OPLỌN 10
Zohunhun
ZOHUNHUN nọ gọalọ nado hẹn hodidọ de tin togbẹ̀. Dile etlẹ yin nujọnu nado tindo nujidọhodo he gọna nudọnamẹ, hodidọ he togbẹ̀, bo hunzo wẹ na gọalọ nado dọ̀n ayidonugo mẹplidopọ lẹ tọn. Mahopọnna aṣa fie hiẹ wá sọn tọn kavi gbẹtọ-yinyin towe, a sọgan wleawuna zohunhun.
Dọho po Numọtolanmẹ Po. To hodidọna yọnnu Samalia tọn de whenu, Jesu dọ dọ mẹhe to Jehovah sẹ̀n lẹ dona wàmọ “to gbigbọ mẹ podọ to nugbo mẹ.” (Joh. 4:24) Sinsẹ̀n-bibasi yetọn dona yin whinwhàn gbọn ahun pinpẹn-nutọn-yinyọnẹn tọn dali bo tin to kọndopọmẹ hẹ nugbo heyin mimọ to Ohó Jiwheyẹwhe tọn mẹ. To whenuena mẹde tindo pinpẹn-nutọn-yinyọnẹn sisosiso enẹ, e na sọawuhia to hodidọ etọn mẹ. E na tin to jejeji nado dọho na mẹdevo lẹ dogbọn awuwledainanu owanyinọ Jehovah tọn lẹ dali. Dohia nukunta etọn tọn, gòwhinwhàn etọn, po ogbè etọn po na do nuhe numọtolanmẹ etọn yin taun hia.
To whelọnu lo, naegbọn hodọtọ he yiwanna Jehovah bo yí nuhe dọ e te sè sọgan gbọ̀agba zohunhun tọn to hodidọ whenu? Nado wleawuna nuhe dọ gbé e ja ma ko pé gba. E dona ze ede jo pete na hodidọ etọn, bo mọ ede to e mẹ to numọtolanmẹ-liho. Mí ni dọ dọ e yin azọ́ndena nado dọhodo avọ́sinsan ofligọ Jesu Klisti tọn ji. Dile hodọtọ lọ to hodidọ etọn na, linlẹn etọn lẹ dona gọ́, e mayin po zẹẹmẹ gigọ́ lẹ po poun gba, ṣigba po pinpẹn-nutọn-yinyọnẹn po na nuhe avọ́sinsan Jesu tọn zẹẹmẹdo na hodọtọ lọ lọsu titi podọ na mẹplidopọ etọn lẹ. E dona flin numọtolanmẹ etọn lẹ gando pẹdido na Jehovah Jiwheyẹwhe po Klisti Jesu po go na awuwledainanu jiawu ehe. E dona lẹnnupọndo nukundido jiawu ogbẹ̀ tọn he e hundote na gbẹtọvi lẹ ji—yèdọ ayajẹ mavọmavọ to agbasalilo pipé mẹ to paladisi aigba ji tọn heyin hinhẹngọwa de mẹ! Enẹwutu, hodidọ lọ dona biọ ahun ewọ lọsu tọn mẹ.
Gando wekantọ Ẹzla go, yèdọ mẹplọntọ de to Islaeli, Biblu dọ dọ e “[wleawuna ahun etọn, NW ] nado to osẹ́n OKLUNỌ tọn dín, podọ nado nọ basi i, podọ nado nọ plọnmẹ . . . to Islaeli mẹ.” (Ẹzla 7:10) Eyin mí wà nudopolọ, bo ma wleawuna nudọnamẹ lẹ kẹdẹ ṣigba ahun mítọn lẹ lọsu ga, mí na dọho sọn ahun mẹ wá. Nugbo mọnkọtọn didọ sọn ahun mẹ wá sọgan wà nususu nado gọalọna mẹhe mí to hodọna lẹ nado wleawuna owanyi nujọnu tọn na nugbo lọ.
Lẹnnupọndo Mẹplidopọ Towe lẹ Ji. Onú titengbe devo to zohunhun didohia mẹ wẹ nado tindo nujikudo dọ mẹplidopọ towe lẹ tindo nuhudo nado sè nuhe hiẹ tindo nado dọ. Ehe zẹẹmẹdo dọ to awuwiwlena nuzedonukọnnamẹ towe whenu, a dona bẹ nudọnamẹ họakuẹ lẹ pli bosọ dona hodẹ̀ na Jehovah na anademẹ etọn to yíyí ì zan nado hẹn ale wá na mẹhe hiẹ na dọhona lẹ mẹ. (Ps. 32:8; Mat. 7:7, 8) Gbadopọnna nuhewutu mẹplidopọ towe lẹ dona sè nudọnamẹ lọ, lehe e na hẹn ale wá na yé do, podọ lehe hiẹ sọgan ze e donukọnnamẹ to aliho he mẹ yé na mọnukunnujẹ nuhọakuẹ-yinyin etọn mẹ te.
Wazọ́n do nujidọhodo towe ji kakajẹ whenuena hiẹ tindo nude he na hẹn homẹ towe hùn. E ma dona yin nuyọyọ dandan gba, ṣigba lehe hiẹ ze hosọ lọ donukọnnamẹ do sọgan yin yọyọ. Eyin a wleawuna nude he na gọalọna mẹplidopọ towe lẹ nugbo nado hẹn haṣinṣan yetọn hẹ Jehovah lodo, nado yọ́n pinpẹn awuwledainanu etọn lẹ tọn, nado pehẹ kọgbidinamẹnu gbẹ̀mẹ tọn lẹ to titonu ylankan ehe mẹ po kọdetọn dagbe po, kavi nado yin kọdetọn dagbenọ to lizọnyizọn yetọn mẹ, to whenẹnu hiẹ tindo whẹwhinwhẹ́n dagbe lẹpo nado yin zohunhunnọ gando hodidọ towe go.
