Aliho Hodọhẹmẹ Tọn

GBẸTỌ lẹ nọ voawu to paa mẹ dile yé to hodọ hẹ họntọn lẹ. Yé nọ dọho to jọwamọ-liho. Mẹdelẹ nọ gbàdomẹmẹ; mẹdevo lẹ nọ whlá yede. Etomọṣo, hodidọ omẹ mọnkọtọn lẹ tọn to jọwamọ-liho nọ fọnjlodotenamẹ.

Nalete, to whenuena mí to hodọ hẹ jonọ, e ma jẹ nado dọho to aliho akọjẹhẹmẹ hugan tọn mẹ kavi to aliho mọmọ tọn mẹ gba. Na nugbo tọn, to fidelẹ, hodidọ lẹpo hẹ jonọ lẹ nọ bẹjẹeji to aṣa-liho. To whenuena sisi he jẹ ko yin didohia godo, e sọgan yọ́n hugan nado yí wuntuntun do de yizan hodidọ aṣa tọn ehelẹ pò bo yí aliho hodọhẹmẹ tọn dagbe zan dogọ.

Mẹdehihọ́ sọ dona yin yiyizan ga to whenuena a to hodọ sọn oplò ji. Hodidọ to aliho mọmọ tọn mẹ nọ fẹayihasẹnamẹ sọn yẹyi opli Klistiani tọn ji podọ sọn nujọnu-yinyin nuhe yin didọ tọn ji. To ogbè delẹ mẹ, e nọ biọ dọ yè ni yí hogbe tangan delẹ zan to hodidọ na mẹhomẹ de, mẹplọntọ de, ahọluzọnwatọ de, kavi mẹjitọ de whenu. (Doayi hogbe heyin yiyizan to Owalọ lẹ 7:2 po 13:16 mẹ po go.) Hogbe voovo lẹ nọ yin yiyizan na alọwlemẹ kavi họntọn alọmayiemẹ de. Dile etlẹ yindọ mí ma dona nọ hodo aṣa zẹjlẹgo to oplò ji, hodidọ mítọn dona do sisi hia.

Nalete, onú delẹ tin he sọgan hẹn hodidọ mẹde tọn lẹzun hẹngogo tọn kavi nuhe to tlọlọ hugan. Dopo to ehelẹ mẹ wẹ aliho he mẹ hodidọ nọ yin awuwlena te. Nuhahun nọ tin eyin hodọtọ de tẹnpọn nado vọ́ hogbe lẹ dọ pẹpẹ dile yé yin kinkàn do. Hogbe kinkàn nọ saba gbọnvo pete na hodidọ paa. Nugbo wẹ dọ, zinjẹgbonu lẹ wẹ nọ yin yiyizan na dodinnanu nado wleawuna hodidọ de. Vlavo hodidọ lọ sọgan sinai do todohukanji Ogbẹ́ tọn de ji. Ṣigba eyin a dọ linlẹn towe lẹ dile yé sọawuhia do to zinjẹgbonu lọ mẹ pẹpẹ kavi hia yé tlọlọ sọn todohukanji lọ mẹ, hodidọ towe ma na tindo jẹhẹnu hodọdopọ tọn gba. Nado hẹn jẹhẹnu hodọhẹmẹ tọn go, dọ linlẹn towe lẹ to hogbe towe titi mẹ bo dapana hodidọ he gẹdẹ lẹ.

Onú devo wẹ vogbingbọn to awuyiya mẹ. Hodidọ he taidi hẹngogo tọn kavi he to tlọlọ hugan nọ saba bẹ hodidọ to aliho he ma voawu mẹ po awuyiya zẹjlẹgo tọn po hẹn. To hodidọ egbesọ tọn mẹ, diọdo nọ tin to awuyiya mẹ podọ mí nọ mìtán gbọzangbọzan to obá voovo mẹ.

Ṣigba, eyin mẹplidopọ daho wẹ a to hodọna, a dona ze ogbè daga bo yí huhlọn po zohunhun po do dọho nado sọgan dọ̀n ayidonugo yetọn.

Nado sọgan yí aliho hodọhẹmẹ tọn he sọgbe na lizọnyizọn lọ zan, a dona hẹn ẹn zun aṣa nado nọ dọho ganji to azán lẹpo gbè. Ehe ma zẹẹmẹdo dọ a dona yin wesetọ daho de gba. Ṣigba onú dagbe wẹ e yin nado wleawuna aṣa hodidọ tọn he na hẹn mẹdevo lẹ dotoaina nuhe dọ a te po sisi po. Po enẹ po to ayiha mẹ, lẹnnupọn vlavo eyin a dona wazọ́n do nuagokun he bọdego helẹ ji to hodidọ egbesọegbesọ tọn towe mẹ.

1. To kọndopọmẹ hẹ ayinamẹ he tin to Kọlọsinu lẹ 3:8 mẹ, dapana hogblo po ohó agbàagba lẹ po. Kakatimọ, nọ yí hogbe paa egbesọegbesọ tọn lẹ zan. Hogbe egbesọ tọn lẹ yin hodidọ to jọwamọ-liho tọn, ṣigba yé nọ sọgbe hẹ nujinọtedo hodidọ tọn heyin alọkẹyi lẹ.

2. Plọn nado nọ yí hogbe he basi zẹẹmẹ nuhe dọ a te tọn hezeheze lẹ zan.

4. Hẹn ẹn zun aṣa nado nọ dọ nuagokun he dona yin finflin lọ to hogbe he bọawu de mẹ.