OPLỌN 14
Dọho to Jọwamọ-Liho
HODIDỌ to jọwamọ-liho na gọalọna we nado mọ jide-domẹgo mẹdevo lẹ tọn yí. Be hiẹ na dejido nuhe yin didọ gbọn mẹhe ze nukunmẹṣinyọnnu dó bo do dọhona we dali go ya? Be e na na we jidide dogọ eyin awusọhia nukunmẹṣinyọnnu lọ tọn yọ́npọ́n taun hugan nukunmẹ hodọtọ lọ lọsu tọn ya? Vlavo wẹ e nado yinmọ. Enẹwutu kakati nado yí nukunmẹṣinyọnnu zan, vò to dewe mẹ.
Hodidọ to jọwamọ-liho ma dona yin dindọnwlu dopọ hẹ vọ́donanu gba. Yizan hogbe tọn he ma sọgbe, hogbe ṣìṣìylọ, po hodidọ do kọ̀mẹ po ma sọgbe gba. Aṣagbe sọ dona yin didapana ga. Mí nọ jlo nado nọ do yẹyi he sọgbe hia to whepoponu, to hodidọ mítọn mẹ podọ to nuyiwa mítọn mẹ. Mẹhe nọ dọho to jọwamọ-liho ma nọ doslanaho mọjanwẹ nuyiwado mẹdevo lẹ ji ma nọ duahunmẹna ẹn zẹjlẹgo do niyẹn.
To Lizọnyizọn Kunnudegbe Tọn Mẹ. To whenuena hiẹ dọnsẹpọ owhé de kavi dọnsẹpọ mẹde to nọtẹn gbangba tọn de mẹ po pọndohlan lọ po nado dekunnu, be ahun towe nọ gbàdo wẹ ya? E nọ wàmọ na suhugan mítọn, ṣigba numọtolanmẹ lọ nọ dẹn-to-aimẹ na mẹdelẹ hugan mẹdevo lẹ tọn. Ayimajai sọgan hẹn ogbè ma nado dọnu to jọwamọ-liho, kavi sisọ́, kavi ahungbigbàdo sọgan do ede hia gbọn alọ lẹ kavi ota mìmí to aliho agọ̀ mẹ dali.
Wẹnlatọ de sọgan tindo nuhahun ehe na whẹwhinwhẹ́n voovo lẹ wutu. Vlavo e to nulẹnpọndo nuyiwadomẹji he e na basi ji kavi to nuhà vlavo eyin nuzedonukọnnamẹ etọn na tindo kọdetọn dagbe. Depope to ehelẹ mẹ ma yin nubajonọmẹ gba, ṣigba nuhahun lẹ nọ fọ́n to whenuena ayidonugo glanglan yin nina onú mọnkọtọn lẹ. Eyin ahun towe nọ gbàdo jẹnukọnna mahẹ tintindo to lizọnyizọn lọ mẹ, etẹwẹ sọgan gọalọ? Awuwiwle sọwhiwhe tọn po odẹ̀ vẹkuvẹku hlan Jehovah po. (Owalọ 4:29) Lẹnnupọndo lẹblanu daho Jehovah tọn to oylọ-bibasina gbẹtọ lẹ nado duvivi agbasalilo pipé tọn po ogbẹ̀ mavọmavọ to Paladisi mẹ po ji. Lẹnnupọndo mẹhe hiẹ to vivẹnudo nado gọalọna lẹ podọ nuhudo yetọn nado sè wẹndagbe lọ ji.