Eyin wehihia to gbangba wẹ azọ́n heyin didena we lo? Nado sọgan wà enẹ po zohunhun po, e biọ nususu hugan nugopipe nado ylọ hogbe lẹ ganji bo tò yé dopọ to aliho he sọgbe mẹ. Plọn owe lọ. Eyin adà de wẹ hiẹ jlo na hia sọn Biblu mẹ, basi dodinnanu delẹ do e ji. Hẹn ẹn diun dọ hiẹ mọnukunnujẹ zẹẹmẹ tangan etọn mẹ. Gbadopọnna lehe e na hẹn ale wá na hiẹ po mẹplidopọ towe lẹ po do, bo hiawe po ojlo lọ po nado do enẹ hia mẹhe to todoaina we lẹ.
Be lizọnyizọn kunnudegbe tọn wleawuna wẹ a te ya? Gbadopọnna hosọ nujidọhodo towe tọn po wefọ he hiẹ ko basi tito nado yizan lẹ po. Sọ lẹnnupọndo nuhe tin to ayiha gbẹtọ lẹ tọn mẹ ji ga. Etẹwẹ ko tin to linlin lẹ mẹ? Nuhahun tẹlẹ wẹ yé to pipehẹ? To whenuena hiẹ ko wleawufo nado dohia gbẹtọ lẹ dọ Ohó Jiwheyẹwhe tọn tindo pọngbọ lẹ na nuhahun he to ahunmẹduna yé lẹ, hiẹ na tindo numọtolanmẹ jejejininọ tọn nado wàmọ, podọ zohunhun na wá to jọwamọ-liho.
Do Zohunhun Hia Gbọn Hodidọ Mẹfọndote Tọn Dali. Zohunhun nọ sọawuhia hezeheze to hodidọ mẹfọndote tọn mẹ. Ehe dona sọawuhia to dohia nukunta towe tọn mẹ. Hiẹ dona yin nujikudonọ, e mayin po goyiyi po gba.
E biọ jlẹkajininọ. Mẹdelẹ sọgan tindo ayilinlẹn nado nọ do zohunhun hia to nulẹpo mẹ. Nuhudo sọgan tin nado gọalọna yé nado yọnẹn dọ eyin mẹde jẹ glòlò jlá ji kavi nọ do numọtolanmẹ hia zẹjlẹgo, mẹplidopọ etọn lẹ na to nulẹnpọndo ewọ ji kakati nido yin do owẹ̀n lọ ji. To alọ devo mẹ, mẹhe nọ kuwinyan lẹ tindo nuhudo tulinamẹ tọn nado dọho ganji.
Zohunhun nọ yinuwado mẹdevo lẹ ji. Eyin a nọ pọ́n mẹplidopọ towe lẹ bo tindo zohunhun to hodidọ towe mẹ, mẹplidopọ towe lẹ na mọ zohunhun enẹ to lanmẹ. Apolo do zohunhun hia to hodidọ etọn mẹ, bọ e yin zẹẹmẹ basina taidi hodọtọ he didẹ́ de. Eyin hiẹ hunzo to gbigbọ Jiwheyẹwhe tọn mẹ, hodidọ mẹfọndote towe na whàn mẹhe dotoaina we lẹ nado yinuwa.—Owalọ 18:24, 25; Lom. 12:11.
Zohunhun Sọgbe hẹ Nujidọhodo. Payi ma nado yin zohunhunnọ zẹjlẹgo to hodidọ towe pete mẹ bọ apọ̀ nado ṣì mẹplidopọ towe lẹ. Yin e mayin mọ, tudohomẹnamẹ depope he hiẹ na yé nado yinuwa do nuhe a to didọ ji na lẹzun osin-bado-pápá nẹgbé poun. Ehe zinnudo nuhudo lọ ji nado wleawuna nujidọhodo he na hẹn vogbingbọn lẹ yọnbasi to hodidọ towe mẹ. Tẹnpọn ma nado wleawuna aṣa numakiyana tọn. Eyin hiẹ yí sọwhiwhe do de nujidọhodo towe, a na tindo ojlo vẹkuvẹku to e mẹ. Ṣigba nuagokun delẹ nọ biọ zohunhun to hodidọ mẹ hugan devo lẹ, podọ ehelẹ dona yin bibladopọ to hodidọ towe pete mẹ po azọ́nyinyọnẹn po.
Na taun tọn, nuagokun tangan lẹ dona yin zizedonukọnnamẹ po zohunhun po. Hodidọ towe dona tindo yanwle lẹ, ehe go hodidọ towe na yin biblado. To whenuena e yindọ ehelẹ wẹ nuagokun tangan hodidọ towe tọn lẹ, yé nọ saba yin nuagokun he yin awuwlena nado whàn mẹplidopọ towe lẹ. Todin he hiẹ ko dù to mẹplidopọ towe lẹ ji, hiẹ dona whàn yé, nado do ale he tin to nuhe ko yin hodọdeji lẹ yiyizan mẹ hia yé. Zohunhun towe na gọalọna we nado jẹ ahun todoaitọ towe lẹ tọn mẹ. Hodidọ mẹfọndote tọn ma dona yin po zingidi po gbede gba. Whẹwhinwhẹ́n de dona tin na ẹn, podọ nujidọhodo towe na na we whẹwhinwhẹ́n enẹ.