo towe mẹ lẹpo tọ́n jẹgbonu bo hẹn ẹn yọ́nsè na mẹplidopọ towe lẹ.