Sọ flin ga dọ, gbẹtọ lẹ tindo mẹdekannujẹ nado basi nudide, enẹwutu yé sọgan kẹalọyi kavi gbẹ́ owẹ̀n lọ. Onú dopolọ wẹ jọ to whenuena Jesu dekunnu to Islaeli hohowhenu tọn mẹ. Azọ́ndenamẹ towe wẹ nado dọyẹwheho poun. (Mat. 24:14) To whenuena gbẹtọ lẹ ma tlẹ dike hiẹ ni dọho, tintin to finẹ towe to ede mẹ na dekunnuna yé. Hiẹ na ko tindo kọdetọn dagbe na hiẹ dike Jehovah ni yí we zan nado basi wadotana ojlo etọn tọn wutu. To ojlẹ he mẹ hiẹ tindo dotẹnmẹ hundote nado dọho, etẹwẹ ogbè towe na dohia? Eyin hiẹ plọn nado ze linlẹn towe lẹ do nuhudo mẹdevo lẹ tọn ji, ogbè towe na dọnmẹdogo bo yin jọwamọnu.
To kunnudide whenu, eyin hiẹ yinuwa bo dọho dile hiẹ nọ wà do egbesọegbesọ, ehe na hẹn todoaitọ towe lẹ voawu. Yé tlẹ sọgan kẹalọyi linlẹn Owe-wiwe tọn he hiẹ jlo na má hẹ yé lẹ ganji. Kakati nado dọ togunmẹho na yé, dọhodopọ hẹ yé. Yin họntọnjihẹmẹtọ. Do ojlo hia to yé mẹ, bo na yé dotẹnmẹ nado dọho. Nugbo wẹ dọ, fie aṣa ogbè lọ tọn kavi lẹdo lọ tọn biọ nuyiwa tangan delẹ te nado do sisi hia to hodidọ hẹ jonọ lẹ whenu, hiẹ na jlo nado setonuna ehelẹ. Ṣigba hiẹ sọgan nọ tin to awuwle mẹ whepoponu po nukiko yẹsẹ de po.
To Oplò Ji. To hodidọ na pipli de whenu, aliho hodọdopọ jọwamọ tọn wẹ nọ saba yọ́n hugan. Na nugbo tọn, eyin mẹplidopọ lẹ sù, hiẹ dona zegbèyiaga dogọ. Eyin hiẹ tẹnpọn nado plọn hodidọ towe do tamẹ kavi eyin kandai towe sù gbau, vlavo hiẹ na yin ahunmẹduna zẹjlẹgo dogbọn lehe ohó lẹ na yin didọ po gbesisọ po do dali. Ohó lẹ didọ po gbesisọ po yin nujọnu, ṣigba to whenuena e yin nina ayidonugo zẹjlẹgo, nuzedonukọnnamẹ lọ nọ lẹzun hẹngogo tọn bo nọ to tlọlọ hugan. Hodidọ to jọwamọ-liho nọ yin hinhẹnbú. Hiẹ dona yí sọwhiwhe do lẹnnupọndo linlẹn towe lẹ ji jẹnukọn bo na suhugan ayidonugo towe tọn hlan linlẹn lẹ, e mayin lehe ohó lẹ dopodopo yin didọ do gba.
Onú dopolọ yin nugbo to whenuena hiẹ to yinyin hokanse to opli ji. Wleawu ganji, ṣigba ma hia kavi plọn gblọndo lẹ do tamẹ blo. Dọ yé po ogbè didiọ to jọwamọ-liho po na zẹẹmẹ towe lẹ nido dọnmẹdogo to jọwamọ-liho.
Jẹhẹnu hodidọ tọn dagbe heyin yiyizan zẹjlẹgo lẹ tlẹ sọgan gọ̀n ma yin jọwamọnu na mẹplidopọ lẹ. Di apajlẹ, hodidọ towe dona tátá podọ hiẹ dona ylọ hogbe lẹ ganji ṣigba e mayin jẹ obá he mẹ hiẹ na nọ zẹ̀n kavi dọho to aliho mọmọ tọn mẹ gba. Eyin agbasa yí do basi dohia nùzindonuji kavi zẹẹmẹ bibasi tọn lẹ yin yiyizan ganji, yé sọgan hẹn hodidọ lọ hunzo, ṣigba agbasa yí do basi dohia zingidi tọn kavi wazẹjlẹgo tọn na fẹayihasẹnamẹ sọn nuhe dọ hiẹ te ji. Yí ogbè he pemẹnu zan, ṣigba tẹnpọn bo ma dawhá zẹjlẹgo blo. To whedelẹnu e nọ yọ́n nado dọho po zohunhun po, ṣigba hiẹ dona dapana yinyin glòlò-jlatọ. Ogbè didiọ, zohunhun, po numọtolanmẹ po dona yin yiyizan to aliho he ma na dọ̀n ayidonugo wá dewe ji kavi hẹn ayimajai wá na mẹplidopọ towe lẹ mẹ.
Mẹdelẹ tindo aliho tangan he mẹ yé nọ dọho te to jọwamọ-liho, etlẹ yin to whenuena yé to hodidọ de na. Mẹdevo lẹ nọ yí hogbe hodọdopọ tọn zan ganji. Ṣigba, onú titengbe lọ wẹ nado nọ dọho ganji to azán lẹpo gbè bo nọ yinuwa po yẹyi Klistiani tọn po. To whenẹnu eyin hiẹ tin to oplò ji, hiẹ na dọho po awubibọ po bo yinuwa to aliho he dọnmẹdogo to jọwamọ-liho mẹ.
To Wehihia Gbangba Tọn Whenu. Wehihia to gbangba to jọwamọ-liho nọ biọ vivẹnudido. Nado jẹ e kọ̀n, a dona yọ́n linlẹn tangan he tin to owe he hiẹ jlo na hia lọ mẹ lẹ, bo doayi lehe ehelẹ yin zẹẹmẹ basina do go. Tindo ehelẹ to ayiha mẹ hezeheze; eyin e mayin mọ, hiẹ na to hogbe lẹ hia poun wẹ. Dindona lehe hogbe he hiẹ ma jẹakọ hẹ lẹ nọ yin yiylọ do. Plọn wehihia daga nado yọ́n ogbè diọ ganji bo tò hogbe lẹ dopọ to aliho he na hẹn linlẹn lọ lẹ họnwun ganji mẹ. Wà ẹ pludopludo kaka wehihia towe nado dídí. Wazọ́n nado jẹakọ hẹ nudọnamẹ lọ ganji bọ to whenuena hiẹ hia ẹ daga, wehihia towe na taidi hodọdopọ zohunhunnọ de. Nuhe hodidọ to jọwamọ-liho zẹẹmẹdo niyẹn.
Nugbo wẹ dọ, suhugan wehihia gbangba tọn mítọn wẹ nọ wá sọn owe sinai do Biblu ji mítọn lẹ mẹ. Gbọnvona azọ́ndenamẹ wehihia tọn lẹ to Wehọmẹ Lizọnyizọn Yẹwhehọluduta tọn mẹ, mí nọ hia wefọ lẹ to lizọnyizọn kunnudegbe tọn mẹ podọ to hodidọ lẹ nina sọn oplò ji whenu. Mẹmẹsunnu lẹ nọ yin azọ́ndena nado hia hukan he to yinyin dogbapọnna to Oplọn Atọ̀họ̀-Nuhihọ́ Lọ Tọn po Oplọn Agunwe po ji lẹ. Mẹmẹsunnu he pegan delẹ nọ mọ azọ́ndenamẹ yí nado hia alọnuwe lẹ to plidopọ agbegbe tọn lẹ ji. Vlavo hiẹ to Biblu kavi owe devo lẹ hia, nọ hia adà he bẹ hoyidọ hẹn lẹ to aliho de mẹ he na hẹn nujidọhodo lọ tin to ogbẹ̀. Eyin gbẹtọ voovo yin hoyidọ sọn e dè, diọ ogbè towe to aliho de mẹ na mẹdopodopo. Hogbe avase tọn de die: Ma dó nukiko namẹ blo, ṣigba hẹn wehihia lọ tin togbẹ̀ to jọwamọ-liho.
Wehihia to jọwamọ-liho nọ tindo jẹhẹnu hodọdopọ tọn. E ma nọ taidi onú mọmọ tọn poun gba ṣigba nọ tindo nujikudo.